౯. పఠమఆనన్దసుత్తం

౩౯. అథ ఖో ఆయస్మా ఆనన్దో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో ఆయస్మా ఆనన్దో భగవన్తం ఏతదవోచ – ‘‘‘సఙ్ఘభేదో సఙ్ఘభేదో’తి, భన్తే, వుచ్చతి. కిత్తావతా ను ఖో, భన్తే, సఙ్ఘో భిన్నో హోతీ’’తి? ‘‘ఇధానన్ద, భిక్ఖూ అధమ్మం ధమ్మోతి దీపేన్తి, ధమ్మం అధమ్మోతి దీపేన్తి, అవినయం వినయోతి దీపేన్తి…పే… పఞ్ఞత్తం తథాగతేన అపఞ్ఞత్తం తథాగతేనాతి దీపేన్తి. తే ఇమేహి దసహి వత్థూహి అవకస్సన్తి అపకస్సన్తి ఆవేని కమ్మాని కరోన్తి ఆవేని పాతిమోక్ఖం ఉద్దిసన్తి. ఏత్తావతా ఖో, ఆనన్ద, సఙ్ఘో భిన్నో హోతీ’’తి.

‘‘సమగ్గం పన, భన్తే, సఙ్ఘం భిన్దిత్వా కిం సో పసవతీ’’తి? ‘‘కప్పట్ఠికం, ఆనన్ద, కిబ్బిసం పసవతీ’’తి. ‘‘కిం పన, భన్తే, కప్పట్ఠికం కిబ్బిస’’న్తి? ‘‘కప్పం, ఆనన్ద, నిరయమ్హి పచ్చతీతి –

‘‘ఆపాయికో నేరయికో, కప్పట్ఠో సఙ్ఘభేదకో;

వగ్గరతో అధమ్మట్ఠో, యోగక్ఖేమా పధంసతి;

సఙ్ఘం సమగ్గం భిన్దిత్వా [భేత్వాన (సీ. స్యా.), భిత్వాన (క.) చూళవ. ౩౫౪; ఇతివు. ౧౮; కథావ. ౬౫౭] కప్పం నిరయమ్హి పచ్చతీ’’తి. నవమం;