8. ஸமுச்சயவாரோ

256. காயஸம்ஸக்³க³ம் ஸாதி³யனபச்சயா கதி ஆபத்தியோ ஆபஜ்ஜதி? காயஸம்ஸக்³க³ம் ஸாதி³யனபச்சயா பஞ்ச ஆபத்தியோ ஆபஜ்ஜதி. அவஸ்ஸுதா பி⁴க்கு²னீ அவஸ்ஸுதஸ்ஸ புரிஸபுக்³க³லஸ்ஸ அத⁴க்க²கம் உப்³ப⁴ஜாணுமண்ட³லம் க³ஹணம் ஸாதி³யதி, ஆபத்தி பாராஜிகஸ்ஸ; பி⁴க்கு² காயேன காயம் ஆமஸதி, ஆபத்தி ஸங்கா⁴தி³ஸேஸஸ்ஸ; காயேன காயபடிப³த்³த⁴ம் ஆமஸதி, ஆபத்தி து²ல்லச்சயஸ்ஸ; காயபடிப³த்³தே⁴ன காயபடிப³த்³த⁴ம் ஆமஸதி, ஆபத்தி து³க்கடஸ்ஸ; அங்கு³லிபதோத³கே பாசித்தியம் – காயஸம்ஸக்³க³ம் ஸாதி³யனபச்சயா இமா பஞ்ச ஆபத்தியோ ஆபஜ்ஜதி.

தா ஆபத்தியோ சதுன்னம் விபத்தீனம் கதி விபத்தியோ ப⁴ஜந்தி? ஸத்தன்னம் ஆபத்திக்க²ந்தா⁴னம் கதிஹி ஆபத்திக்க²ந்தே⁴ஹி ஸங்க³ஹிதா? ச²ன்னம் ஆபத்திஸமுட்டா²னானம் கதிஹி ஸமுட்டா²னேஹி ஸமுட்ட²ந்தி? சதுன்னம் அதி⁴கரணானம் கதமம் அதி⁴கரணம்? ஸத்தன்னம் ஸமதா²னம் கதிஹி ஸமதே²ஹி ஸம்மந்தி? தா ஆபத்தியோ சதுன்னம் விபத்தீனம் த்³வே விபத்தியோ ப⁴ஜந்தி – ஸியா ஸீலவிபத்திம், ஸியா ஆசாரவிபத்திம். ஸத்தன்னம் ஆபத்திக்க²ந்தா⁴னம் பஞ்சஹி ஆபத்திக்க²ந்தே⁴ஹி ஸங்க³ஹிதா – ஸியா பாராஜிகாபத்திக்க²ந்தே⁴ன, ஸியா ஸங்கா⁴தி³ஸேஸாபத்திக்க²ந்தே⁴ன, ஸியா து²ல்லச்சயாபத்திக்க²ந்தே⁴ன, ஸியா பாசித்தியாபத்திக்க²ந்தே⁴ன, ஸியா து³க்கடாபத்திக்க²ந்தே⁴ன. ச²ன்னம் ஆபத்திஸமுட்டா²னானம் ஏகேன ஸமுட்டா²னேன ஸமுட்ட²ந்தி – காயதோ ச சித்ததோ ச ஸமுட்ட²ந்தி, ந வாசதோ. சதுன்னம் அதி⁴கரணானம் ஆபத்தாதி⁴கரணம். ஸத்தன்னம் ஸமதா²னம் தீஹி ஸமதே²ஹி ஸம்மந்தி – ஸியா ஸம்முகா²வினயேன ச படிஞ்ஞாதகரணேன ச, ஸியா ஸம்முகா²வினயேன ச திணவத்தா²ரகேன ச…பே….

த³தி⁴ம் விஞ்ஞாபேத்வா பு⁴ஞ்ஜனபச்சயா கதி ஆபத்தியோ ஆபஜ்ஜதி? த³தி⁴ம் விஞ்ஞாபேத்வா பு⁴ஞ்ஜனபச்சயா த்³வே ஆபத்தியோ ஆபஜ்ஜதி. பு⁴ஞ்ஜிஸ்ஸாமீதி படிக்³க³ண்ஹாதி, ஆபத்தி து³க்கடஸ்ஸ; அஜ்ஜோ²ஹாரே அஜ்ஜோ²ஹாரே ஆபத்தி பாடிதே³ஸனீயஸ்ஸ – த³தி⁴ம் விஞ்ஞாபேத்வா பு⁴ஞ்ஜனபச்சயா இமா த்³வே ஆபத்தியோ ஆபஜ்ஜதி.

தா ஆபத்தியோ சதுன்னம் விபத்தீனம் கதி விபத்தியோ ப⁴ஜந்தி? ஸத்தன்னம் ஆபத்திக்க²ந்தா⁴னம் கதிஹி ஆபத்திக்க²ந்தே⁴ஹி ஸங்க³ஹிதா? ச²ன்னம் ஆபத்திஸமுட்டா²னானம் கதிஹி ஸமுட்டா²னேஹி ஸமுட்ட²ந்தி? சதுன்னம் அதி⁴கரணானம் கதமம் அதி⁴கரணம்? ஸத்தன்னம் ஸமதா²னம் கதிஹி ஸமதே²ஹி ஸம்மந்தி? தா ஆபத்தியோ சதுன்னம் விபத்தீனம் ஏகம் விபத்திம் ப⁴ஜந்தி – ஆசாரவிபத்திம். ஸத்தன்னம் ஆபத்திக்க²ந்தா⁴னம் த்³வீஹி ஆபத்திக்க²ந்தே⁴ஹி ஸங்க³ஹிதா – ஸியா பாடிதே³ஸனீயாபத்திக்க²ந்தே⁴ன, ஸியா து³க்கடாபத்திக்க²ந்தே⁴ன. ச²ன்னம் ஆபத்திஸமுட்டா²னானம் சதூஹி ஸமுட்டா²னேஹி ஸமுட்ட²ந்தி – ஸியா காயதோ ஸமுட்ட²ந்தி, ந வாசதோ ந சித்ததோ; ஸியா காயதோ ச வாசதோ ச ஸமுட்ட²ந்தி, ந சித்ததோ; ஸியா காயதோ ச சித்ததோ ச ஸமுட்ட²ந்தி ந வாசதோ; ஸியா காயதோ ச வாசதோ ச சித்ததோ ச ஸமுட்ட²ந்தி. சதுன்னம் அதி⁴கரணானம், ஆபத்தாதி⁴கரணம். ஸத்தன்னம் ஸமதா²னம் தீஹி ஸமதே²ஹி ஸம்மந்தி – ஸியா ஸம்முகா²வினயேன ச படிஞ்ஞாதகரணேன ச, ஸியா ஸம்முகா²வினயேன ச திணவத்தா²ரகேன சாதி.

ஸமுச்சயவாரோ நிட்டி²தோ அட்ட²மோ. [இமஸ்ஸானந்தரம் போராணஸீஹளபோத்த²கே ஏவம்பி§தி³ஸ்ஸதி –§‘‘தேஸமுத்³தா³னம் –§கதிவாரோ ச விபத்திவாரோ ச, ஸங்க³ஹவாரோ ச ஸமுட்டா²னவாரோ. அதி⁴கரணவாரோ ச ஸமத²வாரோ ச, ஸமுச்சயவாரோ ச இமே ஸத்த வாரா. ஆதி³தோ பஞ்ஞத்திவாரேன ஸஹ அட்ட²வாராதி’’இதி.]

அட்ட² பச்சயவாரா நிட்டி²தா.

பி⁴க்கு²னீவிப⁴ங்கே³ ஸோளஸ மஹாவாரா நிட்டி²தா.