౨. చరవగ్గో

౧. చరసుత్తం

౧౧. [ఇతివు. ౧౧౦] ‘‘చరతో చేపి, భిక్ఖవే, భిక్ఖునో ఉప్పజ్జతి కామవితక్కో వా బ్యాపాదవితక్కో వా విహింసావితక్కో వా. తం చే భిక్ఖు అధివాసేతి, నప్పజహతి న వినోదేతి న బ్యన్తీకరోతి [బ్యన్తికరోతి (పీ.), బ్యన్తిం కరోతి (క.)] న అనభావం గమేతి, చరమ్పి, భిక్ఖవే, భిక్ఖు ఏవంభూతో ‘అనాతాపీ అనోత్తాపీ సతతం సమితం కుసీతో హీనవీరియో’తి వుచ్చతి.

‘‘ఠితస్స చేపి, భిక్ఖవే, భిక్ఖునో ఉప్పజ్జతి కామవితక్కో వా బ్యాపాదవితక్కో వా విహింసావితక్కో వా. తం చే భిక్ఖు అధివాసేతి, నప్పజహతి న వినోదేతి న బ్యన్తీకరోతి న అనభావం గమేతి, ఠితోపి, భిక్ఖవే, భిక్ఖు ఏవంభూతో ‘అనాతాపీ అనోత్తాపీ సతతం సమితం కుసీతో హీనవీరియో’తి వుచ్చతి.

‘‘నిసిన్నస్స చేపి, భిక్ఖవే, భిక్ఖునో ఉప్పజ్జతి కామవితక్కో వా బ్యాపాదవితక్కో వా విహింసావితక్కో వా. తం చే భిక్ఖు అధివాసేతి, నప్పజహతి న వినోదేతి న బ్యన్తీకరోతి న అనభావం గమేతి, నిసిన్నోపి, భిక్ఖవే, భిక్ఖు ఏవంభూతో ‘అనాతాపీ అనోత్తాపీ సతతం సమితం కుసీతో హీనవీరియో’తి వుచ్చతి.

‘‘సయానస్స చేపి, భిక్ఖవే, భిక్ఖునో జాగరస్స ఉప్పజ్జతి కామవితక్కో వా బ్యాపాదవితక్కో వా విహింసావితక్కో వా. తం చే భిక్ఖు అధివాసేతి, నప్పజహతి న వినోదేతి న బ్యన్తీకరోతి న అనభావం గమేతి, సయానోపి, భిక్ఖవే, భిక్ఖు జాగరో ఏవంభూతో ‘అనాతాపీ అనోత్తాపీ సతతం సమితం కుసీతో హీనవీరియో’తి వుచ్చతి.

‘‘చరతో చేపి, భిక్ఖవే, భిక్ఖునో ఉప్పజ్జతి కామవితక్కో వా బ్యాపాదవితక్కో వా విహింసావితక్కో వా. తం చే భిక్ఖు నాధివాసేతి, పజహతి వినోదేతి బ్యన్తీకరోతి అనభావం గమేతి, చరమ్పి, భిక్ఖవే, భిక్ఖు ఏవంభూతో ‘ఆతాపీ ఓత్తాపీ సతతం సమితం ఆరద్ధవీరియో పహితత్తో’తి వుచ్చతి.

‘‘ఠితస్స చేపి, భిక్ఖవే, భిక్ఖునో ఉప్పజ్జతి కామవితక్కో వా బ్యాపాదవితక్కో వా విహింసావితక్కో వా. తం చే భిక్ఖు నాధివాసేతి, పజహతి వినోదేతి బ్యన్తీకరోతి అనభావం గమేతి, ఠితోపి, భిక్ఖవే, భిక్ఖు ఏవంభూతో ‘ఆతాపీ ఓత్తాపీ సతతం సమితం ఆరద్ధవీరియో పహితత్తో’తి వుచ్చతి.

‘‘నిసిన్నస్స చేపి, భిక్ఖవే, భిక్ఖునో ఉప్పజ్జతి కామవితక్కో వా బ్యాపాదవితక్కో వా విహింసావితక్కో వా. తం చే భిక్ఖు నాధివాసేతి, పజహతి వినోదేతి బ్యన్తీకరోతి అనభావం గమేతి, నిసిన్నోపి, భిక్ఖవే, భిక్ఖు ఏవంభూతో ‘ఆతాపీ ఓత్తాపీ సతతం సమితం ఆరద్ధవీరియో పహితత్తో’తి వుచ్చతి.

‘‘సయానస్స చేపి, భిక్ఖవే, భిక్ఖునో జాగరస్స ఉప్పజ్జతి కామవితక్కో వా బ్యాపాదవితక్కో వా విహింసావితక్కో వా. తం చే భిక్ఖు నాధివాసేతి, పజహతి వినోదేతి బ్యన్తీకరోతి అనభావం గమేతి, సయానోపి, భిక్ఖవే, భిక్ఖు జాగరో ఏవంభూతో ‘ఆతాపీ ఓత్తాపీ సతతం సమితం ఆరద్ధవీరియో పహితత్తో’తి వుచ్చతీ’’తి.

‘‘చరం వా యది వా తిట్ఠం, నిసిన్నో ఉద వా సయం;

యో వితక్కం వితక్కేతి, పాపకం గేహనిస్సితం.

‘‘కుమ్మగ్గప్పటిపన్నో సో, మోహనేయ్యేసు ముచ్ఛితో;

అభబ్బో తాదిసో భిక్ఖు, ఫుట్ఠుం సమ్బోధిముత్తమం.

‘‘యో చ చరం వా తిట్ఠం వా, నిసిన్నో ఉద వా సయం;

వితక్కం సమయిత్వాన, వితక్కూపసమే రతో;

భబ్బో సో తాదిసో భిక్ఖు, ఫుట్ఠుం సమ్బోధిముత్తమ’’న్తి. పఠమం;

౨. సీలసుత్తం

౧౨. ‘‘సమ్పన్నసీలా, భిక్ఖవే, విహరథ సమ్పన్నపాతిమోక్ఖా, పాతిమోక్ఖసంవరసంవుతా విహరథ ఆచారగోచరసమ్పన్నా అణుమత్తేసు వజ్జేసు భయదస్సావినో. సమాదాయ సిక్ఖథ సిక్ఖాపదేసు. సమ్పన్నసీలానం వో, భిక్ఖవే, విహరతం సమ్పన్నపాతిమోక్ఖానం పాతిమోక్ఖసంవరసంవుతానం విహరతం ఆచారగోచరసమ్పన్నానం అణుమత్తేసు వజ్జేసు భయదస్సావీనం సమాదాయ సిక్ఖతం సిక్ఖాపదేసు కిమస్స ఉత్తరి కరణీయం?

‘‘చరతో చేపి, భిక్ఖవే, భిక్ఖునో అభిజ్ఝాబ్యాపాదో విగతో హోతి, థినమిద్ధం… ఉద్ధచ్చకుక్కుచ్చం… విచికిచ్ఛా పహీనా హోతి, ఆరద్ధం హోతి వీరియం అసల్లీనం, ఉపట్ఠితా సతి అసమ్ముట్ఠా, పస్సద్ధో కాయో అసారద్ధో, సమాహితం చిత్తం ఏకగ్గం, చరమ్పి, భిక్ఖవే, భిక్ఖు ఏవంభూతో ‘ఆతాపీ ఓత్తాపీ సతతం సమితం ఆరద్ధవీరియో పహితత్తో’తి వుచ్చతి.

‘‘ఠితస్స చేపి, భిక్ఖవే, భిక్ఖునో అభిజ్ఝాబ్యాపాదో విగతో హోతి, థినమిద్ధం… ఉద్ధచ్చకుక్కుచ్చం… విచికిచ్ఛా పహీనా హోతి, ఆరద్ధం హోతి వీరియం అసల్లీనం, ఉపట్ఠితా సతి అసమ్ముట్ఠా, పస్సద్ధో కాయో అసారద్ధో, సమాహితం చిత్తం ఏకగ్గం, ఠితోపి, భిక్ఖవే, భిక్ఖు ఏవంభూతో ‘ఆతాపీ ఓత్తాపీ సతతం సమితం ఆరద్ధవీరియో పహితత్తో’తి వుచ్చతి.

‘‘నిసిన్నస్స చేపి, భిక్ఖవే, భిక్ఖునో అభిజ్ఝాబ్యాపాదో విగతో హోతి, థినమిద్ధం… ఉద్ధచ్చకుక్కుచ్చం… విచికిచ్ఛా పహీనా హోతి, ఆరద్ధం హోతి వీరియం అసల్లీనం, ఉపట్ఠితా సతి అసమ్ముట్ఠా, పస్సద్ధో కాయో అసారద్ధో, సమాహితం చిత్తం ఏకగ్గం, నిసిన్నోపి, భిక్ఖవే, భిక్ఖు ఏవంభూతో ‘ఆతాపీ ఓత్తాపీ సతతం సమితం ఆరద్ధవీరియో పహితత్తో’తి వుచ్చతి.

‘‘సయానస్స చేపి, భిక్ఖవే, భిక్ఖునో జాగరస్స అభిజ్ఝాబ్యాపాదో విగతో హోతి, థినమిద్ధం… ఉద్ధచ్చకుక్కుచ్చం… విచికిచ్ఛా పహీనా హోతి, ఆరద్ధం హోతి వీరియం అసల్లీనం, ఉపట్ఠితా సతి అసమ్ముట్ఠా, పస్సద్ధో కాయో అసారద్ధో, సమాహితం చిత్తం ఏకగ్గం, సయానోపి, భిక్ఖవే, భిక్ఖు జాగరో ఏవంభూతో ‘ఆతాపీ ఓత్తాపీ సతతం సమితం ఆరద్ధవీరియో పహితత్తో’తి వుచ్చతీ’’తి.

‘‘యతం [యథా (క.) ఇతివు. ౧౧౧] చరే యతం [యథా (క.) ఇతివు. ౧౧౧] తిట్ఠే, యతం [యథా (క.) ఇతివు. ౧౧౧] అచ్ఛే యతం [యథా (క.) ఇతివు. ౧౧౧] సయే;

యతం [యథా (క.) ఇతివు. ౧౧౧] సమిఞ్జయే [సమ్మిఞ్జయే (సీ. స్యా. కం. పీ.)] భిక్ఖు, యతమేనం [యతమేవ నం (సీ.), యతమేతం (స్యా. కం.), యతమేవ (?)] పసారయే.

‘‘ఉద్ధం తిరియం అపాచీనం, యావతా జగతో గతి;

సమవేక్ఖితా చ ధమ్మానం, ఖన్ధానం ఉదయబ్బయం.

‘‘చేతోసమథసామీచిం, సిక్ఖమానం సదా సతం;

సతతం పహితత్తోతి, ఆహు భిక్ఖుం తథావిధ’’న్తి. దుతియం;

౩. పధానసుత్తం

౧౩. ‘‘చత్తారిమాని, భిక్ఖవే, సమ్మప్పధానాని. కతమాని చత్తారి? ఇధ, భిక్ఖవే, భిక్ఖు అనుప్పన్నానం పాపకానం అకుసలానం ధమ్మానం అనుప్పాదాయ ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి; ఉప్పన్నానం పాపకానం అకుసలానం ధమ్మానం పహానాయ ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి; అనుప్పన్నానం కుసలానం ధమ్మానం ఉప్పాదాయ ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి; ఉప్పన్నానం కుసలానం ధమ్మానం ఠితియా అసమ్మోసాయ భియ్యోభావాయ వేపుల్లాయ భావనాయ పారిపూరియా ఛన్దం జనేతి వాయమతి వీరియం ఆరభతి చిత్తం పగ్గణ్హాతి పదహతి. ఇమాని ఖో, భిక్ఖవే, చత్తారి సమ్మప్పధానానీ’’తి.

‘‘సమ్మప్పధానా మారధేయ్యాభిభూతా,

తే అసితా జాతిమరణభయస్స పారగూ;

తే తుసితా జేత్వా మారం సవాహినిం [సవాహనం (స్యా. కం. పీ. క.)] తే అనేజా,

సబ్బం నముచిబలం ఉపాతివత్తా తే సుఖితా’’తి. తతియం;

౪. సంవరసుత్తం

౧౪. ‘‘చత్తారిమాని, భిక్ఖవే, పధానాని. కతమాని చత్తారి? సంవరప్పధానం, పహానప్పధానం, భావనాప్పధానం, అనురక్ఖణాప్పధానం. కతమఞ్చ, భిక్ఖవే, సంవరప్పధానం? ఇధ, భిక్ఖవే, భిక్ఖు చక్ఖునా రూపం దిస్వా న నిమిత్తగ్గాహీ హోతి నానుబ్యఞ్జనగ్గాహీ. యత్వాధికరణమేనం చక్ఖున్ద్రియం అసంవుతం విహరన్తం అభిజ్ఝాదోమనస్సా పాపకా అకుసలా ధమ్మా అన్వాస్సవేయ్యుం, తస్స సంవరాయ పటిపజ్జతి, రక్ఖతి చక్ఖున్ద్రియం, చక్ఖున్ద్రియే సంవరం ఆపజ్జతి. సోతేన సద్దం సుత్వా… ఘానేన గన్ధం ఘాయిత్వా… జివ్హాయ రసం సాయిత్వా… కాయేన ఫోట్ఠబ్బం ఫుసిత్వా… మనసా ధమ్మం విఞ్ఞాయ న నిమిత్తగ్గాహీ హోతి నానుబ్యఞ్జనగ్గాహీ, యత్వాధికరణమేనం మనిన్ద్రియం అసంవుతం విహరన్తం అభిజ్ఝాదోమనస్సా పాపకా అకుసలా ధమ్మా అన్వాస్సవేయ్యుం, తస్స సంవరాయ పటిపజ్జతి, రక్ఖతి మనిన్ద్రియం, మనిన్ద్రియే సంవరం ఆపజ్జతి. ఇదం వుచ్చతి, భిక్ఖవే, సంవరప్పధానం.

‘‘కతమఞ్చ, భిక్ఖవే, పహానప్పధానం? ఇధ, భిక్ఖవే, భిక్ఖు ఉప్పన్నం కామవితక్కం నాధివాసేతి పజహతి వినోదేతి బ్యన్తీకరోతి అనభావం గమేతి; ఉప్పన్నం బ్యాపాదవితక్కం…పే… ఉప్పన్నం విహింసావితక్కం…పే… ఉప్పన్నుప్పన్నే పాపకే అకుసలే ధమ్మే నాధివాసేతి పజహతి వినోదేతి బ్యన్తీకరోతి అనభావం గమేతి. ఇదం వుచ్చతి, భిక్ఖవే, పహానప్పధానం.

‘‘కతమఞ్చ, భిక్ఖవే, భావనాప్పధానం? ఇధ, భిక్ఖవే, భిక్ఖు సతిసమ్బోజ్ఝఙ్గం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం, ధమ్మవిచయసమ్బోజ్ఝఙ్గం భావేతి… వీరియసమ్బోజ్ఝఙ్గం భావేతి… పీతిసమ్బోజ్ఝఙ్గం భావేతి… పస్సద్ధిసమ్బోజ్ఝఙ్గం భావేతి… సమాధిసమ్బోజ్ఝఙ్గం భావేతి… ఉపేక్ఖాసమ్బోజ్ఝఙ్గం భావేతి వివేకనిస్సితం విరాగనిస్సితం నిరోధనిస్సితం వోస్సగ్గపరిణామిం. ఇదం వుచ్చతి, భిక్ఖవే, భావనాప్పధానం.

‘‘కతమఞ్చ, భిక్ఖవే, అనురక్ఖణాప్పధానం? ఇధ, భిక్ఖవే, భిక్ఖు ఉప్పన్నం భద్దకం సమాధినిమిత్తం అనురక్ఖతి అట్ఠికసఞ్ఞం పుళవకసఞ్ఞం వినీలకసఞ్ఞం విచ్ఛిద్దకసఞ్ఞం ఉద్ధుమాతకసఞ్ఞం. ఇదం వుచ్చతి, భిక్ఖవే, అనురక్ఖణాప్పధానం. ఇమాని ఖో, భిక్ఖవే, చత్తారి పధానానీ’’తి.

‘‘సంవరో చ పహానఞ్చ, భావనా అనురక్ఖణా;

ఏతే పధానా చత్తారో, దేసితాదిచ్చబన్ధునా;

యేహి భిక్ఖు ఇధాతాపీ, ఖయం దుక్ఖస్స పాపుణే’’తి. చతుత్థం;

౫. పఞ్ఞత్తిసుత్తం

౧౫. ‘‘చతస్సో ఇమా, భిక్ఖవే, అగ్గపఞ్ఞత్తియో. కతమా చతస్సో? ఏతదగ్గం, భిక్ఖవే, అత్తభావీనం యదిదం – రాహు అసురిన్దో. ఏతదగ్గం, భిక్ఖవే, కామభోగీనం యదిదం – రాజా మన్ధాతా. ఏతదగ్గం, భిక్ఖవే, ఆధిపతేయ్యానం యదిదం – మారో పాపిమా. సదేవకే, భిక్ఖవే, లోకే సమారకే సబ్రహ్మకే సస్సమణబ్రాహ్మణియా పజాయ సదేవమనుస్సాయ తథాగతో అగ్గమక్ఖాయతి అరహం సమ్మాసమ్బుద్ధో. ఇమా ఖో, భిక్ఖవే, చతస్సో అగ్గపఞ్ఞత్తియో’’తి.

‘‘రాహుగ్గం అత్తభావీనం, మన్ధాతా కామభోగినం;

మారో ఆధిపతేయ్యానం, ఇద్ధియా యససా జలం.

‘‘ఉద్ధం తిరియం అపాచీనం, యావతా జగతో గతి;

సదేవకస్స లోకస్స, బుద్ధో అగ్గో పవుచ్చతీ’’తి. పఞ్చమం;

౬. సోఖుమ్మసుత్తం

౧౬. ‘‘చత్తారిమాని, భిక్ఖవే, సోఖుమ్మాని. కతమాని చత్తారి? ఇధ, భిక్ఖవే, భిక్ఖు రూపసోఖుమ్మేన సమన్నాగతో హోతి పరమేన; తేన చ రూపసోఖుమ్మేన అఞ్ఞం రూపసోఖుమ్మం ఉత్తరితరం వా పణీతతరం వా న సమనుపస్సతి; తేన చ రూపసోఖుమ్మేన అఞ్ఞం రూపసోఖుమ్మం ఉత్తరితరం వా పణీతతరం వా న పత్థేతి. వేదనాసోఖుమ్మేన సమన్నాగతో హోతి పరమేన; తేన చ వేదనాసోఖుమ్మేన అఞ్ఞం వేదనాసోఖుమ్మం ఉత్తరితరం వా పణీతతరం వా న సమనుపస్సతి; తేన చ వేదనాసోఖుమ్మేన అఞ్ఞం వేదనాసోఖుమ్మం ఉత్తరితరం వా పణీతతరం వా న పత్థేతి. సఞ్ఞాసోఖుమ్మేన సమన్నాగతో హోతి పరమేన; తేన చ సఞ్ఞాసోఖుమ్మేన అఞ్ఞం సఞ్ఞాసోఖుమ్మం ఉత్తరితరం వా పణీతతరం వా న సమనుపస్సతి; తేన చ సఞ్ఞాసోఖుమ్మేన అఞ్ఞం సఞ్ఞాసోఖుమ్మం ఉత్తరితరం వా పణీతతరం వా న పత్థేతి. సఙ్ఖారసోఖుమ్మేన సమన్నాగతో హోతి పరమేన; తేన చ సఙ్ఖారసోఖుమ్మేన అఞ్ఞం సఙ్ఖారసోఖుమ్మం ఉత్తరితరం వా పణీతతరం వా న సమనుపస్సతి; తేన చ సఙ్ఖారసోఖుమ్మేన అఞ్ఞం సఙ్ఖారసోఖుమ్మం ఉత్తరితరం వా పణీతతరం వా న పత్థేతి. ఇమాని ఖో, భిక్ఖవే, చత్తారి సోఖుమ్మానీ’’తి.

‘‘రూపసోఖుమ్మతం ఞత్వా, వేదనానఞ్చ సమ్భవం;

సఞ్ఞా యతో సముదేతి, అత్థం గచ్ఛతి యత్థ చ;

సఙ్ఖారే పరతో ఞత్వా, దుక్ఖతో నో చ అత్తతో.

‘‘స వే సమ్మద్దసో భిక్ఖు, సన్తో సన్తిపదే రతో;

ధారేతి అన్తిమం దేహం, జేత్వా మారం సవాహిని’’న్తి. ఛట్ఠం;

౭. పఠమఅగతిసుత్తం

౧౭. ‘‘చత్తారిమాని, భిక్ఖవే, అగతిగమనాని. కతమాని చత్తారి? ఛన్దాగతిం గచ్ఛతి, దోసాగతిం గచ్ఛతి, మోహాగతిం గచ్ఛతి, భయాగతిం గచ్ఛతి – ఇమాని ఖో, భిక్ఖవే, చత్తారి అగతిగమనానీ’’తి.

‘‘ఛన్దా దోసా భయా మోహా, యో ధమ్మం అతివత్తతి;

నిహీయతి తస్స యసో, కాళపక్ఖేవ చన్దిమా’’తి. సత్తమం;

౮. దుతియఅగతిసుత్తం

౧౮. ‘‘చత్తారిమాని, భిక్ఖవే, నాగతిగమనాని. కతమాని చత్తారి? న ఛన్దాగతిం గచ్ఛతి, న దోసాగతిం గచ్ఛతి, న మోహాగతిం గచ్ఛతి, న భయాగతిం గచ్ఛతి – ఇమాని ఖో, భిక్ఖవే, చత్తారి నాగతిగమనానీ’’తి.

‘‘ఛన్దా దోసా భయా మోహా, యో ధమ్మం నాతివత్తతి;

ఆపూరతి తస్స యసో, సుక్కపక్ఖేవ చన్దిమా’’తి. అట్ఠమం;

౯. తతియఅగతిసుత్తం

౧౯. ‘‘చత్తారిమాని, భిక్ఖవే, అగతిగమనాని. కతమాని చత్తారి? ఛన్దాగతిం గచ్ఛతి, దోసాగతిం గచ్ఛతి, మోహాగతిం గచ్ఛతి, భయాగతిం గచ్ఛతి – ఇమాని ఖో, భిక్ఖవే, చత్తారి అగతిగమనాని.

‘‘చత్తారిమాని, భిక్ఖవే, నాగతిగమనాని. కతమాని చత్తారి? న ఛన్దాగతిం గచ్ఛతి, న దోసాగతిం గచ్ఛతి, న మోహాగతిం గచ్ఛతి, న భయాగతిం గచ్ఛతి – ఇమాని ఖో, భిక్ఖవే, చత్తారి నాగతిగమనానీ’’తి.

‘‘ఛన్దా దోసా భయా మోహా, యో ధమ్మం అతివత్తతి;

నిహీయతి తస్స యసో, కాళపక్ఖేవ చన్దిమా.

‘‘ఛన్దా దోసా భయా మోహా, యో ధమ్మం నాతివత్తతి;

ఆపూరతి తస్స యసో, సుక్కపక్ఖేవ చన్దిమా’’తి. నవమం;

౧౦. భత్తుద్దేసకసుత్తం

౨౦. ‘‘చతూహి, భిక్ఖవే, ధమ్మేహి సమన్నాగతో భత్తుద్దేసకో యథాభతం నిక్ఖిత్తో ఏవం నిరయే. కతమేహి చతూహి? ఛన్దాగతిం గచ్ఛతి, దోసాగతిం గచ్ఛతి, మోహాగతిం గచ్ఛతి, భయాగతిం గచ్ఛతి – ఇమేహి ఖో, భిక్ఖవే, చతూహి ధమ్మేహి సమన్నాగతో భత్తుద్దేసకో యథాభతం నిక్ఖిత్తో ఏవం నిరయే.

‘‘చతూహి, భిక్ఖవే, ధమ్మేహి సమన్నాగతో భత్తుద్దేసకో యథాభతం నిక్ఖిత్తో ఏవం సగ్గే. కతమేహి చతూహి? న ఛన్దాగతిం గచ్ఛతి, న దోసాగతిం గచ్ఛతి, న మోహాగతిం గచ్ఛతి, న భయాగతిం గచ్ఛతి – ఇమేహి ఖో, భిక్ఖవే, చతూహి ధమ్మేహి సమన్నాగతో భత్తుద్దేసకో యథాభతం నిక్ఖిత్తో ఏవం సగ్గే’’తి.

‘‘యే కేచి కామేసు అసఞ్ఞతా జనా,

అధమ్మికా హోన్తి అధమ్మగారవా;

ఛన్దా దోసా మోహా చ భయా గామినో [ఛన్దా చ దోసా చ భయా చ గామినో (సీ. స్యా. కం. పీ)],

పరిసాకసటో [పరిసక్కసావో (సీ. స్యా. కం. పీ.)] చ పనేస వుచ్చతి.

‘‘ఏవఞ్హి వుత్తం సమణేన జానతా,

తస్మా హి తే సప్పురిసా పసంసియా;

ధమ్మే ఠితా యే న కరోన్తి పాపకం,

న ఛన్దా న దోసా న మోహా న భయా చ గామినో [న ఛన్దదోసా న భయా చ గామినో (సీ. స్యా. కం. పీ.)];

‘‘పరిసాయ మణ్డో చ పనేస వుచ్చతి,

ఏవఞ్హి వుత్తం సమణేన జానతా’’తి. దసమం;

చరవగ్గో దుతియో.