5. நவஸங்க³ஹவக்³கோ³

501. நவஸங்க³ஹா – வத்து²ஸங்க³ஹோ, விபத்திஸங்க³ஹோ ஆபத்திஸங்க³ஹோ, நிதா³னஸங்க³ஹோ, புக்³க³லஸங்க³ஹோ, க²ந்த⁴ஸங்க³ஹோ, ஸமுட்டா²னஸங்க³ஹோ, அதி⁴கரணஸங்க³ஹோ, ஸமத²ஸங்க³ஹோதி.

அதி⁴கரணே ஸமுப்பன்னே ஸசே உபோ⁴ அத்த²பச்சத்தி²கா ஆக³ச்ச²ந்தி உபி⁴ன்னம்பி வத்து² ஆரோசாபேதப்³ப³ம். உபி⁴ன்னம்பி வத்து² ஆரோசாபேத்வா உபி⁴ன்னம்பி படிஞ்ஞா ஸோதப்³பா³. உபி⁴ன்னம்பி படிஞ்ஞம் ஸுத்வா உபோ⁴பி வத்தப்³பா³ – ‘‘அம்ஹாகம் இமஸ்மிம் அதி⁴கரணே வூபஸமிதே [வூபஸமேபி (க.)] உபோ⁴பி துட்டா² ப⁴விஸ்ஸதா²’’தி. ஸசே ஆஹம்ஸு – ‘‘உபோ⁴பி துட்டா² ப⁴விஸ்ஸாமா’’தி, ஸங்கே⁴ன தம் அதி⁴கரணம் ஸம்படிச்சி²தப்³ப³ம். ஸசே அலஜ்ஜுஸ்ஸன்னா ஹோதி, பரிஸா உப்³பா³ஹிகாய வூபஸமேதப்³ப³ம். ஸசே பா³லுஸ்ஸன்னா ஹோதி, பரிஸா வினயத⁴ரோ பரியேஸிதப்³போ³ யேன த⁴ம்மேன யேன வினயேன யேன ஸத்து²ஸாஸனேன தம் அதி⁴கரணம் வூபஸம்மதி. ததா² தம் அதி⁴கரணம் வூபஸமேதப்³ப³ம்.

வத்து² ஜானிதப்³ப³ம், கோ³த்தம் ஜானிதப்³ப³ம், நாமம் ஜானிதப்³ப³ம், ஆபத்தி ஜானிதப்³பா³.

மேது²னத⁴ம்மோதி வத்து² சேவ கோ³த்தஞ்ச – பாராஜிகந்தி நாமஞ்சேவ ஆபத்தி ச.

அதி³ன்னாதா³னந்தி வத்து² சேவ கோ³த்தஞ்ச – பாராஜிகந்தி நாமஞ்சேவ ஆபத்தி ச.

மனுஸ்ஸவிக்³க³ஹோதி வத்து² சேவ கோ³த்தஞ்ச – பாராஜிகந்தி நாமஞ்சேவ ஆபத்தி ச.

உத்தரிமனுஸ்ஸத⁴ம்மோதி வத்து² சேவ கோ³த்தஞ்ச – பாராஜிகந்தி நாமஞ்சேவ ஆபத்தி ச.

ஸுக்கவிஸ்ஸட்டீ²தி வத்து² சேவ கோ³த்தஞ்ச – ஸங்கா⁴தி³ஸேஸோதி நாமஞ்சேவ ஆபத்தி ச.

காயஸம்ஸக்³கோ³தி வத்து² சேவ கோ³த்தஞ்ச – ஸங்கா⁴தி³ஸேஸோதி நாமஞ்சேவ ஆபத்தி ச.

து³ட்டு²ல்லவாசாதி வத்து² சேவ கோ³த்தஞ்ச – ஸங்கா⁴தி³ஸேஸோதி நாமஞ்சேவ ஆபத்தி ச.

அத்தகாமந்தி வத்து² சேவ கோ³த்தஞ்ச – ஸங்கா⁴தி³ஸேஸோதி நாமஞ்சேவ ஆபத்தி ச.

ஸஞ்சரித்தந்தி வத்து² சேவ கோ³த்தஞ்ச – ஸங்கா⁴தி³ஸேஸோதி நாமஞ்சேவ ஆபத்தி ச.

ஸஞ்ஞாசிகாய குடிம் காராபனந்தி வத்து² சேவ கோ³த்தஞ்ச – ஸங்கா⁴தி³ஸேஸோதி நாமஞ்சேவ ஆபத்தி ச.

மஹல்லகம் விஹாரம் காராபனந்தி வத்து² சேவ கோ³த்தஞ்ச – ஸங்கா⁴தி³ஸேஸோதி நாமஞ்சேவ ஆபத்தி ச.

பி⁴க்கு²ம் அமூலகேன பாராஜிகேன த⁴ம்மேன அனுத்³த⁴ம்ஸனந்தி வத்து² சேவ கோ³த்தஞ்ச – ஸங்கா⁴தி³ஸேஸோதி நாமஞ்சேவ ஆபத்தி ச.

பி⁴க்கு²ம் அஞ்ஞபா⁴கி³யஸ்ஸ அதி⁴கரணஸ்ஸ கிஞ்சி தே³ஸம் லேஸமத்தம் உபாதா³ய பாராஜிகேன த⁴ம்மேன அனுத்³த⁴ம்ஸனந்தி வத்து² சேவ கோ³த்தஞ்ச – ஸங்கா⁴தி³ஸேஸோதி நாமஞ்சேவ ஆபத்தி ச.

ஸங்க⁴பே⁴த³கஸ்ஸ பி⁴க்கு²னோ யாவததியம் ஸமனுபா⁴ஸனாய ந படினிஸ்ஸஜ்ஜனந்தி வத்து² சேவ கோ³த்தஞ்ச – ஸங்கா⁴தி³ஸேஸோதி நாமஞ்சேவ ஆபத்தி ச.

பே⁴த³கானுவத்தகானம் பி⁴க்கூ²னம் யாவததியம் ஸமனுபா⁴ஸனாய ந படினிஸ்ஸஜ்ஜனந்தி வத்து² சேவ கோ³த்தஞ்ச – ஸங்கா⁴தி³ஸேஸோதி நாமஞ்சேவ ஆபத்தி ச.

து³ப்³ப³சஸ்ஸ பி⁴க்கு²னோ யாவததியம் ஸமனுபா⁴ஸனாய ந படினிஸ்ஸஜ்ஜனந்தி வத்து² சேவ கோ³த்தஞ்ச – ஸங்கா⁴தி³ஸேஸோதி நாமஞ்சேவ ஆபத்தி ச.

குலதூ³ஸகஸ்ஸ பி⁴க்கு²னோ யாவததியம் ஸமனுபா⁴ஸனாய ந படினிஸ்ஸஜ்ஜனந்தி வத்து² சேவ கோ³த்தஞ்ச – ஸங்கா⁴தி³ஸேஸோதி நாமஞ்சேவ ஆபத்தி ச…பே….

அனாத³ரியம் படிச்ச உத³கே உச்சாரம் வா பஸ்ஸாவம் வா கே²ளம் வா கரணந்தி வத்து² சேவ கோ³த்தஞ்ச – து³க்கடந்தி நாமஞ்சேவ ஆபத்தி சாதி.

நவஸங்க³ஹவக்³கோ³ நிட்டி²தோ பஞ்சமோ.