1. பாராஜிககண்ட³ம்

157. மேது²னம் த⁴ம்மம் படிஸேவந்தோ கதி ஆபத்தியோ ஆபஜ்ஜதி? மேது²னம் த⁴ம்மம் படிஸேவந்தோ திஸ்ஸோ ஆபத்தியோ ஆபஜ்ஜதி. அக்கா²யிதே ஸரீரே மேது²னம் த⁴ம்மம் படிஸேவதி, ஆபத்தி பாராஜிகஸ்ஸ; யேபு⁴ய்யேன கா²யிதே ஸரீரே மேது²னம் த⁴ம்மம் படிஸேவதி, ஆபத்தி து²ல்லச்சயஸ்ஸ; வட்டகதே [விவடகதே (ஸ்யா.)] முகே² அச்சு²பந்தம் அங்க³ஜாதம் பவேஸேதி, ஆபத்தி து³க்கடஸ்ஸ – மேது²னம் த⁴ம்மம் படிஸேவந்தோ இமா திஸ்ஸோ ஆபத்தியோ ஆபஜ்ஜதி.

158. அதி³ன்னம் ஆதி³யந்தோ கதி ஆபத்தியோ ஆபஜ்ஜதி? அதி³ன்னம் ஆதி³யந்தோ திஸ்ஸோ ஆபத்தியோ ஆபஜ்ஜதி. பஞ்சமாஸகம் வா அதிரேகபஞ்சமாஸகம் வா அக்³க⁴னகம் அதி³ன்னம் தே²ய்யஸங்கா²தம் ஆதி³யதி, ஆபத்தி பாராஜிகஸ்ஸ; அதிரேகமாஸகம் வா ஊனபஞ்சமாஸகம் வா அக்³க⁴னகம் அதி³ன்னம் தே²ய்யஸங்கா²தம் ஆதி³யதி, ஆபத்தி து²ல்லச்சயஸ்ஸ; மாஸகம் வா ஊனமாஸகம் வா அக்³க⁴னகம் அதி³ன்னம் தே²ய்யஸங்கா²தம் ஆதி³யதி, ஆபத்தி து³க்கடஸ்ஸ – அதி³ன்னம் ஆதி³யந்தோ இமா திஸ்ஸோ ஆபத்தியோ ஆபஜ்ஜதி.

159. ஸஞ்சிச்ச மனுஸ்ஸவிக்³க³ஹம் ஜீவிதா வோரோபேந்தோ கதி ஆபத்தியோ ஆபஜ்ஜதி? ஸஞ்சிச்ச மனுஸ்ஸவிக்³க³ஹம் ஜீவிதா வோரோபேந்தோ திஸ்ஸோ ஆபத்தியோ ஆபஜ்ஜதி. மனுஸ்ஸம் ஓதி³ஸ்ஸ ஓபாதம் க²ணதி ‘‘பபதித்வா மரிஸ்ஸதீ’’தி, ஆபத்தி து³க்கடஸ்ஸ; பபதிதே து³க்கா² வேத³னா உப்பஜ்ஜதி, ஆபத்தி து²ல்லச்சயஸ்ஸ; மரதி, ஆபத்தி பாராஜிகஸ்ஸ – ஸஞ்சிச்ச மனுஸ்ஸவிக்³க³ஹம் ஜீவிதா வோரோபேந்தோ இமா திஸ்ஸோ ஆபத்தியோ ஆபஜ்ஜதி.

160. அஸந்தம் அபூ⁴தம் உத்தரிமனுஸ்ஸத⁴ம்மம் உல்லபந்தோ கதி ஆபத்தியோ ஆபஜ்ஜதி? அஸந்தம் அபூ⁴தம் உத்தரிமனுஸ்ஸத⁴ம்மம் உல்லபந்தோ திஸ்ஸோ ஆபத்தியோ ஆபஜ்ஜதி. பாபிச்சோ² இச்சா²பகதோ அஸந்தம் அபூ⁴தம் உத்தரிமனுஸ்ஸத⁴ம்மம் உல்லபதி, ஆபத்தி பாராஜிகஸ்ஸ; ‘‘யோ தே விஹாரே வஸதி, ஸோ பி⁴க்கு² அரஹா’’தி ப⁴ணதி, படிவிஜானந்தஸ்ஸ ஆபத்தி து²ல்லச்சயஸ்ஸ; ந படிவிஜானந்தஸ்ஸ ஆபத்தி து³க்கடஸ்ஸ – அஸந்தம் அபூ⁴தம் உத்தரிமனுஸ்ஸத⁴ம்மம் உல்லபந்தோ இமா திஸ்ஸோ ஆபத்தியோ ஆபஜ்ஜதி.

சத்தாரோ பாராஜிகா நிட்டி²தா.