౪. కోధగరుసుత్తం

౮౪. ‘‘చతూహి, భిక్ఖవే, ధమ్మేహి సమన్నాగతో యథాభతం నిక్ఖిత్తో ఏవం నిరయే. కతమేహి చతూహి? కోధగరు హోతి న సద్ధమ్మగరు, మక్ఖగరు హోతి న సద్ధమ్మగరు, లాభగరు హోతి న సద్ధమ్మగరు, సక్కారగరు హోతి న సద్ధమ్మగరు – ఇమేహి ఖో, భిక్ఖవే, చతూహి ధమ్మేహి సమన్నాగతో యథాభతం నిక్ఖిత్తో ఏవం నిరయే.

‘‘చతూహి, భిక్ఖవే, ధమ్మేహి సమన్నాగతో యథాభతం నిక్ఖిత్తో ఏవం సగ్గే. కతమేహి చతూహి? సద్ధమ్మగరు హోతి న కోధగరు, సద్ధమ్మగరు హోతి న మక్ఖగరు, సద్ధమ్మగరు హోతి న లాభగరు, సద్ధమ్మగరు హోతి న సక్కారగరు – ఇమేహి ఖో, భిక్ఖవే, చతూహి ధమ్మేహి సమన్నాగతో యథాభతం నిక్ఖిత్తో ఏవం సగ్గే’’తి. చతుత్థం.