౪. పరిసాసుత్తం
౯౬. ‘‘తిస్సో ఇమా, భిక్ఖవే, పరిసా. కతమా తిస్సో? అగ్గవతీ పరిసా, వగ్గా పరిసా, సమగ్గా పరిసా.
‘‘కతమా చ, భిక్ఖవే, అగ్గవతీ పరిసా? ఇధ, భిక్ఖవే, యస్సం పరిసాయం థేరా భిక్ఖూ న బాహులికా హోన్తి న సాథలికా, ఓక్కమనే నిక్ఖిత్తధురా పవివేకే పుబ్బఙ్గమా, వీరియం ఆరభన్తి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ, తేసం పచ్ఛిమా జనతా దిట్ఠానుగతిం ఆపజ్జతి. సాపి హోతి న బాహులికా న సాథలికా ఓక్కమనే నిక్ఖిత్తధురా పవివేకే పుబ్బఙ్గమా, వీరియం ఆరభతి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ. అయం వుచ్చతి, భిక్ఖవే, అగ్గవతీ పరిసా.
‘‘కతమా చ, భిక్ఖవే, వగ్గా పరిసా? ఇధ, భిక్ఖవే, యస్సం పరిసాయం భిక్ఖూ భణ్డనజాతా కలహజాతా వివాదాపన్నా అఞ్ఞమఞ్ఞం ముఖసత్తీహి వితుదన్తా విహరన్తి, అయం వుచ్చతి, భిక్ఖవే, వగ్గా పరిసా.
‘‘కతమా చ, భిక్ఖవే, సమగ్గా పరిసా? ఇధ, భిక్ఖవే, యస్సం పరిసాయం భిక్ఖూ సమగ్గా సమ్మోదమానా అవివదమానా ఖీరోదకీభూతా అఞ్ఞమఞ్ఞం పియచక్ఖూహి సమ్పస్సన్తా విహరన్తి, అయం వుచ్చతి, భిక్ఖవే, సమగ్గా పరిసా.
‘‘యస్మిం, భిక్ఖవే, సమయే భిక్ఖూ సమగ్గా సమ్మోదమానా అవివదమానా ఖీరోదకీభూతా అఞ్ఞమఞ్ఞం పియచక్ఖూహి సమ్పస్సన్తా విహరన్తి, బహుం, భిక్ఖవే, భిక్ఖూ తస్మిం సమయే పుఞ్ఞం పసవన్తి. బ్రహ్మం, భిక్ఖవే, విహారం తస్మిం సమయే భిక్ఖూ విహరన్తి, యదిదం ముదితాయ చేతోవిముత్తియా. పముదితస్స పీతి జాయతి, పీతిమనస్స కాయో పస్సమ్భతి, పస్సద్ధకాయో సుఖం వేదియతి, సుఖినో చిత్తం సమాధియతి.
‘‘సేయ్యథాపి, భిక్ఖవే, ఉపరిపబ్బతే థుల్లఫుసితకే దేవే వస్సన్తే తం ఉదకం యథానిన్నం పవత్తమానం పబ్బతకన్దరపదరసాఖా పరిపూరేతి, పబ్బతకన్దరపదరసాఖా పరిపూరా కుసోబ్భే [కుస్సుమ్భే (సీ. పీ.), కుసుమ్భే (స్యా. కం. క.)] పరిపూరేన్తి, కుసోబ్భా పరిపూరా మహాసోబ్భే పరిపూరేన్తి, మహాసోబ్భా పరిపూరా కున్నదియో పరిపూరేన్తి, కున్నదియో పరిపూరా మహానదియో పరిపూరేన్తి, మహానదియో పరిపూరా సముద్దం [సముద్దసాగరే (క.)] పరిపూరేన్తి.
‘‘ఏవమేవం ఖో, భిక్ఖవే, యస్మిం సమయే భిక్ఖూ సమగ్గా సమ్మోదమానా అవివదమానా ఖీరోదకీభూతా అఞ్ఞమఞ్ఞం పియచక్ఖూహి సమ్పస్సన్తా విహరన్తి, బహుం, భిక్ఖవే, భిక్ఖూ తస్మిం సమయే పుఞ్ఞం పసవన్తి. బ్రహ్మం, భిక్ఖవే, విహారం తస్మిం సమయే భిక్ఖూ విహరన్తి, యదిదం ముదితాయ చేతోవిముత్తియా. పముదితస్స పీతి జాయతి, పీతిమనస్స కాయో పస్సమ్భతి, పస్సద్ధకాయో సుఖం వేదియతి, సుఖినో చిత్తం సమాధియతి. ఇమా ఖో, భిక్ఖవే, తిస్సో పరిసా’’తి. చతుత్థం.