(౧౪) ౪. సాధువగ్గో

౧. సాధుసుత్తం

౧౩౪. [అ. ని. ౧౦.౧౭౮] ‘‘సాధుఞ్చ వో, భిక్ఖవే, దేసేస్సామి అసాధుఞ్చ. తం సుణాథ, సాధుకం మనసి కరోథ; భాసిస్సామీ’’తి. ‘‘ఏవం, భన్తే’’తి ఖో తే భిక్ఖూ భగవతో పచ్చస్సోసుం. భగవా ఏతదవోచ –

‘‘కతమఞ్చ, భిక్ఖవే, అసాధు? మిచ్ఛాదిట్ఠి, మిచ్ఛాసఙ్కప్పో, మిచ్ఛావాచా, మిచ్ఛాకమ్మన్తో, మిచ్ఛాఆజీవో, మిచ్ఛావాయామో, మిచ్ఛాసతి, మిచ్ఛాసమాధి, మిచ్ఛాఞాణం, మిచ్ఛావిముత్తి – ఇదం వుచ్చతి, భిక్ఖవే, అసాధు. కతమఞ్చ, భిక్ఖవే, సాధు? సమ్మాదిట్ఠి, సమ్మాసఙ్కప్పో, సమ్మావాచా సమ్మాకమ్మన్తో, సమ్మాఆజీవో, సమ్మావాయామో, సమ్మాసతి, సమ్మాసమాధి, సమ్మాఞాణం, సమ్మావిముత్తి – ఇదం వుచ్చతి, భిక్ఖవే, సాధూ’’తి. పఠమం.

౨. అరియధమ్మసుత్తం

౧౩౫. ‘‘అరియధమ్మఞ్చ వో, భిక్ఖవే, దేసేస్సామి అనరియధమ్మఞ్చ. తం సుణాథ…పే… కతమో చ, భిక్ఖవే, అనరియో ధమ్మో? మిచ్ఛాదిట్ఠి…పే… మిచ్ఛావిముత్తి – అయం వుచ్చతి, భిక్ఖవే, అనరియో ధమ్మో. కతమో చ, భిక్ఖవే, అరియో ధమ్మో? సమ్మాదిట్ఠి…పే… సమ్మావిముత్తి – అయం వుచ్చతి, భిక్ఖవే, అరియో ధమ్మో’’తి. దుతియం.

౩. అకుసలసుత్తం

౧౩౬. ‘‘అకుసలఞ్చ వో, భిక్ఖవే, దేసేస్సామి కుసలఞ్చ. తం సుణాథ …పే… కతమఞ్చ, భిక్ఖవే, అకుసలం? మిచ్ఛాదిట్ఠి…పే… మిచ్ఛావిముత్తి – ఇదం వుచ్చతి, భిక్ఖవే, అకుసలం. కతమఞ్చ, భిక్ఖవే, కుసలం? సమ్మాదిట్ఠి…పే… సమ్మావిముత్తి – ఇదం వుచ్చతి, భిక్ఖవే, కుసల’’న్తి. తతియం.

౪. అత్థసుత్తం

౧౩౭. ‘‘అత్థఞ్చ వో, భిక్ఖవే, దేసేస్సామి అనత్థఞ్చ. తం సుణాథ…పే… కతమో చ, భిక్ఖవే, అనత్థో? మిచ్ఛాదిట్ఠి …పే… మిచ్ఛావిముత్తి – అయం వుచ్చతి, భిక్ఖవే, అనత్థో. కతమో చ, భిక్ఖవే, అత్థో? సమ్మాదిట్ఠి…పే… సమ్మావిముత్తి – అయం వుచ్చతి, భిక్ఖవే, అత్థో’’తి. చతుత్థం.

౫. ధమ్మసుత్తం

౧౩౮. ‘‘ధమ్మఞ్చ వో, భిక్ఖవే, దేసేస్సామి అధమ్మఞ్చ. తం సుణాథ…పే… కతమో చ, భిక్ఖవే, అధమ్మో? మిచ్ఛాదిట్ఠి…పే… మిచ్ఛావిముత్తి – అయం వుచ్చతి, భిక్ఖవే, అధమ్మో. కతమో చ, భిక్ఖవే, ధమ్మో? సమ్మాదిట్ఠి…పే… సమ్మావిముత్తి – అయం వుచ్చతి, భిక్ఖవే, ధమ్మో’’తి. పఞ్చమం.

౬. సాసవసుత్తం

౧౩౯. ‘‘సాసవఞ్చ వో, భిక్ఖవే, ధమ్మం దేసేస్సామి అనాసవఞ్చ. తం సుణాథ…పే… కతమో చ, భిక్ఖవే, సాసవో ధమ్మో? మిచ్ఛాదిట్ఠి…పే… మిచ్ఛావిముత్తి – అయం వుచ్చతి, భిక్ఖవే, సాసవో ధమ్మో. కతమో చ, భిక్ఖవే, అనాసవో ధమ్మో? సమ్మాదిట్ఠి…పే… సమ్మావిముత్తి – అయం వుచ్చతి, భిక్ఖవే, అనాసవో ధమ్మో’’తి. ఛట్ఠం.

౭. సావజ్జసుత్తం

౧౪౦. ‘‘సావజ్జఞ్చ వో, భిక్ఖవే, ధమ్మం దేసేస్సామి అనవజ్జఞ్చ. తం సుణాథ…పే… కతమో చ, భిక్ఖవే, సావజ్జో ధమ్మో? మిచ్ఛాదిట్ఠి…పే… మిచ్ఛావిముత్తి – అయం వుచ్చతి, భిక్ఖవే, సావజ్జో ధమ్మో. కతమో చ, భిక్ఖవే, అనవజ్జో ధమ్మో? సమ్మాదిట్ఠి…పే… సమ్మావిముత్తి – అయం వుచ్చతి, భిక్ఖవే, అనవజ్జో ధమ్మో’’తి. సత్తమం.

౮. తపనీయసుత్తం

౧౪౧. ‘‘తపనీయఞ్చ వో, భిక్ఖవే, ధమ్మం దేసేస్సామి అతపనీయఞ్చ. తం సుణాథ…పే… కతమో చ, భిక్ఖవే, తపనీయో ధమ్మో? మిచ్ఛాదిట్ఠి…పే… మిచ్ఛావిముత్తి – అయం వుచ్చతి, భిక్ఖవే, తపనీయో ధమ్మో. కతమో చ, భిక్ఖవే, అతపనీయో ధమ్మో? సమ్మాదిట్ఠి…పే… సమ్మావిముత్తి – అయం వుచ్చతి, భిక్ఖవే, అతపనీయో ధమ్మో’’తి. అట్ఠమం.

౯. ఆచయగామిసుత్తం

౧౪౨. ‘‘ఆచయగామిఞ్చ వో, భిక్ఖవే, ధమ్మం దేసేస్సామి అపచయగామిఞ్చ. తం సుణాథ…పే… కతమో చ, భిక్ఖవే, ఆచయగామీ ధమ్మో? మిచ్ఛాదిట్ఠి…పే… మిచ్ఛావిముత్తి – అయం వుచ్చతి, భిక్ఖవే, ఆచయగామీ ధమ్మో. కతమో చ, భిక్ఖవే, అపచయగామీ ధమ్మో? సమ్మాదిట్ఠి…పే… సమ్మావిముత్తి – అయం వుచ్చతి, భిక్ఖవే, అపచయగామీ ధమ్మో’’తి. నవమం.

౧౦. దుక్ఖుద్రయసుత్తం

౧౪౩. ‘‘దుక్ఖుద్రయఞ్చ వో, భిక్ఖవే, ధమ్మం దేసేస్సామి సుఖుద్రయఞ్చ. తం సుణాథ…పే… కతమో చ, భిక్ఖవే, దుక్ఖుద్రయో ధమ్మో? మిచ్ఛాదిట్ఠి…పే… మిచ్ఛావిముత్తి – అయం వుచ్చతి, భిక్ఖవే, దుక్ఖుద్రయో ధమ్మో. కతమో చ, భిక్ఖవే, సుఖుద్రయో ధమ్మో? సమ్మాదిట్ఠి…పే… సమ్మావిముత్తి – అయం వుచ్చతి, భిక్ఖవే, సుఖుద్రయో ధమ్మో’’తి. దసమం.

౧౧. దుక్ఖవిపాకసుత్తం

౧౪౪. ‘‘దుక్ఖవిపాకఞ్చ వో, భిక్ఖవే, ధమ్మం దేసేస్సామి సుఖవిపాకఞ్చ. తం సుణాథ…పే… కతమో చ, భిక్ఖవే, దుక్ఖవిపాకో ధమ్మో? మిచ్ఛాదిట్ఠి…పే… మిచ్ఛావిముత్తి – అయం వుచ్చతి, భిక్ఖవే, దుక్ఖవిపాకో ధమ్మో. కతమో చ, భిక్ఖవే, సుఖవిపాకో ధమ్మో? సమ్మాదిట్ఠి…పే… సమ్మావిముత్తి – అయం వుచ్చతి, భిక్ఖవే, సుఖవిపాకో ధమ్మో’’తి. ఏకాదసమం.

సాధువగ్గో చతుత్థో.