2. ஸங்கா⁴தி³ஸேஸகண்ட³ம்

161. உபக்கமித்வா அஸுசிம் மோசேந்தோ திஸ்ஸோ ஆபத்தியோ ஆபஜ்ஜதி. சேதேதி உபக்கமதி முச்சதி, ஆபத்தி ஸங்கா⁴தி³ஸேஸஸ்ஸ; சேதேதி உபக்கமதி ந முச்சதி, ஆபத்தி து²ல்லச்சயஸ்ஸ; பயோகே³ து³க்கடம்.

மாதுகா³மேன ஸத்³தி⁴ம் காயஸம்ஸக்³க³ம் ஸமாபஜ்ஜந்தோ திஸ்ஸோ ஆபத்தியோ ஆபஜ்ஜதி. காயேன காயம் ஆமஸதி, ஆபத்தி ஸங்கா⁴தி³ஸேஸஸ்ஸ; காயேன காயபடிப³த்³த⁴ம் ஆமஸதி, ஆபத்தி து²ல்லச்சயஸ்ஸ; காயபடிப³த்³தே⁴ன காயபடிப³த்³த⁴ம் ஆமஸதி, ஆபத்தி து³க்கடஸ்ஸ.

மாதுகா³மம் து³ட்டு²ல்லாஹி வாசாஹி ஓபா⁴ஸேந்தோ திஸ்ஸோ ஆபத்தியோ ஆபஜ்ஜதி. வச்சமக்³க³ம் பஸ்ஸாவமக்³க³ம் ஆதி³ஸ்ஸ வண்ணம்பி ப⁴ணதி, அவண்ணம்பி ப⁴ணதி, ஆபத்தி ஸங்கா⁴தி³ஸேஸஸ்ஸ; வச்சமக்³க³ம் பஸ்ஸாவமக்³க³ம் ட²பேத்வா அத⁴க்க²கம் உப்³ப⁴ஜாணுமண்ட³லம் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி, ஆபத்தி து²ல்லச்சயஸ்ஸ; காயபடிப³த்³த⁴ம் ஆதி³ஸ்ஸ வண்ணம்பி ப⁴ணதி அவண்ணம்பி ப⁴ணதி, ஆபத்தி து³க்கடஸ்ஸ.

அத்தகாமபாரிசரியா வண்ணம் பா⁴ஸந்தோ திஸ்ஸோ ஆபத்தியோ ஆபஜ்ஜதி. மாதுகா³மஸ்ஸ ஸந்திகே அத்தகாமபாரிசரியாய வண்ணம் பா⁴ஸதி, ஆபத்தி ஸங்கா⁴தி³ஸேஸஸ்ஸ; பண்ட³கஸ்ஸ ஸந்திகே அத்தகாமபாரிசரியாய வண்ணம் பா⁴ஸதி, ஆபத்தி து²ல்லச்சயஸ்ஸ; திரச்சா²னக³தஸ்ஸ ஸந்திகே அத்தகாமபாரிசரியாய வண்ணம் பா⁴ஸதி, ஆபத்தி து³க்கடஸ்ஸ.

ஸஞ்சரித்தம் ஸமாபஜ்ஜந்தோ திஸ்ஸோ ஆபத்தியோ ஆபஜ்ஜதி. படிக்³க³ண்ஹாதி வீமம்ஸதி பச்சாஹரதி, ஆபத்தி ஸங்கா⁴தி³ஸேஸஸ்ஸ; படிக்³க³ண்ஹாதி வீமம்ஸதி ந பச்சாஹரதி, ஆபத்தி து²ல்லச்சயஸ்ஸ; படிக்³க³ண்ஹாதி ந வீமம்ஸதி ந பச்சாஹரதி, ஆபத்தி து³க்கடஸ்ஸ.

ஸஞ்ஞாசிகாய குடிம் காராபேந்தோ திஸ்ஸோ ஆபத்தியோ ஆபஜ்ஜதி. காராபேதி, பயோகே³ து³க்கடம்; ஏகம் பிண்ட³ம் அனாக³தே, ஆபத்தி து²ல்லச்சயஸ்ஸ; தஸ்மிம் பிண்டே³ ஆக³தே, ஆபத்தி ஸங்கா⁴தி³ஸேஸஸ்ஸ.

மஹல்லகம் விஹாரம் காராபேந்தோ திஸ்ஸோ ஆபத்தியோ ஆபஜ்ஜதி. காராபேதி, பயோகே³ து³க்கடம்; ஏகம் பிண்ட³ம் அனாக³தே, ஆபத்தி து²ல்லச்சயஸ்ஸ; தஸ்மிம் பிண்டே³ ஆக³தே, ஆபத்தி ஸங்கா⁴தி³ஸேஸஸ்ஸ.

பி⁴க்கு²ம் அமூலகேன பாராஜிகேன த⁴ம்மேன அனுத்³த⁴ம்ஸேந்தோ திஸ்ஸோ ஆபத்தியோ ஆபஜ்ஜதி. அனோகாஸம் காராபேத்வா சாவனாதி⁴ப்பாயோ வதே³தி, ஆபத்தி ஸங்கா⁴தி³ஸேஸேன து³க்கடஸ்ஸ; ஓகாஸம் காராபேத்வா அக்கோஸாதி⁴ப்பாயோ வதே³தி, ஆபத்தி ஓமஸவாத³ஸ்ஸ.

பி⁴க்கு²ம் அஞ்ஞபா⁴கி³யஸ்ஸ அதி⁴கரணஸ்ஸ கிஞ்சி தே³ஸம் லேஸமத்தம் உபாதா³ய பாராஜிகேன த⁴ம்மேன அனுத்³த⁴ம்ஸேந்தோ திஸ்ஸோ ஆபத்தியோ ஆபஜ்ஜதி. அனோகாஸம் காராபேத்வா சாவனாதி⁴ப்பாயோ வதே³தி, ஆபத்தி ஸங்கா⁴தி³ஸேஸேன து³க்கடஸ்ஸ; ஓகாஸம் காராபேத்வா அக்கோஸாதி⁴ப்பாயோ வதே³தி, ஆபத்தி ஓமஸவாத³ஸ்ஸ.

ஸங்க⁴பே⁴த³கோ பி⁴க்கு² யாவததியம் ஸமனுபா⁴ஸனாய ந படினிஸ்ஸஜ்ஜந்தோ திஸ்ஸோ ஆபத்தியோ ஆபஜ்ஜதி. ஞத்தியா து³க்கடம்; த்³வீஹி கம்மவாசாஹி து²ல்லச்சயா; கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ.

பே⁴த³கானுவத்தகா பி⁴க்கூ² யாவததியம் ஸமனுபா⁴ஸனாய [ஸமனுபா⁴ஸியமானா (ஸ்யா.)] ந படினிஸ்ஸஜ்ஜந்தா திஸ்ஸோ ஆபத்தியோ ஆபஜ்ஜந்தி. ஞத்தியா து³க்கடம்; த்³வீஹி கம்மவாசாஹி து²ல்லச்சயா; கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ.

து³ப்³ப³சோ பி⁴க்கு² யாவததியம் ஸமனுபா⁴ஸனாய [ஸமனுபா⁴ஸியமானோ (ஸ்யா.)] ந படினிஸ்ஸஜ்ஜந்தோ திஸ்ஸோ ஆபத்தியோ ஆபஜ்ஜதி. ஞத்தியா து³க்கடம்; த்³வீஹி கம்மவாசாஹி து²ல்லச்சயா; கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ.

குலதூ³ஸகோ பி⁴க்கு² யாவததியம் ஸமனுபா⁴ஸனாய ந படினிஸ்ஸஜ்ஜந்தோ திஸ்ஸோ ஆபத்தியோ ஆபஜ்ஜதி. ஞத்தியா து³க்கடம்; த்³வீஹி கம்மவாசாஹி து²ல்லச்சயா; கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ.

தேரஸ ஸங்கா⁴தி³ஸேஸா நிட்டி²தா.