౮. సద్ధసుత్తం

౩౮. ‘‘పఞ్చిమే, భిక్ఖవే, సద్ధే కులపుత్తే ఆనిసంసా. కతమే పఞ్చ? యే తే, భిక్ఖవే, లోకే సన్తో సప్పురిసా తే సద్ధఞ్ఞేవ పఠమం అనుకమ్పన్తా అనుకమ్పన్తి, నో తథా అస్సద్ధం; సద్ధఞ్ఞేవ పఠమం ఉపసఙ్కమన్తా ఉపసఙ్కమన్తి, నో తథా అస్సద్ధం; సద్ధఞ్ఞేవ పఠమం పటిగ్గణ్హన్తా పటిగ్గణ్హన్తి, నో తథా అస్సద్ధం; సద్ధఞ్ఞేవ పఠమం ధమ్మం దేసేన్తా దేసేన్తి, నో తథా అస్సద్ధం; సద్ధో కాయస్స భేదా పరం మరణా సుగతిం సగ్గం లోకం ఉపపజ్జతి. ఇమే ఖో, భిక్ఖవే, పఞ్చ సద్ధే కులపుత్తే ఆనిసంసా.

‘‘సేయ్యథాపి, భిక్ఖవే, సుభూమియం చతుమహాపథే మహానిగ్రోధో సమన్తా పక్ఖీనం పటిసరణం హోతి; ఏవమేవం ఖో, భిక్ఖవే, సద్ధో కులపుత్తో బహునో జనస్స పటిసరణం హోతి భిక్ఖూనం భిక్ఖునీనం ఉపాసకానం ఉపాసికాన’’న్తి.

‘‘సాఖాపత్తఫలూపేతో [సాఖాపత్తబహుపేతో (కత్థచి), సాఖాపత్తపలాసూపేతో (?)], ఖన్ధిమావ [ఖన్ధిమా చ (సీ.)] మహాదుమో;

మూలవా ఫలసమ్పన్నో, పతిట్ఠా హోతి పక్ఖినం.

‘‘మనోరమే ఆయతనే, సేవన్తి నం విహఙ్గమా;

ఛాయం ఛాయత్థికా [ఛాయత్థినో (సీ.)] యన్తి, ఫలత్థా ఫలభోజినో.

‘‘తథేవ సీలసమ్పన్నం, సద్ధం పురిసపుగ్గలం;

నివాతవుత్తిం అత్థద్ధం, సోరతం సఖిలం ముదుం.

‘‘వీతరాగా వీతదోసా, వీతమోహా అనాసవా;

పుఞ్ఞక్ఖేత్తాని లోకస్మిం, సేవన్తి తాదిసం నరం.

‘‘తే తస్స ధమ్మం దేసేన్తి, సబ్బదుక్ఖాపనూదనం;

యం సో ధమ్మం ఇధఞ్ఞాయ, పరినిబ్బాతి అనాసవో’’తి. అట్ఠమం;