౧౯. కాయగతాసతివగ్గో

౫౬౩. ‘‘యస్స కస్సచి, భిక్ఖవే, మహాసముద్దో చేతసా ఫుటో అన్తోగధా తస్స కున్నదియో యా కాచి సముద్దఙ్గమా; ఏవమేవం, భిక్ఖవే, యస్స కస్సచి కాయగతా సతి భావితా బహులీకతా అన్తోగధా తస్స కుసలా ధమ్మా యే కేచి విజ్జాభాగియా’’తి.

౫౬౪-౫౭౦. ‘‘ఏకధమ్మో, భిక్ఖవే, భావితో బహులీకతో మహతో సంవేగాయ సంవత్తతి… మహతో అత్థాయ సంవత్తతి… మహతో యోగక్ఖేమాయ సంవత్తతి… సతిసమ్పజఞ్ఞాయ సంవత్తతి… ఞాణదస్సనప్పటిలాభాయ సంవత్తతి… దిట్ఠధమ్మసుఖవిహారాయ సంవత్తతి… విజ్జావిముత్తిఫలసచ్ఛికిరియాయ సంవత్తతి. కతమో ఏకధమ్మో? కాయగతా సతి. అయం ఖో, భిక్ఖవే, ఏకధమ్మో భావితో బహులీకతో మహతో సంవేగాయ సంవత్తతి… మహతో అత్థాయ సంవత్తతి… మహతో యోగక్ఖేమాయ సంవత్తతి… సతిసమ్పజఞ్ఞాయ సంవత్తతి… ఞాణదస్సనప్పటిలాభాయ సంవత్తతి… దిట్ఠధమ్మసుఖవిహారాయ సంవత్తతి… విజ్జావిముత్తిఫలసచ్ఛికిరియాయ సంవత్తతీ’’తి.

౫౭౧. ‘‘ఏకధమ్మే, భిక్ఖవే, భావితే బహులీకతే కాయోపి పస్సమ్భతి, చిత్తమ్పి పస్సమ్భతి, వితక్కవిచారాపి వూపసమ్మన్తి, కేవలాపి విజ్జాభాగియా ధమ్మా భావనాపారిపూరిం గచ్ఛన్తి. కతమస్మిం ఏకధమ్మే? కాయగతాయ సతియా. ఇమస్మిం ఖో, భిక్ఖవే, ఏకధమ్మే భావితే బహులీకతే కాయోపి పస్సమ్భతి, చిత్తమ్పి పస్సమ్భతి, వితక్కవిచారాపి వూపసమ్మన్తి, కేవలాపి విజ్జాభాగియా ధమ్మా భావనాపారిపూరిం గచ్ఛన్తీ’’తి.

౫౭౨. ‘‘ఏకధమ్మే, భిక్ఖవే, భావితే బహులీకతే అనుప్పన్నా చేవ అకుసలా ధమ్మా నుప్పజ్జన్తి, ఉప్పన్నా చ అకుసలా ధమ్మా పహీయన్తి. కతమస్మిం ఏకధమ్మే? కాయగతాయ సతియా. ఇమస్మిం ఖో, భిక్ఖవే, ఏకధమ్మే భావితే బహులీకతే అనుప్పన్నా చేవ అకుసలా ధమ్మా నుప్పజ్జన్తి, ఉప్పన్నా చ అకుసలా ధమ్మా పహీయన్తీ’’తి.

౫౭౩. ‘‘ఏకధమ్మే, భిక్ఖవే, భావితే బహులీకతే అనుప్పన్నా చేవ కుసలా ధమ్మా ఉప్పజ్జన్తి, ఉప్పన్నా చ కుసలా ధమ్మా భియ్యోభావాయ వేపుల్లాయ సంవత్తన్తి. కతమస్మిం ఏకధమ్మే? కాయగతాయ సతియా. ఇమస్మిం ఖో, భిక్ఖవే, ఏకధమ్మే భావితే బహులీకతే అనుప్పన్నా చేవ కుసలా ధమ్మా ఉప్పజ్జన్తి, ఉప్పన్నా చ కుసలా ధమ్మా భియ్యోభావాయ వేపుల్లాయ సంవత్తన్తీ’’తి.

౫౭౪. ‘‘ఏకధమ్మే, భిక్ఖవే, భావితే బహులీకతే అవిజ్జా పహీయతి, విజ్జా ఉప్పజ్జతి, అస్మిమానో పహీయతి, అనుసయా సముగ్ఘాతం గచ్ఛన్తి, సంయోజనా పహీయన్తి. కతమస్మిం ఏకధమ్మే? కాయగతాయ సతియా. ఇమస్మిం ఖో, భిక్ఖవే, ఏకధమ్మే భావితే బహులీకతే అవిజ్జా పహీయతి, విజ్జా ఉప్పజ్జతి, అస్మిమానో పహీయతి, అనుసయా సముగ్ఘాతం గచ్ఛన్తి, సంయోజనా పహీయన్తీ’’తి.

౫౭౫-౫౭౬. ‘‘ఏకధమ్మో, భిక్ఖవే, భావితో బహులీకతో పఞ్ఞాపభేదాయ సంవత్తతి… అనుపాదాపరినిబ్బానాయ సంవత్తతి. కతమో ఏకధమ్మో? కాయగతా సతి. అయం ఖో, భిక్ఖవే, ఏకధమ్మో భావితో బహులీకతో పఞ్ఞాపభేదాయ సంవత్తతి… అనుపాదాపరినిబ్బానాయ సంవత్తతీ’’తి.

౫౭౭-౫౭౯. ‘‘ఏకధమ్మే, భిక్ఖవే, భావితే బహులీకతే అనేకధాతుపటివేధో హోతి… నానాధాతుపటివేధో హోతి… అనేకధాతుపటిసమ్భిదా హోతి. కతమస్మిం ఏకధమ్మే? కాయగతాయ సతియా. ఇమస్మిం ఖో, భిక్ఖవే, ఏకధమ్మే భావితే బహులీకతే అనేకధాతుపటివేధో హోతి… నానాధాతుపటివేధో హోతి… అనేకధాతుపటిసమ్భిదా హోతీ’’తి.

౫౮౦-౫౮౩. ‘‘ఏకధమ్మో, భిక్ఖవే, భావితో బహులీకతో సోతాపత్తిఫలసచ్ఛికిరియాయ సంవత్తతి… సకదాగామిఫలసచ్ఛికిరియాయ సంవత్తతి… అనాగామిఫలసచ్ఛికిరియాయ సంవత్తతి… అరహత్తఫలసచ్ఛికిరియాయ సంవత్తతి. కతమో ఏకధమ్మో? కాయగతా సతి. అయం ఖో, భిక్ఖవే, ఏకధమ్మో భావితో బహులీకతో సోతాపత్తిఫలసచ్ఛికిరియాయ సంవత్తతి… సకదాగామిఫలసచ్ఛికిరియాయ సంవత్తతి… అనాగామిఫలసచ్ఛికిరియాయ సంవత్తతి… అరహత్తఫలసచ్ఛికిరియాయ సంవత్తతీ’’తి.

౫౮౪-౫౯౯. ‘‘ఏకధమ్మో, భిక్ఖవే, భావితో బహులీకతో పఞ్ఞాపటిలాభాయ సంవత్తతి… పఞ్ఞావుద్ధియా సంవత్తతి… పఞ్ఞావేపుల్లాయ సంవత్తతి… మహాపఞ్ఞతాయ సంవత్తతి… పుథుపఞ్ఞతాయ సంవత్తతి… విపులపఞ్ఞతాయ సంవత్తతి… గమ్భీరపఞ్ఞతాయ సంవత్తతి… అసామన్తపఞ్ఞతాయ [అసమత్థపఞ్ఞతాయ (స్యా. కం.), అసమత్తపఞ్ఞతాయ (క.), అసమన్తపఞ్ఞతాయ (టీకా) పటి. మ. అట్ఠ. ౨.౩.౧ పస్సితబ్బం] సంవత్తతి… భూరిపఞ్ఞతాయ సంవత్తతి… పఞ్ఞాబాహుల్లాయ సంవత్తతి… సీఘపఞ్ఞతాయ సంవత్తతి… లహుపఞ్ఞతాయ సంవత్తతి… హాసపఞ్ఞతాయ [హాసుపఞ్ఞతాయ (సీ. పీ.)] సంవత్తతి… జవనపఞ్ఞతాయ సంవత్తతి… తిక్ఖపఞ్ఞతాయ సంవత్తతి… నిబ్బేధికపఞ్ఞతాయ సంవత్తతి. కతమో ఏకధమ్మో? కాయగతా సతి. అయం ఖో, భిక్ఖవే, ఏకధమ్మో భావితో బహులీకతో పఞ్ఞాపటిలాభాయ సంవత్తతి… పఞ్ఞావుద్ధియా సంవత్తతి… పఞ్ఞావేపుల్లాయ సంవత్తతి… మహాపఞ్ఞతాయ సంవత్తతి… పుథుపఞ్ఞతాయ సంవత్తతి… విపులపఞ్ఞతాయ సంవత్తతి… గమ్భీరపఞ్ఞతాయ సంవత్తతి… అసామన్తపఞ్ఞతాయ సంవత్తతి… భూరిపఞ్ఞతాయ సంవత్తతి… పఞ్ఞాబాహుల్లాయ సంవత్తతి… సీఘపఞ్ఞతాయ సంవత్తతి… లహుపఞ్ఞతాయ సంవత్తతి… హాసపఞ్ఞతాయ సంవత్తతి… జవనపఞ్ఞతాయ సంవత్తతి… తిక్ఖపఞ్ఞతాయ సంవత్తతి… నిబ్బేధికపఞ్ఞతాయ సంవత్తతీ’’తి.

కాయగతాసతివగ్గో ఏకూనవీసతిమో.