7. ஸப்பாணகவக்³கோ³

171. ஸஞ்சிச்ச பாணம் ஜீவிதா வோரோபேந்தோ கதி ஆபத்தியோ ஆபஜ்ஜதி? ஸஞ்சிச்ச பாணம் ஜீவிதா வோரோபேந்தோ சதஸ்ஸோ ஆபத்தியோ ஆபஜ்ஜதி. அனோதி³ஸ்ஸ ஓபாதம் க²ணதி – ‘‘யோ கோசி பபதித்வா மரிஸ்ஸதீ’’தி, ஆபத்தி து³க்கடஸ்ஸ; மனுஸ்ஸோ தஸ்மிம் பபதித்வா மரதி, ஆபத்தி பாராஜிகஸ்ஸ; யக்கோ² வா பேதோ வா திரச்சா²னக³தமனுஸ்ஸவிக்³க³ஹோ வா தஸ்மிம் பபதித்வா மரதி, ஆபத்தி து²ல்லச்சயஸ்ஸ; திரச்சா²னக³தோ தஸ்மிம் பபதித்வா மரதி, ஆபத்தி பாசித்தியஸ்ஸ – ஸஞ்சிச்ச பாணம் ஜீவிதா வோரோபேந்தோ இமா சதஸ்ஸோ ஆபத்தியோ ஆபஜ்ஜதி.

ஜானம் ஸப்பாணகம் உத³கம் பரிபு⁴ஞ்ஜந்தோ த்³வே ஆபத்தியோ ஆபஜ்ஜதி. பரிபு⁴ஞ்ஜதி, பயோகே³ து³க்கடம்; பரிபு⁴த்தே ஆபத்தி பாசித்தியஸ்ஸ.

ஜானம் யதா²த⁴ம்மம் நிஹதாதி⁴கரணம் புனகம்மாய உக்கோடேந்தோ த்³வே ஆபத்தியோ ஆபஜ்ஜதி. உக்கோடேதி, பயோகே³ து³க்கடம்; உக்கோடிதே ஆபத்தி பாசித்தியஸ்ஸ.

பி⁴க்கு²ஸ்ஸ ஜானம் து³ட்டு²ல்லம் ஆபத்திம் படிச்சா²தே³ந்தோ ஏகம் ஆபத்திம் ஆபஜ்ஜதி. பாசித்தியம்.

ஜானம் ஊனவீஸதிவஸ்ஸம் புக்³க³லம் உபஸம்பாதே³ந்தோ த்³வே ஆபத்தியோ ஆபஜ்ஜதி. உபஸம்பாதே³தி, பயோகே³ து³க்கடம்; உபஸம்பாதி³தே ஆபத்தி பாசித்தியஸ்ஸ.

ஜானம் தே²ய்யஸத்தே²ன ஸத்³தி⁴ம் ஸம்விதா⁴ய ஏகத்³தா⁴னமக்³க³ம் படிபஜ்ஜந்தோ த்³வே ஆபத்தியோ ஆபஜ்ஜதி. படிபஜ்ஜதி, பயோகே³ து³க்கடம்; படிபன்னே ஆபத்தி பாசித்தியஸ்ஸ.

மாதுகா³மேன ஸத்³தி⁴ம் ஸம்விதா⁴ய ஏகத்³தா⁴னமக்³க³ம் படிபஜ்ஜந்தோ த்³வே ஆபத்தியோ ஆபஜ்ஜதி. படிபஜ்ஜதி, பயோகே³ து³க்கடம்; படிபன்னே ஆபத்தி பாசித்தியஸ்ஸ.

பாபிகாய தி³ட்டி²யா யாவததியம் ஸமனுபா⁴ஸனாய ந படினிஸ்ஸஜ்ஜந்தோ த்³வே ஆபத்தியோ ஆபஜ்ஜதி. ஞத்தியா து³க்கடம்; கம்மவாசாபரியோஸானே ஆபத்தி பாசித்தியஸ்ஸ.

ஜானம் ததா²வாதி³னா பி⁴க்கு²னா அகடானுத⁴ம்மேன தம் தி³ட்டி²ம் அப்படினிஸ்ஸட்டே²ன ஸத்³தி⁴ம் ஸம்பு⁴ஞ்ஜந்தோ த்³வே ஆபத்தியோ ஆபஜ்ஜதி. ஸம்பு⁴ஞ்ஜதி, பயோகே³ து³க்கடம்; ஸம்பு⁴த்தே ஆபத்தி பாசித்தியஸ்ஸ.

ஜானம் ததா²னாஸிதம் ஸமணுத்³தே³ஸம் உபலாபேந்தோ த்³வே ஆபத்தியோ ஆபஜ்ஜதி. உபலாபேதி, பயோகே³ து³க்கடம்; உபலாபிதே ஆபத்தி பாசித்தியஸ்ஸ.

ஸப்பாணகவக்³கோ³ ஸத்தமோ.