౧౦. అవకుజ్జసుత్తం

౩౦. ‘‘తయోమే, భిక్ఖవే [పు. ప. ౧౦౭-౧౦౮], పుగ్గలా సన్తో సంవిజ్జమానా లోకస్మిం. కతమే తయో? అవకుజ్జపఞ్ఞో పుగ్గలో, ఉచ్ఛఙ్గపఞ్ఞో పుగ్గలో, పుథుపఞ్ఞో పుగ్గలో. కతమో చ, భిక్ఖవే, అవకుజ్జపఞ్ఞో పుగ్గలో? ఇధ, భిక్ఖవే, ఏకచ్చో పుగ్గలో ఆరామం గన్తా హోతి అభిక్ఖణం భిక్ఖూనం సన్తికే ధమ్మస్సవనాయ. తస్స భిక్ఖూ ధమ్మం దేసేన్తి ఆదికల్యాణం మజ్ఝేకల్యాణం పరియోసానకల్యాణం సాత్థం సబ్యఞ్జనం, కేవలపరిపుణ్ణం పరిసుద్ధం బ్రహ్మచరియం పకాసేన్తి. సో తస్మిం ఆసనే నిసిన్నో తస్సా కథాయ నేవ ఆదిం మనసి కరోతి, న మజ్ఝం మనసి కరోతి, న పరియోసానం మనసి కరోతి; వుట్ఠితోపి తమ్హా ఆసనా తస్సా కథాయ నేవ ఆదిం మనసి కరోతి, న మజ్ఝం మనసి కరోతి, న పరియోసానం మనసి కరోతి. సేయ్యథాపి, భిక్ఖవే, కుమ్భో నిక్కుజ్జో [నిక్కుజ్జో (సీ. పీ.)] తత్ర ఉదకం ఆసిత్తం వివట్టతి, నో సణ్ఠాతి; ఏవమేవం ఖో, భిక్ఖవే, ఇధేకచ్చో పుగ్గలో ఆరామం గన్తా హోతి అభిక్ఖణం భిక్ఖూనం సన్తికే ధమ్మస్సవనాయ. తస్స భిక్ఖూ ధమ్మం దేసేన్తి ఆదికల్యాణం మజ్ఝేకల్యాణం పరియోసానకల్యాణం సాత్థం సబ్యఞ్జనం, కేవలపరిపుణ్ణం పరిసుద్ధం బ్రహ్మచరియం పకాసేన్తి. సో తస్మిం ఆసనే నిసిన్నో తస్సా కథాయ నేవ ఆదిం మనసి కరోతి, న మజ్ఝం మనసి కరోతి, న పరియోసానం మనసి కరోతి; వుట్ఠితోపి తమ్హా ఆసనా తస్సా కథాయ నేవాదిం మనసి కరోతి, న మజ్ఝం మనసి కరోతి, న పరియోసానం మనసి కరోతి. అయం వుచ్చతి, భిక్ఖవే, అవకుజ్జపఞ్ఞో పుగ్గలో.

‘‘కతమో చ, భిక్ఖవే, ఉచ్ఛఙ్గపఞ్ఞో పుగ్గలో? ఇధ, భిక్ఖవే, ఏకచ్చో పుగ్గలో ఆరామం గన్తా హోతి అభిక్ఖణం భిక్ఖూనం సన్తికే ధమ్మస్సవనాయ. తస్స భిక్ఖూ ధమ్మం దేసేన్తి ఆదికల్యాణం మజ్ఝేకల్యాణం పరియోసానకల్యాణం సాత్థం సబ్యఞ్జనం, కేవలపరిపుణ్ణం పరిసుద్ధం బ్రహ్మచరియం పకాసేన్తి. సో తస్మిం ఆసనే నిసిన్నో తస్సా కథాయ ఆదిమ్పి మనసి కరోతి, మజ్ఝమ్పి మనసి కరోతి, పరియోసానమ్పి మనసి కరోతి; వుట్ఠితో చ ఖో తమ్హా ఆసనా తస్సా కథాయ నేవాదిం మనసి కరోతి, న మజ్ఝం మనసి కరోతి, న పరియోసానం మనసి కరోతి. సేయ్యథాపి, భిక్ఖవే, పురిసస్స ఉచ్ఛఙ్గే నానాఖజ్జకాని ఆకిణ్ణాని – తిలా తణ్డులా మోదకా బదరా. సో తమ్హా ఆసనా వుట్ఠహన్తో సతిసమ్మోసా పకిరేయ్య. ఏవమేవం ఖో, భిక్ఖవే, ఇధేకచ్చో పుగ్గలో ఆరామం గన్తా హోతి అభిక్ఖణం భిక్ఖూనం సన్తికే ధమ్మస్సవనాయ. తస్స భిక్ఖూ ధమ్మం దేసేన్తి ఆదికల్యాణం మజ్ఝేకల్యాణం పరియోసానకల్యాణం సాత్థం సబ్యఞ్జనం, కేవలపరిపుణ్ణం పరిసుద్ధం బ్రహ్మచరియం పకాసేన్తి. సో తస్మిం ఆసనే నిసిన్నో తస్సా కథాయ ఆదిమ్పి మనసి కరోతి, మజ్ఝమ్పి మనసి కరోతి, పరియోసానమ్పి మనసి కరోతి; వుట్ఠితో చ ఖో తమ్హా ఆసనా తస్సా కథాయ నేవ ఆదిం మనసి కరోతి, న మజ్ఝం మనసి కరోతి, న పరియోసానం మనసి కరోతి. అయం వుచ్చతి, భిక్ఖవే, ఉచ్ఛఙ్గపఞ్ఞో పుగ్గలో.

‘‘కతమో చ, భిక్ఖవే, పుథుపఞ్ఞో పుగ్గలో? ఇధ, భిక్ఖవే, ఏకచ్చో పుగ్గలో ఆరామం గన్తా హోతి అభిక్ఖణం భిక్ఖూనం సన్తికే ధమ్మస్సవనాయ. తస్స భిక్ఖూ ధమ్మం దేసేన్తి ఆదికల్యాణం మజ్ఝేకల్యాణం పరియోసానకల్యాణం సాత్థం సబ్యఞ్జనం, కేవలపరిపుణ్ణం పరిసుద్ధం బ్రహ్మచరియం పకాసేన్తి. సో తస్మిం ఆసనే నిసిన్నో తస్సా కథాయ ఆదిమ్పి మనసి కరోతి, మజ్ఝమ్పి మనసి కరోతి, పరియోసానమ్పి మనసి కరోతి; వుట్ఠితోపి తమ్హా ఆసనా తస్సా కథాయ ఆదిమ్పి మనసి కరోతి, మజ్ఝమ్పి మనసి కరోతి, పరియోసానమ్పి మనసి కరోతి. సేయ్యథాపి, భిక్ఖవే, కుమ్భో ఉక్కుజ్జో తత్ర ఉదకం ఆసిత్తం సణ్ఠాతి నో వివట్టతి; ఏవమేవం ఖో, భిక్ఖవే, ఇధేకచ్చో పుగ్గలో ఆరామం గన్తా హోతి అభిక్ఖణం భిక్ఖూనం సన్తికే ధమ్మస్సవనాయ. తస్స భిక్ఖూ ధమ్మం దేసేన్తి ఆదికల్యాణం మజ్ఝేకల్యాణం పరియోసానకల్యాణం సాత్థం సబ్యఞ్జనం, కేవలపరిపుణ్ణం పరిసుద్ధం బ్రహ్మచరియం పకాసేన్తి. సో తస్మిం ఆసనే నిసిన్నో తస్సా కథాయ ఆదిమ్పి మనసి కరోతి, మజ్ఝమ్పి మనసి కరోతి, పరియోసానమ్పి మనసి కరోతి; వుట్ఠితోపి తమ్హా ఆసనా తస్సా కథాయ ఆదిమ్పి మనసి కరోతి, మజ్ఝమ్పి మనసి కరోతి, పరియోసానమ్పి మనసి కరోతి. అయం వుచ్చతి, భిక్ఖవే, పుథుపఞ్ఞో పుగ్గలో. ‘ఇమే ఖో, భిక్ఖవే, తయో పుగ్గలా సన్తో సంవిజ్జమానా లోకస్మి’’’న్తి.

‘‘అవకుజ్జపఞ్ఞో పురిసో, దుమ్మేధో అవిచక్ఖణో;

అభిక్ఖణమ్పి చే హోతి, గన్తా భిక్ఖూన సన్తికే.

‘‘ఆదిం కథాయ మజ్ఝఞ్చ, పరియోసానఞ్చ తాదిసో;

ఉగ్గహేతుం న సక్కోతి, పఞ్ఞా హిస్స న విజ్జతి.

‘‘ఉచ్ఛఙ్గపఞ్ఞో పురిసో, సేయ్యో ఏతేన వుచ్చతి;

అభిక్ఖణమ్పి చే హోతి, గన్తా భిక్ఖూన సన్తికే.

‘‘ఆదిం కథాయ మజ్ఝఞ్చ, పరియోసానఞ్చ తాదిసో;

నిసిన్నో ఆసనే తస్మిం, ఉగ్గహేత్వాన బ్యఞ్జనం;

వుట్ఠితో నప్పజానాతి, గహితం హిస్స [గహితమ్పిస్స (క.)] ముస్సతి.

‘‘పుథుపఞ్ఞో చ పురిసో, సేయ్యో ఏతేహి [ఏతేన (క.)] వుచ్చతి;

అభిక్ఖణమ్పి చే హోతి, గన్తా భిక్ఖూన సన్తికే.

‘‘ఆదిం కథాయ మజ్ఝఞ్చ, పరియోసానఞ్చ తాదిసో;

నిసిన్నో ఆసనే తస్మిం, ఉగ్గహేత్వాన బ్యఞ్జనం.

‘‘ధారేతి సేట్ఠసఙ్కప్పో, అబ్యగ్గమానసో నరో;

ధమ్మానుధమ్మప్పటిపన్నో, దుక్ఖస్సన్తకరో సియా’’తి. దసమం;

పుగ్గలవగ్గో తతియో.