౯. పుత్తసుత్తం

౩౯. ‘‘పఞ్చిమాని, భిక్ఖవే, ఠానాని సమ్పస్సన్తా మాతాపితరో పుత్తం ఇచ్ఛన్తి కులే జాయమానం. కతమాని పఞ్చ? భతో వా నో భరిస్సతి; కిచ్చం వా నో కరిస్సతి; కులవంసో చిరం ఠస్సతి; దాయజ్జం పటిపజ్జిస్సతి; అథ వా పన పేతానం కాలఙ్కతానం దక్ఖిణం అనుప్పదస్సతీతి. ఇమాని ఖో, భిక్ఖవే, పఞ్చ ఠానాని సమ్పస్సన్తా మాతాపితరో పుత్తం ఇచ్ఛన్తి కులే జాయమాన’’న్తి.

[కథా. ౪౯౧] ‘‘పఞ్చ ఠానాని సమ్పస్సం, పుత్తం ఇచ్ఛన్తి పణ్డితా;

భతో వా నో భరిస్సతి, కిచ్చం వా నో కరిస్సతి.

‘‘కులవంసో చిరం తిట్ఠే, దాయజ్జం పటిపజ్జతి;

అథ వా పన పేతానం, దక్ఖిణం అనుప్పదస్సతి.

‘‘ఠానానేతాని సమ్పస్సం, పుత్తం ఇచ్ఛన్తి పణ్డితా;

తస్మా సన్తో సప్పురిసా, కతఞ్ఞూ కతవేదినో.

‘‘భరన్తి మాతాపితరో, పుబ్బే కతమనుస్సరం;

కరోన్తి నేసం కిచ్చాని, యథా తం పుబ్బకారినం.

‘‘ఓవాదకారీ భతపోసీ, కులవంసం అహాపయం;

సద్ధో సీలేన సమ్పన్నో, పుత్తో హోతి పసంసియో’’తి. నవమం;