8. தப்³பா⁴கி³யவாரோ

298. கதி ஸமதா² விவாதா³தி⁴கரணஸ்ஸ தப்³பா⁴கி³யா? கதி ஸமதா² விவாதா³தி⁴கரணஸ்ஸ அஞ்ஞபா⁴கி³யா? கதி ஸமதா² அனுவாதா³தி⁴கரணஸ்ஸ தப்³பா⁴கி³யா? கதி ஸமதா² அனுவாதா³தி⁴கரணஸ்ஸ அஞ்ஞபா⁴கி³யா? கதி ஸமதா² ஆபத்தாதி⁴கரணஸ்ஸ தப்³பா⁴கி³யா? கதி ஸமதா² ஆபத்தாதி⁴கரணஸ்ஸ அஞ்ஞபா⁴கி³யா? கதி ஸமதா² கிச்சாதி⁴கரணஸ்ஸ தப்³பா⁴கி³யா? கதி ஸமதா² கிச்சாதி⁴கரணஸ்ஸ அஞ்ஞபா⁴கி³யா?

த்³வே ஸமதா² விவாதா³தி⁴கரணஸ்ஸ தப்³பா⁴கி³யா – ஸம்முகா²வினயோ, யேபு⁴ய்யஸிகா. பஞ்ச ஸமதா² விவாதா³தி⁴கரணஸ்ஸ அஞ்ஞபா⁴கி³யா – ஸதிவினயோ, அமூள்ஹவினயோ, படிஞ்ஞாதகரணம், தஸ்ஸபாபியஸிகா, திணவத்தா²ரகோ.

சத்தாரோ ஸமதா² அனுவாதா³தி⁴கரணஸ்ஸ தப்³பா⁴கி³யா – ஸம்முகா²வினயோ, ஸதிவினயோ, அமூள்ஹவினயோ, தஸ்ஸபாபியஸிகா. தயோ ஸமதா² அனுவாதா³தி⁴கரணஸ்ஸ அஞ்ஞபா⁴கி³யா – யேபு⁴ய்யஸிகா, படிஞ்ஞாதகரணம், திணவத்தா²ரகோ.

தயோ ஸமதா² ஆபத்தாதி⁴கரணஸ்ஸ தப்³பா⁴கி³யா – ஸம்முகா²வினயோ, படிஞ்ஞாதகரணம், திணவத்தா²ரகோ. சத்தாரோ ஸமதா² ஆபத்தாதி⁴கரணஸ்ஸ அஞ்ஞபா⁴கி³யா – யேபு⁴ய்யஸிகா, ஸதிவினயோ, அமூள்ஹவினயோ, தஸ்ஸபாபியஸிகா.

ஏகோ ஸமதோ² கிச்சாதி⁴கரணஸ்ஸ தப்³பா⁴கி³யோ – ஸம்முகா²வினயோ. ச² ஸமதா² கிச்சாதி⁴கரணஸ்ஸ அஞ்ஞபா⁴கி³யா – யேபு⁴ய்யஸிகா, ஸதிவினயோ, அமூள்ஹவினயோ, படிஞ்ஞாதகரணம், தஸ்ஸபாபியஸிகா, திணவத்தா²ரகோ.

தப்³பா⁴கி³யவாரோ நிட்டி²தோ அட்ட²மோ.