6. ஸுராமேரயவக்³கோ³

170. மஜ்ஜம் பிவந்தோ த்³வே ஆபத்தியோ ஆபஜ்ஜதி. ‘‘பிவிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ; அஜ்ஜோ²ஹாரே அஜ்ஜோ²ஹாரே ஆபத்தி பாசித்தியஸ்ஸ.

பி⁴க்கு²ம் அங்கு³லிபதோத³கேன ஹாஸேந்தோ த்³வே ஆபத்தியோ ஆபஜ்ஜதி. ஹாஸேதி, பயோகே³ து³க்கடம்; ஹஸிதே ஆபத்தி பாசித்தியஸ்ஸ.

உத³கே கீளந்தோ த்³வே ஆபத்தியோ ஆபஜ்ஜதி. ஹேட்டா²கோ³ப்ப²கே உத³கே கீளதி, ஆபத்தி து³க்கடஸ்ஸ; உபரிகோ³ப்ப²கே கீளதி, ஆபத்தி பாசித்தியஸ்ஸ.

அனாத³ரியம் கரோந்தோ த்³வே ஆபத்தியோ ஆபஜ்ஜதி. கரோதி, பயோகே³ து³க்கடம்; கதே ஆபத்தி பாசித்தியஸ்ஸ.

பி⁴க்கு²ம் பி⁴ம்ஸாபேந்தோ த்³வே ஆபத்தியோ ஆபஜ்ஜதி. பி⁴ம்ஸாபேதி, பயோகே³ து³க்கடம்; பி⁴ம்ஸாபிதே ஆபத்தி பாசித்தியஸ்ஸ.

ஜோதிம் ஸமாத³ஹித்வா விஸிப்³பே³ந்தோ த்³வே ஆபத்தியோ ஆபஜ்ஜதி. ஸமாத³ஹதி, பயோகே³ து³க்கடம்; ஸமாத³ஹிதே ஆபத்தி பாசித்தியஸ்ஸ.

ஓரேனத்³த⁴மாஸம் நஹாயந்தோ த்³வே ஆபத்தியோ ஆபஜ்ஜதி. நஹாயதி, பயோகே³ து³க்கடம்; நஹானபரியோஸானே ஆபத்தி பாசித்தியஸ்ஸ.

அனாதி³யித்வா திண்ணம் து³ப்³ப³ண்ணகரணானம் அஞ்ஞதரம் து³ப்³ப³ண்ணகரணம் நவம் சீவரம் பரிபு⁴ஞ்ஜந்தோ த்³வே ஆபத்தியோ ஆபஜ்ஜதி. பரிபு⁴ஞ்ஜதி, பயோகே³ து³க்கடம்; பரிபு⁴த்தே ஆபத்தி பாசித்தியஸ்ஸ.

பி⁴க்கு²ஸ்ஸ வா பி⁴க்கு²னியா வா ஸிக்க²மானாய வா ஸாமணேரஸ்ஸ வா ஸாமணேரியா வா ஸாமம் சீவரம் விகப்பேத்வா அப்பச்சுத்³தா⁴ரணம் பரிபு⁴ஞ்ஜந்தோ த்³வே ஆபத்தியோ ஆபஜ்ஜதி. பரிபு⁴ஞ்ஜதி, பயோகே³ து³க்கடம்; பரிபு⁴த்தே ஆபத்தி பாசித்தியஸ்ஸ.

பி⁴க்கு²ஸ்ஸ பத்தம் வா சீவரம் வா நிஸீத³னம் வா ஸூசிக⁴ரம் வா காயப³ந்த⁴னம் வா அபனிதே⁴ந்தோ த்³வே ஆபத்தியோ ஆபஜ்ஜதி. அபனிதே⁴தி, பயோகே³ து³க்கடம்; அபனிதி⁴தே ஆபத்தி பாசித்தியஸ்ஸ.

ஸுராமேரயவக்³கோ³ ச²ட்டோ².