౬. సామణేరసుత్తం

౩౬. ‘‘కతిహి ను ఖో, భన్తే, ధమ్మేహి సమన్నాగతేన భిక్ఖునా సామణేరో ఉపట్ఠాపేతబ్బో’’తి? ‘‘దసహి ఖో, ఉపాలి, ధమ్మేహి సమన్నాగతేన భిక్ఖునా సామణేరో ఉపట్ఠాపేతబ్బో. కతమేహి దసహి? ఇధుపాలి, భిక్ఖు సీలవా హోతి…పే… సమాదాయ సిక్ఖతి సిక్ఖాపదేసు; బహుస్సుతో హోతి…పే… దిట్ఠియా సుప్పటివిద్ధా; పాతిమోక్ఖం ఖో పనస్స విత్థారేన స్వాగతం హోతి సువిభత్తం సుప్పవత్తం సువినిచ్ఛితం సుత్తసో అనుబ్యఞ్జనసో; పటిబలో హోతి గిలానం ఉపట్ఠాతుం వా ఉపట్ఠాపేతుం వా; పటిబలో హోతి అనభిరతిం వూపకాసేతుం వా వూపకాసాపేతుం వా; పటిబలో హోతి ఉప్పన్నం కుక్కుచ్చం ధమ్మతో వినోదేతుం; పటిబలో హోతి ఉప్పన్నం దిట్ఠిగతం ధమ్మతో వివేచేతుం; పటిబలో హోతి అధిసీలే సమాదపేతుం; పటిబలో హోతి అధిచిత్తే సమాదపేతుం; పటిబలో హోతి అధిపఞ్ఞాయ సమాదపేతుం. ఇమేహి ఖో, ఉపాలి, దసహి ధమ్మేహి సమన్నాగతేన భిక్ఖునా సామణేరో ఉపట్ఠాపేతబ్బో’’తి. ఛట్ఠం.