౨. దుతియపణ్ణాసకం

(౬) ౧. పుగ్గలవగ్గో

౫౩. ‘‘ద్వేమే, భిక్ఖవే, పుగ్గలా లోకే ఉప్పజ్జమానా ఉప్పజ్జన్తి బహుజనహితాయ బహుజనసుఖాయ, బహునో జనస్స అత్థాయ హితాయ సుఖాయ దేవమనుస్సానం. కతమే ద్వే? తథాగతో చ అరహం సమ్మాసమ్బుద్ధో, రాజా చ చక్కవత్తీ. ఇమే ఖో, భిక్ఖవే, ద్వే పుగ్గలా లోకే ఉప్పజ్జమానా ఉప్పజ్జన్తి బహుజనహితాయ బహుజనసుఖాయ, బహునో జనస్స అత్థాయ హితాయ సుఖాయ దేవమనుస్సాన’’న్తి.

౫౪. ‘‘ద్వేమే, భిక్ఖవే, పుగ్గలా లోకే ఉప్పజ్జమానా ఉప్పజ్జన్తి అచ్ఛరియమనుస్సా. కతమే ద్వే? తథాగతో చ అరహం సమ్మాసమ్బుద్ధో, రాజా చ చక్కవత్తీ. ఇమే ఖో, భిక్ఖవే, ద్వే పుగ్గలా లోకే ఉప్పజ్జమానా ఉప్పజ్జన్తి అచ్ఛరియమనుస్సా’’తి.

౫౫. ‘‘ద్విన్నం, భిక్ఖవే, పుగ్గలానం కాలకిరియా బహునో జనస్స అనుతప్పా హోతి. కతమేసం ద్విన్నం? తథాగతస్స చ అరహతో సమ్మాసమ్బుద్ధస్స, రఞ్ఞో చ చక్కవత్తిస్స. ఇమేసం ఖో, భిక్ఖవే, ద్విన్నం పుగ్గలానం కాలకిరియా బహునో జనస్స అనుతప్పా హోతీ’’తి.

౫౬. ‘‘ద్వేమే, భిక్ఖవే, థూపారహా. కతమే ద్వే? తథాగతో చ అరహం సమ్మాసమ్బుద్ధో, రాజా చ చక్కవత్తీ. ఇమే ఖో, భిక్ఖవే, ద్వే థూపారహా’’తి.

౫౭. ‘‘ద్వేమే, భిక్ఖవే, బుద్ధా. కతమే ద్వే? తథాగతో చ అరహం సమ్మాసమ్బుద్ధో, పచ్చేకబుద్ధో చ. ఇమే ఖో, భిక్ఖవే, ద్వే బుద్ధా’’తి.

౫౮. ‘‘ద్వేమే, భిక్ఖవే, అసనియా ఫలన్తియా న సన్తసన్తి. కతమే ద్వే? భిక్ఖు చ ఖీణాసవో, హత్థాజానీయో చ. ఇమే ఖో, భిక్ఖవే, ద్వే అసనియా ఫలన్తియా న సన్తసన్తీ’’తి.

౫౯. ‘‘ద్వేమే, భిక్ఖవే, అసనియా ఫలన్తియా న సన్తసన్తి. కతమే ద్వే? భిక్ఖు చ ఖీణాసవో, అస్సాజానీయో చ. ఇమే ఖో, భిక్ఖవే, ద్వే అసనియా ఫలన్తియా న సన్తసన్తీ’’తి.

౬౦. ‘‘ద్వేమే, భిక్ఖవే, అసనియా ఫలన్తియా న సన్తసన్తి. కతమే ద్వే? భిక్ఖు చ ఖీణాసవో, సీహో చ మిగరాజా. ఇమే ఖో, భిక్ఖవే, ద్వే అసనియా ఫలన్తియా న సన్తసన్తీ’’తి.

౬౧. ‘‘ద్వేమే, భిక్ఖవే, అత్థవసే సమ్పస్సమానా కింపురిసా మానుసిం వాచం న భాసన్తి. కతమే ద్వే? మా చ ముసా భణిమ్హా, మా చ పరం అభూతేన అబ్భాచిక్ఖిమ్హాతి. ఇమే ఖో, భిక్ఖవే, ద్వే అత్థవసే సమ్పస్సమానా కింపురిసా మానుసిం వాచం న భాసన్తీ’’తి.

౬౨. ‘‘ద్విన్నం ధమ్మానం, భిక్ఖవే, అతిత్తో అప్పటివానో మాతుగామో కాలం కరోతి. కతమేసం ద్విన్నం? మేథునసమాపత్తియా చ విజాయనస్స చ. ఇమేసం ఖో, భిక్ఖవే, ద్విన్నం ధమ్మానం అతిత్తో అప్పటివానో మాతుగామో కాలం కరోతీ’’తి.

౬౩. ‘‘అసన్తసన్నివాసఞ్చ వో, భిక్ఖవే, దేసేస్సామి సన్తసన్నివాసఞ్చ. తం సుణాథ, సాధుకం మనసి కరోథ; భాసిస్సామీ’’తి. ‘‘ఏవం, భన్తే’’తి ఖో తే భిక్ఖూ భగవతో పచ్చస్సోసుం. భగవా ఏతదవోచ –

‘‘కథఞ్చ, భిక్ఖవే, అసన్తసన్నివాసో హోతి, కథఞ్చ అసన్తో సన్నివసన్తి? ఇధ, భిక్ఖవే, థేరస్స భిక్ఖునో ఏవం హోతి – ‘థేరోపి మం న వదేయ్య, మజ్ఝిమోపి మం న వదేయ్య, నవోపి మం న వదేయ్య; థేరమ్పాహం న వదేయ్యం, మజ్ఝిమమ్పాహం న వదేయ్యం, నవమ్పాహం న వదేయ్యం. థేరో చేపి మం వదేయ్య అహితానుకమ్పీ మం వదేయ్య నో హితానుకమ్పీ, నోతి నం వదేయ్యం విహేఠేయ్యం [విహేసేయ్యం (సీ. స్యా. కం. పీ.)] పస్సమ్పిస్స నప్పటికరేయ్యం. మజ్ఝిమో చేపి మం వదేయ్య…పే… నవో చేపి మం వదేయ్య అహితానుకమ్పీ మం వదేయ్య నో హితానుకమ్పీ, నోతి నం వదేయ్యం విహేఠేయ్యం పస్సమ్పిస్స నప్పటికరేయ్యం’. మజ్ఝిమస్సపి భిక్ఖునో ఏవం హోతి…పే… నవస్సపి భిక్ఖునో ఏవం హోతి – ‘థేరోపి మం న వదేయ్య, మజ్ఝిమోపి మం న వదేయ్య, నవోపి మం న వదేయ్య; థేరమ్పాహం న వదేయ్యం, మజ్ఝిమమ్పాహం న వదేయ్యం, నవమ్పాహం న వదేయ్యం. థేరో చేపి మం వదేయ్య అహితానుకమ్పీ మం వదేయ్య నో హితానుకమ్పీ నోతి నం వదేయ్యం విహేఠేయ్యం పస్సమ్పిస్స నప్పటికరేయ్యం. మజ్ఝిమో చేపి మం వదేయ్య…పే… నవో చేపి మం వదేయ్య అహితానుకమ్పీ మం వదేయ్య నో హితానుకమ్పీ, నోతి నం వదేయ్యం విహేఠేయ్యం పస్సమ్పిస్స నప్పటికరేయ్యం’. ఏవం ఖో, భిక్ఖవే, అసన్తసన్నివాసో హోతి, ఏవఞ్చ అసన్తో సన్నివసన్తి.

‘‘కథఞ్చ, భిక్ఖవే, సన్తసన్నివాసో హోతి, కథఞ్చ సన్తో సన్నివసన్తి? ఇధ, భిక్ఖవే, థేరస్స భిక్ఖునో ఏవం హోతి – ‘థేరోపి మం వదేయ్య, మజ్ఝిమోపి మం వదేయ్య, నవోపి మం వదేయ్య; థేరమ్పాహం వదేయ్యం, మజ్ఝిమమ్పాహం వదేయ్యం, నవమ్పాహం వదేయ్యం. థేరో చేపి మం వదేయ్య హితానుకమ్పీ మం వదేయ్య నో అహితానుకమ్పీ, సాధూతి నం వదేయ్యం న విహేఠేయ్యం పస్సమ్పిస్స పటికరేయ్యం. మజ్ఝిమో చేపి మం వదేయ్య…పే… నవో చేపి మం వదేయ్య హితానుకమ్పీ మం వదేయ్య నో అహితానుకమ్పీ, సాధూతి నం వదేయ్యం న నం విహేఠేయ్యం పస్సమ్పిస్స పటికరేయ్యం’. మజ్ఝిమస్సపి భిక్ఖునో ఏవం హోతి…పే… నవస్సపి భిక్ఖునో ఏవం హోతి – ‘థేరోపి మం వదేయ్య, మజ్ఝిమోపి మం వదేయ్య, నవోపి మం వదేయ్య; థేరమ్పాహం వదేయ్యం, మజ్ఝిమమ్పాహం వదేయ్యం, నవమ్పాహం వదేయ్యం. థేరో చేపి మం వదేయ్య హితానుకమ్పీ మం వదేయ్య నో అహితానుకమ్పీ, సాధూతి నం వదేయ్యం న నం విహేఠేయ్యం పస్సమ్పిస్స పటికరేయ్యం. మజ్ఝిమో చేపి మం వదేయ్య…పే… నవో చేపి మం వదేయ్య హితానుకమ్పీ మం వదేయ్య నో అహితానుకమ్పీ, సాధూతి నం వదేయ్యం న నం విహేఠేయ్యం పస్సమ్పిస్స పటికరేయ్యం’. ఏవం ఖో, భిక్ఖవే, సన్తసన్నివాసో హోతి, ఏవఞ్చ సన్తో సన్నివసన్తీ’’తి.

౬౪. ‘‘యస్మిం, భిక్ఖవే, అధికరణే ఉభతో వచీసంసారో దిట్ఠిపళాసో చేతసో ఆఘాతో అప్పచ్చయో అనభిరద్ధి అజ్ఝత్తం అవూపసన్తం హోతి, తస్మేతం, భిక్ఖవే, అధికరణే పాటికఙ్ఖం – ‘దీఘత్తాయ ఖరత్తాయ వాళత్తాయ సంవత్తిస్సతి, భిక్ఖూ చ న ఫాసుం [ఫాసు (క.)] విహరిస్సన్తి’. యస్మిఞ్చ ఖో, భిక్ఖవే, అధికరణే ఉభతో వచీసంసారో దిట్ఠిపళాసో చేతసో ఆఘాతో అప్పచ్చయో అనభిరద్ధి అజ్ఝత్తం సువూపసన్తం హోతి, తస్మేతం, భిక్ఖవే, అధికరణే పాటికఙ్ఖం – ‘న దీఘత్తాయ ఖరత్తాయ వాళత్తాయ సంవత్తిస్సతి, భిక్ఖూ చ ఫాసుం విహరిస్సన్తీ’’’తి.

పుగ్గలవగ్గో పఠమో.

(౭) ౨. సుఖవగ్గో

౬౫. ‘‘ద్వేమాని, భిక్ఖవే, సుఖాని. కతమాని ద్వే? గిహిసుఖఞ్చ పబ్బజితసుఖఞ్చ. ఇమాని ఖో, భిక్ఖవే, ద్వే సుఖాని. ఏతదగ్గం, భిక్ఖవే, ఇమేసం ద్విన్నం సుఖానం యదిదం పబ్బజితసుఖ’’న్తి.

౬౬. ‘‘ద్వేమాని, భిక్ఖవే, సుఖాని. కతమాని ద్వే? కామసుఖఞ్చ నేక్ఖమ్మసుఖఞ్చ. ఇమాని ఖో, భిక్ఖవే, ద్వే సుఖాని. ఏతదగ్గం, భిక్ఖవే, ఇమేసం ద్విన్నం సుఖానం యదిదం నేక్ఖమ్మసుఖ’’న్తి.

౬౭. ‘‘ద్వేమాని, భిక్ఖవే, సుఖాని. కతమాని ద్వే? ఉపధిసుఖఞ్చ నిరుపధిసుఖఞ్చ. ఇమాని ఖో, భిక్ఖవే, ద్వే సుఖాని. ఏతదగ్గం, భిక్ఖవే, ఇమేసం ద్విన్నం సుఖానం యదిదం నిరుపధిసుఖ’’న్తి.

౬౮. ‘‘ద్వేమాని, భిక్ఖవే, సుఖాని. కతమాని ద్వే? సాసవసుఖఞ్చ అనాసవసుఖఞ్చ. ఇమాని ఖో, భిక్ఖవే, ద్వే సుఖాని. ఏతదగ్గం, భిక్ఖవే, ఇమేసం ద్విన్నం సుఖానం యదిదం అనాసవసుఖ’’న్తి.

౬౯. ‘‘ద్వేమాని, భిక్ఖవే, సుఖాని. కతమాని ద్వే? సామిసఞ్చ సుఖం నిరామిసఞ్చ సుఖం. ఇమాని ఖో, భిక్ఖవే, ద్వే సుఖాని. ఏతదగ్గం, భిక్ఖవే, ఇమేసం ద్విన్నం సుఖానం యదిదం నిరామిసం సుఖ’’న్తి.

౭౦. ‘‘ద్వేమాని, భిక్ఖవే, సుఖాని. కతమాని ద్వే? అరియసుఖఞ్చ అనరియసుఖఞ్చ. ఇమాని ఖో, భిక్ఖవే, ద్వే సుఖాని. ఏతదగ్గం, భిక్ఖవే, ఇమేసం ద్విన్నం సుఖానం యదిదం అరియసుఖ’’న్తి.

౭౧. ‘‘ద్వేమాని, భిక్ఖవే, సుఖాని. కతమాని ద్వే? కాయికఞ్చ సుఖం చేతసికఞ్చ సుఖం. ఇమాని ఖో, భిక్ఖవే, ద్వే సుఖాని. ఏతదగ్గం, భిక్ఖవే, ఇమేసం ద్విన్నం సుఖానం యదిదం చేతసికం సుఖ’’న్తి.

౭౨. ‘‘ద్వేమాని, భిక్ఖవే, సుఖాని. కతమాని ద్వే? సప్పీతికఞ్చ సుఖం నిప్పీతికఞ్చ సుఖం. ఇమాని ఖో, భిక్ఖవే, ద్వే సుఖాని. ఏతదగ్గం, భిక్ఖవే, ఇమేసం ద్విన్నం సుఖానం యదిదం నిప్పీతికం సుఖ’’న్తి.

౭౩. ‘‘ద్వేమాని, భిక్ఖవే, సుఖాని. కతమాని ద్వే? సాతసుఖఞ్చ ఉపేక్ఖాసుఖఞ్చ. ఇమాని ఖో, భిక్ఖవే, ద్వే సుఖాని. ఏతదగ్గం, భిక్ఖవే, ఇమేసం ద్విన్నం సుఖానం యదిదం ఉపేక్ఖాసుఖ’’న్తి.

౭౪. ‘‘ద్వేమాని, భిక్ఖవే, సుఖాని. కతమాని ద్వే? సమాధిసుఖఞ్చ అసమాధిసుఖఞ్చ. ఇమాని ఖో, భిక్ఖవే, ద్వే సుఖాని. ఏతదగ్గం, భిక్ఖవే, ఇమేసం ద్విన్నం సుఖానం యదిదం సమాధిసుఖ’’న్తి.

౭౫. ‘‘ద్వేమాని, భిక్ఖవే, సుఖాని. కతమాని ద్వే? సప్పీతికారమ్మణఞ్చ సుఖం నిప్పీతికారమ్మణఞ్చ సుఖం. ఇమాని ఖో, భిక్ఖవే, ద్వే సుఖాని. ఏతదగ్గం, భిక్ఖవే, ఇమేసం ద్విన్నం సుఖానం యదిదం నిప్పీతికారమ్మణం సుఖ’’న్తి.

౭౬. ‘‘ద్వేమాని, భిక్ఖవే, సుఖాని. కతమాని ద్వే? సాతారమ్మణఞ్చ సుఖం ఉపేక్ఖారమ్మణఞ్చ సుఖం. ఇమాని ఖో, భిక్ఖవే, ద్వే సుఖాని. ఏతదగ్గం, భిక్ఖవే, ఇమేసం ద్విన్నం సుఖానం యదిదం ఉపేక్ఖారమ్మణం సుఖ’’న్తి.

౭౭. ‘‘ద్వేమాని, భిక్ఖవే, సుఖాని. కతమాని ద్వే? రూపారమ్మణఞ్చ సుఖం అరూపారమ్మణఞ్చ సుఖం. ఇమాని ఖో, భిక్ఖవే, ద్వే సుఖాని. ఏతదగ్గం, భిక్ఖవే, ఇమేసం ద్విన్నం సుఖానం యదిదం అరూపారమ్మణం సుఖ’’న్తి.

సుఖవగ్గో దుతియో.

(౮) ౩. సనిమిత్తవగ్గో

౭౮. ‘‘సనిమిత్తా, భిక్ఖవే, ఉప్పజ్జన్తి పాపకా అకుసలా ధమ్మా, నో అనిమిత్తా. తస్సేవ నిమిత్తస్స పహానా ఏవం తే పాపకా అకుసలా ధమ్మా న హోన్తీ’’తి.

౭౯. ‘‘సనిదానా, భిక్ఖవే, ఉప్పజ్జన్తి పాపకా అకుసలా ధమ్మా, నో అనిదానా. తస్సేవ నిదానస్స పహానా ఏవం తే పాపకా అకుసలా ధమ్మా న హోన్తీ’’తి.

౮౦. ‘‘సహేతుకా, భిక్ఖవే, ఉప్పజ్జన్తి పాపకా అకుసలా ధమ్మా, నో అహేతుకా. తస్సేవ హేతుస్స పహానా ఏవం తే పాపకా అకుసలా ధమ్మా న హోన్తీ’’తి.

౮౧. ‘‘ససఙ్ఖారా, భిక్ఖవే, ఉప్పజ్జన్తి పాపకా అకుసలా ధమ్మా, నో అసఙ్ఖారా. తేసంయేవ సఙ్ఖారానం పహానా ఏవం తే పాపకా అకుసలా ధమ్మా న హోన్తీ’’తి.

౮౨. ‘‘సప్పచ్చయా, భిక్ఖవే, ఉప్పజ్జన్తి పాపకా అకుసలా ధమ్మా, నో అప్పచ్చయా. తస్సేవ పచ్చయస్స పహానా ఏవం తే పాపకా అకుసలా ధమ్మా న హోన్తీ’’తి.

౮౩. ‘‘సరూపా, భిక్ఖవే, ఉప్పజ్జన్తి పాపకా అకుసలా ధమ్మా, నో అరూపా. తస్సేవ రూపస్స పహానా ఏవం తే పాపకా అకుసలా ధమ్మా న హోన్తీ’’తి.

౮౪. ‘‘సవేదనా, భిక్ఖవే, ఉప్పజ్జన్తి పాపకా అకుసలా ధమ్మా, నో అవేదనా. తస్సాయేవ వేదనాయ పహానా ఏవం తే పాపకా అకుసలా ధమ్మా న హోన్తీ’’తి.

౮౫. ‘‘ససఞ్ఞా, భిక్ఖవే, ఉప్పజ్జన్తి పాపకా అకుసలా ధమ్మా, నో అసఞ్ఞా. తస్సాయేవ సఞ్ఞాయ పహానా ఏవం తే పాపకా అకుసలా ధమ్మా న హోన్తీ’’తి.

౮౬. ‘‘సవిఞ్ఞాణా, భిక్ఖవే, ఉప్పజ్జన్తి పాపకా అకుసలా ధమ్మా, నో అవిఞ్ఞాణా. తస్సేవ విఞ్ఞాణస్స పహానా ఏవం తే పాపకా అకుసలా ధమ్మా న హోన్తీ’’తి.

౮౭. ‘‘సఙ్ఖతారమ్మణా, భిక్ఖవే, ఉప్పజ్జన్తి పాపకా అకుసలా ధమ్మా, నో అసఙ్ఖతారమ్మణా. తస్సేవ సఙ్ఖతస్స పహానా ఏవం తే పాపకా అకుసలా ధమ్మా న హోన్తీ’’తి.

సనిమిత్తవగ్గో తతియో.

(౯) ౪. ధమ్మవగ్గో

౮౮. ‘‘ద్వేమే, భిక్ఖవే, ధమ్మా. కతమే ద్వే? చేతోవిముత్తి చ పఞ్ఞావిముత్తి చ. ఇమే ఖో, భిక్ఖవే, ద్వే ధమ్మా’’తి.

౮౯. ‘‘ద్వేమే, భిక్ఖవే, ధమ్మా. కతమే ద్వే? పగ్గాహో చ అవిక్ఖేపో చ. ఇమే ఖో, భిక్ఖవే, ద్వే ధమ్మా’’తి.

౯౦. ‘‘ద్వేమే, భిక్ఖవే, ధమ్మా. కతమే ద్వే? నామఞ్చ రూపఞ్చ. ఇమే ఖో, భిక్ఖవే, ద్వే ధమ్మా’’తి.

౯౧. ‘‘ద్వేమే, భిక్ఖవే, ధమ్మా. కతమే ద్వే? విజ్జా చ విముత్తి చ. ఇమే ఖో, భిక్ఖవే, ద్వే ధమ్మా’’తి.

౯౨. ‘‘ద్వేమే, భిక్ఖవే, ధమ్మా. కతమే ద్వే? భవదిట్ఠి చ విభవదిట్ఠి చ. ఇమే ఖో, భిక్ఖవే, ద్వే ధమ్మా’’తి.

౯౩. ‘‘ద్వేమే, భిక్ఖవే, ధమ్మా. కతమే ద్వే? అహిరికఞ్చ అనోత్తప్పఞ్చ. ఇమే ఖో, భిక్ఖవే, ద్వే ధమ్మా’’తి.

౯౪. ‘‘ద్వేమే, భిక్ఖవే, ధమ్మా. కతమే ద్వే? హిరీ చ ఓత్తప్పఞ్చ. ఇమే ఖో, భిక్ఖవే, ద్వే ధమ్మా’’తి.

౯౫. ‘‘ద్వేమే, భిక్ఖవే, ధమ్మా. కతమే ద్వే? దోవచస్సతా చ పాపమిత్తతా చ. ఇమే ఖో, భిక్ఖవే, ద్వే ధమ్మా’’తి.

౯౬. ‘‘ద్వేమే, భిక్ఖవే, ధమ్మా. కతమే ద్వే? సోవచస్సతా చ కల్యాణమిత్తతా చ. ఇమే ఖో, భిక్ఖవే, ద్వే ధమ్మా’’తి.

౯౭. ‘‘ద్వేమే, భిక్ఖవే, ధమ్మా. కతమే ద్వే? ధాతుకుసలతా చ మనసికారకుసలతా చ. ఇమే ఖో, భిక్ఖవే, ద్వే ధమ్మా’’తి.

౯౮. ‘‘ద్వేమే, భిక్ఖవే, ధమ్మా. కతమే ద్వే? ఆపత్తికుసలతా చ ఆపత్తివుట్ఠానకుసలతా చ. ఇమే ఖో, భిక్ఖవే, ద్వే ధమ్మా’’తి.

ధమ్మవగ్గో చతుత్థో.

(౧౦) ౫. బాలవగ్గో

౯౯. ‘‘ద్వేమే, భిక్ఖవే, బాలా. కతమే ద్వే? యో చ అనాగతం భారం వహతి, యో చ ఆగతం భారం న వహతి. ఇమే ఖో, భిక్ఖవే, ద్వే బాలా’’తి.

౧౦౦. ‘‘ద్వేమే, భిక్ఖవే, పణ్డితా. కతమే ద్వే? యో చ అనాగతం భారం న వహతి, యో చ ఆగతం భారం వహతి. ఇమే ఖో, భిక్ఖవే, ద్వే పణ్డితా’’తి.

౧౦౧. ‘‘ద్వేమే, భిక్ఖవే, బాలా. కతమే ద్వే? యో చ అకప్పియే కప్పియసఞ్ఞీ, యో చ కప్పియే అకప్పియసఞ్ఞీ. ఇమే ఖో, భిక్ఖవే, ద్వే బాలా’’తి.

౧౦౨. ‘‘ద్వేమే, భిక్ఖవే, పణ్డితా. కతమే ద్వే? యో చ అకప్పియే అకప్పియసఞ్ఞీ, యో చ కప్పియే కప్పియసఞ్ఞీ. ఇమే ఖో, భిక్ఖవే, ద్వే పణ్డితా’’తి.

౧౦౩. ‘‘ద్వేమే, భిక్ఖవే, బాలా. కతమే ద్వే? యో చ అనాపత్తియా ఆపత్తిసఞ్ఞీ, యో చ ఆపత్తియా అనాపత్తిసఞ్ఞీ. ఇమే ఖో, భిక్ఖవే, ద్వే బాలా’’తి.

౧౦౪. ‘‘ద్వేమే, భిక్ఖవే, పణ్డితా. కతమే ద్వే? యో చ అనాపత్తియా అనాపత్తిసఞ్ఞీ, యో చ ఆపత్తియా ఆపత్తిసఞ్ఞీ. ఇమే ఖో, భిక్ఖవే, ద్వే పణ్డితా’’తి.

౧౦౫. ‘‘ద్వేమే, భిక్ఖవే, బాలా. కతమే ద్వే? యో చ అధమ్మే ధమ్మసఞ్ఞీ, యో చ ధమ్మే అధమ్మసఞ్ఞీ. ఇమే ఖో, భిక్ఖవే, ద్వే బాలా’’తి.

౧౦౬. ‘‘ద్వేమే, భిక్ఖవే, పణ్డితా. కతమే ద్వే? యో చ ధమ్మే ధమ్మసఞ్ఞీ, యో చ అధమ్మే అధమ్మసఞ్ఞీ. ఇమే ఖో, భిక్ఖవే, ద్వే పణ్డితా’’తి.

౧౦౭. ‘‘ద్వేమే, భిక్ఖవే, బాలా. కతమే ద్వే? యో చ అవినయే వినయసఞ్ఞీ, యో చ వినయే అవినయసఞ్ఞీ. ఇమే ఖో, భిక్ఖవే, ద్వే బాలా’’తి.

౧౦౮. ‘‘ద్వేమే, భిక్ఖవే, పణ్డితా. కతమే ద్వే? యో చ అవినయే అవినయసఞ్ఞీ, యో చ వినయే వినయసఞ్ఞీ. ఇమే ఖో, భిక్ఖవే, ద్వే పణ్డితా’’తి.

౧౦౯. ‘‘ద్విన్నం, భిక్ఖవే, ఆసవా వడ్ఢన్తి. కతమేసం ద్విన్నం? యో చ న కుక్కుచ్చాయితబ్బం కుక్కుచ్చాయతి, యో చ కుక్కుచ్చాయితబ్బం న కుక్కుచ్చాయతి. ఇమేసం ఖో, భిక్ఖవే, ద్విన్నం ఆసవా వడ్ఢన్తీ’’తి.

౧౧౦. ‘‘ద్విన్నం, భిక్ఖవే, ఆసవా న వడ్ఢన్తి. కతమేసం ద్విన్నం? యో చ న కుక్కుచ్చాయితబ్బం న కుక్కుచ్చాయతి, యో చ కుక్కుచ్చాయితబ్బం కుక్కుచ్చాయతి. ఇమేసం ఖో, భిక్ఖవే, ద్విన్నం ఆసవా న వడ్ఢన్తీ’’తి.

౧౧౧. ‘‘ద్విన్నం, భిక్ఖవే, ఆసవా వడ్ఢన్తి. కతమేసం ద్విన్నం? యో చ అకప్పియే కప్పియసఞ్ఞీ, యో చ కప్పియే అకప్పియసఞ్ఞీ. ఇమేసం ఖో, భిక్ఖవే, ద్విన్నం ఆసవా వడ్ఢన్తీ’’తి.

౧౧౨. ‘‘ద్విన్నం, భిక్ఖవే, ఆసవా న వడ్ఢన్తి. కతమేసం ద్విన్నం? యో చ అకప్పియే అకప్పియసఞ్ఞీ, యో చ కప్పియే కప్పియసఞ్ఞీ. ఇమేసం ఖో, భిక్ఖవే, ద్విన్నం ఆసవా న వడ్ఢన్తీ’’తి.

౧౧౩. ‘‘ద్విన్నం, భిక్ఖవే, ఆసవా వడ్ఢన్తి. కతమేసం ద్విన్నం? యో చ ఆపత్తియా అనాపత్తిసఞ్ఞీ, యో చ అనాపత్తియా ఆపత్తిసఞ్ఞీ. ఇమేసం ఖో, భిక్ఖవే, ద్విన్నం ఆసవా వడ్ఢన్తీ’’తి.

౧౧౪. ‘‘ద్విన్నం, భిక్ఖవే, ఆసవా న వడ్ఢన్తి. కతమేసం ద్విన్నం? యో చ ఆపత్తియా ఆపత్తిసఞ్ఞీ, యో చ అనాపత్తియా అనాపత్తిసఞ్ఞీ. ఇమేసం ఖో, భిక్ఖవే, ద్విన్నం ఆసవా న వడ్ఢన్తీ’’తి.

౧౧౫. ‘‘ద్విన్నం, భిక్ఖవే, ఆసవా వడ్ఢన్తి. కతమేసం ద్విన్నం? యో చ అధమ్మే ధమ్మసఞ్ఞీ, యో చ ధమ్మే అధమ్మసఞ్ఞీ. ఇమేసం ఖో, భిక్ఖవే, ద్విన్నం ఆసవా వడ్ఢన్తీ’’తి.

౧౧౬. ‘‘ద్విన్నం, భిక్ఖవే, ఆసవా న వడ్ఢన్తి. కతమేసం ద్విన్నం? యో చ ధమ్మే ధమ్మసఞ్ఞీ, యో చ అధమ్మే అధమ్మసఞ్ఞీ. ఇమేసం ఖో, భిక్ఖవే, ద్విన్నం ఆసవా న వడ్ఢన్తీ’’తి.

౧౧౭. ‘‘ద్విన్నం, భిక్ఖవే, ఆసవా వడ్ఢన్తి. కతమేసం ద్విన్నం? యో చ అవినయే వినయసఞ్ఞీ, యో చ వినయే అవినయసఞ్ఞీ. ఇమేసం ఖో, భిక్ఖవే, ద్విన్నం ఆసవా వడ్ఢన్తీ’’తి.

౧౧౮. ‘‘ద్విన్నం, భిక్ఖవే, ఆసవా న వడ్ఢన్తి. కతమేసం ద్విన్నం? యో చ అవినయే అవినయసఞ్ఞీ, యో చ వినయే వినయసఞ్ఞీ. ఇమేసం ఖో, భిక్ఖవే, ద్విన్నం ఆసవా న వడ్ఢన్తీ’’తి.

బాలవగ్గో పఞ్చమో.

దుతియో పణ్ణాసకో సమత్తో.