1. கம்மவக்³கோ³

482. சத்தாரி கம்மானி. அபலோகனகம்மம், ஞத்திகம்மம், ஞத்திது³தியகம்மம், ஞத்திசதுத்த²கம்மம் – இமானி சத்தாரி கம்மானி. கதிஹாகாரேஹி விபஜ்ஜந்தி? இமானி சத்தாரி கம்மானி பஞ்சஹாகாரேஹி விபஜ்ஜந்தி – வத்து²தோ வா ஞத்திதோ வா அனுஸ்ஸாவனதோ வா ஸீமதோ வா பரிஸதோ வா.

483. கத²ம் வத்து²தோ கம்மானி விபஜ்ஜந்தி? ஸம்முகா²கரணீயம் கம்மம் அஸம்முகா² கரோதி, வத்து²விபன்னம் அத⁴ம்மகம்மம்; படிபுச்சா²கரணீயம் கம்மம் அபடிபுச்சா² கரோதி, வத்து²விபன்னம் அத⁴ம்மகம்மம்; படிஞ்ஞாய கரணீயம் கம்மம் அபடிஞ்ஞாய கரோதி, வத்து²விபன்னம் அத⁴ம்மகம்மம்; ஸதிவினயாரஹஸ்ஸ அமூள்ஹவினயம் தே³தி, வத்து²விபன்னம் அத⁴ம்மகம்மம்; அமூள்ஹவினயாரஹஸ்ஸ தஸ்ஸபாபியஸிகாகம்மம் கரோதி, வத்து²விபன்னம் அத⁴ம்மகம்மம்; தஸ்ஸபாபியஸிகாகம்மாரஹஸ்ஸ தஜ்ஜனீயகம்மம் கரோதி, வத்து²விபன்னம் அத⁴ம்மகம்மம்; தஜ்ஜனீயகம்மாரஹஸ்ஸ நியஸ்ஸகம்மம் கரோதி, வத்து²விபன்னம் அத⁴ம்மகம்மம்; நியஸ்ஸகம்மாரஹஸ்ஸ பப்³பா³ஜனீயகம்மம் கரோதி, வத்து²விபன்னம் அத⁴ம்மகம்மம்; பப்³பா³ஜனீயகம்மாரஹஸ்ஸ படிஸாரணீயகம்மம் கரோதி, வத்து²விபன்னம் அத⁴ம்மகம்மம்; படிஸாரணீயகம்மாரஹஸ்ஸ உக்கே²பனீயகம்மம் கரோதி, வத்து²விபன்னம் அத⁴ம்மகம்மம்; உக்கே²பனீயகம்மாரஹஸ்ஸ பரிவாஸம் தே³தி, வத்து²விபன்னம் அத⁴ம்மகம்மம்; பரிவாஸாரஹம் மூலாய படிகஸ்ஸதி, வத்து²விபன்னம் அத⁴ம்மகம்மம்; மூலாயபடிகஸ்ஸனாரஹஸ்ஸ மானத்தம் தே³தி, வத்து²விபன்னம் அத⁴ம்மகம்மம்; மானத்தாரஹம் அப்³பே⁴தி, வத்து²விபன்னம் அத⁴ம்மகம்மம்; அப்³பா⁴னாரஹம் உபஸம்பாதே³தி, வத்து²விபன்னம் அத⁴ம்மகம்மம்; அனுபோஸதே² உபோஸத²ம் கரோதி, வத்து²விபன்னம் அத⁴ம்மகம்மம்; அபவாரணாய பவாரேதி, வத்து²விபன்னம் அத⁴ம்மகம்மம். ஏவம் வத்து²தோ கம்மானி விபஜ்ஜந்தி.

484. கத²ம் ஞத்திதோ கம்மானி விபஜ்ஜந்தி? பஞ்சஹாகாரேஹி ஞத்திதோ கம்மானி விபஜ்ஜந்தி – வத்து²ம் ந பராமஸதி, ஸங்க⁴ம் ந பராமஸதி, புக்³க³லம் ந பராமஸதி, ஞத்திம் ந பராமஸதி, பச்சா² வா ஞத்திம் ட²பேதி – இமேஹி பஞ்சஹாகாரேஹி ஞத்திதோ கம்மானி விபஜ்ஜந்தி.

485. கத²ம் அனுஸ்ஸாவனதோ கம்மானி விபஜ்ஜந்தி? பஞ்சஹாகாரேஹி அனுஸ்ஸாவனதோ கம்மானி விபஜ்ஜந்தி – வத்து²ம் ந பராமஸதி, ஸங்க⁴ம் ந பராமஸதி, புக்³க³லம் ந பராமஸதி, ஸாவனம் ஹாபேதி, அகாலே வா ஸாவேதி – இமேஹி பஞ்சஹாகாரேஹி அனுஸ்ஸாவனதோ கம்மானி விபஜ்ஜந்தி.

486. கத²ம் ஸீமதோ கம்மானி விபஜ்ஜந்தி? ஏகாத³ஸஹி ஆகாரேஹி ஸீமதோ கம்மானி விபஜ்ஜந்தி – அதிகு²த்³த³கம் ஸீமம் ஸம்மன்னதி, அதிமஹதிம் ஸீமம் ஸம்மன்னதி, க²ண்ட³னிமித்தம் ஸீமம் ஸம்மன்னதி, சா²யானிமித்தம் ஸீமம் ஸம்மன்னதி, அனிமித்தம் ஸீமம் ஸம்மன்னதி, ப³ஹிஸீமே டி²தோ ஸீமம் ஸம்மன்னதி, நதி³யா ஸீமம் ஸம்மன்னதி, ஸமுத்³தே³ ஸீமம் ஸம்மன்னதி, ஜாதஸ்ஸரே ஸீமம் ஸம்மன்னதி, ஸீமாய ஸீமம் ஸம்பி⁴ந்த³தி, ஸீமாய ஸீமம் அஜ்ஜோ²த்த²ரதி – இமேஹி ஏகாத³ஸஹி ஆகாரேஹி ஸீமதோ கம்மானி விபஜ்ஜந்தி.

487. கத²ம் பரிஸதோ கம்மானி விபஜ்ஜந்தி? த்³வாத³ஸஹி ஆகாரேஹி பரிஸதோ கம்மானி விபஜ்ஜந்தி – சதுவக்³க³கரணே கம்மே யாவதிகா பி⁴க்கூ² கம்மபத்தா தே அனாக³தா ஹோந்தி, ச²ந்தா³ரஹானம் ச²ந்தோ³ அனாஹடோ ஹோதி, ஸம்முகீ²பூ⁴தா படிக்கோஸந்தி, சதுவக்³க³கரணே கம்மே யாவதிகா பி⁴க்கூ² கம்மபத்தா தே ஆக³தா ஹோந்தி, ச²ந்தா³ரஹானம் ச²ந்தோ³ அனாஹடோ ஹோதி, ஸம்முகீ²பூ⁴தா படிக்கோஸந்தி, சதுவக்³க³கரணே கம்மே யாவதிகா பி⁴க்கூ² கம்மபத்தா தே ஆக³தா ஹோந்தி, ச²ந்தா³ரஹானம் ச²ந்தோ³ ஆஹடோ ஹோதி, ஸம்முகீ²பூ⁴தா படிக்கோஸந்தி. பஞ்சவக்³க³கரணே கம்மே…பே… த³ஸவக்³க³கரணே கம்மே…பே… வீஸதிவக்³க³கரணே கம்மே யாவதிகா பி⁴க்கூ² கம்மபத்தா தே அனாக³தா ஹோந்தி, ச²ந்தா³ரஹானம் ச²ந்தோ³ அனாஹடோ ஹோதி, ஸம்முகீ²பூ⁴தா படிக்கோஸந்தி, வீஸதிவக்³க³கரணே கம்மே யாவதிகா பி⁴க்கூ² கம்மபத்தா, தே ஆக³தா ஹோந்தி, ச²ந்தா³ரஹானம் ச²ந்தோ³ அனாஹடோ ஹோதி, ஸம்முகீ²பூ⁴தா படிக்கோஸந்தி, வீஸதிவக்³க³கரணே கம்மே யாவதிகா பி⁴க்கூ² கம்மபத்தா, தே ஆக³தா ஹோந்தி, ச²ந்தா³ரஹானம் ச²ந்தோ³ ஆஹடோ ஹோதி ஸம்முகீ²பூ⁴தா படிக்கோஸந்தி – இமேஹி த்³வாத³ஸஹி ஆகாரேஹி பரிஸதோ கம்மானி விபஜ்ஜந்தி.

488. சதுவக்³க³கரணே கம்மே சத்தாரோ பி⁴க்கூ² பகதத்தா கம்மபத்தா, அவஸேஸா பகதத்தா ச²ந்தா³ரஹா. யஸ்ஸ ஸங்கோ⁴ கம்மம் கரோதி ஸோ நேவ கம்மபத்தோ நாபி ச²ந்தா³ரஹோ, அபி ச கம்மாரஹோ. பஞ்சவக்³க³கரணே கம்மே பஞ்ச பி⁴க்கூ² பகதத்தா கம்மபத்தா, அவஸேஸா பகதத்தா ச²ந்தா³ரஹா. யஸ்ஸ ஸங்கோ⁴ கம்மம் கரோதி ஸோ நேவ கம்மபத்தோ நாபி ச²ந்தா³ரஹோ, அபி ச கம்மாரஹோ. த³ஸவக்³க³கரணே கம்மே த³ஸ பி⁴க்கூ² பகதத்தா கம்மபத்தா, அவஸேஸா பகதத்தா ச²ந்தா³ரஹா. யஸ்ஸ ஸங்கோ⁴ கம்மம் கரோதி ஸோ நேவ கம்மபத்தோ நாபி ச²ந்தா³ரஹோ, அபி ச கம்மாரஹோ. வீஸதிவக்³க³கரணே கம்மே வீஸதி பி⁴க்கூ² பகதத்தா கம்மபத்தா, அவஸேஸா பகதத்தா ச²ந்தா³ரஹா. யஸ்ஸ ஸங்கோ⁴ கம்மம் கரோதி ஸோ நேவ கம்மபத்தோ நாபி ச²ந்தா³ரஹோ, அபி ச கம்மாரஹோ.

489. சத்தாரி கம்மானி – அபலோகனகம்மம், ஞத்திகம்மம், ஞத்திது³தியகம்மம், ஞத்திசதுத்த²கம்மம். இமானி சத்தாரி கம்மானி கதிஹாகாரேஹி விபஜ்ஜந்தி? இமானி சத்தாரி கம்மானி பஞ்சஹாகாரேஹி விபஜ்ஜந்தி – வத்து²தோ வா ஞத்திதோ வா அனுஸ்ஸாவனதோ வா ஸீமதோ வா பரிஸதோ வா.

490. கத²ம் வத்து²தோ கம்மானி விபஜ்ஜந்தி? பண்ட³கம் உபஸம்பாதே³தி, வத்து²விபன்னம் அத⁴ம்மகம்மம். தே²ய்யஸம்வாஸகம் உபஸம்பாதே³தி, வத்து²விபன்னம் அத⁴ம்மகம்மம். தித்தி²யபக்கந்தகம் உபஸம்பாதே³தி, வத்து²விபன்னம் அத⁴ம்மகம்மம். திரச்சா²னக³தம் உபஸம்பாதே³தி, வத்து²விபன்னம் அத⁴ம்மகம்மம். மாதுகா⁴தகம் உபஸம்பாதே³தி, வத்து²விபன்னம் அத⁴ம்மகம்மம். பிதுகா⁴தகம் உபஸம்பாதே³தி, வத்து²விபன்னம் அத⁴ம்மகம்மம். அரஹந்தகா⁴தகம் உபஸம்பாதே³தி, வத்து²விபன்னம் அத⁴ம்மகம்மம். பி⁴க்கு²னிதூ³ஸகம் உபஸம்பாதே³தி, வத்து²விபன்னம் அத⁴ம்மகம்மம். ஸங்க⁴பே⁴த³கம் உபஸம்பாதே³தி, வத்து²விபன்னம் அத⁴ம்மகம்மம். லோஹிதுப்பாத³கம் உபஸம்பாதே³தி, வத்து²விபன்னம் அத⁴ம்மகம்மம். உப⁴தோப்³யஞ்ஜனம் உபஸம்பாதே³தி, வத்து²விபன்னம் அத⁴ம்மகம்மம். ஊனவீஸதிவஸ்ஸம் புக்³க³லம் உபஸம்பாதே³தி, வத்து²விபன்னம் அத⁴ம்மகம்மம். ஏவம் வத்து²தோ கம்மானி விபஜ்ஜந்தி.

491. கத²ம் ஞத்திதோ கம்மானி விபஜ்ஜந்தி? பஞ்சஹாகாரேஹி ஞத்திதோ கம்மானி விபஜ்ஜந்தி. வத்து²ம் ந பராமஸதி, ஸங்க⁴ம் ந பராமஸதி, புக்³க³லம் ந பராமஸதி, ஞத்திம் ந பராமஸதி, பச்சா² வா ஞத்திம் ட²பேதி – இமேஹி பஞ்சஹாகாரேஹி ஞத்திதோ கம்மானி விபஜ்ஜந்தி.

492. கத²ம் அனுஸ்ஸாவனதோ கம்மானி விபஜ்ஜந்தி? பஞ்சஹாகாரேஹி அனுஸ்ஸாவனதோ கம்மானி விபஜ்ஜந்தி – வத்து²ம் ந பராமஸதி, ஸங்க⁴ம் ந பராமஸதி, புக்³க³லம் ந பராமஸதி, ஸாவனம் ஹாபேதி, அகாலே வா ஸாவேதி – இமேஹி பஞ்சஹாகாரேஹி அனுஸ்ஸாவனதோ கம்மானி விபஜ்ஜந்தி.

493. கத²ம் ஸீமதோ கம்மானி விபஜ்ஜந்தி? ஏகாத³ஸஹி ஆகாரேஹி ஸீமதோ கம்மானி விபஜ்ஜந்தி. அதிகு²த்³த³கம் ஸீமம் ஸம்மன்னதி, அதிமஹதிம் ஸீமம் ஸம்மன்னதி, க²ண்ட³னிமித்தம் ஸீமம் ஸம்மன்னதி, சா²யானிமித்தம் ஸீமம் ஸம்மன்னதி, அனிமித்தம் ஸீமம் ஸம்மன்னதி, ப³ஹிஸீமே டி²தோ ஸீமம் ஸம்மன்னதி, நதி³யா ஸீமம் ஸம்மன்னதி, ஸமுத்³தே³ ஸீமம் ஸம்மன்னதி, ஜாதஸ்ஸரே ஸீமம் ஸம்மன்னதி, ஸீமாய ஸீமம் ஸம்பி⁴ந்த³தி, ஸீமாய ஸீமம் அஜ்ஜோ²த்த²ரதி – இமேஹி ஏகாத³ஸஹி ஆகாரேஹி ஸீமதோ கம்மானி விபஜ்ஜந்தி.

494. கத²ம் பரிஸதோ கம்மானி விபஜ்ஜந்தி? த்³வாத³ஸஹி ஆகாரேஹி பரிஸதோ கம்மானி விபஜ்ஜந்தி – சதுவக்³க³கரணே கம்மே யாவதிகா பி⁴க்கூ² கம்மபத்தா தே அனாக³தா ஹோந்தி, ச²ந்தா³ரஹானம் ச²ந்தோ³ அனாஹடோ ஹோதி, ஸம்முகீ²பூ⁴தா படிக்கோஸந்தி, சதுவக்³க³கரணே கம்மே யாவதிகா பி⁴க்கூ² கம்மபத்தா தே ஆக³தா ஹோந்தி, ச²ந்தா³ரஹானம் ச²ந்தோ³ அனாஹடோ ஹோதி, ஸம்முகீ²பூ⁴தா படிக்கோஸந்தி. சதுவக்³க³கரணே கம்மே யாவதிகா பி⁴க்கூ² கம்மபத்தா தே ஆக³தா ஹோந்தி, ச²ந்தா³ரஹானம் ச²ந்தோ³ ஆஹடோ ஹோதி ஸம்முகீ²பூ⁴தா படிக்கோஸந்தி. பஞ்சவக்³க³கரணே கம்மே…பே… த³ஸவக்³க³கரணே கம்மே…பே… வீஸதிவக்³க³கரணே கம்மே யாவதிகா பி⁴க்கூ² கம்மபத்தா தே அனாக³தா ஹோந்தி, ச²ந்தா³ரஹானம் ச²ந்தோ³ அனாஹடோ ஹோதி, ஸம்முகீ²பூ⁴தா படிக்கோஸந்தி. வீஸதிவக்³க³கரணே கம்மே யாவதிகா பி⁴க்கூ² கம்மபத்தா தே ஆக³தா ஹோந்தி, ச²ந்தா³ரஹானம் ச²ந்தோ³ அனாஹடோ ஹோதி, ஸம்முகீ²பூ⁴தா படிக்கோஸந்தி. வீஸதிவக்³க³கரணே கம்மே யாவதிகா பி⁴க்கூ² கம்மபத்தா தே ஆக³தா ஹோந்தி, ச²ந்தா³ரஹானம் ச²ந்தோ³ ஆஹடோ ஹோதி, ஸம்முகீ²பூ⁴தா படிக்கோஸந்தி – இமேஹி த்³வாத³ஸஹி ஆகாரேஹி பரிஸதோ கம்மானி விபஜ்ஜந்தி.

495. அபலோகனகம்மம் கதி டா²னானி க³ச்ச²தி? ஞத்திகம்மம் கதி டா²னானி க³ச்ச²தி? ஞத்திது³தியகம்மம் கதி டா²னானி க³ச்ச²தி? ஞத்திசதுத்த²கம்மம் கதி டா²னானி க³ச்ச²தி? அபலோகனகம்மம் பஞ்ச டா²னானி க³ச்ச²தி. ஞத்திகம்மம் நவ டா²னானி க³ச்ச²தி. ஞத்திது³தியகம்மம் ஸத்த டா²னானி க³ச்ச²தி. ஞத்திசதுத்த²கம்மம் ஸத்த டா²னானி க³ச்ச²தி.

496. அபலோகனகம்மம் கதமானி பஞ்ச டா²னானி க³ச்ச²தி? ஓஸாரணம், நிஸ்ஸாரணம், ப⁴ண்டு³கம்மம், ப்³ரஹ்மத³ண்ட³ம், கம்மலக்க²ணஞ்ஞேவ பஞ்சமம் – அபலோகனகம்மம் இமானி பஞ்ச டா²னானி க³ச்ச²தி. ஞத்திகம்மம் கதமானி நவ டா²னானி க³ச்ச²தி? ஓஸாரணம், நிஸ்ஸாரணம், உபோஸத²ம், பவாரணம், ஸம்முதிம், தா³னம், படிக்³க³ஹம், பச்சுக்கட்³ட⁴னம், கம்மலக்க²ணஞ்ஞேவ நவமம் – ஞத்திகம்மம் இமானி நவ டா²னானி க³ச்ச²தி. ஞத்திது³தியகம்மம் கதமானி ஸத்த டா²னானி க³ச்ச²தி? ஓஸாரணம், நிஸ்ஸாரணம், ஸம்முதிம், தா³னம், உத்³த⁴ரணம், தே³ஸனம், கம்மலக்க²ணஞ்ஞேவ ஸத்தமம் – ஞத்திது³தியகம்மம் இமானி ஸத்த டா²னானி க³ச்ச²தி. ஞத்திசதுத்த²கம்மம் கதமானி ஸத்த டா²னானி க³ச்ச²தி? ஓஸாரணம், நிஸ்ஸாரணம், ஸம்முதிம், தா³னம், நிக்³க³ஹம், ஸமனுபா⁴ஸனம், கம்மலக்க²ணஞ்ஞேவ ஸத்தமம் – ஞத்திசதுத்த²கம்மம் இமானி ஸத்த டா²னானி க³ச்ச²தி.

497. சதுவக்³க³கரணே கம்மே சத்தாரோ பி⁴க்கூ² பகதத்தா கம்மபத்தா, அவஸேஸா பகதத்தா ச²ந்தா³ரஹா. யஸ்ஸ ஸங்கோ⁴ கம்மம் கரோதி ஸோ நேவ கம்மபத்தோ நாபி ச²ந்தா³ரஹோ, அபி ச கம்மாரஹோ. பஞ்சவக்³க³கரணே கம்மே பஞ்ச பி⁴க்கூ² பகதத்தா கம்மபத்தா, அவஸேஸா பகதத்தா ச²ந்தா³ரஹா. யஸ்ஸ ஸங்கோ⁴ கம்மம் கரோதி ஸோ நேவ கம்மபத்தோ நாபி ச²ந்தா³ரஹோ, அபி ச கம்மாரஹோ. த³ஸவக்³க³கரணே கம்மே த³ஸ பி⁴க்கூ² பகதத்தா கம்மபத்தா, அவஸேஸா பகதத்தா ச²ந்தா³ரஹா. யஸ்ஸ ஸங்கோ⁴ கம்மம் கரோதி ஸோ நேவ கம்மபத்தோ நாபி ச²ந்தா³ரஹோ, அபி ச கம்மாரஹோ. வீஸதிவக்³க³கரணே கம்மே வீஸதி பி⁴க்கூ² பகதத்தா கம்மபத்தா, அவஸேஸா பகதத்தா ச²ந்தா³ரஹா. யஸ்ஸ ஸங்கோ⁴ கம்மம் கரோதி ஸோ நேவ கம்மபத்தோ நாபி ச²ந்தா³ரஹோ, அபி ச கம்மாரஹோ.

கம்மவக்³கோ³ நிட்டி²தோ பட²மோ.