5. பாடிதே³ஸனீயகண்ட³ம்

174. அஞ்ஞாதிகாய பி⁴க்கு²னியா அந்தரக⁴ரம் பவிட்டா²ய ஹத்த²தோ கா²த³னீயம் வா போ⁴ஜனீயம் வா ஸஹத்தா² படிக்³க³ஹேத்வா பு⁴ஞ்ஜந்தோ கதி ஆபத்தியோ ஆபஜ்ஜதி? அஞ்ஞாதிகாய பி⁴க்கு²னியா அந்தரக⁴ரம் பவிட்டா²ய ஹத்த²தோ கா²த³னீயம் வா போ⁴ஜனீயம் வா ஸஹத்தா² படிக்³க³ஹேத்வா பு⁴ஞ்ஜந்தோ த்³வே ஆபத்தியோ ஆபஜ்ஜதி. பு⁴ஞ்ஜிஸ்ஸாமீதி படிக்³க³ண்ஹாதி, ஆபத்தி து³க்கடஸ்ஸ; அஜ்ஜோ²ஹாரே அஜ்ஜோ²ஹாரே ஆபத்தி பாடிதே³ஸனீயஸ்ஸ – அஞ்ஞாதிகாய பி⁴க்கு²னியா அந்தரக⁴ரம் பவிட்டா²ய ஹத்த²தோ கா²த³னீயம் வா போ⁴ஜனீயம் வா ஸஹத்தா² படிக்³க³ஹேத்வா பு⁴ஞ்ஜந்தோ இமா த்³வே ஆபத்தியோ ஆபஜ்ஜதி.

பி⁴க்கு²னியா வோஸாஸந்தியா ந நிவாரேத்வா பு⁴ஞ்ஜந்தோ த்³வே ஆபத்தியோ ஆபஜ்ஜதி. பு⁴ஞ்ஜிஸ்ஸாமீதி படிக்³க³ண்ஹாதி, ஆபத்தி து³க்கடஸ்ஸ; அஜ்ஜோ²ஹாரே அஜ்ஜோ²ஹாரே ஆபத்தி பாடிதே³ஸனீயஸ்ஸ.

ஸேக்க²ஸம்மதேஸு குலேஸு கா²த³னீயம் வா போ⁴ஜனீயம் வா ஸஹத்தா² படிக்³க³ஹேத்வா பு⁴ஞ்ஜந்தோ த்³வே ஆபத்தியோ ஆபஜ்ஜதி. பு⁴ஞ்ஜிஸ்ஸாமீதி படிக்³க³ண்ஹாதி, ஆபத்தி து³க்கடஸ்ஸ; அஜ்ஜோ²ஹாரே அஜ்ஜோ²ஹாரே ஆபத்தி பாடிதே³ஸனீயஸ்ஸ.

ஆரஞ்ஞகேஸு ஸேனாஸனேஸு புப்³பே³ அப்படிஸம்விதி³தம் கா²த³னீயம் வா போ⁴ஜனீயம் வா அஜ்ஜா²ராமே ஸஹத்தா² படிக்³க³ஹேத்வா பு⁴ஞ்ஜந்தோ கதி ஆபத்தியோ ஆபஜ்ஜதி? ஆரஞ்ஞகேஸு ஸேனாஸனேஸு புப்³பே³ அப்படிஸம்விதி³தம் கா²த³னீயம் வா போ⁴ஜனீயம் வா அஜ்ஜா²ராமே ஸஹத்தா² படிக்³க³ஹேத்வா பு⁴ஞ்ஜந்தோ த்³வே ஆபத்தியோ ஆபஜ்ஜதி. பு⁴ஞ்ஜிஸ்ஸாமீதி படிக்³க³ண்ஹாதி, ஆபத்தி து³க்கடஸ்ஸ; அஜ்ஜோ²ஹாரே அஜ்ஜோ²ஹாரே ஆபத்தி பாடிதே³ஸனீயஸ்ஸ – ஆரஞ்ஞகேஸு ஸேனாஸனேஸு புப்³பே³ அப்படிஸம்விதி³தம் கா²த³னீயம் வா போ⁴ஜனீயம் வா அஜ்ஜா²ராமே ஸஹத்தா² படிக்³க³ஹேத்வா பு⁴ஞ்ஜந்தோ இமா த்³வே ஆபத்தியோ ஆபஜ்ஜதி.

சத்தாரோ பாடிதே³ஸனீயா நிட்டி²தா.