౧. అసురసుత్తం

౯౧. ‘‘చత్తారోమే, భిక్ఖవే, పుగ్గలా సన్తో సంవిజ్జమానా లోకస్మిం. కతమే చత్తారో? అసురో అసురపరివారో, అసురో దేవపరివారో, దేవో అసురపరివారో, దేవో దేవపరివారో.

‘‘కథఞ్చ, భిక్ఖవే, పుగ్గలో అసురో హోతి అసురపరివారో? ఇధ, భిక్ఖవే, ఏకచ్చో పుగ్గలో దుస్సీలో హోతి పాపధమ్మో, పరిసాపిస్స హోతి దుస్సీలా పాపధమ్మా. ఏవం ఖో, భిక్ఖవే, పుగ్గలో అసురో హోతి అసురపరివారో.

‘‘కథఞ్చ, భిక్ఖవే, పుగ్గలో అసురో హోతి దేవపరివారో? ఇధ, భిక్ఖవే, ఏకచ్చో పుగ్గలో దుస్సీలో హోతి పాపధమ్మో, పరిసా చ ఖ్వస్స హోతి సీలవతీ కల్యాణధమ్మా. ఏవం ఖో, భిక్ఖవే, పుగ్గలో అసురో హోతి దేవపరివారో.

‘‘కథఞ్చ, భిక్ఖవే, పుగ్గలో దేవో హోతి అసురపరివారో? ఇధ, భిక్ఖవే, ఏకచ్చో పుగ్గలో సీలవా హోతి కల్యాణధమ్మో, పరిసా చ ఖ్వస్స హోతి దుస్సీలా పాపధమ్మా. ఏవం ఖో, భిక్ఖవే, పుగ్గలో దేవో హోతి అసురపరివారో.

‘‘కథఞ్చ, భిక్ఖవే, పుగ్గలో దేవో హోతి దేవపరివారో? ఇధ, భిక్ఖవే, ఏకచ్చో పుగ్గలో సీలవా హోతి కల్యాణధమ్మో, పరిసాపిస్స హోతి సీలవతీ కల్యాణధమ్మా. ఏవం ఖో, భిక్ఖవే, పుగ్గలో దేవో హోతి, దేవపరివారో. ఇమే ఖో, భిక్ఖవే, చత్తారో పుగ్గలా సన్తో సంవిజ్జమానా లోకస్మి’’న్తి. పఠమం.