(౨౭) ౭. కమ్మపథవగ్గో

౧. పాణాతిపాతీసుత్తం

౨౬౪. ‘‘చతూహి, భిక్ఖవే, ధమ్మేహి సమన్నాగతో యథాభతం నిక్ఖిత్తో ఏవం నిరయే. కతమేహి చతూహి? అత్తనా చ పాణాతిపాతీ హోతి, పరఞ్చ పాణాతిపాతే సమాదపేతి, పాణాతిపాతే చ సమనుఞ్ఞో హోతి, పాణాతిపాతస్స చ వణ్ణం భాసతి – ఇమేహి ఖో, భిక్ఖవే, చతూహి ధమ్మేహి సమన్నాగతో యథాభతం నిక్ఖిత్తో ఏవం నిరయే.

‘‘చతూహి, భిక్ఖవే, ధమ్మేహి సమన్నాగతో యథాభతం నిక్ఖిత్తో ఏవం సగ్గే. కతమేహి చతూహి? అత్తనా చ పాణాతిపాతా పటివిరతో హోతి, పరఞ్చ పాణాతిపాతా వేరమణియా సమాదపేతి, పాణాతిపాతా వేరమణియా చ సమనుఞ్ఞో హోతి, పాణాతిపాతా వేరమణియా చ వణ్ణం భాసతి – ఇమేహి ఖో, భిక్ఖవే, చతూహి ధమ్మేహి సమన్నాగతో యథాభతం నిక్ఖిత్తో ఏవం సగ్గే’’తి. పఠమం.

౨. అదిన్నాదాయీసుత్తం

౨౬౫. ‘‘చతూహి, భిక్ఖవే, ధమ్మేహి సమన్నాగతో యథాభతం నిక్ఖిత్తో ఏవం నిరయే. కతమేహి చతూహి? అత్తనా చ అదిన్నాదాయీ హోతి, పరఞ్చ అదిన్నాదానే సమాదపేతి, అదిన్నాదానే చ సమనుఞ్ఞో హోతి, అదిన్నాదానస్స చ వణ్ణం భాసతి – ఇమేహి ఖో…పే….

‘‘అత్తనా చ అదిన్నాదానా పటివిరతో హోతి, పరఞ్చ అదిన్నాదానా వేరమణియా సమాదపేతి, అదిన్నాదానా వేరమణియా చ సమనుఞ్ఞో హోతి, అదిన్నాదానా వేరమణియా చ వణ్ణం భాసతి – ఇమేహి ఖో, భిక్ఖవే…పే…. దుతియం.

౩. మిచ్ఛాచారీసుత్తం

౨౬౬. … అత్తనా చ కామేసుమిచ్ఛాచారీ హోతి, పరఞ్చ కామేసుమిచ్ఛాచారే సమాదపేతి, కామేసుమిచ్ఛాచారే చ సమనుఞ్ఞో హోతి, కామేసుమిచ్ఛాచారస్స చ వణ్ణం భాసతి – ఇమేహి ఖో…పే….

అత్తనా చ కామేసుమిచ్ఛాచారా పటివిరతో హోతి, పరఞ్చ కామేసుమిచ్ఛాచారా వేరమణియా సమాదపేతి, కామేసుమిచ్ఛాచారా వేరమణియా చ సమనుఞ్ఞో హోతి, కామేసుమిచ్ఛాచారా వేరమణియా చ వణ్ణం భాసతి – ఇమేహి ఖో…పే…. తతియం.

౪. ముసావాదీసుత్తం

౨౬౭. … అత్తనా చ ముసావాదీ హోతి, పరఞ్చ ముసావాదే సమాదపేతి, ముసావాదే చ సమనుఞ్ఞో హోతి, ముసావాదస్స చ వణ్ణం భాసతి – ఇమేహి ఖో…పే….

అత్తనా చ ముసావాదా పటివిరతో హోతి, పరఞ్చ ముసావాదా వేరమణియా సమాదపేతి, ముసావాదా వేరమణియా చ సమనుఞ్ఞో హోతి, ముసావాదా వేరమణియా చ వణ్ణం భాసతి – ఇమేహి…పే…. చతుత్థం.

౫. పిసుణవాచాసుత్తం

౨౬౮. … అత్తనా చ పిసుణవాచో హోతి, పరఞ్చ పిసుణాయ వాచాయ సమాదపేతి, పిసుణాయ వాచాయ చ సమనుఞ్ఞో హోతి, పిసుణాయ వాచాయ చ వణ్ణం భాసతి – ఇమేహి…పే….

అత్తనా చ పిసుణాయ వాచాయ పటివిరతో హోతి, పరఞ్చ పిసుణాయ వాచాయ వేరమణియా సమాదపేతి, పిసుణాయ వాచాయ వేరమణియా చ సమనుఞ్ఞో హోతి, పిసుణాయ వాచాయ వేరమణియా చ వణ్ణం భాసతి – ఇమేహి…పే…. పఞ్చమం.

౬. ఫరుసవాచాసుత్తం

౨౬౯. … అత్తనా చ ఫరుసవాచో హోతి, పరఞ్చ ఫరుసాయ వాచాయ సమాదపేతి, ఫరుసాయ వాచాయ చ సమనుఞ్ఞో హోతి, ఫరుసాయ వాచాయ చ వణ్ణం భాసతి…పే….

అత్తనా చ ఫరుసాయ వాచాయ పటివిరతో హోతి, పరఞ్చ ఫరుసాయ వాచాయ వేరమణియా సమాదపేతి, ఫరుసాయ వాచాయ వేరమణియా చ సమనుఞ్ఞో హోతి, ఫరుసాయ వాచాయ వేరమణియా చ వణ్ణం భాసతి – ఇమేహి ఖో…పే…. ఛట్ఠం.

౭. సమ్ఫప్పలాపసుత్తం

౨౭౦. … అత్తనా చ సమ్ఫప్పలాపీ హోతి, పరఞ్చ సమ్ఫప్పలాపే సమాదపేతి, సమ్ఫప్పలాపే చ సమనుఞ్ఞో హోతి, సమ్ఫప్పలాపస్స చ వణ్ణం భాసతి – ఇమేహి…పే….

అత్తనా చ సమ్ఫప్పలాపా పటివిరతో హోతి, పరఞ్చ సమ్ఫప్పలాపా వేరమణియా సమాదపేతి, సమ్ఫప్పలాపా వేరమణియా చ సమనుఞ్ఞో హోతి, సమ్ఫప్పలాపా వేరమణియా చ వణ్ణం భాసతి – ఇమేహి ఖో, భిక్ఖవే…పే…. సత్తమం.

౮. అభిజ్ఝాలుసుత్తం

౨౭౧. … అత్తనా చ అభిజ్ఝాలు హోతి, పరఞ్చ అభిజ్ఝాయ సమాదపేతి, అభిజ్ఝాయ చ సమనుఞ్ఞో హోతి, అభిజ్ఝాయ చ వణ్ణం భాసతి…పే….

‘‘అత్తనా చ అనభిజ్ఝాలు హోతి, పరఞ్చ అనభిజ్ఝాయ సమాదపేతి, అనభిజ్ఝాయ చ సమనుఞ్ఞో హోతి, అనభిజ్ఝాయ చ వణ్ణం భాసతి – ఇమేహి ఖో…పే…. అట్ఠమం.

౯. బ్యాపన్నచిత్తసుత్తం

౨౭౨. … అత్తనా చ బ్యాపన్నచిత్తో హోతి, పరఞ్చ బ్యాపాదే సమాదపేతి, బ్యాపాదే చ సమనుఞ్ఞో హోతి, బ్యాపాదస్స చ వణ్ణం భాసతి – ఇమేహి…పే….

అత్తనా చ అబ్యాపన్నచిత్తో హోతి, పరఞ్చ అబ్యాపాదే సమాదపేతి, అబ్యాపాదే చ సమనుఞ్ఞో హోతి, అబ్యాపాదస్స చ వణ్ణం భాసతి – ఇమేహి ఖో…పే…. నవమం.

౧౦. మిచ్ఛాదిట్ఠిసుత్తం

౨౭౩. … అత్తనా చ మిచ్ఛాదిట్ఠికో హోతి, పరఞ్చ మిచ్ఛాదిట్ఠియా సమాదపేతి, మిచ్ఛాదిట్ఠియా చ సమనుఞ్ఞో హోతి, మిచ్ఛాదిట్ఠియా చ వణ్ణం భాసతి – ఇమేహి…పే….

అత్తనా చ సమ్మాదిట్ఠికో హోతి, పరఞ్చ సమ్మాదిట్ఠియా సమాదపేతి, సమ్మాదిట్ఠియా చ సమనుఞ్ఞో హోతి, సమ్మాదిట్ఠియా చ వణ్ణం భాసతి – ఇమేహి ఖో, భిక్ఖవే, చతూహి ధమ్మేహి సమన్నాగతో యథాభతం నిక్ఖిత్తో ఏవం సగ్గేతి. దసమం.

కమ్మపథవగ్గో సత్తమో.