கதி²னபே⁴தோ³

1. கதி²னஅத்த²தாதி³

403. கஸ்ஸ கதி²னம் [கடி²னம் (ஸீ. ஸ்யா.)] அனத்த²தம்? கஸ்ஸ கதி²னம் அத்த²தம்? கிந்தி கதி²னம் அனத்த²தம்? கிந்தி கதி²னம் அத்த²தம்?

கஸ்ஸ கதி²னம் அனத்த²தந்தி? த்³வின்னம் புக்³க³லானம் அனத்த²தம் ஹோதி கதி²னம் – அனத்தா²ரகஸ்ஸ ச அனனுமோத³கஸ்ஸ ச. இமேஸம் த்³வின்னம் புக்³க³லானம் அனத்த²தம் ஹோதி கதி²னம்.

கஸ்ஸ கதி²னம் அத்த²தந்தி? த்³வின்னம் புக்³க³லானம் அத்த²தம் ஹோதி கதி²னம் – அத்தா²ரகஸ்ஸ ச அனுமோத³கஸ்ஸ ச. இமேஸம் த்³வின்னம் புக்³க³லானம் அத்த²தம் ஹோதி கதி²னம்.

கிந்தி கதி²னம் அனத்த²தந்தி? சதுவீஸதியா ஆகாரேஹி அனத்த²தம் ஹோதி கதி²னம், ந உல்லிகி²தமத்தேன அத்த²தம் ஹோதி கதி²னம், ந தோ⁴வனமத்தேன அத்த²தம் ஹோதி கதி²னம், ந சீவரவிசாரணமத்தேன அத்த²தம் ஹோதி கதி²னம், ந சே²த³னமத்தேன அத்த²தம் ஹோதி கதி²னம், ந ப³ந்த⁴னமத்தேன அத்த²தம் ஹோதி கதி²னம், ந ஓவட்டியகரணமத்தேன அத்த²தம் ஹோதி கதி²னம், ந கண்டு³ஸகரணமத்தேன [ந க³ண்டு³ஸகரணமத்தேன (க.)] அத்த²தம் ஹோதி கதி²னம், ந த³ள்ஹீகம்மகரணமத்தேன அத்த²தம் ஹோதி கதி²னம், ந அனுவாதகரணமத்தேன அத்த²தம் ஹோதி கதி²னம், ந பரிப⁴ண்ட³கரணமத்தேன அத்த²தம் ஹோதி கதி²னம், ந ஓவத்³தே⁴ய்யகரணமத்தேன [ந ஓவட்டேய்யகரணமத்தேன (ஸீ. ஸ்யா.), ந ஓவதே³ய்யகரணமத்தேன (க.)] அத்த²தம் ஹோதி கதி²னம், ந கம்ப³லமத்³த³னமத்தேன அத்த²தம் ஹோதி கதி²னம், ந நிமித்தகதேன அத்த²தம் ஹோதி கதி²னம், ந பரிகதா²கதேன அத்த²தம் ஹோதி கதி²னம், ந குக்குகதேன அத்த²தம் ஹோதி கதி²னம், ந ஸன்னிதி⁴கதேன அத்த²தம் ஹோதி கதி²னம், ந நிஸ்ஸக்³கி³யேன அத்த²தம் ஹோதி கதி²னம், ந அகப்பகதேன அத்த²தம் ஹோதி கதி²னம், ந அஞ்ஞத்ர ஸங்கா⁴டியா அத்த²தம் ஹோதி கதி²னம், ந அஞ்ஞத்ர உத்தராஸங்கே³ன அத்த²தம் ஹோதி கதி²னம், ந அஞ்ஞத்ர அந்தரவாஸகேன அத்த²தம் ஹோதி கதி²னம், ந அஞ்ஞத்ர பஞ்சகேன வா அதிரேகபஞ்சகேன வா தத³ஹேவ ஸஞ்சி²ன்னேன ஸமண்ட³லீகதேன அத்த²தம் ஹோதி கதி²னம், ந அஞ்ஞத்ர புக்³க³லஸ்ஸ அத்தா²ரா அத்த²தம் ஹோதி கதி²னம், ஸம்மா சே அத்த²தம் ஹோதி கதி²னம் தம் சே நிஸ்ஸீமட்டோ² அனுமோத³தி. ஏவம்பி அனத்த²தம் ஹோதி கதி²னம்.

நிமித்தகம்மம் நாம நிமித்தம் கரோதி – ‘‘இமினா து³ஸ்ஸேன கதி²னம் அத்த²ரிஸ்ஸாமீ’’தி. பரிகதா² நாம பரிகத²ம் கரோதி – ‘‘இமாய பரிகதா²ய கதி²னது³ஸ்ஸம் நிப்³ப³த்தேஸ்ஸாமீ’’தி. குக்குகதம் நாம அனாதி³யதா³னம் வுச்சதி. ஸன்னிதி⁴ நாம த்³வே ஸன்னிதி⁴யோ – கரணஸன்னிதி⁴ வா நிசயஸன்னிதி⁴ வா. நிஸ்ஸக்³கி³யம் நாம கயிரமானே அருணம் உட்ட²ஹதி [உத்³ரியதி (ஸீ. ஸ்யா.)]. இமேஹி சதுவீஸதியா ஆகாரேஹி அனத்த²தம் ஹோதி கதி²னம்.

கிந்தி கதி²னம் அத்த²தந்தி? ஸத்தரஸஹி ஆகாரேஹி அத்த²தம் ஹோதி கதி²னம். அஹதேன அத்த²தம் ஹோதி கதி²னம், அஹதகப்பேன அத்த²தம் ஹோதி கதி²னம், பிலோதிகாய அத்த²தம் ஹோதி கதி²னம், பம்ஸுகூலேன அத்த²தம் ஹோதி கதி²னம், பாபணிகேன அத்த²தம் ஹோதி கதி²னம், அனிமித்தகதேன அத்த²தம் ஹோதி கதி²னம், அபரிகதா²கதேன அத்த²தம் ஹோதி கதி²னம், அகுக்குகதேன அத்த²தம் ஹோதி கதி²னம், அஸன்னிதி⁴கதேன அத்த²தம் ஹோதி கதி²னம், அனிஸ்ஸக்³கி³யேன அத்த²தம் ஹோதி கதி²னம், கப்பகதேன அத்த²தம் ஹோதி கதி²னம், ஸங்கா⁴டியா அத்த²தம் ஹோதி கதி²னம், உத்தராஸங்கே³ன அத்த²தம் ஹோதி கதி²னம், அந்தரவாஸகேன அத்த²தம் ஹோதி கதி²னம், பஞ்சகேன வா அதிரேகபஞ்சகேன வா தத³ஹேவ ஸஞ்சி²ன்னேன ஸமண்ட³லீகதேன அத்த²தம் ஹோதி கதி²னம், புக்³க³லஸ்ஸ அத்தா²ரா அத்த²தம் ஹோதி கதி²னம், ஸம்மா சே அத்த²தம் ஹோதி கதி²னம், தம் சே ஸீமட்டோ² அனுமோத³தி, ஏவம்பி அத்த²தம் ஹோதி கதி²னம். இமேஹி ஸத்தரஸஹி ஆகாரேஹி அத்த²தம் ஹோதி கதி²னம்.

ஸஹ கதி²னஸ்ஸ அத்தா²ரா கதி த⁴ம்மா ஜாயந்தி? ஸஹ கதி²னஸ்ஸ அத்தா²ரா பன்னரஸ த⁴ம்மா ஜாயந்தி – அட்ட² மாதிகா, த்³வே பலிபோ³தா⁴, பஞ்சானிஸம்ஸா. ஸஹ கதி²னஸ்ஸ அத்தா²ரா இமே பன்னரஸ த⁴ம்மா ஜாயந்தி.

2. கதி²னஅனந்தரபச்சயாதி³

404. பயோக³ஸ்ஸ கதமே த⁴ம்மா அனந்தரபச்சயேன பச்சயோ, ஸமனந்தரபச்சயேன பச்சயோ, நிஸ்ஸயபச்சயேன பச்சயோ, உபனிஸ்ஸயபச்சயேன பச்சயோ, புரேஜாதபச்சயேன பச்சயோ, பச்சா²ஜாதபச்சயேன பச்சயோ, ஸஹஜாதபச்சயேன பச்சயோ? புப்³ப³கரணஸ்ஸ கதமே த⁴ம்மா அனந்தரபச்சயேன பச்சயோ…பே… பச்சுத்³தா⁴ரஸ்ஸ கதமே த⁴ம்மா… அதி⁴ட்டா²னஸ்ஸ கதமே த⁴ம்மா… அத்தா²ரஸ்ஸ கதமே த⁴ம்மா… மாதிகானஞ்ச பலிபோ³தா⁴னஞ்ச கதமே த⁴ம்மா… வத்து²ஸ்ஸ கதமே த⁴ம்மா அனந்தரபச்சயேன பச்சயோ, ஸமனந்தரபச்சயேன பச்சயோ, நிஸ்ஸயபச்சயேன பச்சயோ, உபனிஸ்ஸயபச்சயேன பச்சயோ, புரேஜாதபச்சயேன பச்சயோ, பச்சா²ஜாதபச்சயேன பச்சயோ, ஸஹஜாதபச்சயேன பச்சயோ?

புப்³ப³கரணம் பயோக³ஸ்ஸ அனந்தரபச்சயேன பச்சயோ, ஸமனந்தரபச்சயேன பச்சயோ, நிஸ்ஸயபச்சயேன பச்சயோ, உபனிஸ்ஸயபச்சயேன பச்சயோ. பயோகோ³ புப்³ப³கரணஸ்ஸ புரேஜாதபச்சயேன பச்சயோ. புப்³ப³கரணம் பயோக³ஸ்ஸ பச்சா²ஜாதபச்சயேன பச்சயோ. பன்னரஸ த⁴ம்மா ஸஹஜாதபச்சயேன பச்சயோ. பச்சுத்³தா⁴ரோ புப்³ப³கரணஸ்ஸ அனந்தரபச்சயேன பச்சயோ, ஸமனந்தரபச்சயேன பச்சயோ, நிஸ்ஸயபச்சயேன பச்சயோ, உபனிஸ்ஸயபச்சயேன பச்சயோ. புப்³ப³கரணம் பச்சுத்³தா⁴ரஸ்ஸ புரேஜாதபச்சயேன பச்சயோ. பச்சுத்³தா⁴ரோ புப்³ப³கரணஸ்ஸ பச்சா²ஜாதபச்சயேன பச்சயோ. பன்னரஸ த⁴ம்மா ஸஹஜாதபச்சயேன பச்சயோ. அதி⁴ட்டா²னம் பச்சுத்³தா⁴ரஸ்ஸ அனந்தரபச்சயேன பச்சயோ, ஸமனந்தரபச்சயேன பச்சயோ, நிஸ்ஸயபச்சயேன பச்சயோ, உபனிஸ்ஸயபச்சயேன பச்சயோ. பச்சுத்³தா⁴ரோ அதி⁴ட்டா²னஸ்ஸ புரேஜாதபச்சயேன பச்சயோ. அதி⁴ட்டா²னம் பச்சுத்³தா⁴ரஸ்ஸ பச்சா²ஜாதபச்சயேன பச்சயோ. பன்னரஸ த⁴ம்மா ஸஹஜாதபச்சயேன பச்சயோ. அத்தா²ரோ அதி⁴ட்டா²னஸ்ஸ அனந்தரபச்சயேன பச்சயோ, ஸமனந்தரபச்சயேன பச்சயோ, நிஸ்ஸயபச்சயேன பச்சயோ, உபனிஸ்ஸயபச்சயேன பச்சயோ. அதி⁴ட்டா²னம் அத்தா²ரஸ்ஸ புரேஜாதபச்சயேன பச்சயோ. அத்தா²ரோ அதி⁴ட்டா²னஸ்ஸ பச்சா²ஜாதபச்சயேன பச்சயோ. பன்னரஸ த⁴ம்மா ஸஹஜாதபச்சயேன பச்சயோ. மாதிகா ச பலிபோ³தா⁴ ச அத்தா²ரஸ்ஸ அனந்தரபச்சயேன பச்சயோ, ஸமனந்தரபச்சயேன பச்சயோ, நிஸ்ஸயபச்சயேன பச்சயோ, உபனிஸ்ஸயபச்சயேன பச்சயோ. அத்தா²ரோ மாதிகானஞ்ச பலிபோ³தா⁴னஞ்ச புரேஜாதபச்சயேன பச்சயோ. மாதிகா ச பலிபோ³தா⁴ ச அத்தா²ரஸ்ஸ பச்சா²ஜாதபச்சயேன பச்சயோ. பன்னரஸ த⁴ம்மா ஸஹஜாதபச்சயேன பச்சயோ. ஆஸா ச அனாஸா ச வத்து²ஸ்ஸ அனந்தரபச்சயேன பச்சயோ, ஸமனந்தரபச்சயேன பச்சயோ, நிஸ்ஸயபச்சயேன பச்சயோ, உபனிஸ்ஸயபச்சயேன பச்சயோ. வத்து² ஆஸானஞ்ச அனாஸானஞ்ச புரேஜாதபச்சயேன பச்சயோ. ஆஸா ச அனாஸா ச வத்து²ஸ்ஸ பச்சா²ஜாதபச்சயேன பச்சயோ. பன்னரஸ த⁴ம்மா ஸஹஜாதபச்சயேன பச்சயோ.

3. புப்³ப³கரணனிதா³னாதி³விபா⁴கோ³

405. புப்³ப³கரணம் கிம்னிதா³னம், கிம்ஸமுத³யம், கிம்ஜாதிகம், கிம்பப⁴வம், கிம்ஸம்பா⁴ரம், கிம்ஸமுட்டா²னம்? பச்சுத்³தா⁴ரோ கிம்னிதா³னோ, கிம்ஸமுத³யோ, கிம்ஜாதிகோ, கிம்பப⁴வோ, கிம்ஸம்பா⁴ரோ, கிம்ஸமுட்டா²னோ? அதி⁴ட்டா²னம் கிம்னிதா³னம், கிம்ஸமுத³யம், கிம்ஜாதிகம், கிம்பப⁴வம், கிம்ஸம்பா⁴ரம், கிம்ஸமுட்டா²னம்? அத்தா²ரோ கிம்னிதா³னோ, கிம்ஸமுத³யோ, கிம்ஜாதிகோ, கிம்பப⁴வோ, கிம்ஸம்பா⁴ரோ, கிம்ஸமுட்டா²னோ? மாதிகா ச பலிபோ³தா⁴ ச கிம்னிதா³னா, கிம்ஸமுத³யா, கிம்ஜாதிகா, கிம்பப⁴வா, கிம்ஸம்பா⁴ரா கிம்ஸமுட்டா²னா? ஆஸா ச அனாஸா ச கிம்னிதா³னா, கிம்ஸமுத³யா, கிம்ஜாதிகா, கிம்பப⁴வா, கிம்ஸம்பா⁴ரா, கிம்ஸமுட்டா²னா?

புப்³ப³கரணம் பயோக³னிதா³னம், பயோக³ஸமுத³யம், பயோக³ஜாதிகம், பயோக³பப⁴வம், பயோக³ஸம்பா⁴ரம், பயோக³ஸமுட்டா²னம். பச்சுத்³தா⁴ரோ புப்³ப³கரணனிதா³னோ, புப்³ப³கரணஸமுத³யோ, புப்³ப³கரணஜாதிகோ, புப்³ப³கரணபப⁴வோ, புப்³ப³கரணஸம்பா⁴ரோ, புப்³ப³கரணஸமுட்டா²னோ. அதி⁴ட்டா²னம் பச்சுத்³தா⁴ரனிதா³னம், பச்சுத்³தா⁴ரஸமுத³யம், பச்சுத்³தா⁴ரஜாதிகம், பச்சுத்³தா⁴ரபப⁴வம், பச்சுத்³தா⁴ரஸம்பா⁴ரம், பச்சுத்³தா⁴ரஸமுட்டா²னம். அத்தா²ரோ அதி⁴ட்டா²னனிதா³னோ, அதி⁴ட்டா²னஸமுத³யோ, அதி⁴ட்டா²னஜாதிகோ, அதி⁴ட்டா²னபப⁴வோ, அதி⁴ட்டா²னஸம்பா⁴ரோ, அதி⁴ட்டா²னஸமுட்டா²னோ. மாதிகா ச பலிபோ³தா⁴ ச அத்தா²ரனிதா³னா, அத்தா²ரஸமுத³யா, அத்தா²ரஜாதிகா, அத்தா²ரபப⁴வா, அத்தா²ரஸம்பா⁴ரா, அத்தா²ரஸமுட்டா²னா. ஆஸா ச அனாஸா ச வத்து²னிதா³னா, வத்து²ஸமுத³யா, வத்து²ஜாதிகா, வத்து²பப⁴வா, வத்து²ஸம்பா⁴ரா, வத்து²ஸமுட்டா²னா.

406. பயோகோ³ கிம்னிதா³னோ, கிம்ஸமுத³யோ, கிம்ஜாதிகோ, கிம்பப⁴வோ, கிம்ஸம்பா⁴ரோ, கிம்ஸமுட்டா²னோ, புப்³ப³கரணம்…பே… பச்சுத்³தா⁴ரோ… அதி⁴ட்டா²னம்… அத்தா²ரோ… மாதிகா ச பலிபோ³தா⁴ ச… வத்து²… ஆஸா ச அனாஸா ச கிம்னிதா³னா, கிம்ஸமுத³யா, கிம்ஜாதிகா, கிம்பப⁴வா, கிம்ஸம்பா⁴ரா, கிம்ஸமுட்டா²னா?

பயோகோ³ ஹேதுனிதா³னோ, ஹேதுஸமுத³யோ, ஹேதுஜாதிகோ, ஹேதுபப⁴வோ, ஹேதுஸம்பா⁴ரோ, ஹேதுஸமுட்டா²னோ. புப்³ப³கரணம்…பே… பச்சுத்³தா⁴ரோ… அதி⁴ட்டா²னம்… அத்தா²ரோ … மாதிகா ச பலிபோ³தா⁴ ச… வத்து²… ஆஸா ச அனாஸா ச ஹேதுனிதா³னா, ஹேதுஸமுத³யா, ஹேதுஜாதிகா, ஹேதுபப⁴வா, ஹேதுஸம்பா⁴ரா, ஹேதுஸமுட்டா²னா.

407. பயோகோ³ கிம்னிதா³னோ, கிம்ஸமுத³யோ, கிம்ஜாதிகோ, கிம்பப⁴வோ, கிம்ஸம்பா⁴ரோ, கிம்ஸமுட்டா²னோ? புப்³ப³கரணம்…பே… பச்சுத்³தா⁴ரோ… அதி⁴ட்டா²னம்… அத்தா²ரோ… மாதிகா ச பலிபோ³தா⁴ ச… வத்து²… ஆஸா ச அனாஸா ச கிம்னிதா³னா, கிம்ஸமுத³யா, கிம்ஜாதிகா, கிம்பப⁴வா, கிம்ஸம்பா⁴ரா, கிம்ஸமுட்டா²னா?

பயோகோ³ பச்சயனிதா³னோ, பச்சயஸமுத³யோ, பச்சயஜாதிகோ, பச்சயபப⁴வோ, பச்சயஸம்பா⁴ரோ, பச்சயஸமுட்டா²னோ. புப்³ப³கரணம்…பே… பச்சுத்³தா⁴ரோ… அதி⁴ட்டா²னம்… அத்தா²ரோ… மாதிகா ச பலிபோ³தா⁴ ச… வத்து²… ஆஸா ச அனாஸா ச பச்சயனிதா³னா, பச்சயஸமுத³யா, பச்சயஜாதிகா, பச்சயபப⁴வா, பச்சயஸம்பா⁴ரா, பச்சயஸமுட்டா²னா.

408. புப்³ப³கரணம் கதிஹி த⁴ம்மேஹி ஸங்க³ஹிதம்? புப்³ப³கரணம் ஸத்தஹி த⁴ம்மேஹி ஸங்க³ஹிதம். தோ⁴வனேன, விசாரணேன, சே²த³னேன, ப³ந்த⁴னேன, ஸிப்³ப³னேன, ரஜனேன, கப்பகரணேன – புப்³ப³கரணம் இமேஹி ஸத்தஹி த⁴ம்மேஹி ஸங்க³ஹிதம்.

பச்சுத்³தா⁴ரோ கதிஹி த⁴ம்மேஹி ஸங்க³ஹிதோ? பச்சுத்³தா⁴ரோ தீஹி த⁴ம்மேஹி ஸங்க³ஹிதோ – ஸங்கா⁴டியா, உத்தராஸங்கே³ன, அந்தரவாஸகேன.

அதி⁴ட்டா²னம் கதிஹி த⁴ம்மேஹி ஸங்க³ஹிதம்? அதி⁴ட்டா²னம் தீஹி த⁴ம்மேஹி ஸங்க³ஹிதம் – ஸங்கா⁴டியா, உத்தராஸங்கே³ன, அந்தரவாஸகேன.

அத்தா²ரோ கதிஹி த⁴ம்மேஹி ஸங்க³ஹிதோ? அத்தா²ரோ ஏகேன த⁴ம்மேன ஸங்க³ஹிதோ – வசீபே⁴தே³ன.

கதி²னஸ்ஸ கதி மூலானி, கதி வத்தூ²னி, கதி பூ⁴மியோ? கதி²னஸ்ஸ ஏகம் மூலம் – ஸங்கோ⁴; தீணி வத்தூ²னி – ஸங்கா⁴டி, உத்தராஸங்கோ³, அந்தரவாஸகோ, ச² பூ⁴மியோ – கோ²மம், கப்பாஸிகம், கோஸேய்யம், கம்ப³லம், ஸாணம், ப⁴ங்க³ம்.

கதி²னஸ்ஸ கோ ஆதி³, கிம் மஜ்ஜே², கிம் பரியோஸானம்? கதி²னஸ்ஸ புப்³ப³கரணம் ஆதி³, க்ரியா மஜ்ஜே², அத்தா²ரோ பரியோஸானம்.

409. கதிஹங்கே³ஹி ஸமன்னாக³தோ புக்³க³லோ அப⁴ப்³போ³ கதி²னம் அத்த²ரிதும்? கதிஹங்கே³ஹி ஸமன்னாக³தோ புக்³க³லோ ப⁴ப்³போ³ கதி²னம் அத்த²ரிதும்? அட்ட²ஹங்கே³ஹி ஸமன்னாக³தோ புக்³க³லோ அப⁴ப்³போ³ கதி²னம் அத்த²ரிதும். அட்ட²ஹங்கே³ஹி ஸமன்னாக³தோ புக்³க³லோ ப⁴ப்³போ³ கதி²னம் அத்த²ரிதும். கதமேஹி அட்ட²ஹங்கே³ஹி ஸமன்னாக³தோ புக்³க³லோ அப⁴ப்³போ³ கதி²னம் அத்த²ரிதும்? புப்³ப³கரணம் ந ஜானாதி, பச்சுத்³தா⁴ரம் ந ஜானாதி, அதி⁴ட்டா²னம் ந ஜானாதி, அத்தா²ரம் ந ஜானாதி, மாதிகம் ந ஜானாதி, பலிபோ³த⁴ம் ந ஜானாதி, உத்³தா⁴ரம் ந ஜானாதி, ஆனிஸம்ஸம் ந ஜானாதி – இமேஹி அட்ட²ஹங்கே³ஹி ஸமன்னாக³தோ புக்³க³லோ அப⁴ப்³போ³ கதி²னம் அத்த²ரிதும். கதமேஹி அட்ட²ஹங்கே³ஹி ஸமன்னாக³தோ புக்³க³லோ ப⁴ப்³போ³ கதி²னம் அத்த²ரிதும்? புப்³ப³கரணம் ஜானாதி, பச்சுத்³தா⁴ரம் ஜானாதி, அதி⁴ட்டா²னம் ஜானாதி, அத்தா²ரம் ஜானாதி, மாதிகம் ஜானாதி, பலிபோ³த⁴ம் ஜானாதி, உத்³தா⁴ரம் ஜானாதி, ஆனிஸம்ஸம் ஜானாதி – இமேஹி அட்ட²ஹங்கே³ஹி ஸமன்னாக³தோ புக்³க³லோ ப⁴ப்³போ³ கதி²னம் அத்த²ரிதும்.

410. கதினம் புக்³க³லானம் கதி²னத்தா²ரா ந ருஹந்தி? கதினம் புக்³க³லானம் கதி²னத்தா²ரா ருஹந்தி? திண்ணம் புக்³க³லானம் கதி²னத்தா²ரா ந ருஹந்தி. திண்ணம் புக்³க³லானம் கதி²னத்தா²ரா ருஹந்தி. கதமேஸம் திண்ணம் புக்³க³லானம் கதி²னத்தா²ரா ந ருஹந்தி? நிஸ்ஸீமட்டோ² அனுமோத³தி, அனுமோதே³ந்தோ ந வாசம் பி⁴ந்த³தி, வாசம் பி⁴ந்த³ந்தோ ந பரம் விஞ்ஞாபேதி – இமேஸம் திண்ணம் புக்³க³லானம் கதி²னத்தா²ரா ந ருஹந்தி. கதமேஸம் திண்ணம் புக்³க³லானம் கதி²னத்தா²ரா ருஹந்தி? ஸீமட்டோ² அனுமோத³தி, அனுமோதே³ந்தோ வாசம் பி⁴ந்த³தி, வாசம் பி⁴ந்த³ந்தோ பரம் விஞ்ஞாபேதி – இமேஸம் திண்ணம் புக்³க³லானம் கதி²னத்தா²ரா ருஹந்தி.

411. கதி கதி²னத்தா²ரா ந ருஹந்தி? கதி கதி²னத்தா²ரா ருஹந்தி? தயோ கதி²னத்தா²ரா ந ருஹந்தி. தயோ கதி²னத்தா²ரா ருஹந்தி. கதமே தயோ கதி²னத்தா²ரா ந ருஹந்தி? வத்து²விபன்னஞ்சேவ ஹோதி, காலவிபன்னஞ்ச, கரணவிபன்னஞ்ச – இமே தயோ கதி²னத்தா²ரா ந ருஹந்தி. கதமே தயோ கதி²னத்தா²ரா ருஹந்தி? வத்து²ஸம்பன்னஞ்சேவ ஹோதி, காலஸம்பன்னஞ்ச, கரணஸம்பன்னஞ்ச – இமே தயோ கதி²னத்தா²ரா ருஹந்தி.

4. கதி²னாதி³ஜானிதப்³ப³விபா⁴கோ³

412. கதி²னம் ஜானிதப்³ப³ம், கதி²னத்தா²ரோ ஜானிதப்³போ³, கதி²னஸ்ஸ அத்தா²ரமாஸோ ஜானிதப்³போ³, கதி²னஸ்ஸ அத்தா²ரவிபத்தி ஜானிதப்³பா³, கதி²னஸ்ஸ அத்தா²ரஸம்பத்தி ஜானிதப்³பா³, நிமித்தகம்மம் ஜானிதப்³ப³ம், பரிகதா² ஜானிதப்³பா³, குக்குகதம் ஜானிதப்³ப³ம், ஸன்னிதி⁴ ஜானிதப்³பா³, நிஸ்ஸக்³கி³யம் ஜானிதப்³ப³ம்.

கதி²னம் ஜானிதப்³ப³ந்தி தேஸஞ்ஞேவ த⁴ம்மானம் ஸங்க³ஹோ ஸமவாயோ நாமம் நாமகம்மம் நாமதே⁴ய்யம் நிருத்தி ப்³யஞ்ஜனம் அபி⁴லாபோ யதி³த³ம் கதி²னந்தி.

கதி²னஸ்ஸ அத்தா²ரமாஸோ ஜானிதப்³போ³தி வஸ்ஸானஸ்ஸ பச்சி²மோ மாஸோ ஜானிதப்³போ³.

கதி²னஸ்ஸ அத்தா²ரவிபத்தி ஜானிதப்³பா³தி சதுவீஸதியா ஆகாரேஹி கதி²னஸ்ஸ அத்தா²ரவிபத்தி ஜானிதப்³பா³.

கதி²னஸ்ஸ அத்தா²ரஸம்பத்தி ஜானிதப்³பா³தி ஸத்தரஸஹி ஆகாரேஹி கதி²னஸ்ஸ அத்தா²ரஸம்பத்தி ஜானிதப்³பா³.

நிமித்தகம்மம் ஜானிதப்³ப³ந்தி நிமித்தம் கரோதி இமினா து³ஸ்ஸேன கதி²னம் அத்த²ரிஸ்ஸாமீதி.

பரிகதா² ஜானிதப்³பா³தி பரிகத²ம் கரோதி இமாய பரிகதா²ய கதி²னது³ஸ்ஸம் நிப்³ப³த்தேஸ்ஸாமீதி.

குக்குகதம் ஜானிதப்³ப³ந்தி அனாதி³யதா³னம் ஜானிதப்³ப³ம்.

ஸன்னிதி⁴ ஜானிதப்³பா³தி த்³வே ஸன்னிதி⁴யோ ஜானிதப்³பா³ – கரணஸன்னிதி⁴ வா நிசயஸன்னிதி⁴ வா.

நிஸ்ஸக்³கி³யம் ஜானிதப்³ப³ந்தி கரியமானே அருணம் உட்ட²ஹதி.

கதி²னத்தா²ரோ ஜானிதப்³போ³தி ஸசே ஸங்க⁴ஸ்ஸ கதி²னது³ஸ்ஸம் உப்பன்னம் ஹோதி, ஸங்கே⁴ன கத²ம் படிபஜ்ஜிதப்³ப³ம், அத்தா²ரகேன கத²ம் படிபஜ்ஜிதப்³ப³ம், அனுமோத³கேன கத²ம் படிபஜ்ஜிதப்³ப³ம்.

413. ஸங்கே⁴ன ஞத்திது³தியேன கம்மேன கதி²னத்தா²ரகஸ்ஸ பி⁴க்கு²னோ தா³தப்³ப³ம், தேன கதி²னத்தா²ரகேன பி⁴க்கு²னா தத³ஹேவ தோ⁴வித்வா விமஜ்ஜித்வா விசாரேத்வா சி²ந்தி³த்வா ஸிப்³பே³த்வா ரஜித்வா கப்பம் கத்வா கதி²னம் அத்த²ரிதப்³ப³ம். ஸசே ஸங்கா⁴டியா கதி²னம் அத்த²ரிதுகாமோ ஹோதி, போராணிகா ஸங்கா⁴டி பச்சுத்³த⁴ரிதப்³பா³, நவா ஸங்கா⁴டி அதி⁴ட்டா²தப்³பா³. இமாய ஸங்கா⁴டியா கதி²னம் அத்த²ராமீதி வாசா பி⁴ந்தி³தப்³பா³. ஸசே உத்தராஸங்கே³ன கதி²னம் அத்த²ரிதுகாமோ ஹோதி, போராணகோ உத்தராஸங்கோ³ பச்சுத்³த⁴ரிதப்³போ³, நவோ உத்தராஸங்கோ³ அதி⁴ட்டா²தப்³போ³. இமினா உத்தராஸங்கே³ன கதி²னம் அத்த²ராமீதி வாசா பி⁴ந்தி³தப்³பா³. ஸசே அந்தரவாஸகேன கதி²னம் அத்த²ரிதுகாமோ ஹோதி, போராணகோ அந்தரவாஸகோ பச்சுத்³த⁴ரிதப்³போ³, நவோ அந்தரவாஸகோ அதி⁴ட்டா²தப்³போ³. இமினா அந்தரவாஸகேன கதி²னம் அத்த²ராமீதி வாசா பி⁴ந்தி³தப்³பா³. தேன கதி²னத்தா²ரகேன பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘அத்த²தம், ப⁴ந்தே, ஸங்க⁴ஸ்ஸ கதி²னம், த⁴ம்மிகோ கதி²னத்தா²ரோ, அனுமோத³தா²’’தி. தேஹி அனுமோத³கேஹி பி⁴க்கூ²ஹி ஏகம்ஸம் உத்தராஸங்க³ம் கரித்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘அத்த²தம், ஆவுஸோ, ஸங்க⁴ஸ்ஸ கதி²னம், த⁴ம்மிகோ கதி²னத்தா²ரோ, அனுமோதா³மா’’தி. தேன கதி²னத்தா²ரகேன பி⁴க்கு²னா ஸம்ப³ஹுலே பி⁴க்கூ² உபஸங்கமித்வா ஏகம்ஸம் உத்தராஸங்க³ம் கரித்வா அஞ்ஜலிம் பக்³க³ஹேத்வா ஏவமஸ்ஸு வசனீயா – ‘‘அத்த²தம், ப⁴ந்தே, ஸங்க⁴ஸ்ஸ கதி²னம், த⁴ம்மிகோ கதி²னத்தா²ரோ, அனுமோத³தா²’’தி. தேஹி அனுமோத³கேஹி பி⁴க்கூ²ஹி ஏகம்ஸம் உத்தராஸங்க³ம் கரித்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘அத்த²தம், ஆவுஸோ, ஸங்க⁴ஸ்ஸ கதி²னம், த⁴ம்மிகோ கதி²னத்தா²ரோ அனுமோதா³மா’’தி. தேன கதி²னத்தா²ரகேன பி⁴க்கு²னா ஏகம் பி⁴க்கு²ம் உபஸங்கமித்வா ஏகம்ஸம் உத்தராஸங்க³ம் கரித்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘அத்த²தம், ஆவுஸோ, ஸங்க⁴ஸ்ஸ கதி²னம், த⁴ம்மிகோ கதி²னத்தா²ரோ, அனுமோதா³ஹீ’’தி. தேன அனுமோத³கேன பி⁴க்கு²னா ஏகம்ஸம் உத்தராஸங்க³ம் கரித்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘அத்த²தம், ஆவுஸோ, ஸங்க⁴ஸ்ஸ கதி²னம், த⁴ம்மிகோ கதி²னத்தா²ரோ, அனுமோதா³மீ’’தி.

5. புக்³க³லஸ்ஸேவகதி²னத்தா²ரோ

414. ஸங்கோ⁴ கதி²னம் அத்த²ரதி, க³ணோ கதி²னம் அத்த²ரதி, புக்³க³லோ கதி²னம் அத்த²ரதீதி. ந ஸங்கோ⁴ கதி²னம் அத்த²ரதி, ந க³ணோ கதி²னம் அத்த²ரதி, புக்³க³லோ கதி²னம் அத்த²ரதீதி. ஹஞ்சி ந ஸங்கோ⁴ கதி²னம் அத்த²ரதி, ந க³ணோ கதி²னம் அத்த²ரதி, புக்³க³லோ கதி²னம் அத்த²ரதி. ஸங்க⁴ஸ்ஸ அனத்த²தம் ஹோதி கதி²னம், க³ணஸ்ஸ அனத்த²தம் ஹோதி கதி²னம், புக்³க³லஸ்ஸ அத்த²தம் ஹோதி கதி²னம். ஸங்கோ⁴ பாதிமோக்க²ம் உத்³தி³ஸதி க³ணோ பாதிமோக்க²ம் உத்³தி³ஸதி புக்³க³லோ பாதிமோக்க²ம் உத்³தி³ஸதீதி ந ஸங்கோ⁴ பாதிமோக்க²ம் உத்³தி³ஸதி, ந க³ணோ பாதிமோக்க²ம் உத்³தி³ஸதி, புக்³க³லோ பாதிமோக்க²ம் உத்³தி³ஸதீதி. ஹஞ்சி ந ஸங்கோ⁴ பாதிமோக்க²ம் உத்³தி³ஸதி, ந க³ணோ பாதிமோக்க²ம் உத்³தி³ஸதி, புக்³க³லோ பாதிமோக்க²ம் உத்³தி³ஸதி. ஸங்க⁴ஸ்ஸ அனுத்³தி³ட்ட²ம் ஹோதி பாதிமோக்க²ம், க³ணஸ்ஸ அனுத்³தி³ட்ட²ம் ஹோதி பாதிமோக்க²ம், புக்³க³லஸ்ஸ உத்³தி³ட்ட²ம் ஹோதி பாதிமோக்க²ம். ஸங்க⁴ஸ்ஸ ஸாமக்³கி³யா க³ணஸ்ஸ ஸாமக்³கி³யா புக்³க³லஸ்ஸ உத்³தே³ஸா ஸங்க⁴ஸ்ஸ உத்³தி³ட்ட²ம் ஹோதி பாதிமோக்க²ம், க³ணஸ்ஸ உத்³தி³ட்ட²ம் ஹோதி பாதிமோக்க²ம், புக்³க³லஸ்ஸ உத்³தி³ட்ட²ம் ஹோதி பாதிமோக்க²ம். ஏவமேவ ந ஸங்கோ⁴ கதி²னம் அத்த²ரதி, ந க³ணோ கதி²னம் அத்த²ரதி, புக்³க³லோ கதி²னம் அத்த²ரதி. ஸங்க⁴ஸ்ஸ அனுமோத³னாய க³ணஸ்ஸ அனுமோத³னாய புக்³க³லஸ்ஸ அத்தா²ரா ஸங்க⁴ஸ்ஸ அத்த²தம் ஹோதி கதி²னம், க³ணஸ்ஸ அத்த²தம் ஹோதி கதி²னம், புக்³க³லஸ்ஸ அத்த²தம் ஹோதி கதி²னந்தி.