౯. భోజనసుత్తం

౫౯. ‘‘భోజనం, భిక్ఖవే, దదమానో దాయకో పటిగ్గాహకానం చత్తారి ఠానాని దేతి. కతమాని చత్తారి? ఆయుం దేతి, వణ్ణం దేతి, సుఖం దేతి, బలం దేతి. ఆయుం ఖో పన దత్వా ఆయుస్స భాగీ హోతి దిబ్బస్స వా మానుసస్స వా. వణ్ణం దత్వా… సుఖం దత్వా… బలం దత్వా బలస్స భాగీ హోతి దిబ్బస్స వా మానుసస్స వా. భోజనం, భిక్ఖవే, దదమానో దాయకో పటిగ్గాహకానం ఇమాని చత్తారి ఠానాని దేతీ’’తి.

[మహావ. ౨౮౨] ‘‘యో సఞ్ఞతానం పరదత్తభోజినం,

కాలేన సక్కచ్చ దదాతి భోజనం;

చత్తారి ఠానాని అనుప్పవేచ్ఛతి,

ఆయుఞ్చ వణ్ణఞ్చ సుఖం బలఞ్చ.

‘‘సో ఆయుదాయీ వణ్ణదాయీ, సుఖం బలం దదో నరో;

దీఘాయు యసవా హోతి, యత్థ యత్థూపపజ్జతీ’’తి. నవమం;