கா³தா²ஸங்க³ணிகம்

1. ஸத்தனக³ரேஸு பஞ்ஞத்தஸிக்கா²பத³ம்

335. ஏகம்ஸம் சீவரம் கத்வா, பக்³க³ண்ஹித்வான அஞ்ஜலிம்;

ஆஸீஸமானரூபோவ [ஆஸிம்ஸமானரூபோவ (ஸீ. ஸ்யா.)], கிஸ்ஸ த்வம் இத⁴ மாக³தோ.

த்³வீஸு வினயேஸு யே பஞ்ஞத்தா;

உத்³தே³ஸம் ஆக³ச்ச²ந்தி உபோஸதே²ஸு;

கதி தே ஸிக்கா²பதா³ ஹோந்தி;

கதிஸு நக³ரேஸு பஞ்ஞத்தா.

ப⁴த்³த³கோ தே உம்மங்கோ³, யோனிஸோ பரிபுச்ச²ஸி;

தக்³க⁴ தே அஹமக்கி²ஸ்ஸம், யதா²ஸி குஸலோ ததா².

த்³வீஸு வினயேஸு யே பஞ்ஞத்தா;

உத்³தே³ஸம் ஆக³ச்ச²ந்தி உபோஸதே²ஸு;

அட்³டு⁴ட்³ட⁴ஸதானி தே ஹோந்தி;

ஸத்தஸு நக³ரேஸு பஞ்ஞத்தா.

கதமேஸு ஸத்தஸு நக³ரேஸு பஞ்ஞத்தா;

இங்க⁴ மே த்வம் ப்³யாகர நம் [இங்க⁴ மே தம் ப்³யாகர (க.)];

தம் வசனபத²ம் [தவ வசனபத²ம் (ஸ்யா.)] நிஸாமயித்வா;

படிபஜ்ஜேம ஹிதாய நோ ஸியா.

வேஸாலியம் ராஜக³ஹே, ஸாவத்தி²யஞ்ச ஆளவியம்;

கோஸம்பி³யஞ்ச ஸக்கேஸு, ப⁴க்³கே³ஸு சேவ பஞ்ஞத்தா.

கதி வேஸாலியம் பஞ்ஞத்தா, கதி ராஜக³ஹே கதா;

ஸாவத்தி²யம் கதி ஹோந்தி, கதி ஆளவியம் கதா.

கதி கோஸம்பி³யம் பஞ்ஞத்தா, கதி ஸக்கேஸு வுச்சந்தி;

கதி ப⁴க்³கே³ஸு பஞ்ஞத்தா, தம் மே அக்கா²ஹி புச்சி²தோ.

த³ஸ வேஸாலியம் பஞ்ஞத்தா, ஏகவீஸ ராஜக³ஹே கதா;

ச²ஊன தீணிஸதானி, ஸப்³பே³ ஸாவத்தி²யம் கதா.

ச² ஆளவியம் பஞ்ஞத்தா, அட்ட² கோஸம்பி³யம் கதா;

அட்ட² ஸக்கேஸு வுச்சந்தி, தயோ ப⁴க்³கே³ஸு பஞ்ஞத்தா.

யே வேஸாலியம் பஞ்ஞத்தா, தே ஸுணோஹி யதா²தத²ம் [யதா²கத²ம் (ஸீ. ஸ்யா. ஏவமுபரிபி)];

மேது²னவிக்³க³ஹுத்தரி, அதிரேகஞ்ச காளகம்.

பூ⁴தம் பரம்பரப⁴த்தம், த³ந்தபோனேன [த³ந்தபோணேன (க.)] அசேலகோ;

பி⁴க்கு²னீஸு ச அக்கோஸோ, த³ஸேதே வேஸாலியம் கதா.

யே ராஜக³ஹே பஞ்ஞத்தா, தே ஸுணோஹி யதா²தத²ம்;

அதி³ன்னாதா³னம் ராஜக³ஹே, த்³வே அனுத்³த⁴ம்ஸனா த்³வேபி ச பே⁴தா³.

அந்தரவாஸகம் ரூபியம் ஸுத்தம், உஜ்ஜா²பனேன ச பாசிதபிண்ட³ம்;

க³ணபோ⁴ஜனம் விகாலே ச, சாரித்தம் நஹானம் ஊனவீஸதி.

சீவரம் த³த்வா வோஸாஸந்தி, ஏதே ராஜக³ஹே கதா;

கி³ரக்³க³சரியா தத்தே²வ, ச²ந்த³தா³னேன ஏகவீஸதி.

யே ஸாவத்தி²யம் பஞ்ஞத்தா, தே ஸுணோஹி யதா²தத²ம்;

பாராஜிகானி சத்தாரி, ஸங்கா⁴தி³ஸேஸா ப⁴வந்தி ஸோளஸ.

அனியதா ச த்³வே ஹோந்தி, நிஸ்ஸக்³கி³யா சதுவீஸதி;

ச²பஞ்ஞாஸஸதஞ்சேவ, கு²த்³த³கானி பவுச்சந்தி.

த³ஸயேவ ச கா³ரய்ஹா, த்³வேஸத்ததி ச ஸேகி²யா;

ச²ஊன தீணிஸதானி, ஸப்³பே³ ஸாவத்தி²யம் கதா.

யே ஆளவியம் பஞ்ஞத்தா, தே ஸுணோஹி யதா²தத²ம்;

குடிகோஸியஸேய்யா ச, க²ணனே க³ச்ச² தே³வதே;

ஸப்பாணகஞ்ச ஸிஞ்சந்தி, ச² ஏதே ஆளவியம் கதா.

யே கோஸம்பி³யம் பஞ்ஞத்தா, தே ஸுணோஹி யதா²தத²ம்;

மஹாவிஹாரோ தோ³வசஸ்ஸம், அஞ்ஞம் த்³வாரம் ஸுராய ச;

அனாத³ரியம் ஸஹத⁴ம்மோ, பயோபானேன அட்ட²மம்.

யே ஸக்கேஸு பஞ்ஞத்தா, தே ஸுணோஹி யதா²தத²ம்;

ஏளகலோமானி பத்தோ ச, ஓவாதோ³ சேவ பே⁴ஸஜ்ஜம்.

ஸூசி ஆரஞ்ஞிகோ சேவ, அட்டே²தே [ச² ஏதே (ஸப்³ப³த்த²)] காபிலவத்த²வே;

உத³கஸுத்³தி⁴யா ஓவாதோ³, பி⁴க்கு²னீஸு பவுச்சந்தி.

யே ப⁴க்³கே³ஸு பஞ்ஞத்தா, தே ஸுணோஹி யதா²தத²ம்;

ஸமாத³ஹித்வா விஸிப்³பே³ந்தி, ஸாமிஸேன ஸஸித்த²கம்.

பாராஜிகானி சத்தாரி, ஸங்கா⁴தி³ஸேஸானி ப⁴வந்தி;

ஸத்த ச நிஸ்ஸக்³கி³யானி, அட்ட² த்³வத்திம்ஸ கு²த்³த³கா.

த்³வே கா³ரய்ஹா தயோ ஸேக்கா², ச²ப்பஞ்ஞாஸ ஸிக்கா²பதா³;

ச²ஸு நக³ரேஸு பஞ்ஞத்தா, பு³த்³தே⁴னாதி³ச்சப³ந்து⁴னா.

ச²ஊன தீணிஸதானி, ஸப்³பே³ ஸாவத்தி²யம் கதா;

காருணிகேன பு³த்³தே⁴ன, கோ³தமேன யஸஸ்ஸினா.

2. சதுவிபத்திம்

336. யம் தம் [யம் யம் (க.)] புச்சி²ம்ஹ அகித்தயி நோ;

தம் தம் ப்³யாகதம் அனஞ்ஞதா²;

அஞ்ஞம் தம் புச்சா²மி ததி³ங்க⁴ ப்³ரூஹி;

க³ருக லஹுகஞ்சாபி ஸாவஸேஸம்;

அனவஸேஸம் து³ட்டு²ல்லஞ்ச அது³ட்டு²ல்லம்;

யே ச யாவததியகா.

ஸாதா⁴ரணம் அஸாதா⁴ரணம்;

விப⁴த்தியோ ச [விபத்தியோ ச (ஸீ. ஸ்யா.)] யேஹி ஸமதே²ஹி ஸம்மந்தி;

ஸப்³பா³னிபேதானி வியாகரோஹி;

ஹந்த³ வாக்யம் ஸுணோம தே.

ஏகதிம்ஸா யே க³ருகா, அட்டே²த்த² அனவஸேஸா;

யே க³ருகா தே து³ட்டு²ல்லா, யே து³ட்டு²ல்லா ஸா ஸீலவிபத்தி;

பாராஜிகம் ஸங்கா⁴தி³ஸேஸோ, ‘‘ஸீலவிபத்தீ’’தி வுச்சதி.

து²ல்லச்சயம் பாசித்தியா, பாடிதே³ஸனீயம் து³க்கடம்;

து³ப்³பா⁴ஸிதம் யோ சாயம், அக்கோஸதி ஹஸாதி⁴ப்பாயோ;

அயம் ஸா ஆசாரவிபத்திஸம்மதா.

விபரீததி³ட்டி²ம் க³ண்ஹந்தி, அஸத்³த⁴ம்மேஹி புரக்க²தா;

அப்³பா⁴சிக்க²ந்தி ஸம்பு³த்³த⁴ம், து³ப்பஞ்ஞா மோஹபாருதா;

அயம் ஸா தி³ட்டி²விபத்திஸம்மதா.

ஆஜீவஹேது ஆஜீவகாரணா பாபிச்சோ² இச்சா²பகதோ அஸந்தம் அபூ⁴தம் உத்தரிமனுஸ்ஸத⁴ம்மம் உல்லபதி, ஆஜீவஹேது ஆஜீவகாரணா ஸஞ்சரித்தம் ஸமாபஜ்ஜதி, ஆஜீவஹேது ஆஜீவகாரணா – ‘‘யோ தே விஹாரே வஸதி, ஸோ பி⁴க்கு² அரஹா’’தி ப⁴ணதி, ஆஜீவஹேது ஆஜீவகாரணா பி⁴க்கு² பணீதபோ⁴ஜனானி அத்தனோ அத்தா²ய விஞ்ஞாபேத்வா பு⁴ஞ்ஜதி, ஆஜீவஹேது ஆஜீவகாரணா பி⁴க்கு²னீ பணீதபோ⁴ஜனானி அத்தனோ அத்தா²ய விஞ்ஞாபேத்வா பு⁴ஞ்ஜதி, ஆஜீவஹேது ஆஜீவகாரணா ஸூபம் வா ஓத³னம் வா அகி³லானோ அத்தனோ அத்தா²ய விஞ்ஞாபேத்வா பு⁴ஞ்ஜதி. அயம் ஸா ஆஜீவவிபத்தி ஸம்மதா.

ஏகாத³ஸ யாவததியகா, தே ஸுணோஹி யதா²தத²ம்;

உக்கி²த்தானுவத்திகா, அட்ட² யாவததியகா;

அரிட்டோ² சண்ட³காளீ ச, இமே தே யாவததியகா.

3. சே²த³னகாதி³

337. கதி சே²த³னகானி? கதி பே⁴த³னகானி? கதி உத்³தா³லனகானி? கதி அனஞ்ஞபாசித்தியானி? கதி பி⁴க்கு²ஸம்முதியோ? கதி ஸாமீசியோ? கதி பரமானி?

கதி ஜானந்தி பஞ்ஞத்தா, பு³த்³தே⁴னாதி³ச்சப³ந்து⁴னா.

ச² சே²த³னகானி. ஏகம் பே⁴த³னகம். ஏகம் உத்³தா³லனகம். சத்தாரி அனஞ்ஞபாசித்தியானி. சதஸ்ஸோ பி⁴க்கு²ஸம்முதியோ. ஸத்த ஸாமீசியோ. சுத்³த³ஸ பரமானி.

ஸோத³ஸ [ஸோளஸ (ஸீ. ஸ்யா.) அட்ட²கதா² ஓலோகேதப்³பா³] ஜானந்தி பஞ்ஞத்தா, பு³த்³தே⁴னாதி³ச்சப³ந்து⁴னா.

4. அஸாதா⁴ரணாதி³

338. வீஸம் த்³வே ஸதானி பி⁴க்கூ²னம் ஸிக்கா²பதா³னி;

உத்³தே³ஸம் ஆக³ச்ச²ந்தி உபோஸதே²ஸு;

தீணி ஸதானி சத்தாரி பி⁴க்கு²னீனம் ஸிக்கா²பதா³னி;

உத்³தே³ஸம் ஆக³ச்ச²ந்தி உபோஸதே²ஸு.

ச²சத்தாரீஸா பி⁴க்கூ²னம், பி⁴க்கு²னீஹி அஸாதா⁴ரணா;

ஸதம் திம்ஸா ச பி⁴க்கு²னீனம், பி⁴க்கூ²ஹி அஸாதா⁴ரணா.

ஸதம் ஸத்ததி ச²ச்சேவ, உபி⁴ன்னம் அஸாதா⁴ரணா;

ஸதம் ஸத்ததி சத்தாரி, உபி⁴ன்னம் ஸமஸிக்க²தா.

வீஸம் த்³வே ஸதானி பி⁴க்கூ²னம் ஸிக்கா²பதா³னி;

உத்³தே³ஸம் ஆக³ச்ச²ந்தி உபோஸதே²ஸு;

தே ஸுணோஹி யதா²தத²ம்.

பாராஜிகானி சத்தாரி, ஸங்கா⁴தி³ஸேஸானி ப⁴வந்தி தேரஸ;

அனியதா த்³வே ஹோந்தி.

நிஸ்ஸக்³கி³யானி திம்ஸேவ, த்³வேனவுதி ச கு²த்³த³கா;

சத்தாரோ பாடிதே³ஸனீயா, பஞ்சஸத்ததி ஸேகி²யா.

வீஸம் த்³வே ஸதானி சிமே ஹோந்தி பி⁴க்கூ²னம் ஸிக்கா²பதா³னி;

உத்³தே³ஸம் ஆக³ச்ச²ந்தி உபோஸதே²ஸு.

தீணி ஸதானி சத்தாரி, பி⁴க்கு²னீனம் ஸிக்கா²பதா³னி;

உத்³தே³ஸம் ஆக³ச்ச²ந்தி உபோஸதே²ஸு, தே ஸுணோஹி யதா²தத²ம்.

பாராஜிகானி அட்ட², ஸங்கா⁴தி³ஸேஸானி ப⁴வந்தி ஸத்தரஸ;

நிஸ்ஸக்³கி³யானி திம்ஸேவ, ஸதம் ஸட்டி² ச² சேவ கு²த்³த³கானி பவுச்சந்தி.

அட்ட² பாடிதே³ஸனீயா, பஞ்சஸத்ததி ஸேகி²யா;

தீணி ஸதானி சத்தாரி சிமே ஹோந்தி பி⁴க்கு²னீனம் ஸிக்கா²பதா³னி;

உத்³தே³ஸம் ஆக³ச்ச²ந்தி உபோஸதே²ஸு.

ச²சத்தாரீஸா பி⁴க்கூ²னம், பி⁴க்கு²னீஹி அஸாதா⁴ரணா;

தே ஸுணோஹி யதா²தத²ம்.

ஸங்கா⁴தி³ஸேஸா, த்³வே அனியதேஹி அட்ட²;

நிஸ்ஸக்³கி³யானி த்³வாத³ஸ, தேஹி தே ஹோந்தி வீஸதி.

த்³வேவீஸதி கு²த்³த³கா, சதுரோ பாடிதே³ஸனீயா;

ச²சத்தாரீஸா சிமே ஹோந்தி, பி⁴க்கூ²னம் பி⁴க்கு²னீஹி அஸாதா⁴ரணா.

ஸதம் திம்ஸா ச பி⁴க்கு²னீனம், பி⁴க்கூ²ஹி அஸாதா⁴ரணா;

தே ஸுணோஹி யதா²தத²ம்.

பாராஜிகானி சத்தாரி, ஸங்க⁴ம்ஹா த³ஸ நிஸ்ஸரே;

நிஸ்ஸக்³கி³யானி த்³வாத³ஸ, ச²ன்னவுதி ச கு²த்³த³கா;

அட்ட² பாடிதே³ஸனீயா.

ஸதம் திம்ஸா சிமே ஹோந்தி பி⁴க்கு²னீனம், பி⁴க்கூ²ஹி அஸாதா⁴ரணா;

ஸதம் ஸத்ததி ச²ச்சேவ, உபி⁴ன்னம் அஸாதா⁴ரணா;

தே ஸுணோஹி யதா²தத²ம்.

பாராஜிகானி சத்தாரி, ஸங்கா⁴தி³ஸேஸானி ப⁴வந்தி ஸோளஸ;

அனியதா த்³வே ஹோந்தி, நிஸ்ஸக்³கி³யானி சதுவீஸதி;

ஸதம் அட்டா²ரஸா சேவ, கு²த்³த³கானி பவுச்சந்தி;

த்³வாத³ஸ பாடிதே³ஸனீயா.

ஸதம் ஸத்ததி ச²ச்சேவிமே ஹோந்தி, உபி⁴ன்னம் அஸாதா⁴ரணா;

ஸதம் ஸத்ததி சத்தாரி, உபி⁴ன்னம் ஸமஸிக்க²தா;

தே ஸுணோஹி யதா²தத²ம்.

பாராஜிகானி சத்தாரி, ஸங்கா⁴தி³ஸேஸானி ப⁴வந்தி ஸத்த;

நிஸ்ஸக்³கி³யானி அட்டா²ரஸ, ஸமஸத்ததி கு²த்³த³கா;

பஞ்சஸத்ததி ஸேகி²யானி.

ஸதம் ஸத்ததி சத்தாரி சிமே ஹோந்தி, உபி⁴ன்னம் ஸமஸிக்க²தா;

அட்டே² பாராஜிகா யே து³ராஸதா³, தாலவத்து²ஸமூபமா.

பண்டு³பலாஸோ புது²ஸிலா, ஸீஸச்சி²ன்னோவ ஸோ நரோ;

தாலோவ மத்த²கச்சி²ன்னோ, அவிருள்ஹீ ப⁴வந்தி தே.

தேவீஸதி ஸங்கா⁴தி³ஸேஸா, த்³வே அனியதா;

த்³வே சத்தாரீஸ நிஸ்ஸக்³கி³யா;

அட்டா²ஸீதிஸதம் பாசித்தியா, த்³வாத³ஸ பாடிதே³ஸனீயா.

பஞ்சஸத்ததி ஸேகி²யா, தீஹி ஸமதே²ஹி ஸம்மந்தி;

ஸம்முகா² ச படிஞ்ஞாய, திணவத்தா²ரகேன ச.

த்³வே உபோஸதா² த்³வே பவாரணா;