8. ஸஹத⁴ம்மிகவக்³கோ³

172. பி⁴க்கூ²ஹி ஸஹத⁴ம்மிகம் வுச்சமானோ – ‘‘ந தாவாஹம், ஆவுஸோ, ஏதஸ்மிம் ஸிக்கா²பதே³ ஸிக்கி²ஸ்ஸாமி யாவ ந அஞ்ஞம் பி⁴க்கு²ம் ப்³யத்தம் வினயத⁴ரம் பரிபுச்சி²ஸ்ஸாமீ’’தி ப⁴ணந்தோ த்³வே ஆபத்தியோ ஆபஜ்ஜதி. ப⁴ணதி, பயோகே³ து³க்கடம்; ப⁴ணிதே ஆபத்தி பாசித்தியஸ்ஸ.

வினயம் விவண்ணேந்தோ த்³வே ஆபத்தியோ ஆபஜ்ஜதி. விவண்ணேதி, பயோகே³ து³க்கடம்; விவண்ணிதே ஆபத்தி பாசித்தியஸ்ஸ.

மோஹேந்தோ த்³வே ஆபத்தியோ ஆபஜ்ஜதி. அனாரோபிதே மோஹே மோஹேதி, ஆபத்தி து³க்கடஸ்ஸ; ஆரோபிதே மோஹே மோஹேதி, ஆபத்தி பாசித்தியஸ்ஸ.

பி⁴க்கு²ஸ்ஸ குபிதோ அனத்தமனோ பஹாரம் தே³ந்தோ த்³வே ஆபத்தியோ ஆபஜ்ஜதி. பஹரதி, பயோகே³ து³க்கடம்; பஹதே ஆபத்தி பாசித்தியஸ்ஸ.

பி⁴க்கு²ஸ்ஸ குபிதோ அனத்தமனோ தலஸத்திகம் உக்³கி³ரந்தோ த்³வே ஆபத்தியோ ஆபஜ்ஜதி. உக்³கி³ரதி, பயோகே³ து³க்கடம்; உக்³கி³ரிதே ஆபத்தி பாசித்தியஸ்ஸ.

பி⁴க்கு²ம் அமூலகேன ஸங்கா⁴தி³ஸேஸேன அனுத்³த⁴ம்ஸேந்தோ த்³வே ஆபத்தியோ ஆபஜ்ஜதி. அனுத்³த⁴ம்ஸேதி, பயோகே³ து³க்கடம்; அனுத்³த⁴ம்ஸிதே ஆபத்தி பாசித்தியஸ்ஸ.

பி⁴க்கு²ஸ்ஸ ஸஞ்சிச்ச குக்குச்சம் உபத³ஹந்தோ த்³வே ஆபத்தியோ ஆபஜ்ஜதி. உபத³ஹதி, பயோகே³ து³க்கடம்; உபத³ஹிதே ஆபத்தி பாசித்தியஸ்ஸ.

பி⁴க்கூ²னம் ப⁴ண்ட³னஜாதானம் கலஹஜாதானம் விவாதா³பன்னானம் உபஸ்ஸுதிம் திட்ட²ந்தோ த்³வே ஆபத்தியோ ஆபஜ்ஜதி. ‘‘ஸோஸ்ஸாமீ’’தி க³ச்ச²தி, ஆபத்தி து³க்கடஸ்ஸ; யத்த² டி²தோ ஸுணாதி, ஆபத்தி பாசித்தியஸ்ஸ.

த⁴ம்மிகானம் கம்மானம் ச²ந்த³ம் த³த்வா பச்சா² கீ²யனத⁴ம்மம் ஆபஜ்ஜந்தோ த்³வே ஆபத்தியோ ஆபஜ்ஜதி. கி²ய்யதி, பயோகே³ து³க்கடம்; கி²ய்யிதே ஆபத்தி பாசித்தியஸ்ஸ.

ஸங்கே⁴ வினிச்ச²யகதா²ய வத்தமானாய ச²ந்த³ம் அத³த்வா உட்டா²யாஸனா பக்கமந்தோ த்³வே ஆபத்தியோ ஆபஜ்ஜதி. பரிஸாய ஹத்த²பாஸம் விஜஹந்தஸ்ஸ ஆபத்தி து³க்கடஸ்ஸ; விஜஹிதே ஆபத்தி பாசித்தியஸ்ஸ.

ஸமக்³கே³ன ஸங்கே⁴ன சீவரம் த³த்வா பச்சா² கீ²யனத⁴ம்மம் ஆபஜ்ஜந்தோ த்³வே ஆபத்தியோ ஆபஜ்ஜதி. கி²ய்யதி, பயோகே³ து³க்கடம்; கி²ய்யிதே ஆபத்தி பாசித்தியஸ்ஸ.

ஜானம் ஸங்கி⁴கம் லாப⁴ம் பரிணதம் புக்³க³லஸ்ஸ பரிணாமேந்தோ த்³வே ஆபத்தியோ ஆபஜ்ஜதி. பரிணாமேதி, பயோகே³ து³க்கடம்; பரிணாமிதே ஆபத்தி பாசித்தியஸ்ஸ.

ஸஹத⁴ம்மிகவக்³கோ³ அட்ட²மோ.