౩. తతియపణ్ణాసకం

(౧౧) ౧. ఆసాదుప్పజహవగ్గో

౧౧౯. ‘‘ద్వేమా, భిక్ఖవే, ఆసా దుప్పజహా. కతమా ద్వే? లాభాసా చ జీవితాసా చ. ఇమా ఖో, భిక్ఖవే, ద్వే ఆసా దుప్పజహా’’తి.

౧౨౦. ‘‘ద్వేమే, భిక్ఖవే, పుగ్గలా దుల్లభా లోకస్మిం. కతమే ద్వే? యో చ పుబ్బకారీ, యో చ కతఞ్ఞూ కతవేదీ. ఇమే ఖో, భిక్ఖవే, ద్వే పుగ్గలా దుల్లభా లోకస్మి’’న్తి.

౧౨౧. ‘‘ద్వేమే, భిక్ఖవే, పుగ్గలా దుల్లభా లోకస్మిం. కతమే ద్వే? తిత్తో చ తప్పేతా చ. ఇమే ఖో, భిక్ఖవే, ద్వే పుగ్గలా దుల్లభా లోకస్మి’’న్తి.

౧౨౨. ‘‘ద్వేమే, భిక్ఖవే, పుగ్గలా దుత్తప్పయా. కతమే ద్వే? యో చ లద్ధం లద్ధం నిక్ఖిపతి, యో చ లద్ధం లద్ధం విస్సజ్జేతి. ఇమే ఖో, భిక్ఖవే, ద్వే పుగ్గలా దుత్తప్పయా’’తి.

౧౨౩. ‘‘ద్వేమే, భిక్ఖవే, పుగ్గలా సుతప్పయా. కతమే ద్వే? యో చ లద్ధం లద్ధం న నిక్ఖిపతి, యో చ లద్ధం లద్ధం న విస్సజ్జేతి. ఇమే ఖో, భిక్ఖవే, ద్వే పుగ్గలా సుతప్పయా’’తి.

౧౨౪. ‘‘ద్వేమే, భిక్ఖవే, పచ్చయా రాగస్స ఉప్పాదాయ. కతమే ద్వే? సుభనిమిత్తఞ్చ అయోనిసో చ మనసికారో. ఇమే ఖో, భిక్ఖవే, ద్వే పచ్చయా రాగస్స ఉప్పాదాయా’’తి.

౧౨౫. ‘‘ద్వేమే, భిక్ఖవే, పచ్చయా దోసస్స ఉప్పాదాయ. కతమే ద్వే? పటిఘనిమిత్తఞ్చ అయోనిసో చ మనసికారో. ఇమే ఖో, భిక్ఖవే, ద్వే పచ్చయా దోసస్స ఉప్పాదాయా’’తి.

౧౨౬. ‘‘ద్వేమే, భిక్ఖవే, పచ్చయా మిచ్ఛాదిట్ఠియా ఉప్పాదాయ. కతమే ద్వే? పరతో చ ఘోసో అయోనిసో చ మనసికారో. ఇమే ఖో, భిక్ఖవే, ద్వే పచ్చయా మిచ్ఛాదిట్ఠియా ఉప్పాదాయా’’తి.

౧౨౭. ‘‘ద్వేమే, భిక్ఖవే, పచ్చయా సమ్మాదిట్ఠియా ఉప్పాదాయ. కతమే ద్వే? పరతో చ ఘోసో, యోనిసో చ మనసికారో. ఇమే ఖో, భిక్ఖవే, ద్వే పచ్చయా సమ్మాదిట్ఠియా ఉప్పాదాయా’’తి.

౧౨౮. ‘‘ద్వేమా, భిక్ఖవే, ఆపత్తియో. కతమా ద్వే? లహుకా చ ఆపత్తి, గరుకా చ ఆపత్తి. ఇమా ఖో, భిక్ఖవే, ద్వే ఆపత్తియో’’తి.

౧౨౯. ‘‘ద్వేమా, భిక్ఖవే, ఆపత్తియో. కతమా ద్వే? దుట్ఠుల్లా చ ఆపత్తి, అదుట్ఠుల్లా చ ఆపత్తి. ఇమా ఖో, భిక్ఖవే, ద్వే ఆపత్తియో’’తి.

౧౩౦. ‘‘ద్వేమా, భిక్ఖవే, ఆపత్తియో. కతమా ద్వే? సావసేసా చ ఆపత్తి, అనవసేసా చ ఆపత్తి. ఇమా ఖో, భిక్ఖవే, ద్వే ఆపత్తియో’’తి.

ఆసాదుప్పజహవగ్గో పఠమో.

(౧౨) ౨. ఆయాచనవగ్గో

౧౩౧. ‘‘సద్ధో, భిక్ఖవే, భిక్ఖు ఏవం సమ్మా ఆయాచమానో ఆయాచేయ్య – ‘తాదిసో హోమి యాదిసా సారిపుత్తమోగ్గల్లానా’తి. ఏసా, భిక్ఖవే, తులా ఏతం పమాణం మమ సావకానం భిక్ఖూనం యదిదం సారిపుత్తమోగ్గల్లానా’’తి.

౧౩౨. ‘‘సద్ధా, భిక్ఖవే, భిక్ఖునీ ఏవం సమ్మా ఆయాచమానా ఆయాచేయ్య – ‘తాదిసీ హోమి యాదిసీ ఖేమా చ భిక్ఖునీ ఉప్పలవణ్ణా చా’తి. ఏసా, భిక్ఖవే, తులా ఏతం పమాణం మమ సావికానం భిక్ఖునీనం యదిదం ఖేమా చ భిక్ఖునీ ఉప్పలవణ్ణా చా’’తి.

౧౩౩. ‘‘సద్ధో, భిక్ఖవే, ఉపాసకో ఏవం సమ్మా ఆయాచమానో ఆయాచేయ్య – ‘తాదిసో హోమి యాదిసో చిత్తో చ గహపతి హత్థకో చ ఆళవకో’తి. ఏసా, భిక్ఖవే, తులా ఏతం పమాణం మమ సావకానం ఉపాసకానం యదిదం చిత్తో చ గహపతి హత్థకో చ ఆళవకో’’తి.

౧౩౪. ‘‘సద్ధా, భిక్ఖవే, ఉపాసికా ఏవం సమ్మా ఆయాచమానా ఆయాచేయ్య – ‘తాదిసీ హోమి యాదిసీ ఖుజ్జుత్తరా చ ఉపాసికా వేళుకణ్డకియా [వేళుకణ్డకీ (అ. ని. ౬.౩౭; అ. ని. ౪.౧౭౬ ఆగతం] చ నన్దమాతా’తి. ఏసా, భిక్ఖవే, తులా ఏతం పమాణం మమ సావికానం ఉపాసికానం యదిదం ఖుజ్జుత్తరా చ ఉపాసికా వేళుకణ్డకియా చ నన్దమాతా’’తి.

౧౩౫. ‘‘ద్వీహి, భిక్ఖవే, ధమ్మేహి సమన్నాగతో బాలో అబ్యత్తో అసప్పురిసో ఖతం ఉపహతం అత్తానం పరిహరతి, సావజ్జో చ హోతి సానువజ్జో చ విఞ్ఞూనం, బహుఞ్చ అపుఞ్ఞం పసవతి. కతమేహి ద్వీహి? అననువిచ్చ అపరియోగాహేత్వా అవణ్ణారహస్స వణ్ణం భాసతి, అననువిచ్చ అపరియోగాహేత్వా వణ్ణారహస్స అవణ్ణం భాసతి. ఇమేహి ఖో, భిక్ఖవే, ద్వీహి ధమ్మేహి సమన్నాగతో బాలో అబ్యత్తో అసప్పురిసో ఖతం ఉపహతం అత్తానం పరిహరతి, సావజ్జో చ హోతి సానువజ్జో చ విఞ్ఞూనం, బహుఞ్చ అపుఞ్ఞం పసవతీతి.

‘‘ద్వీహి, భిక్ఖవే, ధమ్మేహి సమన్నాగతో పణ్డితో వియత్తో సప్పురిసో అక్ఖతం అనుపహతం అత్తానం పరిహరతి, అనవజ్జో చ హోతి అననువజ్జో చ విఞ్ఞూనం, బహుఞ్చ పుఞ్ఞం పసవతి. కతమేహి ద్వీహి? అనువిచ్చ పరియోగాహేత్వా అవణ్ణారహస్స అవణ్ణం భాసతి, అనువిచ్చ పరియోగాహేత్వా వణ్ణారహస్స వణ్ణం భాసతి. ఇమేహి ఖో, భిక్ఖవే, ద్వీహి ధమ్మేహి సమన్నాగతో పణ్డితో వియత్తో సప్పురిసో అక్ఖతం అనుపహతం అత్తానం పరిహరతి, అనవజ్జో చ హోతి అననువజ్జో చ విఞ్ఞూనం, బహుఞ్చ పుఞ్ఞం పసవతీ’’తి.

౧౩౬. ‘‘ద్వీహి, భిక్ఖవే, ధమ్మేహి సమన్నాగతో బాలో అబ్యత్తో అసప్పురిసో ఖతం ఉపహతం అత్తానం పరిహరతి, సావజ్జో చ హోతి సానువజ్జో చ విఞ్ఞూనం, బహుఞ్చ అపుఞ్ఞం పసవతి. కతమేహి ద్వీహి? అననువిచ్చ అపరియోగాహేత్వా అప్పసాదనీయే ఠానే పసాదం ఉపదంసేతి, అననువిచ్చ అపరియోగాహేత్వా పసాదనీయే ఠానే అప్పసాదం ఉపదంసేతి. ఇమేహి ఖో, భిక్ఖవే, ద్వీహి ధమ్మేహి సమన్నాగతో బాలో అబ్యత్తో అసప్పురిసో ఖతం ఉపహతం అత్తానం పరిహరతి, సావజ్జో చ హోతి సానువజ్జో చ విఞ్ఞూనం, బహుఞ్చ అపుఞ్ఞం పసవతీతి.

‘‘ద్వీహి, భిక్ఖవే, ధమ్మేహి సమన్నాగతో పణ్డితో వియత్తో సప్పురిసో అక్ఖతం అనుపహతం అత్తానం పరిహరతి, అనవజ్జో చ హోతి అననువజ్జో చ విఞ్ఞూనం, బహుఞ్చ పుఞ్ఞం పసవతి. కతమేహి ద్వీహి? అనువిచ్చ పరియోగాహేత్వా అప్పసాదనీయే ఠానే అప్పసాదం ఉపదంసేతి, అనువిచ్చ పరియోగాహేత్వా పసాదనీయే ఠానే పసాదం ఉపదంసేతి. ఇమేహి ఖో, భిక్ఖవే, ద్వీహి ధమ్మేహి సమన్నాగతో పణ్డితో వియత్తో సప్పురిసో అక్ఖతం అనుపహతం అత్తానం పరిహరతి, అనవజ్జో చ హోతి అననువజ్జో చ విఞ్ఞూనం, బహుఞ్చ పుఞ్ఞం పసవతీ’’తి.

౧౩౭. ‘‘ద్వీసు, భిక్ఖవే, మిచ్ఛాపటిపజ్జమానో బాలో అబ్యత్తో అసప్పురిసో ఖతం ఉపహతం అత్తానం పరిహరతి, సావజ్జో చ హోతి సానువజ్జో చ విఞ్ఞూనం, బహుఞ్చ అపుఞ్ఞం పసవతి. కతమేసు ద్వీసు? మాతరి చ పితరి చ. ఇమేసు ఖో, భిక్ఖవే, ద్వీసు మిచ్ఛాపటిపజ్జమానో బాలో అబ్యత్తో అసప్పురిసో ఖతం ఉపహతం అత్తానం పరిహరతి, సావజ్జో చ హోతి సానువజ్జో చ విఞ్ఞూనం, బహుఞ్చ అపుఞ్ఞం పసవతీతి.

‘‘ద్వీసు, భిక్ఖవే, సమ్మాపటిపజ్జమానో పణ్డితో వియత్తో సప్పురిసో అక్ఖతం అనుపహతం అత్తానం పరిహరతి, అనవజ్జో చ హోతి అననువజ్జో చ విఞ్ఞూనం, బహుఞ్చ పుఞ్ఞం పసవతి. కతమేసు ద్వీసు? మాతరి చ పితరి చ. ఇమేసు ఖో, భిక్ఖవే, ద్వీసు సమ్మాపటిపజ్జమానో పణ్డితో వియత్తో సప్పురిసో అక్ఖతం అనుపహతం అత్తానం పరిహరతి, అనవజ్జో చ హోతి అననువజ్జో చ విఞ్ఞూనం, బహుఞ్చ పుఞ్ఞం పసవతీ’’తి.

౧౩౮. ‘‘ద్వీసు, భిక్ఖవే, మిచ్ఛాపటిపజ్జమానో బాలో అబ్యత్తో అసప్పురిసో ఖతం ఉపహతం అత్తానం పరిహరతి, సావజ్జో చ హోతి సానువజ్జో చ విఞ్ఞూనం, బహుఞ్చ అపుఞ్ఞం పసవతి. కతమేసు ద్వీసు? తథాగతే చ తథాగతసావకే చ. ఇమేసు ఖో, భిక్ఖవే, మిచ్ఛాపటిపజ్జమానో బాలో అబ్యత్తో అసప్పురిసో ఖతం ఉపహతం అత్తానం పరిహరతి, సావజ్జో చ హోతి సానువజ్జో చ విఞ్ఞూనం, బహుఞ్చ అపుఞ్ఞం పసవతీతి.

‘‘ద్వీసు, భిక్ఖవే, సమ్మాపటిపజ్జమానో పణ్డితో వియత్తో సప్పురిసో అక్ఖతం అనుపహతం అత్తానం పరిహరతి, అనవజ్జో చ హోతి అననువజ్జో చ విఞ్ఞూనం, బహుఞ్చ పుఞ్ఞం పసవతి. కతమేసు ద్వీసు? తథాగతే చ తథాగతసావకే చ. ఇమేసు ఖో, భిక్ఖవే, ద్వీసు సమ్మాపటిపజ్జమానో పణ్డితో వియత్తో సప్పురిసో అక్ఖతం అనుపహతం అత్తానం పరిహరతి, అనవజ్జో చ హోతి అననువజ్జో చ విఞ్ఞూనం, బహుఞ్చ పుఞ్ఞం పసవతీ’’తి.

౧౩౯. ‘‘ద్వేమే, భిక్ఖవే, ధమ్మా. కతమే ద్వే? సచిత్తవోదానఞ్చ న చ కిఞ్చి లోకే ఉపాదియతి. ఇమే ఖో, భిక్ఖవే, ద్వే ధమ్మా’’తి.

౧౪౦. ‘‘ద్వేమే, భిక్ఖవే, ధమ్మా. కతమే ద్వే? కోధో చ ఉపనాహో చ. ఇమే ఖో, భిక్ఖవే, ద్వే ధమ్మా’’తి.

౧౪౧. ‘‘ద్వేమే, భిక్ఖవే, ధమ్మా. కతమే ద్వే? కోధవినయో చ ఉపనాహవినయో చ. ఇమే ఖో, భిక్ఖవే, ద్వే ధమ్మా’’తి.

ఆయాచనవగ్గో దుతియో.

(౧౩) ౩. దానవగ్గో

౧౪౨. ‘‘ద్వేమాని, భిక్ఖవే, దానాని. కతమాని ద్వే? ఆమిసదానఞ్చ ధమ్మదానఞ్చ. ఇమాని ఖో, భిక్ఖవే, ద్వే దానాని. ఏతదగ్గం, భిక్ఖవే, ఇమేసం ద్విన్నం దానానం యదిదం ధమ్మదాన’’న్తి.

౧౪౩. ‘‘ద్వేమే, భిక్ఖవే, యాగా. కతమే ద్వే? ఆమిసయాగో చ ధమ్మయాగో చ. ఇమే ఖో, భిక్ఖవే, ద్వే యాగా. ఏతదగ్గం, భిక్ఖవే, ఇమేసం ద్విన్నం యాగానం యదిదం ధమ్మయాగో’’తి.

౧౪౪. ‘‘ద్వేమే, భిక్ఖవే, చాగా. కతమే ద్వే? ఆమిసచాగో చ ధమ్మచాగో చ. ఇమే ఖో, భిక్ఖవే, ద్వే చాగా. ఏతదగ్గం, భిక్ఖవే, ఇమేసం ద్విన్నం చాగానం యదిదం ధమ్మచాగో’’తి.

౧౪౫. ‘‘ద్వేమే, భిక్ఖవే, పరిచ్చాగా. కతమే ద్వే? ఆమిసపరిచ్చాగో చ ధమ్మపరిచ్చాగో చ. ఇమే ఖో, భిక్ఖవే, ద్వే పరిచ్చాగా. ఏతదగ్గం, భిక్ఖవే, ఇమేసం ద్విన్నం పరిచ్చాగానం యదిదం ధమ్మపరిచ్చాగో’’తి.

౧౪౬. ‘‘ద్వేమే, భిక్ఖవే, భోగా. కతమే ద్వే? ఆమిసభోగో చ ధమ్మభోగో చ. ఇమే ఖో, భిక్ఖవే, ద్వే భోగా. ఏతదగ్గం, భిక్ఖవే, ఇమేసం ద్విన్నం భోగానం యదిదం ధమ్మభోగో’’తి.

౧౪౭. ‘‘ద్వేమే, భిక్ఖవే, సమ్భోగా. కతమే ద్వే? ఆమిససమ్భోగో చ ధమ్మసమ్భోగో చ. ఇమే ఖో, భిక్ఖవే, ద్వే సమ్భోగా. ఏతదగ్గం, భిక్ఖవే, ఇమేసం ద్విన్నం సమ్భోగానం యదిదం ధమ్మసమ్భోగో’’తి.

౧౪౮. ‘‘ద్వేమే, భిక్ఖవే, సంవిభాగా. కతమే ద్వే? ఆమిససంవిభాగో చ ధమ్మసంవిభాగో చ. ఇమే ఖో, భిక్ఖవే, ద్వే సంవిభాగా. ఏతదగ్గం, భిక్ఖవే, ఇమేసం ద్విన్నం సంవిభాగానం యదిదం ధమ్మసంవిభాగో’’తి.

౧౪౯. ‘‘ద్వేమే, భిక్ఖవే, సఙ్గహా. కతమే ద్వే? ఆమిససఙ్గహో చ ధమ్మసఙ్గహో చ. ఇమే ఖో, భిక్ఖవే, ద్వే సఙ్గహా. ఏతదగ్గం, భిక్ఖవే, ఇమేసం ద్విన్నం సఙ్గహానం యదిదం ధమ్మసఙ్గహో’’తి.

౧౫౦. ‘‘ద్వేమే, భిక్ఖవే, అనుగ్గహా. కతమే ద్వే? ఆమిసానుగ్గహో చ ధమ్మానుగ్గహో చ. ఇమే ఖో, భిక్ఖవే, ద్వే అనుగ్గహా. ఏతదగ్గం, భిక్ఖవే, ఇమేసం ద్విన్నం అనుగ్గహానం యదిదం ధమ్మానుగ్గహో’’తి.

౧౫౧. ‘‘ద్వేమా, భిక్ఖవే, అనుకమ్పా. కతమా ద్వే? ఆమిసానుకమ్పా చ ధమ్మానుకమ్పా చ. ఇమా ఖో, భిక్ఖవే, ద్వే అనుకమ్పా. ఏతదగ్గం, భిక్ఖవే, ఇమాసం ద్విన్నం అనుకమ్పానం యదిదం ధమ్మానుకమ్పా’’తి.

దానవగ్గో తతియో.

(౧౪) ౪. సన్థారవగ్గో

౧౫౨. ‘‘ద్వేమే, భిక్ఖవే, సన్థారా [సన్ధారా (క.)]. కతమే ద్వే? ఆమిససన్థారో చ ధమ్మసన్థారో చ. ఇమే ఖో, భిక్ఖవే, ద్వే సన్థారా. ఏతదగ్గం, భిక్ఖవే, ఇమేసం ద్విన్నం సన్థారానం యదిదం ధమ్మసన్థారో’’తి.

౧౫౩. ‘‘ద్వేమే, భిక్ఖవే, పటిసన్థారా [పటిసన్ధారా (క.)]. కతమే ద్వే? ఆమిసపటిసన్థారో చ ధమ్మపటిసన్థారో చ. ఇమే ఖో, భిక్ఖవే, ద్వే పటిసన్థారా. ఏతదగ్గం, భిక్ఖవే, ఇమేసం ద్విన్నం పటిసన్థారానం యదిదం ధమ్మపటిసన్థారో’’తి.

౧౫౪. ‘‘ద్వేమా, భిక్ఖవే, ఏసనా. కతమా ద్వే? ఆమిసేసనా చ ధమ్మేసనా చ. ఇమా ఖో, భిక్ఖవే, ద్వే ఏసనా. ఏతదగ్గం, భిక్ఖవే, ఇమాసం ద్విన్నం ఏసనానం యదిదం ధమ్మేసనా’’తి.

౧౫౫. ‘‘ద్వేమా, భిక్ఖవే, పరియేసనా. కతమా ద్వే? ఆమిసపరియేసనా చ ధమ్మపరియేసనా చ. ఇమా ఖో, భిక్ఖవే, ద్వే పరియేసనా. ఏతదగ్గం, భిక్ఖవే, ఇమాసం ద్విన్నం పరియేసనానం యదిదం ధమ్మపరియేసనా’’తి.

౧౫౬. ‘‘ద్వేమా, భిక్ఖవే, పరియేట్ఠియో. కతమా ద్వే? ఆమిసపరియేట్ఠి చ ధమ్మపరియేట్ఠి చ. ఇమా ఖో, భిక్ఖవే, ద్వే పరియేట్ఠియో. ఏతదగ్గం, భిక్ఖవే, ఇమాసం ద్విన్నం పరియేట్ఠీనం యదిదం ధమ్మపరియేట్ఠీ’’తి.

౧౫౭. ‘‘ద్వేమా, భిక్ఖవే, పూజా. కతమా ద్వే? ఆమిసపూజా చ ధమ్మపూజా చ. ఇమా ఖో భిక్ఖవే, ద్వే పూజా. ఏతదగ్గం, భిక్ఖవే, ఇమాసం ద్విన్నం పూజానం యదిదం ధమ్మపూజా’’తి.

౧౫౮. ‘‘ద్వేమాని, భిక్ఖవే, ఆతిథేయ్యాని. కతమాని ద్వే? ఆమిసాతిథేయ్యఞ్చ ధమ్మాతిథేయ్యఞ్చ. ఇమాని ఖో, భిక్ఖవే, ద్వే ఆతిథేయ్యాని. ఏతదగ్గం, భిక్ఖవే, ఇమేసం ద్విన్నం ఆతిథేయ్యానం యదిదం ధమ్మాతిథేయ్య’’న్తి.

౧౫౯. ‘‘ద్వేమా, భిక్ఖవే, ఇద్ధియో. కతమా ద్వే? ఆమిసిద్ధి చ ధమ్మిద్ధి చ. ఇమా ఖో, భిక్ఖవే, ద్వే ఇద్ధియో. ఏతదగ్గం, భిక్ఖవే, ఇమాసం ద్విన్నం ఇద్ధీనం యదిదం ధమ్మిద్ధీ’’తి.

౧౬౦. ‘‘ద్వేమా, భిక్ఖవే, వుద్ధియో. కతమా ద్వే? ఆమిసవుద్ధి చ ధమ్మవుద్ధి చ. ఇమా ఖో, భిక్ఖవే, ద్వే వుద్ధియో. ఏతదగ్గం, భిక్ఖవే, ఇమాసం ద్విన్నం వుద్ధీనం యదిదం ధమ్మవుద్ధీ’’తి.

౧౬౧. ‘‘ద్వేమాని, భిక్ఖవే, రతనాని. కతమాని ద్వే? ఆమిసరతనఞ్చ ధమ్మరతనఞ్చ. ఇమాని ఖో, భిక్ఖవే, ద్వే రతనాని. ఏతదగ్గం, భిక్ఖవే, ఇమేసం ద్విన్నం రతనానం యదిదం ధమ్మరతన’’న్తి.

౧౬౨. ‘‘ద్వేమే, భిక్ఖవే, సన్నిచయా. కతమే ద్వే? ఆమిససన్నిచయో చ ధమ్మసన్నిచయో చ. ఇమే ఖో, భిక్ఖవే, ద్వే సన్నిచయా. ఏతదగ్గం, భిక్ఖవే, ఇమేసం ద్విన్నం సన్నిచయానం యదిదం ధమ్మసన్నిచయో’’తి.

౧౬౩. ‘‘ద్వేమాని, భిక్ఖవే, వేపుల్లాని. కతమాని ద్వే? ఆమిసవేపుల్లఞ్చ ధమ్మవేపుల్లఞ్చ. ఇమాని ఖో, భిక్ఖవే, ద్వే వేపుల్లాని. ఏతదగ్గం, భిక్ఖవే, ఇమేసం ద్విన్నం వేపుల్లానం యదిదం ధమ్మవేపుల్ల’’న్తి.

సన్థారవగ్గో చతుత్థో.

(౧౫) ౫. సమాపత్తివగ్గో

౧౬౪. ‘‘ద్వేమే, భిక్ఖవే, ధమ్మా. కతమే ద్వే? సమాపత్తికుసలతా చ సమాపత్తివుట్ఠానకుసలతా చ. ఇమే ఖో, భిక్ఖవే, ద్వే ధమ్మా’’తి.

౧౬౫. ‘‘ద్వేమే, భిక్ఖవే, ధమ్మా. కతమే ద్వే? అజ్జవఞ్చ మద్దవఞ్చ. ఇమే ఖో, భిక్ఖవే, ద్వే ధమ్మా’’.

౧౬౬. ‘‘ద్వేమే, భిక్ఖవే, ధమ్మా. కతమే ద్వే? ఖన్తి చ సోరచ్చఞ్చ. ఇమే ఖో, భిక్ఖవే, ద్వే ధమ్మా’’.

౧౬౭. ‘‘ద్వేమే, భిక్ఖవే, ధమ్మా. కతమే ద్వే? సాఖల్యఞ్చ పటిసన్థారో చ. ఇమే ఖో, భిక్ఖవే, ద్వే ధమ్మా’’.

౧౬౮. ‘ద్వేమే, భిక్ఖవే, ధమ్మా. కతమే ద్వే? అవిహింసా చ సోచేయ్యఞ్చ. ఇమే ఖో, భిక్ఖవే, ద్వే ధమ్మా’’.

౧౬౯. ‘‘ద్వేమే, భిక్ఖవే, ధమ్మా. కతమే ద్వే? ఇన్ద్రియేసు అగుత్తద్వారతా చ భోజనే అమత్తఞ్ఞుతా చ. ఇమే ఖో, భిక్ఖవే, ద్వే ధమ్మా’’.

౧౭౦. ‘‘ద్వేమే, భిక్ఖవే, ధమ్మా. కతమే ద్వే? ఇన్ద్రియేసు గుత్తద్వారతా చ భోజనే మత్తఞ్ఞుతా చ. ఇమే ఖో, భిక్ఖవే, ద్వే ధమ్మా’’.

౧౭౧. ‘‘ద్వేమే, భిక్ఖవే, ధమ్మా. కతమే ద్వే? పటిసఙ్ఖానబలఞ్చ భావనాబలఞ్చ. ఇమే ఖో, భిక్ఖవే, ద్వే ధమ్మా’’.

౧౭౨. ‘‘ద్వేమే, భిక్ఖవే, ధమ్మా. కతమే ద్వే? సతిబలఞ్చ సమాధిబలఞ్చ. ఇమే ఖో, భిక్ఖవే, ద్వే ధమ్మా’’.

౧౭౩. ‘‘ద్వేమే, భిక్ఖవే, ధమ్మా. కతమే ద్వే? సమథో చ విపస్సనా చ. ఇమే ఖో, భిక్ఖవే, ద్వే ధమ్మా’’.

౧౭౪. ‘‘ద్వేమే, భిక్ఖవే, ధమ్మా. కతమే ద్వే? సీలవిపత్తి చ దిట్ఠివిపత్తి చ. ఇమే ఖో, భిక్ఖవే, ద్వే ధమ్మా’’.

౧౭౫. ‘‘ద్వేమే, భిక్ఖవే, ధమ్మా. కతమే ద్వే? సీలసమ్పదా చ దిట్ఠిసమ్పదా చ. ఇమే ఖో, భిక్ఖవే, ద్వే ధమ్మా’’.

౧౭౬. ‘‘ద్వేమే, భిక్ఖవే, ధమ్మా. కతమే ద్వే? సీలవిసుద్ధి చ దిట్ఠివిసుద్ధి చ. ఇమే ఖో, భిక్ఖవే, ద్వే ధమ్మా’’.

౧౭౭. ‘‘ద్వేమే, భిక్ఖవే, ధమ్మా. కతమే ద్వే? దిట్ఠివిసుద్ధి చ యథాదిట్ఠిస్స చ పధానం. ఇమే ఖో, భిక్ఖవే, ద్వే ధమ్మా’’.

౧౭౮. ‘‘ద్వేమే, భిక్ఖవే, ధమ్మా. కతమే ద్వే? అసన్తుట్ఠితా చ కుసలేసు ధమ్మేసు, అప్పటివానితా చ పధానస్మిం. ఇమే ఖో, భిక్ఖవే, ద్వే ధమ్మా’’.

౧౭౯. ‘‘ద్వేమే, భిక్ఖవే, ధమ్మా. కతమే ద్వే? ముట్ఠస్సచ్చఞ్చ అసమ్పజఞ్ఞఞ్చ. ఇమే ఖో, భిక్ఖవే, ద్వే ధమ్మా’’.

౧౮౦. ‘‘ద్వేమే, భిక్ఖవే, ధమ్మా. కతమే ద్వే? సతి చ సమ్పజఞ్ఞఞ్చ. ఇమే ఖో, భిక్ఖవే, ద్వే ధమ్మా’’తి.

సమాపత్తివగ్గో పఞ్చమో.

తతియో పణ్ణాసకో సమత్తో.