13. ஆவாஸிகவக்³கோ³

461. ‘‘கதிஹி நு கோ², ப⁴ந்தே, அங்கே³ஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே’’தி? ‘‘பஞ்சஹுபாலி, அங்கே³ஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? ச²ந்தா³க³திம் க³ச்ச²தி, தோ³ஸாக³திம் க³ச்ச²தி, மோஹாக³திம் க³ச்ச²தி, ப⁴யாக³திம் க³ச்ச²தி, ஸங்கி⁴கம் புக்³க³லிகபரிபோ⁴கே³ன பரிபு⁴ஞ்ஜதி – இமேஹி கோ², உபாலி, பஞ்சஹங்கே³ஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் நிரயே.

‘‘பஞ்சஹுபாலி, அங்கே³ஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³. கதமேஹி பஞ்சஹி? ந ச²ந்தா³க³திம் க³ச்ச²தி, ந தோ³ஸாக³திம் க³ச்ச²தி, ந மோஹாக³திம் க³ச்ச²தி, ந ப⁴யாக³திம் க³ச்ச²தி, ஸங்கி⁴கம் ந புக்³க³லிகபரிபோ⁴கே³ன பரிபு⁴ஞ்ஜதி – இமேஹி கோ², உபாலி, பஞ்சஹங்கே³ஹி ஸமன்னாக³தோ ஆவாஸிகோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³’’தி.

462. ‘‘கதி நு கோ², ப⁴ந்தே, அத⁴ம்மிகா வினயப்³யாகரணா’’தி? ‘‘பஞ்சிமே, உபாலி, அத⁴ம்மிகா வினயப்³யாகரணா. கதமே பஞ்ச? இது⁴பாலி, பி⁴க்கு² அத⁴ம்மம் த⁴ம்மோதி பரிணாமேதி, த⁴ம்மம் அத⁴ம்மோதி பரிணாமேதி, அவினயம் வினயோதி பரிணாமேதி, வினயம் அவினயோதி பரிணாமேதி, அபஞ்ஞத்தம் பஞ்ஞாபேதி, பஞ்ஞத்தம் ஸமுச்சி²ந்த³தி – இமே கோ², உபாலி, பஞ்ச அத⁴ம்மிகா வினயப்³யாகரணா. பஞ்சிமே, உபாலி, த⁴ம்மிகா வினயப்³யாகரணா. கதமே பஞ்ச? இது⁴பாலி, பி⁴க்கு² அத⁴ம்மம் அத⁴ம்மோதி பரிணாமேதி, த⁴ம்மம் த⁴ம்மோதி பரிணாமேதி, அவினயம் அவினயோதி பரிணாமேதி, வினயம் வினயோதி பரிணாமேதி, அபஞ்ஞத்தம் ந பஞ்ஞபேதி, பஞ்ஞத்தம் ந ஸமுச்சி²ந்த³தி – இமே கோ², உபாலி, பஞ்ச த⁴ம்மிகா வினயப்³யாகரணா’’தி.

463. [அ. நி. 5.272-285] ‘‘கதிஹி நு கோ², ப⁴ந்தே, அங்கே³ஹி ஸமன்னாக³தோ ப⁴த்துத்³தே³ஸகோ யதா²ப⁴தம் நிக்கி²த்தோ ஏவம் நிரயே’’தி? ‘‘பஞ்சஹுபாலி, அங்கே³ஹி ஸமன்னாக³தோ ப⁴த்துத்³தே³ஸகோ யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? ச²ந்தா³க³திம் க³ச்ச²தி, தோ³ஸாக³திம் க³ச்ச²தி, மோஹாக³திம் க³ச்ச²தி, ப⁴யாக³திம் க³ச்ச²தி, உத்³தி³ட்டா²னுத்³தி³ட்ட²ம் ந ஜானாதி – இமேஹி கோ², உபாலி, பஞ்சஹங்கே³ஹி ஸமன்னாக³தோ ப⁴த்துத்³தே³ஸகோ யதா²ப⁴தம் நிக்கி²த்தோ ஏவம் நிரயே.

[அ. நி. 5.272-285] ‘‘பஞ்சஹுபாலி, அங்கே³ஹி ஸமன்னாக³தோ ப⁴த்துத்³தே³ஸகோ யதா²ப⁴தம் நிக்கி²த்தோ ஏவம் ஸக்³கே³. கதமேஹி பஞ்சஹி? ந ச²ந்தா³க³திம் க³ச்ச²தி, ந தோ³ஸாக³திம் க³ச்ச²தி, ந மோஹாக³திம் க³ச்ச²தி, ந ப⁴யாக³திம் க³ச்ச²தி, உத்³தி³ட்டா²னுத்³தி³ட்ட²ம் ஜானாதி – இமேஹி கோ², உபாலி, பஞ்சஹங்கே³ஹி ஸமன்னாக³தோ ப⁴த்துத்³தே³ஸகோ யதா²ப⁴தம் நிக்கி²த்தோ ஏவம் ஸக்³கே³’’தி.

464. ‘‘கதிஹி நு கோ², ப⁴ந்தே, அங்கே³ஹி ஸமன்னாக³தோ ஸேனாஸனபஞ்ஞாபகோ…பே… ப⁴ண்டா³கா³ரிகோ…பே… சீவரபடிக்³கா³ஹகோ…பே… சீவரபா⁴ஜகோ…பே… யாகு³பா⁴ஜகோ…பே… ப²லபா⁴ஜகோ…பே… க²ஜ்ஜபா⁴ஜகோ…பே… அப்பமத்தகவிஸ்ஸஜ்ஜகோ…பே… ஸாடியக்³கா³ஹாபகோ…பே… பத்தக்³கா³ஹாபகோ…பே… ஆராமிகபேஸகோ…பே… ஸாமணேரபேஸகோ யதா²ப⁴தம் நிக்கி²த்தோ ஏவம் நிரயே’’தி? ‘‘பஞ்சஹுபாலி, அங்கே³ஹி ஸமன்னாக³தோ ஸாமணேரபேஸகோ யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? ச²ந்தா³க³திம் க³ச்ச²தி, தோ³ஸாக³திம் க³ச்ச²தி, மோஹாக³திம் க³ச்ச²தி, ப⁴யாக³திம் க³ச்ச²தி, பேஸிதாபேஸிதம் ந ஜானாதி – இமேஹி கோ², உபாலி, பஞ்சஹங்கே³ஹி ஸமன்னாக³தோ ஸாமணேரபேஸகோ யதா²ப⁴தம் நிக்கி²த்தோ ஏவம் நிரயே. பஞ்சஹுபாலி, அங்கே³ஹி ஸமன்னாக³தோ ஸாமணேரபேஸகோ யதா²ப⁴தம் நிக்கி²த்தோ ஏவம் ஸக்³கே³. கதமேஹி பஞ்சஹி? ந ச²ந்தா³க³திம் க³ச்ச²தி, ந தோ³ஸாக³திம் க³ச்ச²தி, ந மோஹாக³திம் க³ச்ச²தி, ந ப⁴யாக³திம் க³ச்ச²தி, பேஸிதாபேஸிதம் ஜானாதி – இமேஹி கோ², உபாலி, பஞ்சஹங்கே³ஹி ஸமன்னாக³தோ ஸாமணேரபேஸகோ யதா²ப⁴தம் நிக்கி²த்தோ ஏவம் ஸக்³கே³’’தி.

ஆவாஸிகவக்³கோ³ நிட்டி²தோ தேரஸமோ.

தஸ்ஸுத்³தா³னம் –

ஆவாஸிகப்³யாகரணா, ப⁴த்துஸேனாஸனானி ச;

ப⁴ண்ட³சீவரக்³கா³ஹோ ச, சீவரஸ்ஸ ச பா⁴ஜகோ.

யாகு³ ப²லம் க²ஜ்ஜகஞ்ச, அப்பஸாடியகா³ஹகோ;

பத்தோ ஆராமிகோ சேவ, ஸாமணேரேன பேஸகோதி.