5. அசேலகவக்³கோ³

169. அசேலகஸ்ஸ, வா பரிப்³பா³ஜகஸ்ஸ வா பரிப்³பா³ஜிகாய வா ஸஹத்தா² கா²த³னீயம் வா போ⁴ஜனீயம் வா தே³ந்தோ த்³வே ஆபத்தியோ ஆபஜ்ஜதி. தே³தி, பயோகே³ து³க்கடம்; தி³ன்னே ஆபத்தி பாசித்தியஸ்ஸ.

பி⁴க்கு²ம் – ‘‘ஏஹாவுஸோ, கா³மம் வா நிக³மம் வா பிண்டா³ய பவிஸிஸ்ஸாமா’’தி தஸ்ஸ தா³பேத்வா வா அதா³பேத்வா வா உய்யோஜேந்தோ த்³வே ஆபத்தியோ ஆபஜ்ஜதி. உய்யோஜேதி, பயோகே³ து³க்கடம்; உய்யோஜிதே ஆபத்தி பாசித்தியஸ்ஸ.

ஸபோ⁴ஜனே குலே அனுபக²ஜ்ஜ நிஸஜ்ஜம் கப்பேந்தோ த்³வே ஆபத்தியோ ஆபஜ்ஜதி. நிஸீத³தி, பயோகே³ து³க்கடம்; நிஸின்னே ஆபத்தி பாசித்தியஸ்ஸ.

மாதுகா³மேன ஸத்³தி⁴ம் ரஹோ படிச்ச²ன்னே ஆஸனே நிஸஜ்ஜம் கப்பேந்தோ த்³வே ஆபத்தியோ ஆபஜ்ஜதி. நிஸீத³தி, பயோகே³ து³க்கடம்; நிஸின்னே ஆபத்தி பாசித்தியஸ்ஸ.

மாதுகா³மேன ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேந்தோ த்³வே ஆபத்தியோ ஆபஜ்ஜதி. நிஸீத³தி, பயோகே³ து³க்கடம்; நிஸின்னே ஆபத்தி பாசித்தியஸ்ஸ.

நிமந்திதோ ஸப⁴த்தோ ஸமானோ புரேப⁴த்தம் பச்சா²ப⁴த்தம் குலேஸு சாரித்தம் ஆபஜ்ஜந்தோ த்³வே ஆபத்தியோ ஆபஜ்ஜதி. பட²மம் பாத³ம் உம்மாரம் அதிக்காமேதி, ஆபத்தி து³க்கடஸ்ஸ; து³தியம் பாத³ம் அதிக்காமேதி, ஆபத்தி பாசித்தியஸ்ஸ.

ததுத்தரி பே⁴ஸஜ்ஜம் விஞ்ஞாபேந்தோ த்³வே ஆபத்தியோ ஆபஜ்ஜதி. விஞ்ஞாபேதி, பயோகே³ து³க்கடம்; விஞ்ஞாபிதே ஆபத்தி பாசித்தியஸ்ஸ.

உய்யுத்தம் ஸேனம் த³ஸ்ஸனாய க³ச்ச²ந்தோ த்³வே ஆபத்தியோ ஆபஜ்ஜதி. க³ச்ச²தி, ஆபத்தி து³க்கடஸ்ஸ; யத்த² டி²தோ பஸ்ஸதி, ஆபத்தி பாசித்தியஸ்ஸ.

அதிரேகதிரத்தம் ஸேனாய வஸந்தோ த்³வே ஆபத்தியோ ஆபஜ்ஜதி. வஸதி, பயோகே³ து³க்கடம்; வஸிதே ஆபத்தி பாசித்தியஸ்ஸ.

உய்யோதி⁴கம் க³ச்ச²ந்தோ த்³வே ஆபத்தியோ ஆபஜ்ஜதி. க³ச்ச²தி, ஆபத்தி து³க்கடஸ்ஸ; யத்த² டி²தோ பஸ்ஸதி, ஆபத்தி பாசித்தியஸ்ஸ.

அசேலகவக்³கோ³ பஞ்சமோ.