மஹாஸங்கா³மோ

1. வோஹரந்தேன ஜானிதப்³பா³தி³

368. ஸங்கா³மாவசரே பி⁴க்கு²னா ஸங்கே⁴ வோஹரந்தேன வத்து² ஜானிதப்³ப³ம், விபத்தி ஜானிதப்³பா³, ஆபத்தி ஜானிதப்³பா³, நிதா³னம் ஜானிதப்³ப³ம், ஆகாரோ ஜானிதப்³போ³, புப்³பா³பரம் ஜானிதப்³ப³ம், கதாகதம் ஜானிதப்³ப³ம், கம்மம் ஜானிதப்³ப³ம், அதி⁴கரணம் ஜானிதப்³ப³ம், ஸமதோ² ஜானிதப்³போ³, ந ச²ந்தா³க³தி க³ந்தப்³பா³, ந தோ³ஸாக³தி க³ந்தப்³பா³, ந மோஹாக³தி க³ந்தப்³பா³, ந ப⁴யாக³தி க³ந்தப்³பா³, ஸஞ்ஞாபனீயே டா²னே ஸஞ்ஞாபேதப்³ப³ம், நிஜ்ஜா²பனீயே டா²னே நிஜ்ஜா²பேதப்³ப³ம், பேக்க²னீயே டா²னே பேக்கி²தப்³ப³ம், பஸாத³னீயே டா²னே பஸாதே³தப்³ப³ம், லத்³த⁴பக்கோ²ம்ஹீதி பரபக்கோ² நாவஜானிதப்³போ³, ப³ஹுஸ்ஸுதோம்ஹீதி அப்பஸ்ஸுதோ நாவஜானிதப்³போ³, தே²ரதரோம்ஹீதி நவகதரோ நாவஜானிதப்³போ³, அஸம்பத்தம் ந ப்³யாஹாதப்³ப³ம், ஸம்பத்தம் த⁴ம்மதோ வினயதோ ந பரிஹாபேதப்³ப³ம், யேன த⁴ம்மேன யேன வினயேன யேன ஸத்து²ஸாஸனேன தம் அதி⁴கரணம் வூபஸம்மதி, ததா² தம் அதி⁴கரணம் வூபஸமேதப்³ப³ம்.

369. வத்து² ஜானிதப்³ப³ந்தி அட்ட²பாராஜிகானம் [அட்ட²ன்னம் பாராஜிகானம் (ஸீ. க.)] வத்து² ஜானிதப்³ப³ம், தேவீஸஸங்கா⁴தி³ஸேஸானம் வத்து² ஜானிதப்³ப³ம், த்³வேஅனியதானம் வத்து² ஜானிதப்³ப³ம், த்³வேசத்தாரீஸனிஸ்ஸக்³கி³யானம் வத்து² ஜானிதப்³ப³ம், அட்டா²ஸீதிஸதபாசித்தியானம் வத்து² ஜானிதப்³ப³ம், த்³வாத³ஸபாடிதே³ஸனீயானம் வத்து² ஜானிதப்³ப³ம், து³க்கடானம் வத்து² ஜானிதப்³ப³ம், து³ப்³பா⁴ஸிதானம் வத்து² ஜானிதப்³ப³ம்.

370. விபத்தி ஜானிதப்³பா³தி ஸீலவிபத்தி ஜானிதப்³பா³, ஆசாரவிபத்தி ஜானிதப்³பா³, தி³ட்டி²விபத்தி ஜானிதப்³பா³, ஆஜீவவிபத்தி ஜானிதப்³பா³.

371. ஆபத்தி ஜானிதப்³பா³தி பாராஜிகாபத்தி ஜானிதப்³பா³, ஸங்கா⁴தி³ஸேஸாபத்தி ஜானிதப்³பா³, து²ல்லச்சயாபத்தி ஜானிதப்³பா³, பாசித்தியாபத்தி ஜானிதப்³பா³, பாடிதே³ஸனீயாபத்தி ஜானிதப்³பா³, து³க்கடாபத்தி ஜானிதப்³பா³, து³ப்³பா⁴ஸிதாபத்தி ஜானிதப்³பா³.

372. நிதா³னம் ஜானிதப்³ப³ந்தி அட்ட²பாராஜிகானம் நிதா³னம் ஜானிதப்³ப³ம், தேவீஸஸங்கா⁴தி³ஸேஸானம் நிதா³னம் ஜானிதப்³ப³ம், த்³வேஅனியதானம் நிதா³னம் ஜானிதப்³ப³ம், த்³வேசத்தாரீஸனிஸ்ஸக்³கி³யானம் நிதா³னம் ஜானிதப்³ப³ம், அட்டா²ஸீதிஸதபாசித்தியானம் நிதா³னம் ஜானிதப்³ப³ம், த்³வாத³ஸபாடிதே³ஸனீயானம் நிதா³னம் ஜானிதப்³ப³ம், து³க்கடானம் நிதா³னம் ஜானிதப்³ப³ம், து³ப்³பா⁴ஸிதானம் நிதா³னம் ஜானிதப்³ப³ம்.

373. ஆகாரோ ஜானிதப்³போ³தி ஸங்கோ⁴ ஆகாரதோ ஜானிதப்³போ³, க³ணோ ஆகாரதோ ஜானிதப்³போ³, புக்³க³லோ ஆகாரதோ ஜானிதப்³போ³, சோத³கோ ஆகாரதோ ஜானிதப்³போ³, சுதி³தகோ ஆகாரதோ ஜானிதப்³போ³. ஸங்கோ⁴ ஆகாரதோ ஜானிதப்³போ³தி படிப³லோ நு கோ² அயம் ஸங்கோ⁴ இமம் அதி⁴கரணம் வூபஸமேதும் த⁴ம்மேன வினயேன ஸத்து²ஸாஸனேன உதா³ஹு நோதி, ஏவம் ஸங்கோ⁴ ஆகாரதோ ஜானிதப்³போ³. க³ணோ ஆகாரதோ ஜானிதப்³போ³தி படிப³லோ நு கோ² அயம் க³ணோ இமம் அதி⁴கரணம் வூபஸமேதும் த⁴ம்மேன வினயேன ஸத்து²ஸாஸனேன உதா³ஹு நோதி, ஏவம் க³ணோ ஆகாரதோ ஜானிதப்³போ³. புக்³க³லோ ஆகாரதோ ஜானிதப்³போ³தி படிப³லோ நு கோ² அயம் புக்³க³லோ இமம் அதி⁴கரணம் வூபஸமேதும் த⁴ம்மேன வினயேன ஸத்து²ஸாஸனேன உதா³ஹு நோதி, ஏவம் புக்³க³லோ ஆகாரதோ ஜானிதப்³போ³. சோத³கோ ஆகாரதோ ஜானிதப்³போ³தி கச்சி நு கோ² அயமாயஸ்மா பஞ்சஸு த⁴ம்மேஸு பதிட்டா²ய பரம் சோதே³தி உதா³ஹு நோதி, ஏவம் சோத³கோ ஆகாரதோ ஜானிதப்³போ³. சுதி³தகோ ஆகாரதோ ஜானிதப்³போ³தி கச்சி நு கோ² அயமாயஸ்மா த்³வீஸு த⁴ம்மேஸு பதிட்டி²தோ ஸச்சே ச அகுப்பே ச உதா³ஹு நோதி, ஏவம் சுதி³தகோ ஆகாரதோ ஜானிதப்³போ³.

374. புப்³பா³பரம் ஜானிதப்³ப³ந்தி கச்சி நு கோ² அயமாயஸ்மா வத்து²தோ வா வத்து²ம் ஸங்கமதி, விபத்திதோ வா விபத்திம் ஸங்கமதி, ஆபத்திதோ வா ஆபத்திம் ஸங்கமதி, அவஜானித்வா வா படிஜானாதி, படிஜானித்வா வா அவஜானாதி, அஞ்ஞேன வா அஞ்ஞம் படிசரதி, உதா³ஹு நோதி, ஏவம் புப்³பா³பரம் ஜானிதப்³ப³ம்.

375. கதாகதம் ஜானிதப்³ப³ந்தி மேது²னத⁴ம்மோ ஜானிதப்³போ³, மேது²னத⁴ம்மஸ்ஸ அனுலோமம் ஜானிதப்³ப³ம், மேது²னத⁴ம்மஸ்ஸ புப்³ப³பா⁴கோ³ ஜானிதப்³போ³. மேது²னத⁴ம்மோ ஜானிதப்³போ³தி த்³வயம்த்³வயஸமாபத்தி ஜானிதப்³பா³. மேது²னத⁴ம்மஸ்ஸ அனுலோமம் ஜானிதப்³ப³ந்தி பி⁴க்கு² அத்தனோ முகே²ன பரஸ்ஸ அங்க³ஜாதம் க³ண்ஹாதி. மேது²னத⁴ம்மஸ்ஸ புப்³ப³பா⁴கோ³ ஜானிதப்³போ³தி வண்ணாவண்ணோ [வண்ணோ அவண்ணோ (ஸ்யா.)], காயஸம்ஸக்³கோ³, து³ட்டு²ல்லவாசா, அத்தகாமபாரிசரியா, வசனமனுப்பதா³னம் [த⁴னமனுப்பதா³னம் (க.)].

376. கம்மம் ஜானிதப்³ப³ந்தி ஸோளஸகம்மானி ஜானிதப்³பா³னி – சத்தாரி அபலோகனகம்மானி ஜானிதப்³பா³னி, சத்தாரி ஞத்திகம்மானி ஜானிதப்³பா³னி, சத்தாரி ஞத்திது³தியகம்மானி ஜானிதப்³பா³னி, சத்தாரி ஞத்திசதுத்த²கம்மானி ஜானிதப்³பா³னி.

377. அதி⁴கரணம் ஜானிதப்³ப³ந்தி சத்தாரி அதி⁴கரணானி ஜானிதப்³பா³னி – விவாதா³தி⁴கரணம் ஜானிதப்³ப³ம், அனுவாதா³தி⁴கரணம் ஜானிதப்³ப³ம், ஆபத்தாதி⁴கரணம் ஜானிதப்³ப³ம், கிச்சாதி⁴கரணம் ஜானிதப்³ப³ம்.

378. ஸமதோ² ஜானிதப்³போ³தி ஸத்த ஸமதா² ஜானிதப்³பா³ – ஸம்முகா²வினயோ ஜானிதப்³போ³, ஸதிவினயோ ஜானிதப்³போ³, அமூள்ஹவினயோ ஜானிதப்³போ³, படிஞ்ஞாதகரணம் ஜானிதப்³ப³ம், யேபு⁴ய்யஸிகா ஜானிதப்³பா³, தஸ்ஸபாபியஸிகா ஜானிதப்³பா³, திணவத்தா²ரகோ ஜானிதப்³போ³.

2. அக³திஅக³ந்தப்³போ³

379. ந ச²ந்தா³க³தி க³ந்தப்³பா³தி ச²ந்தா³க³திம் க³ச்ச²ந்தோ கத²ம் ச²ந்தா³க³திம் க³ச்ச²தி? இதே⁴கச்சோ – ‘‘அயம் மே உபஜ்ஜா²யோ வா ஆசரியோ வா ஸத்³தி⁴விஹாரிகோ வா அந்தேவாஸிகோ வா ஸமானுபஜ்ஜா²யகோ வா ஸமானாசரியகோ வா ஸந்தி³ட்டோ² வா ஸம்ப⁴த்தோ வா ஞாதிஸாலோஹிதோ வா’’தி, தஸ்ஸானுகம்பாய தஸ்ஸானுரக்கா²ய அத⁴ம்மம் த⁴ம்மோதி தீ³பேதி, த⁴ம்மம் அத⁴ம்மோதி தீ³பேதி, அவினயம் வினயோதி தீ³பேதி, வினயம் அவினயோதி தீ³பேதி, அபா⁴ஸிதம் அலபிதம் ததா²க³தேன பா⁴ஸிதம் லபிதம் ததா²க³தேனாதி தீ³பேதி, பா⁴ஸிதம் லபிதம் ததா²க³தேன அபா⁴ஸிதம் அலபிதம் ததா²க³தேனாதி தீ³பேதி, அனாசிண்ணம் ததா²க³தேன ஆசிண்ணம் ததா²க³தேனாதி தீ³பேதி, ஆசிண்ணம் ததா²க³தேன அனாசிண்ணம் ததா²க³தேனாதி தீ³பேதி, அபஞ்ஞத்தம் ததா²க³தேன பஞ்ஞத்தம் ததா²க³தேனாதி தீ³பேதி, பஞ்ஞத்தம் ததா²க³தேன அபஞ்ஞத்தம் ததா²க³தேனாதி தீ³பேதி, அனாபத்திம் ஆபத்தீதி தீ³பேதி, ஆபத்திம் அனாபத்தீதி தீ³பேதி, லஹுகம் ஆபத்திம் க³ருகா ஆபத்தீதி தீ³பேதி, க³ருகம் ஆபத்திம் லஹுகா ஆபத்தீதி தீ³பேதி, ஸாவஸேஸம் ஆபத்திம் அனவஸேஸா ஆபத்தீதி தீ³பேதி, அனவஸேஸம் ஆபத்திம் ஸாவஸேஸா ஆபத்தீதி தீ³பேதி, து³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேதி, அது³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேதி. இமேஹி அட்டா²ரஸஹி வத்தூ²ஹி ச²ந்தா³க³திம் க³ச்ச²ந்தோ ப³ஹுஜனாஹிதாய படிபன்னோ ஹோதி ப³ஹுஜனாஸுகா²ய ப³ஹுனோ ஜனஸ்ஸ அனத்தா²ய அஹிதாய து³க்கா²ய தே³வமனுஸ்ஸானம். இமேஹி அட்டா²ரஸஹி வத்தூ²ஹி ச²ந்தா³க³திம் க³ச்ச²ந்தோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி. ச²ந்தா³க³திம் க³ச்ச²ந்தோ ஏவம் ச²ந்தா³க³திம் க³ச்ச²தி.

380. ந தோ³ஸாக³தி க³ந்தப்³பா³தி தோ³ஸாக³திம் க³ச்ச²ந்தோ கத²ம் தோ³ஸாக³திம் க³ச்ச²தி? இதே⁴கச்சோ அனத்த²ம் மே அசரீதி ஆகா⁴தம் ப³ந்த⁴தி, அனத்த²ம் மே சரதீதி ஆகா⁴தம் ப³ந்த⁴தி, அனத்த²ம் மே சரிஸ்ஸதீதி ஆகா⁴தம் ப³ந்த⁴தி, பியஸ்ஸ மே மனாபஸ்ஸ அனத்த²ம் அசரி… அனத்த²ம் சரதி… அனத்த²ம் சரிஸ்ஸதீதி ஆகா⁴தம் ப³ந்த⁴தி, அப்பியஸ்ஸ மே அமனாபஸ்ஸ அத்த²ம் அசரி… அத்த²ம் சரதி… அத்த²ம் சரிஸ்ஸதீதி ஆகா⁴தம் ப³ந்த⁴தி. இமேஹி நவஹி ஆகா⁴தவத்தூ²ஹி ஆகா⁴தோ படிகா⁴தோ குத்³தோ⁴ கோதா⁴பி⁴பூ⁴தோ அத⁴ம்மம் த⁴ம்மோதி தீ³பேதி, த⁴ம்மம் அத⁴ம்மோதி தீ³பேதி…பே… து³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேதி, அது³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேதி. இமேஹி அட்டா²ரஸஹி வத்தூ²ஹி தோ³ஸாக³திம் க³ச்ச²ந்தோ ப³ஹுஜனாஹிதாய படிபன்னோ ஹோதி ப³ஹுஜனாஸுகா²ய ப³ஹுனோ ஜனஸ்ஸ அனத்தா²ய அஹிதாய து³க்கா²ய தே³வமனுஸ்ஸானம். இமேஹி அட்டா²ரஸஹி வத்தூ²ஹி தோ³ஸாக³திம் க³ச்ச²ந்தோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம் ப³ஹுஞ்ச அபுஞ்ஞம் பஸவதி. தோ³ஸாக³திம் க³ச்ச²ந்தோ ஏவம் தோ³ஸாக³திம் க³ச்ச²தி.

381. ந மோஹாக³தி க³ந்தப்³பா³தி மோஹாக³திம் க³ச்ச²ந்தோ கத²ம் மோஹாக³திம் க³ச்ச²தி? ரத்தோ ராக³வஸேன க³ச்ச²தி, து³ட்டோ² தோ³ஸவஸேன க³ச்ச²தி, மூள்ஹோ மோஹவஸேன க³ச்ச²தி, பராமட்டோ² தி³ட்டி²வஸேன க³ச்ச²தி, மூள்ஹோ ஸம்மூள்ஹோ மோஹாபி⁴பூ⁴தோ அத⁴ம்மம் த⁴ம்மோதி தீ³பேதி, த⁴ம்மம் அத⁴ம்மோதி தீ³பேதி…பே… து³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேதி, அது³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேதி. இமேஹி அட்டா²ரஸஹி வத்தூ²ஹி மோஹாக³திம் க³ச்ச²ந்தோ ப³ஹுஜனாஹிதாய படிபன்னோ ஹோதி ப³ஹுஜனாஸுகா²ய ப³ஹுனோ ஜனஸ்ஸ அனத்தா²ய அஹிதாய து³க்கா²ய தே³வமனுஸ்ஸானம். இமேஹி அட்டா²ரஸஹி வத்தூ²ஹி மோஹாக³திம் க³ச்ச²ந்தோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி. மோஹாக³திம் க³ச்ச²ந்தோ ஏவம் மோஹாக³திம் க³ச்ச²தி.

382. ந ப⁴யாக³தி க³ந்தப்³பா³தி ப⁴யாக³திம் க³ச்ச²ந்தோ கத²ம் ப⁴யாக³திம் க³ச்ச²தி? இதே⁴கச்சோ – ‘‘அயம் விஸமனிஸ்ஸிதோ வா க³ஹனனிஸ்ஸிதோ வா ப³லவனிஸ்ஸிதோ வா கக்க²ளோ ப²ருஸோ ஜீவிதந்தராயம் வா ப்³ரஹ்மசரியந்தராயம் வா கரிஸ்ஸதீ’’தி, தஸ்ஸ ப⁴யா பீ⁴தோ அத⁴ம்மம் த⁴ம்மோதி தீ³பேதி, த⁴ம்மம் அத⁴ம்மோதி தீ³பேதி, அவினயம் வினயோதி தீ³பேதி, வினயம் அவினயோதி தீ³பேதி, அபா⁴ஸிதம் அலபிதம் ததா²க³தேன பா⁴ஸிதம் லபிதம் ததா²க³தேனாதி தீ³பேதி, பா⁴ஸிதம் லபிதம் ததா²க³தேன அபா⁴ஸிதம் அலபிதம் ததா²க³தேனாதி தீ³பேதி, அனாசிண்ணம் ததா²க³தேன ஆசிண்ணம் ததா²க³தேனாதி தீ³பேதி, ஆசிண்ணம் ததா²க³தேன அனாசிண்ணம் ததா²க³தேனாதி தீ³பேதி, அபஞ்ஞத்தம் ததா²க³தேன பஞ்ஞத்தம் ததா²க³தேனாதி தீ³பேதி, பஞ்ஞத்தம் ததா²க³தேன அபஞ்ஞத்தம் ததா²க³தேனாதி தீ³பேதி, அனாபத்திம் ஆபத்தீதி தீ³பேதி, ஆபத்திம் அனாபத்தீதி தீ³பேதி, லஹுகம் ஆபத்திம் க³ருகா ஆபத்தீதி தீ³பேதி, க³ருகம் ஆபத்திம் லஹுகா ஆபத்தீதி தீ³பேதி, ஸாவஸேஸம் ஆபத்திம் அனவஸேஸா ஆபத்தீதி தீ³பேதி, அனவஸேஸம் ஆபத்திம் ஸாவஸேஸா ஆபத்தீதி தீ³பேதி, து³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேதி, அது³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேதி. இமேஹி அட்டா²ரஸஹி வத்தூ²ஹி ப⁴யாக³திம் க³ச்ச²ந்தோ ப³ஹுஜனாஹிதாய படிபன்னோ ஹோதி ப³ஹுஜனாஸுகா²ய ப³ஹுனோ ஜனஸ்ஸ அனத்தா²ய அஹிதாய து³க்கா²ய தே³வமனுஸ்ஸானம். இமேஹி அட்டா²ரஸஹி வத்தூ²ஹி ப⁴யாக³திம் க³ச்ச²ந்தோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி. ப⁴யாக³திம் க³ச்ச²ந்தோ ஏவம் ப⁴யாக³திம் க³ச்ச²தி.

ச²ந்தா³ தோ³ஸா ப⁴யா மோஹா, யோ த⁴ம்மம் அதிவத்ததி;

நிஹீயதி தஸ்ஸ யஸோ, காளபக்கே²வ சந்தி³மாதி.

3. அக³திஅக³மனம்

383. கத²ம் ந ச²ந்தா³க³திம் க³ச்ச²தி? அத⁴ம்மம் அத⁴ம்மோதி தீ³பேந்தோ ந ச²ந்தா³க³திம் க³ச்ச²தி, த⁴ம்மம் த⁴ம்மோதி தீ³பேந்தோ ந ச²ந்தா³க³திம் க³ச்ச²தி, அவினயம் அவினயோதி தீ³பேந்தோ ந ச²ந்தா³க³திம் க³ச்ச²தி, வினயம் வினயோதி தீ³பேந்தோ ந ச²ந்தா³க³திம் க³ச்ச²தி, அபா⁴ஸிதம் அலபிதம் ததா²க³தேன அபா⁴ஸிதம் அலபிதம் ததா²க³தேனாதி தீ³பேந்தோ ந ச²ந்தா³க³திம் க³ச்ச²தி, பா⁴ஸிதம் லபிதம் ததா²க³தேன பா⁴ஸிதம் லபிதம் ததா²க³தேனாதி தீ³பேந்தோ ந ச²ந்தா³க³திம் க³ச்ச²தி, அனாசிண்ணம் ததா²க³தேன அனாசிண்ணம் ததா²க³தேனாதி தீ³பேந்தோ ந ச²ந்தா³க³திம் க³ச்ச²தி, ஆசிண்ணம் ததா²க³தேன ஆசிண்ணம் ததா²க³தேனாதி தீ³பேந்தோ ந ச²ந்தா³க³திம் க³ச்ச²தி, அபஞ்ஞத்தம் ததா²க³தேன அபஞ்ஞத்தம் ததா²க³தேனாதி தீ³பேந்தோ ந ச²ந்தா³க³திம் க³ச்ச²தி, பஞ்ஞத்தம் ததா²க³தேன பஞ்ஞத்தம் ததா²க³தேனாதி தீ³பேந்தோ ந ச²ந்தா³க³திம் க³ச்ச²தி, அனாபத்திம் அனாபத்தீதி தீ³பேந்தோ ந ச²ந்தா³க³திம் க³ச்ச²தி, ஆபத்திம் ஆபத்தீதி தீ³பேந்தோ ந ச²ந்தா³க³திம் க³ச்ச²தி, லஹுகம் ஆபத்திம் லஹுகா ஆபத்தீதி தீ³பேந்தோ ந ச²ந்தா³க³திம் க³ச்ச²தி, க³ருகம் ஆபத்திம் க³ருகா ஆபத்தீதி தீ³பேந்தோ ந ச²ந்தா³க³திம் க³ச்ச²தி, ஸாவஸேஸம் ஆபத்திம் ஸாவஸேஸா ஆபத்தீதி தீ³பேந்தோ ந ச²ந்தா³க³திம் க³ச்ச²தி, அனவஸேஸம் ஆபத்திம் அனவஸேஸா ஆபத்தீதி தீ³பேந்தோ ந ச²ந்தா³க³திம் க³ச்ச²தி, து³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேந்தோ ந ச²ந்தா³க³திம் க³ச்ச²தி, அது³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேந்தோ ந ச²ந்தா³க³திம் க³ச்ச²தி. ஏவம் ந ச²ந்தா³க³திம் க³ச்ச²தி.

384. கத²ம் ந தோ³ஸாக³திம் க³ச்ச²தி? அத⁴ம்மம் அத⁴ம்மோதி தீ³பேந்தோ ந தோ³ஸாக³திம் க³ச்ச²தி, த⁴ம்மம் த⁴ம்மோதி தீ³பேந்தோ ந தோ³ஸாக³திம் க³ச்ச²தி…பே… து³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேந்தோ ந தோ³ஸாக³திம் க³ச்ச²தி, அது³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேந்தோ ந தோ³ஸாக³திம் க³ச்ச²தி. ஏவம் ந தோ³ஸாக³திம் க³ச்ச²தி.

385. கத²ம் ந மோஹாக³திம் க³ச்ச²தி? அத⁴ம்மம் அத⁴ம்மோதி தீ³பேந்தோ ந மோஹாக³திம் க³ச்ச²தி, த⁴ம்மம் த⁴ம்மோதி தீ³பேந்தோ ந மோஹாக³திம் க³ச்ச²தி…பே… து³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேந்தோ ந மோஹாக³திம் க³ச்ச²தி, அது³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேந்தோ ந மோஹாக³திம் க³ச்ச²தி. ஏவம் ந மோஹாக³திம் க³ச்ச²தி.

386. கத²ம் ந ப⁴யாக³திம் க³ச்ச²தி? அத⁴ம்மம் அத⁴ம்மோதி தீ³பேந்தோ ந ப⁴யாக³திம் க³ச்ச²தி, த⁴ம்மம் த⁴ம்மோதி தீ³பேந்தோ ந ப⁴யாக³திம் க³ச்ச²தி, அவினயம் அவினயோதி தீ³பேந்தோ ந ப⁴யாக³திம் க³ச்ச²தி, வினயம் வினயோதி தீ³பேந்தோ ந ப⁴யாக³திம் க³ச்ச²தி, அபா⁴ஸிதம் அலபிதம் ததா²க³தேன அபா⁴ஸிதம் அலபிதம் ததா²க³தேனாதி தீ³பேந்தோ ந ப⁴யாக³திம் க³ச்ச²தி, பா⁴ஸிதம் லபிதம் ததா²க³தேன பா⁴ஸிதம் லபிதம் ததா²க³தேனாதி தீ³பேந்தோ ந ப⁴யாக³திம் க³ச்ச²தி, அனாசிண்ணம் ததா²க³தேன அனாசிண்ணம் ததா²க³தேனாதி தீ³பேந்தோ ந ப⁴யாக³திம் க³ச்ச²தி, ஆசிண்ணம் ததா²க³தேன ஆசிண்ணம் ததா²க³தேனாதி தீ³பேந்தோ ந ப⁴யாக³திம் க³ச்ச²தி, அபஞ்ஞத்தம் ததா²க³தேன அபஞ்ஞத்தம் ததா²க³தேனாதி தீ³பேந்தோ ந ப⁴யாக³திம் க³ச்ச²தி, பஞ்ஞத்தம் ததா²க³தேன பஞ்ஞத்தம் ததா²க³தேனாதி தீ³பேந்தோ ந ப⁴யாக³திம் க³ச்ச²தி, அனாபத்திம் அனாபத்தீதி தீ³பேந்தோ ந ப⁴யாக³திம் க³ச்ச²தி, ஆபத்திம் ஆபத்தீதி தீ³பேந்தோ ந ப⁴யாக³திம் க³ச்ச²தி, லஹுகம் ஆபத்திம் லஹுகா ஆபத்தீதி தீ³பேந்தோ ந ப⁴யாக³திம் க³ச்ச²தி, க³ருகம் ஆபத்திம் க³ருகா ஆபத்தீதி தீ³பேந்தோ ந ப⁴யாக³திம் க³ச்ச²தி, ஸாவஸேஸம் ஆபத்திம் ஸாவஸேஸா ஆபத்தீதி தீ³பேந்தோ ந ப⁴யாக³திம் க³ச்ச²தி, அனவஸேஸம் ஆபத்திம் அனவஸேஸா ஆபத்தீதி தீ³பேந்தோ ந ப⁴யாக³திம் க³ச்ச²தி, து³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேந்தோ ந ப⁴யாக³திம் க³ச்ச²தி, அது³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேந்தோ ந ப⁴யாக³திம் க³ச்ச²தி. ஏவம் ந ப⁴யாக³திம் க³ச்ச²தி.

ச²ந்தா³ தோ³ஸா ப⁴யா மோஹா, யோ த⁴ம்மம் நாதிவத்ததி;

ஆபூரதி தஸ்ஸ யஸோ, ஸுக்கபக்கே²வ சந்தி³மாதி.

4. ஸஞ்ஞாபனீயாதி³

387. கத²ம் ஸஞ்ஞாபனீயே டா²னே ஸஞ்ஞாபேதி? அத⁴ம்மம் அத⁴ம்மோதி தீ³பேந்தோ ஸஞ்ஞாபனீயே டா²னே ஸஞ்ஞாபேதி, த⁴ம்மம் த⁴ம்மோதி தீ³பேந்தோ ஸஞ்ஞாபனீயே டா²னே ஸஞ்ஞாபேதி…பே… து³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேந்தோ ஸஞ்ஞாபனீயே டா²னே ஸஞ்ஞாபேதி, அது³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேந்தோ ஸஞ்ஞாபனீயே டா²னே ஸஞ்ஞாபேதி. ஏவம் ஸஞ்ஞாபனீயே டா²னே ஸஞ்ஞாபேதி.

388. கத²ம் நிஜ்ஜா²பனீயே டா²னே நிஜ்ஜா²பேதி? அத⁴ம்மம் அத⁴ம்மோதி தீ³பேந்தோ நிஜ்ஜா²பனீயே டா²னே நிஜ்ஜா²பேதி, த⁴ம்மம் த⁴ம்மோதி தீ³பேந்தோ நிஜ்ஜா²பனீயே டா²னே நிஜ்ஜா²பேதி…பே… து³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேந்தோ நிஜ்ஜா²பனீயே டா²னே நிஜ்ஜா²பேதி, அது³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேந்தோ நிஜ்ஜா²பனீயே டா²னே நிஜ்ஜா²பேதி. ஏவம் நிஜ்ஜா²பனீயே டா²னே நிஜ்ஜா²பேதி.

389. கத²ம் பேக்க²னீயே டா²னே பேக்க²தி? அத⁴ம்மம் அத⁴ம்மோதி தீ³பேந்தோ பேக்க²னீயே டா²னே பேக்க²தி, த⁴ம்மம் த⁴ம்மோதி தீ³பேந்தோ பேக்க²னீயே டா²னே பேக்க²தி…பே… து³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேந்தோ பேக்க²னீயே டா²னே பேக்க²தி, அது³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேந்தோ பேக்க²னீயே டா²னே பேக்க²தி. ஏவம் பேக்க²னீயே டா²னே பேக்க²தி.

390. கத²ம் பஸாத³னீயே டா²னே பஸாதே³தி? அத⁴ம்மம் அத⁴ம்மோதி தீ³பேந்தோ பஸாத³னீயே டா²னே பஸாதே³தி, த⁴ம்மம் த⁴ம்மோதி தீ³பேந்தோ பஸாத³னீயே டா²னே பஸாதே³தி…பே… து³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேந்தோ பஸாத³னீயே டா²னே பஸாதே³தி, அது³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேந்தோ பஸாத³னீயே டா²னே பஸாதே³தி. ஏவம் பஸாத³னீயே டா²னே பஸாதே³தி.

5. பரபக்கா²தி³அவஜானனம்

391. கத²ம் லத்³த⁴பக்கோ²ம்ஹீதி பரபக்க²ம் அவஜானாதி? இதே⁴கச்சோ லத்³த⁴பக்கோ² ஹோதி லத்³த⁴பரிவாரோ பக்க²வா ஞாதிமா. ‘‘அயம் அலத்³த⁴பக்கோ² அலத்³த⁴பரிவாரோ ந பக்க²வா ந ஞாதிமா’’தி தஸ்ஸ அவஜானந்தோ அத⁴ம்மம் த⁴ம்மோதி தீ³பேதி, த⁴ம்மம் அத⁴ம்மோதி தீ³பேதி…பே… து³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேதி, அது³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேதி. ஏவம் லத்³த⁴பக்கோ²ம்ஹீதி பரபக்க²ம் அவஜானாதி.

392. கத²ம் ப³ஹுஸ்ஸுதோம்ஹீதி அப்பஸ்ஸுதம் அவஜானாதி? இதே⁴கச்சோ ப³ஹுஸ்ஸுதோ ஹோதி ஸுதத⁴ரோ ஸுதஸன்னிசயோ. ‘‘அயம் அப்பஸ்ஸுதோ அப்பாக³மோ அப்பத⁴ரோ’’தி தஸ்ஸ அவஜானந்தோ அத⁴ம்மம் த⁴ம்மோதி தீ³பேதி, த⁴ம்மம் அத⁴ம்மோதி தீ³பேதி…பே… து³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேதி, அது³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேதி. ஏவம் ப³ஹுஸ்ஸுதோம்ஹீதி அப்பஸ்ஸுதம் அவஜானாதி.

393. கத²ம் தே²ரதரோம்ஹீதி நவகதரம் அவஜானாதி? இதே⁴கச்சோ தே²ரோ ஹோதி ரத்தஞ்ஞூ சிரபப்³ப³ஜிதோ அயம் நவகோ அப்பஞ்ஞாதோ அப்பகதஞ்ஞூ இமஸ்ஸ வசனம் அகதம் ப⁴விஸ்ஸதீ’’தி தஸ்ஸ அவஜானந்தோ அத⁴ம்மம் த⁴ம்மோதி தீ³பேதி, த⁴ம்மம் அத⁴ம்மோதி தீ³பேதி …பே… து³ட்டு²ல்லம் ஆபத்திம் அது³ட்டு²ல்லா ஆபத்தீதி தீ³பேதி, அது³ட்டு²ல்லம் ஆபத்திம் து³ட்டு²ல்லா ஆபத்தீதி தீ³பேதி. ஏவம் தே²ரதரோம்ஹீதி நவகதரம் அவஜானாதி.

394. அஸம்பத்தம் ந ப்³யாஹரிதப்³ப³ந்தி அனோதிண்ணம் பா⁴ரம் [பா⁴ஸம் (ஸ்யா.)] ந ஓதாரேதப்³ப³ம். ஸம்பத்தம் த⁴ம்மதோ வினயதோ ந பரிஹாபேதப்³ப³ந்தி யம்அத்தா²ய ஸங்கோ⁴ ஸன்னிபதிதோ ஹோதி தம் அத்த²ம் த⁴ம்மதோ வினயதோ ந பரிஹாபேதப்³ப³ம்.

395. யேன த⁴ம்மேனாதி பூ⁴தேன வத்து²னா. யேன வினயேனாதி சோதே³த்வா ஸாரேத்வா. யேன ஸத்து²ஸாஸனேனாதி ஞத்திஸம்பதா³ய அனுஸ்ஸாவனஸம்பதா³ய, யேன த⁴ம்மேன யேன வினயேன யேன ஸத்து²ஸாஸனேன தம் அதி⁴கரணம் வூபஸம்மதி, ததா² தம் அதி⁴கரணம் வூபஸமேதப்³ப³ந்தி.

6. அனுவிஜ்ஜகஸ்ஸ அனுயோக³ம்

396. அனுவிஜ்ஜகேன சோத³கோ புச்சி²தப்³போ³ – ‘‘யம் கோ² த்வம், ஆவுஸோ, இமஸ்ஸ பி⁴க்கு²னோ பவாரணம் ட²பேஸி, கிம்ஹி நம் ட²பேஸி, ஸீலவிபத்தியா வா ட²பேஸி, ஆசாரவிபத்தியா வா ட²பேஸி, தி³ட்டி²விபத்தியா வா ட²பேஸீ’’தி? ஸோ சே ஏவம் வதே³ய்ய – ‘‘ஸீலவிபத்தியா வா ட²பேமி ஆசாரவிபத்தியா வா ட²பேமி தி³ட்டி²விபத்தியா வா ட²பேமீ’’தி, ஸோ ஏவமஸ்ஸ வசனீயோ – ‘‘ஜானாதி பனாயஸ்மா ஸீலவிபத்திம், ஜானாதி ஆசாரவிபத்திம், ஜானாதி தி³ட்டி²விபத்தி’’ந்தி? ஸோ சே ஏவம் வதே³ய்ய – ‘‘ஜானாமி கோ² அஹம், ஆவுஸோ, ஸீலவிபத்திம், ஜானாமி ஆசாரவிபத்திம், ஜானாமி தி³ட்டி²விபத்தி’’ந்தி, ஸோ ஏவமஸ்ஸ வசனீயோ – ‘‘கதமா பனாவுஸோ, ஸீலவிபத்தி கதமா ஆசாரவிபத்தி கதமா தி³ட்டி²விபத்தீ’’தி? ஸோ சே ஏவம் வதே³ய்ய – ‘‘சத்தாரி பாராஜிகானி தேரஸ ஸங்கா⁴தி³ஸேஸா – அயம் ஸீலவிபத்தி. து²ல்லச்சயம் பாசித்தியம் பாடிதே³ஸனீயம் து³க்கடம் து³ப்³பா⁴ஸிதம் – அயம் ஆசாரவிபத்தி. மிச்சா²தி³ட்டி² அந்தக்³கா³ஹிகாதி³ட்டி² – அயம் தி³ட்டி²விபத்தீ’’தி, ஸோ ஏவமஸ்ஸ வசனீயோ – ‘‘யம் கோ² த்வம், ஆவுஸோ, இமஸ்ஸ பி⁴க்கு²னோ பவாரணம் ட²பேஸி, தி³ட்டே²ன வா ட²பேஸி, ஸுதேன வா ட²பேஸி, பரிஸங்காய வா ட²பேஸீ’’தி? ஸோ சே ஏவம் வதே³ய்ய – ‘‘தி³ட்டே²ன வா ட²பேமி, ஸுதேன வா ட²பேமி, பரிஸங்காய வா ட²பேமீ’’தி, ஸோ ஏவமஸ்ஸ வசனீயோ – ‘‘யம் கோ² த்வம், ஆவுஸோ, இமஸ்ஸ பி⁴க்கு²னோ தி³ட்டே²ன பவாரணம் ட²பேஸி, கிம் தே தி³ட்ட²ம், கிந்தி தே தி³ட்ட²ம், கதா³ தே தி³ட்ட²ம், கத்த² தே தி³ட்ட²ம், பாராஜிகம் அஜ்ஜா²பஜ்ஜந்தோ தி³ட்டோ², ஸங்கா⁴தி³ஸேஸம் அஜ்ஜா²பஜ்ஜந்தோ தி³ட்டோ², து²ல்லச்சயம்… பாசித்தியம்… பாடிதே³ஸனீயம்… து³க்கடம்… து³ப்³பா⁴ஸிதம் அஜ்ஜா²பஜ்ஜந்தோ தி³ட்டோ², கத்த² ச த்வம் அஹோஸி, கத்த² சாயம் பி⁴க்கு² அஹோஸி, கிஞ்ச த்வம் கரோஸி, கிம் சாயம் பி⁴க்கு² கரோதீ’’தி? ஸோ சே ஏவம் வதே³ய்ய – ‘‘ந கோ² அஹம், ஆவுஸோ, இமஸ்ஸ பி⁴க்கு²னோ தி³ட்டே²ன பவாரணம் ட²பேமி, அபி ச ஸுதேன பவாரணம் ட²பேமீ’’தி, ஸோ ஏவமஸ்ஸ வசனீயோ – ‘‘யம் கோ² த்வம், ஆவுஸோ, இமஸ்ஸ பி⁴க்கு²னோ ஸுதேன பவாரணம் ட²பேஸி கிம் தே ஸுதம், கிந்தி தே ஸுதம், கதா³ தே ஸுதம், கத்த² தே ஸுதம், பாராஜிகம் அஜ்ஜா²பன்னோதி ஸுதம், ஸங்கா⁴தி³ஸேஸம் அஜ்ஜா²பன்னோதி ஸுதம், து²ல்லச்சயம்… பாசித்தியம்… பாடிதே³ஸனீயம்… து³க்கடம்… து³ப்³பா⁴ஸிதம் அஜ்ஜா²பன்னோதி ஸுதம், பி⁴க்கு²ஸ்ஸ ஸுதம், பி⁴க்கு²னியா ஸுதம், ஸிக்க²மானாய ஸுதம், ஸாமணேரஸ்ஸ ஸுதம், ஸாமணேரியா ஸுதம், உபாஸகஸ்ஸ ஸுதம், உபாஸிகாய ஸுதம், ராஜூனம் ஸுதம், ராஜமஹாமத்தானம் ஸுதம், தித்தி²யானம் ஸுதம், தித்தி²யஸாவகானம் ஸுத’’ந்தி? ஸோ சே ஏவம் வதே³ய்ய – ‘‘ந கோ² அஹம், ஆவுஸோ, இமஸ்ஸ பி⁴க்கு²னோ ஸுதேன பவாரணம் ட²பேமி, அபி ச பரிஸங்காய பவாரணம் ட²பேமீ’’தி, ஸோ ஏவமஸ்ஸ வசனீயோ – ‘‘யம் கோ² த்வம், ஆவுஸோ, இமஸ்ஸ பி⁴க்கு²னோ பரிஸங்காய பவாரணம் ட²பேஸி, கிம் பரிஸங்கஸி, கிந்தி பரிஸங்கஸி, கதா³ பரிஸங்கஸி, கத்த² பரிஸங்கஸி, பாராஜிகம் அஜ்ஜா²பன்னோதி பரிஸங்கஸி, ஸங்கா⁴தி³ஸேஸம் அஜ்ஜா²பன்னோதி பரிஸங்கஸி, து²ல்லச்சயம்… பாசித்தியம்… பாடிதே³ஸனீயம்… து³க்கடம்… து³ப்³பா⁴ஸிதம் அஜ்ஜா²பன்னோதி பரிஸங்கஸி, பி⁴க்கு²ஸ்ஸ ஸுத்வா பரிஸங்கஸி, பி⁴க்கு²னியா ஸுத்வா பரிஸங்கஸி, ஸிக்க²மானாய ஸுத்வா பரிஸங்கஸி, ஸாமணேரஸ்ஸ ஸுத்வா பரிஸங்கஸி, ஸாமணேரியா ஸுத்வா பரிஸங்கஸி, உபாஸகஸ்ஸ ஸுத்வா பரிஸங்கஸி, உபாஸிகாய ஸுத்வா பரிஸங்கஸி, ராஜூனம் ஸுத்வா பரிஸங்கஸி ராஜமஹாமத்தானம் ஸுத்வா பரிஸங்கஸி, தித்தி²யானம் ஸுத்வா பரிஸங்கஸி, தித்தி²யஸாவகானம் ஸுத்வா பரிஸங்கஸீ’’தி?

397. தி³ட்ட²ம் தி³ட்டே²ன ஸமேதி, தி³ட்டே²ன ஸம்ஸந்த³தே தி³ட்ட²ம்;

தி³ட்ட²ம் படிச்ச ந உபேதி, அஸுத்³த⁴பரிஸங்கிதோ;

ஸோ புக்³க³லோ படிஞ்ஞாய, காதப்³பா³ தேன பவாரணா.

ஸுதம் ஸுதேன ஸமேதி, ஸுதேன ஸம்ஸந்த³தே ஸுதம்;

ஸுதம் படிச்ச ந உபேதி, அஸுத்³த⁴பரிஸங்கிதோ;

ஸோ புக்³க³லோ படிஞ்ஞாய, காதப்³பா³ தேன பவாரணா.

முதம் முதேன ஸமேதி, முதேன ஸம்ஸந்த³தே முதம்;

முதம் படிச்ச ந உபேதி, அஸுத்³த⁴பரிஸங்கிதோ;

ஸோ புக்³க³லோ படிஞ்ஞாய, காதப்³பா³ தேன பவாரணாதி.

7. புச்சா²விபா⁴கோ³

398. கிம் தே தி³ட்ட²ந்தி கதமா புச்சா²? கிந்தி தே தி³ட்ட²ந்தி கதமா புச்சா²? கதா³ தே தி³ட்ட²ந்தி கதமா புச்சா²? கத்த² தே தி³ட்ட²ந்தி கதமா புச்சா²?

399. கிம் தே தி³ட்ட²ந்தி வத்து²புச்சா², விபத்திபுச்சா², ஆபத்திபுச்சா², அஜ்ஜா²சாரபுச்சா². வத்து²புச்சா²தி – அட்ட²பாராஜிகானம் வத்து²புச்சா², தேவீஸஸங்கா⁴தி³ஸேஸானம் வத்து²புச்சா², த்³வேஅனியதானம் வத்து²புச்சா², த்³வேசத்தாரீஸனிஸ்ஸக்³கி³யானம் வத்து²புச்சா², அட்டா²ஸீதிஸதபாசித்தியானம் வத்து²புச்சா², த்³வாத³ஸபாடிதே³ஸனீயானம் வத்து²புச்சா², து³க்கடானம் வத்து²புச்சா², து³ப்³பா⁴ஸிதானம் வத்து²புச்சா². விபத்திபுச்சா²தி – ஸீலவிபத்திபுச்சா², ஆசாரவிபத்திபுச்சா², தி³ட்டி²விபத்திபுச்சா², ஆஜீவவிபத்திபுச்சா². ஆபத்திபுச்சா²தி – பாராஜிகாபத்திபுச்சா², ஸங்கா⁴தி³ஸேஸாபத்திபுச்சா², து²ல்லச்சயாபத்திபுச்சா², பாசித்தியாபத்திபுச்சா², பாடிதே³ஸனீயாபத்திபுச்சா², து³க்கடாபத்திபுச்சா², து³ப்³பா⁴ஸிதாபத்திபுச்சா². அஜ்ஜா²சாரபுச்சா²தி – த்³வயம்த்³வயஸமாபத்திபுச்சா².

400. கிந்தி தே தி³ட்ட²ந்தி லிங்க³புச்சா², இரியாபத²புச்சா², ஆகாரபுச்சா², விப்பகாரபுச்சா². லிங்க³புச்சா²தி – தீ³க⁴ம் வா ரஸ்ஸம் வா கண்ஹம் வா ஓதா³தம் வா. இரியாபத²புச்சா²தி க³ச்ச²ந்தம் வா டி²தம் வா நிஸின்னம் வா நிபன்னம் வா. ஆகாரபுச்சா²தி கி³ஹிலிங்கே³ வா தித்தி²யலிங்கே³ வா பப்³ப³ஜிதலிங்கே³ வா. விப்பகாரபுச்சா²தி க³ச்ச²ந்தம் வா டி²தம் வா நிஸின்னம் வா நிபன்னம் வா.

401. கதா³ தே தி³ட்ட²ந்தி காலபுச்சா², ஸமயபுச்சா², தி³வஸபுச்சா², உதுபுச்சா². காலபுச்சா²தி புப்³ப³ண்ஹகாலே வா மஜ்ஜ²ன்ஹிககாலே வா ஸாயன்ஹகாலே வா. ஸமயபுச்சா²தி புப்³ப³ண்ஹஸமயே வா மஜ்ஜ²ன்ஹிகஸமயே வா ஸாயன்ஹஸமயே வா. தி³வஸபுச்சா²தி புரேப⁴த்தம் வா பச்சா²ப⁴த்தம் வா ரத்திம் வா தி³வா வா காளே வா ஜுண்ஹே வா. உதுபுச்சா²தி ஹேமந்தே வா கி³ம்ஹே வா வஸ்ஸே வா [வஸ்ஸானே வா (ஸீ.)].

402. கத்த² தே தி³ட்ட²ந்தி டா²னபுச்சா², பூ⁴மிபுச்சா², ஓகாஸபுச்சா², பதே³ஸபுச்சா². டா²னபுச்சா²தி பூ⁴மியா வா பத²வியா வா த⁴ரணியா வா ஜக³தியா வா. பூ⁴மிபுச்சா²தி பூ⁴மியா வா பத²வியா வா பப்³ப³தே வா பாஸாணே வா பாஸாதே³ வா. ஓகாஸபுச்சா²தி புரத்தி²மே வா ஓகாஸே பச்சி²மே வா ஓகாஸே உத்தரே வா ஓகாஸே த³க்கி²ணே வா ஓகாஸே. பதே³ஸபுச்சா²தி புரத்தி²மே வா பதே³ஸே பச்சி²மே வா பதே³ஸே உத்தரே வா பதே³ஸே த³க்கி²ணே வா பதே³ஸேதி.

மஹாஸங்கா³மோ நிட்டி²தோ.