3. ஓவாத³வக்³கோ³

167. அஸம்மதோ பி⁴க்கு²னியோ ஓவத³ந்தோ த்³வே ஆபத்தியோ ஆபஜ்ஜதி. ஓவத³தி, பயோகே³ து³க்கடம்; ஓவதி³தே ஆபத்தி பாசித்தியஸ்ஸ.

அத்த²ங்க³தே ஸூரியே பி⁴க்கு²னியோ ஓவத³ந்தோ த்³வே ஆபத்தியோ ஆபஜ்ஜதி. ஓவத³தி, பயோகே³ து³க்கடம்; ஓவதி³தே ஆபத்தி பாசித்தியஸ்ஸ.

பி⁴க்கு²னுபஸ்ஸயம் உபஸங்கமித்வா பி⁴க்கு²னியோ ஓவத³ந்தோ த்³வே ஆபத்தியோ ஆபஜ்ஜதி. ஓவத³தி, பயோகே³ து³க்கடம்; ஓவதி³தே ஆபத்தி பாசித்தியஸ்ஸ.

‘‘ஆமிஸஹேது பி⁴க்கூ² பி⁴க்கு²னியோ ஓவத³ந்தீ’’தி ப⁴ணந்தோ த்³வே ஆபத்தியோ ஆபஜ்ஜதி. ப⁴ணதி, பயோகே³ து³க்கடம்; ப⁴ணிதே ஆபத்தி பாசித்தியஸ்ஸ.

அஞ்ஞாதிகாய பி⁴க்கு²னியா சீவரம் தே³ந்தோ த்³வே ஆபத்தியோ ஆபஜ்ஜதி. தே³தி, பயோகே³ து³க்கடம்; தி³ன்னே ஆபத்தி பாசித்தியஸ்ஸ.

அஞ்ஞாதிகா பி⁴க்கு²னியா சீவரம் ஸிப்³பே³ந்தோ த்³வே ஆபத்தியோ ஆபஜ்ஜதி. ஸிப்³பே³தி, பயோகே³ து³க்கடம்; ஆராபதே² ஆராபதே² ஆபத்தி பாசித்தியஸ்ஸ.

பி⁴க்கு²னியா ஸத்³தி⁴ம் ஸம்விதா⁴ய ஏகத்³தா⁴னமக்³க³ம் படிபஜ்ஜந்தோ த்³வே ஆபத்தியோ ஆபஜ்ஜதி. படிபஜ்ஜதி, பயோகே³ து³க்கடம்; படிபன்னே ஆபத்தி பாசித்தியஸ்ஸ.

பி⁴க்கு²னியா ஸத்³தி⁴ம் ஸம்விதா⁴ய ஏகம் நாவம் அபி⁴ருஹந்தோ த்³வே ஆபத்தியோ ஆபஜ்ஜதி. அபி⁴ருஹதி, பயோகே³ து³க்கடம்; அபி⁴ருள்ஹே ஆபத்தி பாசித்தியஸ்ஸ.

ஜானம் பி⁴க்கு²னிபரிபாசிதம் பிண்ட³பாதம் பு⁴ஞ்ஜந்தோ த்³வே ஆபத்தியோ ஆபஜ்ஜதி. ‘‘பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ; அஜ்ஜோ²ஹாரே அஜ்ஜோ²ஹாரே ஆபத்தி பாசித்தியஸ்ஸ.

பி⁴க்கு²னியா ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேந்தோ த்³வே ஆபத்தியோ ஆபஜ்ஜதி. நிஸீத³தி, பயோகே³ து³க்கடம்; நிஸின்னே ஆபத்தி பாசித்தியஸ்ஸ.

ஓவாத³வக்³கோ³ ததியோ.