6. ஆராமவக்³கோ³

236. ஜானம் ஸபி⁴க்கு²கம் ஆராமம் அனாபுச்சா² பவிஸந்தீ த்³வே ஆபத்தியோ ஆபஜ்ஜதி. பட²மம் பாத³ம் பரிக்கே²பம் அதிக்காமேதி, ஆபத்தி து³க்கடஸ்ஸ; து³தியம் பாத³ம் அதிக்காமேதி, ஆபத்தி பாசித்தியஸ்ஸ.

பி⁴க்கு²ம் அக்கோஸந்தீ பரிபா⁴ஸந்தீ த்³வே ஆபத்தியோ ஆபஜ்ஜதி. அக்கோஸதி, பயோகே³ து³க்கடம்; அக்கோஸிதே, ஆபத்தி பாசித்தியஸ்ஸ.

சண்டீ³கதா க³ணம் பரிபா⁴ஸந்தீ த்³வே ஆபத்தியோ ஆபஜ்ஜதி. பரிபா⁴ஸதி, பயோகே³ து³க்கடம்; பரிபா⁴ஸிதே, ஆபத்தி பாசித்தியஸ்ஸ.

நிமந்திதா வா பவாரிதா வா கா²த³னீயம் வா போ⁴ஜனீயம் வா பு⁴ஞ்ஜந்தீ த்³வே ஆபத்தியோ ஆபஜ்ஜதி. ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ; அஜ்ஜோ²ஹாரே அஜ்ஜோ²ஹாரே ஆபத்தி பாசித்தியஸ்ஸ.

குலம் மச்ச²ராயந்தீ த்³வே ஆபத்தியோ ஆபஜ்ஜதி. மச்ச²ராயதி, பயோகே³ து³க்கடம்; மச்ச²ரிதே, ஆபத்தி பாசித்தியஸ்ஸ.

அபி⁴க்கு²கே ஆவாஸே வஸ்ஸம் வஸந்தீ த்³வே ஆபத்தியோ ஆபஜ்ஜதி. ‘‘வஸ்ஸம் வஸிஸ்ஸாமீ’’தி ஸேனாஸனம் பஞ்ஞபேதி பானீயம் பரிபோ⁴ஜனீயம் உபட்ட²பேதி பரிவேணம் ஸம்மஜ்ஜதி, ஆபத்தி து³க்கடஸ்ஸ; ஸஹ அருணுக்³க³மனா ஆபத்தி பாசித்தியஸ்ஸ.

வஸ்ஸம்வுட்டா² பி⁴க்கு²னீ உப⁴தோஸங்கே⁴ தீஹி டா²னேஹி ந பவாரேந்தீ ஏகம் ஆபத்திம் ஆபஜ்ஜதி. பாசித்தியம்.

ஓவாதா³ய வா ஸம்வாஸாய வா ந க³ச்ச²ந்தீ ஏகம் ஆபத்திம் ஆபஜ்ஜதி. பாசித்தியம்.

உபோஸத²ம்பி ந புச்ச²ந்தீ ஓவாத³ம்பி ந யாசந்தீ ஏகம் ஆபத்திம் ஆபஜ்ஜதி. பாசித்தியம்.

பஸாகே² ஜாதம் க³ண்ட³ம் வா ருதி⁴தம் வா அனபலோகேத்வா ஸங்க⁴ம் வா க³ணம் வா புரிஸேன ஸத்³தி⁴ம் ஏகேனேகா பே⁴தா³பேந்தீ த்³வே ஆபத்தியோ ஆபஜ்ஜதி. பே⁴தா³பேதி, பயோகே³ து³க்கடம்; பி⁴ன்னே, ஆபத்தி பாசித்தியஸ்ஸ.

ஆராமவக்³கோ³ ச²ட்டோ².