9. ஸமதா² ஸமத²ஸ்ஸ ஸாதா⁴ரணவாரோ

299. ஸமதா² ஸமத²ஸ்ஸ ஸாதா⁴ரணா, ஸமதா² ஸமத²ஸ்ஸ அஸாதா⁴ரணா. ஸியா ஸமதா² ஸமத²ஸ்ஸ ஸாதா⁴ரணா, ஸியா ஸமதா² ஸமத²ஸ்ஸ அஸாதா⁴ரணா.

கத²ம் ஸியா ஸமதா² ஸமத²ஸ்ஸ ஸாதா⁴ரணா? கத²ம் ஸியா ஸமதா² ஸமத²ஸ்ஸ அஸாதா⁴ரணா? யேபு⁴ய்யஸிகா ஸம்முகா²வினயஸ்ஸ ஸாதா⁴ரணா, ஸதிவினயஸ்ஸ அமூள்ஹவினயஸ்ஸ படிஞ்ஞாதகரணஸ்ஸ தஸ்ஸபாபியஸிகாய திணவத்தா²ரகஸ்ஸ அஸாதா⁴ரணா.

ஸதிவினயோ ஸம்முகா²வினயஸ்ஸ ஸாதா⁴ரணோ, அமூள்ஹவினயஸ்ஸ படிஞ்ஞாதகரணஸ்ஸ தஸ்ஸபாபியஸிகாய திணவத்தா²ரகஸ்ஸ யேபு⁴ய்யஸிகாய அஸாதா⁴ரணோ.

அமூள்ஹவினயோ ஸம்முகா²வினயஸ்ஸ ஸாதா⁴ரணோ, படிஞ்ஞாதகரணஸ்ஸ தஸ்ஸபாபியஸிகாய திணவத்தா²ரகஸ்ஸ யேபு⁴ய்யஸிகாய ஸதிவினயஸ்ஸ அஸாதா⁴ரணோ.

படிஞ்ஞாதகரணம் ஸம்முகா²வினயஸ்ஸ ஸாதா⁴ரணம், தஸ்ஸபாபியஸிகாய திணவத்தா²ரகஸ்ஸ யேபு⁴ய்யஸிகாய ஸதிவினயஸ்ஸ அமூள்ஹவினயஸ்ஸ அஸாதா⁴ரணம்.

தஸ்ஸபாபியஸிகா ஸம்முகா²வினயஸ்ஸ ஸாதா⁴ரணா, திணவத்தா²ரகஸ்ஸ யேபு⁴ய்யஸிகாய ஸதிவினயஸ்ஸ அமூள்ஹவினயஸ்ஸ படிஞ்ஞாதகரணஸ்ஸ அஸாதா⁴ரணா.

திணவத்தா²ரகோ ஸம்முகா²வினயஸ்ஸ ஸாதா⁴ரணோ, யேபு⁴ய்யஸிகாய ஸதிவினயஸ்ஸ அமூள்ஹவினயஸ்ஸ படிஞ்ஞாதகரணஸ்ஸ தஸ்ஸபாபியஸிகாய அஸாதா⁴ரணோ. ஏவம் ஸியா ஸமதா² ஸமத²ஸ்ஸ ஸாதா⁴ரணா; ஏவம் ஸியா ஸமதா² ஸமத²ஸ்ஸ அஸாதா⁴ரணா.

ஸமதா² ஸமத²ஸ்ஸ ஸாதா⁴ரணவாரோ நிட்டி²தோ நவமோ.