౯. పరిక్కమనసుత్తం

౧౭౫. ‘‘సపరిక్కమనో అయం, భిక్ఖవే, ధమ్మో, నాయం ధమ్మో అపరిక్కమనో. కథఞ్చ, భిక్ఖవే, సపరిక్కమనో అయం ధమ్మో, నాయం ధమ్మో అపరిక్కమనో? పాణాతిపాతిస్స, భిక్ఖవే, పాణాతిపాతా వేరమణీ పరిక్కమనం హోతి. అదిన్నాదాయిస్స, భిక్ఖవే, అదిన్నాదానా వేరమణీ పరిక్కమనం హోతి. కామేసుమిచ్ఛాచారిస్స, భిక్ఖవే, కామేసుమిచ్ఛాచారా వేరమణీ పరిక్కమనం హోతి. ముసావాదిస్స, భిక్ఖవే, ముసావాదా వేరమణీ పరిక్కమనం హోతి. పిసుణవాచస్స, భిక్ఖవే, పిసుణాయ వాచాయ వేరమణీ పరిక్కమనం హోతి. ఫరుసవాచస్స, భిక్ఖవే, ఫరుసాయ వాచాయ వేరమణీ పరిక్కమనం హోతి. సమ్ఫప్పలాపిస్స, భిక్ఖవే, సమ్ఫప్పలాపా వేరమణీ పరిక్కమనం హోతి. అభిజ్ఝాలుస్స, భిక్ఖవే, అనభిజ్ఝా పరిక్కమనం హోతి. బ్యాపన్నచిత్తస్స [బ్యాపాదస్స (సీ. పీ. క.), బ్యాపన్నస్స (స్యా.)], భిక్ఖవే, అబ్యాపాదో పరిక్కమనం హోతి. మిచ్ఛాదిట్ఠిస్స, భిక్ఖవే, సమ్మాదిట్ఠి పరిక్కమనం హోతి. ఏవం ఖో, భిక్ఖవే, సపరిక్కమనో అయం ధమ్మో, నాయం ధమ్మో అపరిక్కమనో’’తి. నవమం.