9. ராஜவக்³கோ³

173. புப்³பே³ அப்படிஸம்விதி³தோ ரஞ்ஞோ அந்தேபுரம் பவிஸந்தோ த்³வே ஆபத்தியோ ஆபஜ்ஜதி. பட²மம் பாத³ம் உம்மாரம் அதிக்காமேதி, ஆபத்தி து³க்கடஸ்ஸ; து³தியம் பாத³ம் அதிக்காமேதி, ஆபத்தி பாசித்தியஸ்ஸ.

ரதனம் உக்³க³ண்ஹந்தோ த்³வே ஆபத்தியோ ஆபஜ்ஜதி. க³ண்ஹாதி, பயோகே³ து³க்கடம்; க³ஹிதே ஆபத்தி பாசித்தியஸ்ஸ.

ஸந்தம் பி⁴க்கு²ம் அனாபுச்சா² விகாலே கா³மம் பவிஸந்தோ த்³வே ஆபத்தியோ ஆபஜ்ஜதி. பட²மம் பாத³ம் பரிக்கே²பம் அதிக்காமேதி, ஆபத்தி து³க்கடஸ்ஸ; து³தியம் பாத³ம் அதிக்காமேதி, ஆபத்தி பாசித்தியஸ்ஸ.

அட்டி²மயம் வா த³ந்தமயம் வா விஸாணமயம் வா ஸூசிக⁴ரம் காராபேந்தோ த்³வே ஆபத்தியோ ஆபஜ்ஜதி. காராபேதி, பயோகே³ து³க்கடம்; காராபிதே ஆபத்தி பாசித்தியஸ்ஸ.

பமாணாதிக்கந்தம் மஞ்சம் வா பீட²ம் வா காராபேந்தோ த்³வே ஆபத்தியோ ஆபஜ்ஜதி. காராபேதி, பயோகே³ து³க்கடம்; காராபிதே ஆபத்தி பாசித்தியஸ்ஸ.

மஞ்சம் வா பீட²ம் வா தூலோனத்³த⁴ம் காராபேந்தோ த்³வே ஆபத்தியோ ஆபஜ்ஜதி. காராபேதி, பயோகே³ து³க்கடம்; காராபிதே ஆபத்தி பாசித்தியஸ்ஸ.

பமாணாதிக்கந்தம் நிஸீத³னம் காராபேந்தோ த்³வே ஆபத்தியோ ஆபஜ்ஜதி. காராபேதி, பயோகே³ து³க்கடம்; காராபிதே ஆபத்தி பாசித்தியஸ்ஸ.

பமாணாதிக்கந்தம் கண்டு³ப்படிச்சா²தி³ம் காராபேந்தோ த்³வே ஆபத்தியோ ஆபஜ்ஜதி. காராபேதி, பயோகே³ து³க்கடம்; காராபிதே ஆபத்தி பாசித்தியஸ்ஸ.

பமாணாதிக்கந்தம் வஸ்ஸிகஸாடிகம் காராபேந்தோ த்³வே ஆபத்தியோ ஆபஜ்ஜதி. காராபேதி, பயோகே³ து³க்கடம்; காராபிதே ஆபத்தி பாசித்தியஸ்ஸ.

சீவரம் காராபேந்தோ கதி ஆபத்தியோ ஆபஜ்ஜதி? ஸுக³தசீவரப்பமாணம் சீவரம் காராபேந்தோ த்³வே ஆபத்தியோ ஆபஜ்ஜதி. காராபேதி, பயோகே³ து³க்கடம்; காராபிதே ஆபத்தி பாசித்தியஸ்ஸ – ஸுக³தசீவரப்பமாணம் சீவரம் காராபேந்தோ இமா த்³வே ஆபத்தியோ ஆபஜ்ஜதி.

ராஜவக்³கோ³ நவமோ. கு²த்³த³கா நிட்டி²தா.