1. அனுவிஜ்ஜகஸ்ஸபடிபத்தி

365. [பரி. 421] ஸங்கா³மாவசரே பி⁴க்கு²னா ஸங்க⁴ம் உபஸங்கமந்தேன நீசசித்தேன ஸங்கோ⁴ உபஸங்கமிதப்³போ³ ரஜோஹரணஸமேன சித்தேன; ஆஸனகுஸலேன ப⁴விதப்³ப³ம் நிஸஜ்ஜகுஸலேன; தே²ரே பி⁴க்கூ² அனுபக²ஜ்ஜந்தேன, நவே பி⁴க்கூ² ஆஸனேன அப்படிபா³ஹந்தேன, யதா²பதிரூபே ஆஸனே நிஸீதி³தப்³ப³ம்; அனானாகதி²கேன ப⁴விதப்³ப³ம் அதிரச்சா²னகதி²கேன; ஸாமம் வா த⁴ம்மோ பா⁴ஸிதப்³போ³ பரோ வா அஜ்ஜே²ஸிதப்³போ³ அரியோ வா துண்ஹீபா⁴வோ நாதிமஞ்ஞிதப்³போ³.

ஸங்கே⁴ன அனுமதேன புக்³க³லேன அனுவிஜ்ஜகேன அனுவிஜ்ஜிதுகாமேன ந உபஜ்ஜா²யோ புச்சி²தப்³போ³, ந ஆசரியோ புச்சி²தப்³போ³, ந ஸத்³தி⁴விஹாரிகோ புச்சி²தப்³போ³, ந அந்தேவாஸிகோ புச்சி²தப்³போ³, ந ஸமானுபஜ்ஜா²யகோ புச்சி²தப்³போ³, ந ஸமானாசரியகோ புச்சி²தப்³போ³, ந ஜாதி புச்சி²தப்³பா³, ந நாமம் புச்சி²தப்³ப³ம், ந கோ³த்தம் புச்சி²தப்³ப³ம், ந ஆக³மோ புச்சி²தப்³போ³, ந குலபதே³ஸோ புச்சி²தப்³போ³, ந ஜாதிபூ⁴மி புச்சி²தப்³பா³. தம் கிம் காரணா? அத்ரஸ்ஸ பேமம் வா தோ³ஸோ வா. பேமே வா ஸதி தோ³ஸே வா, ச²ந்தா³பி க³ச்சே²ய்ய தோ³ஸாபி க³ச்சே²ய்ய மோஹாபி க³ச்சே²ய்ய ப⁴யாபி க³ச்சே²ய்ய.

ஸங்கே⁴ன அனுமதேன புக்³க³லேன அனுவிஜ்ஜகேன அனுவிஜ்ஜிதுகாமேன ஸங்க⁴க³ருகேன ப⁴விதப்³ப³ம் நோ புக்³க³லக³ருகேன, ஸத்³த⁴ம்மக³ருகேன ப⁴விதப்³ப³ம் நோ ஆமிஸக³ருகேன, அத்த²வஸிகேன ப⁴விதப்³ப³ம் நோ பரிஸகப்பிகேன, காலேன அனுவிஜ்ஜிதப்³ப³ம் நோ அகாலேன, பூ⁴தேன அனுவிஜ்ஜிதப்³ப³ம் நோ அபூ⁴தேன, ஸண்ஹேன அனுவிஜ்ஜிதப்³ப³ம் நோ ப²ருஸேன, அத்த²ஸம்ஹிதேன அனுவிஜ்ஜிதப்³ப³ம் நோ அனத்த²ஸம்ஹிதேன, மேத்தாசித்தேன அனுவிஜ்ஜிதப்³ப³ம் நோ தோ³ஸந்தரேன, ந உபகண்ணகஜப்பினா ப⁴விதப்³ப³ம், ந ஜிம்ஹம் பேக்கி²தப்³ப³ம், ந அக்கி² நிக²ணிதப்³ப³ம், ந ப⁴முகம் உக்கி²பிதப்³ப³ம், ந ஸீஸம் உக்கி²பிதப்³ப³ம், ந ஹத்த²விகாரோ காதப்³போ³, ந ஹத்த²முத்³தா³ த³ஸ்ஸேதப்³பா³.

ஆஸனகுஸலேன ப⁴விதப்³ப³ம் நிஸஜ்ஜகுஸலேன, யுக³மத்தம் பேக்க²ந்தேன அத்த²ம் அனுவிதி⁴யந்தேன ஸகே ஆஸனே நிஸீதி³தப்³ப³ம், ந ச ஆஸனா வுட்டா²தப்³ப³ம், ந வீதிஹாதப்³ப³ம், ந கும்மக்³கோ³ ஸேவிதப்³போ³, ந பா³ஹாவிக்கே²பகம் [ந வாசா விக்கே²பகம் (ஸ்யா.)] ப⁴ணிதப்³ப³ம், அதுரிதேன ப⁴விதப்³ப³ம் அஸாஹஸிகேன, அசண்டி³கதேன ப⁴விதப்³ப³ம் வசனக்க²மே, மேத்தாசித்தேன ப⁴விதப்³ப³ம் ஹிதானுகம்பினா, காருணிகேன ப⁴விதப்³ப³ம் ஹிதபரிஸக்கினா, அஸம்ப²ப்பலாபினா ப⁴விதப்³ப³ம் பரியந்தபா⁴ணினா, அவேரவஸிகேன ப⁴விதப்³ப³ம் அனஸுருத்தேன, அத்தா பரிக்³க³ஹேதப்³போ³, பரோ பரிக்³க³ஹேதப்³போ³, சோத³கோ பரிக்³க³ஹேதப்³போ³, சுதி³தகோ பரிக்³க³ஹேதப்³போ³, அத⁴ம்மசோத³கோ பரிக்³க³ஹேதப்³போ³, அத⁴ம்மசுதி³தகோ பரிக்³க³ஹேதப்³போ³, த⁴ம்மசோத³கோ பரிக்³க³ஹேதப்³போ³, த⁴ம்மசுதி³தகோ பரிக்³க³ஹேதப்³போ³, வுத்தம் அஹாபேந்தேன அவுத்தம் அபகாஸேந்தேன ஓதிண்ணானி பத³ப்³யஞ்ஜனானி ஸாது⁴கம் பரிக்³க³ஹேத்வா பரோ படிபுச்சி²த்வா யதா² படிஞ்ஞாய காரேதப்³போ³, மந்தோ³ ஹாஸேதப்³போ³ [வேபோ பஹாஸேதப்³போ³ (ஸ்யா.)], பீ⁴ரூ அஸ்ஸாஸேதப்³போ³, சண்டோ³ நிஸேதே⁴தப்³போ³, அஸுசி விபா⁴வேதப்³போ³, உஜுமத்³த³வேன ந ச²ந்தா³க³திம் க³ந்தப்³ப³ம், ந தோ³ஸாக³திம் க³ந்தப்³ப³ம், ந மோஹாக³திம் க³ந்தப்³ப³ம், ந ப⁴யாக³திம் க³ந்தப்³ப³ம், மஜ்ஜ²த்தேன ப⁴விதப்³ப³ம் த⁴ம்மேஸு ச புக்³க³லேஸு ச. ஏவஞ்ச பன அனுவிஜ்ஜகோ அனுவிஜ்ஜமானோ ஸத்து² சேவ ஸாஸனகரோ ஹோதி, விஞ்ஞூனஞ்ச ஸப்³ரஹ்மசாரீனம் பியோ ச ஹோதி மனாபோ ச க³ரு ச பா⁴வனீயோ ச.

366. ஸுத்தம் ஸம்ஸந்த³னத்தா²ய, ஓபம்மம் நித³ஸ்ஸனத்தா²ய, அத்தோ² விஞ்ஞாபனத்தா²ய, படிபுச்சா² ட²பனத்தா²ய, ஓகாஸகம்மம் சோத³னத்தா²ய, சோத³னா ஸாரணத்தா²ய, ஸாரணா ஸவசனீயத்தா²ய, ஸவசனீயம் பலிபோ³த⁴த்தா²ய, பலிபோ³தோ⁴ வினிச்ச²யத்தா²ய, வினிச்ச²யோ ஸந்தீரணத்தா²ய, ஸந்தீரணம் டா²னாடா²னக³மனத்தா²ய, டா²னாடா²னக³மனம் து³ம்மங்கூனம் புக்³க³லானம் நிக்³க³ஹத்தா²ய, பேஸலானம் பி⁴க்கூ²னம் ஸம்பக்³க³ஹத்தா²ய, ஸங்கோ⁴ ஸம்பரிக்³க³ஹஸம்படிச்ச²னத்தா²ய, ஸங்கே⁴ன அனுமதா புக்³க³லா பச்சேகட்டா²யினோ அவிஸம்வாத³கட்டா²யினோ.

வினயோ ஸம்வரத்தா²ய, ஸம்வரோ அவிப்படிஸாரத்தா²ய, அவிப்படிஸாரோ பாமுஜ்ஜத்தா²ய, பாமுஜ்ஜம் பீதத்தா²ய, பீதி பஸ்ஸத்³த⁴த்தா²ய, பஸ்ஸத்³தி⁴ ஸுக²த்தா²ய, ஸுக²ம் ஸமாத⁴த்தா²ய, ஸமாதி⁴ யதா²பூ⁴தஞாணத³ஸ்ஸனத்தா²ய, யதா²பூ⁴தஞாணத³ஸ்ஸனம் நிப்³பி³த³த்தா²ய, நிப்³பி³தா³ விராக³த்தா²ய, விராகோ³ விமுத்தத்தா²ய, விமுத்தி விமுத்திஞாணத³ஸ்ஸனத்தா²ய, விமுத்திஞாணத³ஸ்ஸனம் அனுபாதா³பரினிப்³பா³னத்தா²ய. ஏதத³த்தா² கதா², ஏதத³த்தா² மந்தனா, ஏதத³த்தா² உபனிஸா, ஏதத³த்த²ம் ஸோதாவதா⁴னம் – யதி³த³ம் அனுபாதா³சித்தஸ்ஸ விமோக்கோ²தி.

367. அனுயோக³வத்தம் நிஸாமய, குஸலேன பு³த்³தி⁴மதா கதம்;

ஸுவுத்தம் ஸிக்கா²பதா³னுலோமிகம், க³திம் ந நாஸேந்தோ ஸம்பராயிகம்.

வத்து²ம் விபத்திம் ஆபத்திம், நிதா³னம் ஆகாரஅகோவிதோ³;

புப்³பா³பரம் ந ஜானாதி, கதாகதம் ஸமேன ச.

கம்மஞ்ச அதி⁴கரணஞ்ச, ஸமதே² சாபி அகோவிதோ³;

ரத்தோ து³ட்டோ² ச மூள்ஹோ ச, ப⁴யா மோஹா ச க³ச்ச²தி.

ந ச ஸஞ்ஞத்திகுஸலோ, நிஜ்ஜ²த்தியா ச அகோவிதோ³;

லத்³த⁴பக்கோ² அஹிரிகோ, கண்ஹகம்மோ அனாத³ரோ;

ஸ வே [ஸசே (க.)] தாதி³ஸகோ பி⁴க்கு², அப்படிக்கோ²தி வுச்சதி.

வத்து²ம் விபத்திம் ஆபத்திம், நிதா³னம் ஆகாரகோவிதோ³;

புப்³பா³பரஞ்ச ஜானாதி, கதாகதம் ஸமேன ச.

கம்மஞ்ச அதி⁴கரணஞ்ச, ஸமதே² சாபி கோவிதோ³;

அரத்தோ அது³ட்டோ² அமூள்ஹோ, ப⁴யா மோஹா ந க³ச்ச²தி.

ஸஞ்ஞத்தியா ச குஸலோ, நிஜ்ஜ²த்தியா ச கோவிதோ³;

லத்³த⁴பக்கோ² ஹிரிமனோ, ஸுக்ககம்மோ ஸகா³ரவோ;

ஸ வே தாதி³ஸகோ பி⁴க்கு², ஸப்படிக்கோ²தி வுச்சதீதி.

சூளஸங்கா³மோ நிட்டி²தோ.