౫. కులసుత్తం

౨౫౮. ‘‘యాని కానిచి, భిక్ఖవే, కులాని భోగేసు మహత్తం పత్తాని న చిరట్ఠితికాని భవన్తి, సబ్బాని తాని చతూహి ఠానేహి, ఏతేసం వా అఞ్ఞతరేన. కతమేహి చతూహి? నట్ఠం న గవేసన్తి, జిణ్ణం న పటిసఙ్ఖరోన్తి, అపరిమితపానభోజనా హోన్తి, దుస్సీలం ఇత్థిం వా పురిసం వా ఆధిపచ్చే ఠపేన్తి. యాని కానిచి, భిక్ఖవే, కులాని భోగేసు మహత్తం పత్తాని న చిరట్ఠితికాని భవన్తి, సబ్బాని తాని ఇమేహి చతూహి ఠానేహి, ఏతేసం వా అఞ్ఞతరేన.

‘‘యాని కానిచి, భిక్ఖవే, కులాని భోగేసు మహత్తం పత్తాని చిరట్ఠితికాని భవన్తి, సబ్బాని తాని చతూహి ఠానేహి, ఏతేసం వా అఞ్ఞతరేన. కతమేహి చతూహి? నట్ఠం గవేసన్తి, జిణ్ణం పటిసఙ్ఖరోన్తి, పరిమితపానభోజనా హోన్తి, సీలవన్తం ఇత్థిం వా పురిసం వా ఆధిపచ్చే ఠపేన్తి. యాని కానిచి, భిక్ఖవే, కులాని భోగేసు మహత్తం పత్తాని చిరట్ఠితికాని భవన్తి, సబ్బాని తాని ఇమేహి చతూహి ఠానేహి, ఏతేసం వా అఞ్ఞతరేనా’’తి. పఞ్చమం.