౧. అభిఞ్ఞాసుత్తం

౨౫౪. ‘‘చత్తారోమే, భిక్ఖవే, ధమ్మా. కతమే చత్తారో? అత్థి, భిక్ఖవే, ధమ్మా అభిఞ్ఞా పరిఞ్ఞేయ్యా; అత్థి, భిక్ఖవే, ధమ్మా అభిఞ్ఞా పహాతబ్బా; అత్థి, భిక్ఖవే, ధమ్మా అభిఞ్ఞా భావేతబ్బా; అత్థి, భిక్ఖవే, ధమ్మా అభిఞ్ఞా సచ్ఛికాతబ్బా.

‘‘కతమే చ, భిక్ఖవే, ధమ్మా అభిఞ్ఞా పరిఞ్ఞేయ్యా? పఞ్చుపాదానక్ఖన్ధా [పఞ్చుపాదానక్ఖన్ధాతిస్స వచనీయం (క.)] – ఇమే వుచ్చన్తి, భిక్ఖవే, ధమ్మా అభిఞ్ఞా పరిఞ్ఞేయ్యా.

‘‘కతమే చ, భిక్ఖవే, ధమ్మా అభిఞ్ఞా పహాతబ్బా? అవిజ్జా చ భవతణ్హా చ – ఇమే వుచ్చన్తి, భిక్ఖవే, ధమ్మా అభిఞ్ఞా పహాతబ్బా.

‘‘కతమే చ, భిక్ఖవే, ధమ్మా అభిఞ్ఞా భావేతబ్బా? సమథో చ విపస్సనా చ – ఇమే వుచ్చన్తి, భిక్ఖవే, ధమ్మా అభిఞ్ఞా భావేతబ్బా.

‘‘కతమే చ, భిక్ఖవే, ధమ్మా అభిఞ్ఞా సచ్ఛికాతబ్బా? విజ్జా చ విముత్తి చ – ఇమే వుచ్చన్తి, భిక్ఖవే, ధమ్మా అభిఞ్ఞా సచ్ఛికాతబ్బా. ఇమే ఖో, భిక్ఖవే, చత్తారో ధమ్మా’’తి. పఠమం.