౫. దానానిసంససుత్తం

౩౫. ‘‘పఞ్చిమే, భిక్ఖవే, దానే ఆనిసంసా. కతమే పఞ్చ? బహునో జనస్స పియో హోతి మనాపో; సన్తో సప్పురిసా భజన్తి; కల్యాణో కిత్తిసద్దో అబ్భుగ్గచ్ఛతి; గిహిధమ్మా అనపగతో [గిహిధమ్మా అనపేతో (సీ. పీ.), గిహిధమ్మమనుపగతో (క.)] హోతి; కాయస్స భేదా పరం మరణా సుగతిం సగ్గం లోకం ఉపపజ్జతి. ఇమే ఖో, భిక్ఖవే, పఞ్చ దానే ఆనిసంసా’’తి.

‘‘దదమానో పియో హోతి, సతం ధమ్మం అనుక్కమం;

సన్తో నం సదా భజన్తి [సన్తో భజన్తి సప్పురిసా (సీ.)], సఞ్ఞతా బ్రహ్మచారయో.

‘‘తే తస్స ధమ్మం దేసేన్తి, సబ్బదుక్ఖాపనూదనం;

యం సో ధమ్మం ఇధఞ్ఞాయ, పరినిబ్బాతి అనాసవో’’తి. పఞ్చమం;