7. ஸாதா⁴ரணவாரோ

297. கதி ஸமதா² விவாதா³தி⁴கரணஸ்ஸ ஸாதா⁴ரணா? கதி ஸமதா² விவாதா³தி⁴கரணஸ்ஸ அஸாதா⁴ரணா? கதி ஸமதா² அனுவாதா³தி⁴கரணஸ்ஸ ஸாதா⁴ரணா? கதி ஸமதா² அனுவாதா³தி⁴கரணஸ்ஸ அஸாதா⁴ரணா? கதி ஸமதா² ஆபத்தாதி⁴கரணஸ்ஸ ஸாதா⁴ரணா? கதி ஸமதா² ஆபத்தாதி⁴கரணஸ்ஸ அஸாதா⁴ரணா? கதி ஸமதா² கிச்சாதி⁴கரணஸ்ஸ ஸாதா⁴ரணா? கதி ஸமதா² கிச்சாதி⁴கரணஸ்ஸ அஸாதா⁴ரணா?

த்³வே ஸமதா² விவாதா³தி⁴கரணஸ்ஸ ஸாதா⁴ரணா – ஸம்முகா²வினயோ, யேபு⁴ய்யஸிகா. பஞ்ச ஸமதா² விவாதா³தி⁴கரணஸ்ஸ அஸாதா⁴ரணா – ஸதிவினயோ, அமூள்ஹவினயோ, படிஞ்ஞாதகரணம், தஸ்ஸபாபியஸிகா, திணவத்தா²ரகோ.

சத்தாரோ ஸமதா² அனுவாதா³தி⁴கரணஸ்ஸ ஸாதா⁴ரணா – ஸம்முகா²வினயோ; ஸதிவினயோ, அமூள்ஹவினயோ, தஸ்ஸபாபியஸிகா. தயோ ஸமதா² அனுவாதா³தி⁴கரணஸ்ஸ அஸாதா⁴ரணா – யேபு⁴ய்யஸிகா, படிஞ்ஞாதகரணம், திணவத்தா²ரகோ.

தயோ ஸமதா² ஆபத்தாதி⁴கரணஸ்ஸ ஸாதா⁴ரணா – ஸம்முகா²வினயோ, படிஞ்ஞாதகரணம், திணவத்தா²ரகோ. சத்தாரோ ஸமதா² ஆபத்தாதி⁴கரணஸ்ஸ அஸாதா⁴ரணா – யேபு⁴ய்யஸிகா, ஸதிவினயோ, அமூள்ஹவினயோ, தஸ்ஸபாபியஸிகா.

ஏகோ ஸமதோ² கிச்சாதி⁴கரணஸ்ஸ ஸாதா⁴ரணோ – ஸம்முகா²வினயோ. ச² ஸமதா² கிச்சாதி⁴கரணஸ்ஸ அஸாதா⁴ரணா – யேபு⁴ய்யஸிகா, ஸதிவினயோ, அமூள்ஹவினயோ, படிஞ்ஞாதகரணம், தஸ்ஸபாபியஸிகா, திணவத்தா²ரகோ.

ஸாதா⁴ரணவாரோ நிட்டி²தோ ஸத்தமோ.