౨. సఙ్గహసుత్తం

౩౨. ‘‘చత్తారిమాని, భిక్ఖవే, సఙ్గహవత్థూని. కతమాని చత్తారి? దానం, పేయ్యవజ్జం, అత్థచరియా, సమానత్తతా – ఇమాని ఖో, భిక్ఖవే, చత్తారి సఙ్గహవత్థూనీ’’తి.

‘‘దానఞ్చ పేయ్యవజ్జఞ్చ [సఙ్గహే (అట్ఠకథాయం పాఠన్తరం) దీ. ని. ౩.౨౭౩ పస్సితబ్బం], అత్థచరియా చ యా ఇధ;

సమానత్తతా చ ధమ్మేసు, తత్థ తత్థ యథారహం;

ఏతే ఖో సఙ్గహా లోకే, రథస్సాణీవ యాయతో.

‘‘ఏతే చ సఙ్గహా నాస్సు, న మాతా పుత్తకారణా;

లభేథ మానం పూజం వా, పితా వా పుత్తకారణా.

‘‘యస్మా చ సఙ్గహా [సఙ్గహే (అట్ఠకథాయం పాఠన్తరం) దీ. ని. ౩.౨౭౩ పస్సితబ్బం] ఏతే, సమవేక్ఖన్తి పణ్డితా;

తస్మా మహత్తం పప్పోన్తి, పాసంసా చ భవన్తి తే’’తి. దుతియం;