2. அக³திஅக³ந்தப்³போ³

379. ந ச²ந்தா³க³தி க³ந்தப்³பா³தி ச²ந்தா³க³திம் க³ச்ச²ந்தோ கத²ம் ச²ந்தா³க³திம் க³ச்ச²தி? இதே⁴கச்சோ – ‘‘அயம் மே உபஜ்ஜா²யோ வா ஆசரியோ வா ஸத்³தி⁴விஹாரிகோ வா அந்தேவாஸிகோ வா ஸமானுபஜ்ஜா²யகோ வா ஸமானாசரியகோ வா ஸந்தி³ட்டோ² வா ஸம்ப⁴த்தோ வா ஞாதிஸாலோஹிதோ வா’’தி, தஸ்ஸானுகம்பாய தஸ்ஸானுரக்கா²ய அத⁴ம்மம் த⁴ம்மோதி தீ³பேதி, த⁴ம்மம் அத⁴ம்மோதி தீ³பேதி, அவினயம் வினயோதி தீ³பேதி, வினயம் அவினயோதி தீ³பேதி, அபா⁴ஸிதம் அலபிதம் ததா²க³தேன பா⁴ஸிதம் லபிதம் ததா²க³தேனாதி தீ³பேதி, பா⁴ஸிதம் லபிதம் ததா²க³தேன அபா⁴ஸிதம் அலபிதம் ததா²க³தேனாதி தீ³பேதி, அனாசிண்ணம் ததா²க³தேன ஆசிண்ணம் ததா²க³தேனாதி தீ³பேதி, ஆசிண்ணம் ததா²க³தேன அனாசிண்ணம் ததா²க³தேனாதி தீ³பேதி, அபஞ்ஞத்தம் ததா²க³தேன பஞ்ஞத்தம் ததா²க³தேனாதி தீ³பேதி, பஞ்ஞத்தம் ததா²க³தேன அபஞ்ஞத்தம் ததா²க³தேனாதி தீ³பேதி, அனாபத்திம் ஆபத்தீதி தீ³பேதி, ஆபத்திம் அனாபத்தீதி தீ³பேதி, லஹுகம் ஆபத்திம் க³ருகா ஆபத்தீதி தீ³பேதி, க³ருகம் ஆபத்திம் லஹுகா ஆபத்தீதி தீ³பேதி, ஸாவஸேஸம் ஆபத்திம் அனவஸேஸா ஆபத்தீதி தீ³பேதி, அனவஸேஸம் ஆபத்திம் ஸாவஸேஸா ஆபத்தீதி தீ³பேதி, து³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேதி, அது³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேதி. இமேஹி அட்டா²ரஸஹி வத்தூ²ஹி ச²ந்தா³க³திம் க³ச்ச²ந்தோ ப³ஹுஜனாஹிதாய படிபன்னோ ஹோதி ப³ஹுஜனாஸுகா²ய ப³ஹுனோ ஜனஸ்ஸ அனத்தா²ய அஹிதாய து³க்கா²ய தே³வமனுஸ்ஸானம். இமேஹி அட்டா²ரஸஹி வத்தூ²ஹி ச²ந்தா³க³திம் க³ச்ச²ந்தோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி. ச²ந்தா³க³திம் க³ச்ச²ந்தோ ஏவம் ச²ந்தா³க³திம் க³ச்ச²தி.

380. ந தோ³ஸாக³தி க³ந்தப்³பா³தி தோ³ஸாக³திம் க³ச்ச²ந்தோ கத²ம் தோ³ஸாக³திம் க³ச்ச²தி? இதே⁴கச்சோ அனத்த²ம் மே அசரீதி ஆகா⁴தம் ப³ந்த⁴தி, அனத்த²ம் மே சரதீதி ஆகா⁴தம் ப³ந்த⁴தி, அனத்த²ம் மே சரிஸ்ஸதீதி ஆகா⁴தம் ப³ந்த⁴தி, பியஸ்ஸ மே மனாபஸ்ஸ அனத்த²ம் அசரி… அனத்த²ம் சரதி… அனத்த²ம் சரிஸ்ஸதீதி ஆகா⁴தம் ப³ந்த⁴தி, அப்பியஸ்ஸ மே அமனாபஸ்ஸ அத்த²ம் அசரி… அத்த²ம் சரதி… அத்த²ம் சரிஸ்ஸதீதி ஆகா⁴தம் ப³ந்த⁴தி. இமேஹி நவஹி ஆகா⁴தவத்தூ²ஹி ஆகா⁴தோ படிகா⁴தோ குத்³தோ⁴ கோதா⁴பி⁴பூ⁴தோ அத⁴ம்மம் த⁴ம்மோதி தீ³பேதி, த⁴ம்மம் அத⁴ம்மோதி தீ³பேதி…பே… து³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேதி, அது³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேதி. இமேஹி அட்டா²ரஸஹி வத்தூ²ஹி தோ³ஸாக³திம் க³ச்ச²ந்தோ ப³ஹுஜனாஹிதாய படிபன்னோ ஹோதி ப³ஹுஜனாஸுகா²ய ப³ஹுனோ ஜனஸ்ஸ அனத்தா²ய அஹிதாய து³க்கா²ய தே³வமனுஸ்ஸானம். இமேஹி அட்டா²ரஸஹி வத்தூ²ஹி தோ³ஸாக³திம் க³ச்ச²ந்தோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம் ப³ஹுஞ்ச அபுஞ்ஞம் பஸவதி. தோ³ஸாக³திம் க³ச்ச²ந்தோ ஏவம் தோ³ஸாக³திம் க³ச்ச²தி.

381. ந மோஹாக³தி க³ந்தப்³பா³தி மோஹாக³திம் க³ச்ச²ந்தோ கத²ம் மோஹாக³திம் க³ச்ச²தி? ரத்தோ ராக³வஸேன க³ச்ச²தி, து³ட்டோ² தோ³ஸவஸேன க³ச்ச²தி, மூள்ஹோ மோஹவஸேன க³ச்ச²தி, பராமட்டோ² தி³ட்டி²வஸேன க³ச்ச²தி, மூள்ஹோ ஸம்மூள்ஹோ மோஹாபி⁴பூ⁴தோ அத⁴ம்மம் த⁴ம்மோதி தீ³பேதி, த⁴ம்மம் அத⁴ம்மோதி தீ³பேதி…பே… து³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேதி, அது³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேதி. இமேஹி அட்டா²ரஸஹி வத்தூ²ஹி மோஹாக³திம் க³ச்ச²ந்தோ ப³ஹுஜனாஹிதாய படிபன்னோ ஹோதி ப³ஹுஜனாஸுகா²ய ப³ஹுனோ ஜனஸ்ஸ அனத்தா²ய அஹிதாய து³க்கா²ய தே³வமனுஸ்ஸானம். இமேஹி அட்டா²ரஸஹி வத்தூ²ஹி மோஹாக³திம் க³ச்ச²ந்தோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி. மோஹாக³திம் க³ச்ச²ந்தோ ஏவம் மோஹாக³திம் க³ச்ச²தி.

382. ந ப⁴யாக³தி க³ந்தப்³பா³தி ப⁴யாக³திம் க³ச்ச²ந்தோ கத²ம் ப⁴யாக³திம் க³ச்ச²தி? இதே⁴கச்சோ – ‘‘அயம் விஸமனிஸ்ஸிதோ வா க³ஹனனிஸ்ஸிதோ வா ப³லவனிஸ்ஸிதோ வா கக்க²ளோ ப²ருஸோ ஜீவிதந்தராயம் வா ப்³ரஹ்மசரியந்தராயம் வா கரிஸ்ஸதீ’’தி, தஸ்ஸ ப⁴யா பீ⁴தோ அத⁴ம்மம் த⁴ம்மோதி தீ³பேதி, த⁴ம்மம் அத⁴ம்மோதி தீ³பேதி, அவினயம் வினயோதி தீ³பேதி, வினயம் அவினயோதி தீ³பேதி, அபா⁴ஸிதம் அலபிதம் ததா²க³தேன பா⁴ஸிதம் லபிதம் ததா²க³தேனாதி தீ³பேதி, பா⁴ஸிதம் லபிதம் ததா²க³தேன அபா⁴ஸிதம் அலபிதம் ததா²க³தேனாதி தீ³பேதி, அனாசிண்ணம் ததா²க³தேன ஆசிண்ணம் ததா²க³தேனாதி தீ³பேதி, ஆசிண்ணம் ததா²க³தேன அனாசிண்ணம் ததா²க³தேனாதி தீ³பேதி, அபஞ்ஞத்தம் ததா²க³தேன பஞ்ஞத்தம் ததா²க³தேனாதி தீ³பேதி, பஞ்ஞத்தம் ததா²க³தேன அபஞ்ஞத்தம் ததா²க³தேனாதி தீ³பேதி, அனாபத்திம் ஆபத்தீதி தீ³பேதி, ஆபத்திம் அனாபத்தீதி தீ³பேதி, லஹுகம் ஆபத்திம் க³ருகா ஆபத்தீதி தீ³பேதி, க³ருகம் ஆபத்திம் லஹுகா ஆபத்தீதி தீ³பேதி, ஸாவஸேஸம் ஆபத்திம் அனவஸேஸா ஆபத்தீதி தீ³பேதி, அனவஸேஸம் ஆபத்திம் ஸாவஸேஸா ஆபத்தீதி தீ³பேதி, து³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேதி, அது³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேதி. இமேஹி அட்டா²ரஸஹி வத்தூ²ஹி ப⁴யாக³திம் க³ச்ச²ந்தோ ப³ஹுஜனாஹிதாய படிபன்னோ ஹோதி ப³ஹுஜனாஸுகா²ய ப³ஹுனோ ஜனஸ்ஸ அனத்தா²ய அஹிதாய து³க்கா²ய தே³வமனுஸ்ஸானம். இமேஹி அட்டா²ரஸஹி வத்தூ²ஹி ப⁴யாக³திம் க³ச்ச²ந்தோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி. ப⁴யாக³திம் க³ச்ச²ந்தோ ஏவம் ப⁴யாக³திம் க³ச்ச²தி.

ச²ந்தா³ தோ³ஸா ப⁴யா மோஹா, யோ த⁴ம்மம் அதிவத்ததி;

நிஹீயதி தஸ்ஸ யஸோ, காளபக்கே²வ சந்தி³மாதி.