౪. సీహసేనాపతిసుత్తం

౩౪. ఏకం సమయం భగవా వేసాలియం విహరతి మహావనే కూటాగారసాలాయం. అథ ఖో సీహో సేనాపతి యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో సీహో సేనాపతి భగవన్తం ఏతదవోచ – ‘‘సక్కా ను ఖో, భన్తే, భగవా సన్దిట్ఠికం దానఫలం పఞ్ఞాపేతు’’న్తి?

‘‘సక్కా, సీహా’’తి భగవా అవోచ – ‘‘దాయకో, సీహ, దానపతి బహునో జనస్స పియో హోతి మనాపో. యమ్పి, సీహ, దాయకో దానపతి బహునో జనస్స పియో హోతి మనాపో, ఇదమ్పి సన్దిట్ఠికం దానఫలం.

‘‘పున చపరం, సీహ, దాయకం దానపతిం సన్తో సప్పురిసా భజన్తి. యమ్పి, సీహ, దాయకం దానపతిం సన్తో సప్పురిసా భజన్తి, ఇదమ్పి సన్దిట్ఠికం దానఫలం.

‘‘పున చపరం, సీహ, దాయకస్స దానపతినో కల్యాణో కిత్తిసద్దో అబ్భుగ్గచ్ఛతి. యమ్పి, సీహ, దాయకస్స దానపతినో కల్యాణో కిత్తిసద్దో అబ్భుగ్గచ్ఛతి, ఇదమ్పి సన్దిట్ఠికం దానఫలం.

‘‘పున చపరం, సీహ, దాయకో దానపతి యం యదేవ పరిసం ఉపసఙ్కమతి – యది ఖత్తియపరిసం యది బ్రాహ్మణపరిసం యది గహపతిపరిసం యది సమణపరిసం – విసారదో [విసారదోవ (సీ.) అ. ని. ౭.౫౭ పస్సితబ్బం] ఉపసఙ్కమతి అమఙ్కుభూతో. యమ్పి, సీహ, దాయకో దానపతి యం యదేవ పరిసం ఉపసఙ్కమతి – యది ఖత్తియపరిసం యది బ్రాహ్మణపరిసం యది గహపతిపరిసం యది సమణపరిసం – విసారదో ఉపసఙ్కమతి అమఙ్కుభూతో, ఇదమ్పి సన్దిట్ఠికం దానఫలం.

‘‘పున చపరం, సీహ, దాయకో దానపతి కాయస్స భేదా పరం మరణా సుగతిం సగ్గం లోకం ఉపపజ్జతి. యమ్పి, సీహ, దాయకో దానపతి కాయస్స భేదా పరం మరణా సుగతిం సగ్గం లోకం ఉపపజ్జతి, ఇదం [ఇదమ్పి సీహ (క.)] సమ్పరాయికం దానఫల’’న్తి.

ఏవం వుత్తే సీహో సేనాపతి భగవన్తం ఏతదవోచ – ‘‘యానిమాని, భన్తే, భగవతా చత్తారి సన్దిట్ఠికాని దానఫలాని అక్ఖాతాని, నాహం ఏత్థ భగవతో సద్ధాయ గచ్ఛామి; అహం పేతాని జానామి. అహం, భన్తే, దాయకో దానపతి బహునో జనస్స పియో మనాపో. అహం, భన్తే, దాయకో దానపతి; మం సన్తో సప్పురిసా భజన్తి. అహం, భన్తే, దాయకో దానపతి; మయ్హం కల్యాణో కిత్తిసద్దో అబ్భుగ్గతో – ‘సీహో సేనాపతి దాయకో కారకో సఙ్ఘుపట్ఠాకో’తి. అహం, భన్తే, దాయకో దానపతి యం యదేవ పరిసం ఉపసఙ్కమామి – యది ఖత్తియపరిసం యది బ్రాహ్మణపరిసం యది గహపతిపరిసం యది సమణపరిసం – విసారదో ఉపసఙ్కమామి అమఙ్కుభూతో. యానిమాని, భన్తే, భగవతా చత్తారి సన్దిట్ఠికాని దానఫలాని అక్ఖాతాని, నాహం ఏత్థ భగవతో సద్ధాయ గచ్ఛామి; అహం పేతాని జానామి. యఞ్చ ఖో మం, భన్తే, భగవా ఏవమాహ – ‘దాయకో, సీహ, దానపతి కాయస్స భేదా పరం మరణా సుగతిం సగ్గం లోకం ఉపపజ్జతీ’తి, ఏతాహం న జానామి; ఏత్థ చ పనాహం భగవతో సద్ధాయ గచ్ఛామీ’’తి. ‘‘ఏవమేతం, సీహ, ఏవమేతం, సీహ! దాయకో దానపతి కాయస్స భేదా పరం మరణా సుగతిం సగ్గం లోకం ఉపపజ్జతీ’’తి.

‘‘దదం పియో హోతి భజన్తి నం బహూ,

కిత్తిఞ్చ పప్పోతి యసో చ వడ్ఢతి [యసస్స వడ్ఢతి (స్యా. కం.), యసం పవడ్ఢతి (క.)];

అమఙ్కుభూతో పరిసం విగాహతి,

విసారదో హోతి నరో అమచ్ఛరీ.

‘‘తస్మా హి దానాని దదన్తి పణ్డితా,

వినేయ్య మచ్ఛేరమలం సుఖేసినో;

తే దీఘరత్తం తిదివే పతిట్ఠితా,

దేవానం సహబ్యగతా రమన్తి తే [సహబ్యతం గతా రమన్తి (సీ.), సహబ్యతా రమన్తి తే (క.)].

‘‘కతావకాసా కతకుసలా ఇతో చుతా [తతో చుతా (సీ.)],

సయంపభా అనువిచరన్తి నన్దనం [నన్దనే (స్యా. కం.)];

తే తత్థ నన్దన్తి రమన్తి మోదరే,

సమప్పితా కామగుణేహి పఞ్చహి;

‘‘కత్వాన వాక్యం అసితస్స తాదినో,

రమన్తి సగ్గే [రమన్తి సుమనా (క.), కమన్తి సబ్బే (స్యా. కం.)] సుగతస్స సావకా’’తి. చతుత్థం;