1. பாராஜிககண்ட³ம்

201. யம் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன பி⁴க்கு²னீனம் பஞ்சமம் பாராஜிகம் கத்த² பஞ்ஞத்தம்? கம் ஆரப்³ப⁴? கிஸ்மிம் வத்து²ஸ்மிம்? அத்தி² தத்த² பஞ்ஞத்தி, அனுபஞ்ஞத்தி, அனுப்பன்னபஞ்ஞத்தி? ஸப்³ப³த்த²பஞ்ஞத்தி, பதே³ஸபஞ்ஞத்தி? ஸாதா⁴ரணபஞ்ஞத்தி, அஸாதா⁴ரணபஞ்ஞத்தி? ஏகதோபஞ்ஞத்தி, உப⁴தோபஞ்ஞத்தி? சதுன்னம் பாதிமோக்கு²த்³தே³ஸானம் கத்தோ²க³த⁴ம் கத்த² பரியாபன்னம்? கதமேன உத்³தே³ஸேன உத்³தே³ஸம் ஆக³ச்ச²தி? சதுன்னம் விபத்தீனம் கதமா விபத்தி? ஸத்தன்னம் ஆபத்திக்க²ந்தா⁴னம் கதமோ ஆபத்திக்க²ந்தோ⁴? ச²ன்னம் ஆபத்திஸமுட்டா²னானம் கதிஹி ஸமுட்டா²னேஹி ஸமுட்டா²தி? சதுன்னம் அதி⁴கரணானம் கதமம் அதி⁴கரணம்? ஸத்தன்னம் ஸமதா²னம் கதிஹி ஸமதே²ஹி ஸம்மதி? கோ தத்த² வினயோ? கோ தத்த² அபி⁴வினயோ? கிம் தத்த² பாதிமோக்க²ம்? கிம் தத்த² அதி⁴பாதிமோக்க²ம்? கா விபத்தி? கா ஸம்பத்தி? கா படிபத்தி? கதி அத்த²வஸே படிச்ச ப⁴க³வதா பி⁴க்கு²னீனம் பஞ்சமம் பாராஜிகம் பஞ்ஞத்தம்? கா ஸிக்க²ந்தி? கா ஸிக்கி²தஸிக்கா²? கத்த² டி²தம்? கா தா⁴ரேந்தி? கஸ்ஸ வசனம்? கேனாப⁴தந்தி?

202. யம் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன பி⁴க்கு²னீனம் பஞ்சமம் பாராஜிகம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? ஸுந்த³ரீனந்த³ம் பி⁴க்கு²னிம் ஆரப்³ப⁴. கிஸ்மிம் வத்து²ஸ்மிந்தி? ஸுந்த³ரீனந்தா³ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ காயஸம்ஸக்³க³ம் ஸாதி³யி, தஸ்மிம் வத்து²ஸ்மிம். அத்தி² தத்த² பஞ்ஞத்தி அனுபஞ்ஞத்தி அனுப்பன்னபஞ்ஞத்தீதி? ஏகா பஞ்ஞத்தி. அனுபஞ்ஞத்தி அனுப்பன்னபஞ்ஞத்தி தஸ்மிம் நத்தி². ஸப்³ப³த்த²பஞ்ஞத்தி, பதே³ஸபஞ்ஞத்தீதி? ஸப்³ப³த்த²பஞ்ஞத்தி. ஸாதா⁴ரணபஞ்ஞத்தி, அஸாதா⁴ரணபஞ்ஞத்தீதி? அஸாதா⁴ரணபஞ்ஞத்தி. ஏகதோபஞ்ஞத்தி, உப⁴தோபஞ்ஞத்தீதி? ஏகதோபஞ்ஞத்தி. சதுன்னம் பாதிமோக்கு²த்³தே³ஸானம் கத்தோ²க³த⁴ம் கத்த² பரியாபன்னந்தி? நிதா³னோக³த⁴ம் நிதா³னபரியாபன்னம். கதமேன உத்³தே³ஸேன உத்³தே³ஸம் ஆக³ச்ச²தீதி? து³தியேன உத்³தே³ஸேன உத்³தே³ஸம் ஆக³ச்ச²தி. சதுன்னம் விபத்தீனம் கதமா விபத்தீதி? ஸீலவிபத்தி. ஸத்தன்னம் ஆபத்திக்க²ந்தா⁴னம் கதமோ ஆபத்திக்க²ந்தோ⁴தி? பாராஜிகாபத்திக்க²ந்தோ⁴. ச²ன்னம் ஆபத்திஸமுட்டா²னானம் கதிஹி ஸமுட்டா²னேஹி ஸமுட்டா²தீதி? ஏகேன ஸமுட்டா²னே ஸமுட்டா²தி – காயதோ ச சித்ததோ ச ஸமுட்டா²தி, ந வாசதோ. சதுன்னம் அதி⁴கரணானம் கதமம் அதி⁴கரணந்தி? ஆபத்தாதி⁴கரணம்? ஸத்தன்னம் ஸமதா²னம் கதிஹி ஸமதே²ஹி ஸம்மதீதி? த்³வீஹி ஸமதே²ஹி ஸம்மதி – ஸம்முகா²வினயேன ச படிஞ்ஞாதகரணேன ச. கோ தத்த² வினயோ, கோ தத்த² அபி⁴வினயோதி? பஞ்ஞத்தி வினயோ, விப⁴த்தி அபி⁴வினயோ. கிம் தத்த² பாதிமோக்க²ம், கிம் தத்த² அதி⁴பாதிமோக்க²ந்தி? பஞ்ஞத்தி பாதிமோக்க²ம், விப⁴த்தி அதி⁴பாதிமோக்க²ம். கா விபத்தீதி? அஸம்வரோ விபத்தி. கா ஸம்பத்தீதி? ஸம்வரோ ஸம்பத்தி. கா படிபத்தீதி? ந ஏவரூபம் கரிஸ்ஸாமீதி யாவஜீவம் ஆபாணகோடிகம் ஸமாதா³ய ஸிக்க²தி ஸிக்கா²பதே³ஸு. [அ. நி. 10.31] கதி அத்த²வஸே படிச்ச ப⁴க³வதா பி⁴க்கு²னீனம் பஞ்சமம் பாராஜிகம் பஞ்ஞத்தந்தி? த³ஸ அத்த²வஸே படிச்ச ப⁴க³வதா பி⁴க்கு²னீனம் பஞ்சமம் பாராஜிகம் பஞ்ஞத்தம் – ஸங்க⁴ஸுட்டு²தாய, ஸங்க⁴பா²ஸுதாய, து³ம்மங்கூனம் பி⁴க்கு²னீனம் நிக்³க³ஹாய, பேஸலானம் பி⁴க்கு²னீனம் பா²ஸுவிஹாராய, தி³ட்ட²த⁴ம்மிகானம் ஆஸவானம் ஸம்வராய, ஸம்பராயிகானம் ஆஸவானம் படிகா⁴தாய, அப்பஸன்னானம் பஸாதா³ய, பஸன்னானம் பி⁴ய்யோபா⁴வாய, ஸத்³த⁴ம்மட்டி²தியா, வினயானுக்³க³ஹாய. கா ஸிக்க²ந்தீதி? ஸேக்கா² ச புது²ஜ்ஜனகல்யாணிகா ச ஸிக்க²ந்தி. கா ஸிக்கி²தஸிக்கா²தி? அரஹந்தியோ [அரஹந்தா (க.)] ஸிக்கி²தஸிக்கா². கத்த² டி²தந்தி? ஸிக்கா²காமாஸு டி²தம். கா தா⁴ரேந்தீதி? யாஸம் வத்ததி தா தா⁴ரேந்தி. கஸ்ஸ வசனந்தி? ப⁴க³வதோ வசனம் அரஹதோ ஸம்மாஸம்பு³த்³த⁴ஸ்ஸ. கேனாப⁴தந்தி? பரம்பராப⁴தம் –

உபாலி தா³ஸகோ சேவ, ஸோணகோ ஸிக்³க³வோ ததா²;

மோக்³க³லிபுத்தேன பஞ்சமா, ஏதே ஜம்பு³ஸிரிவ்ஹயே.

ததோ மஹிந்தோ³ இட்டியோ, உத்தியோ ஸம்ப³லோ ததா²;

ப⁴த்³த³னாமோ ச பண்டி³தோ.

ஏதே நாகா³ மஹாபஞ்ஞா, ஜம்பு³தீ³பா இதா⁴க³தா;

வினயம் தே வாசயிம்ஸு, பிடகம் தம்ப³பண்ணியா.

நிகாயே பஞ்ச வாசேஸும், ஸத்த சேவ பகரணே;

ததோ அரிட்டோ² மேதா⁴வீ, திஸ்ஸத³த்தோ ச பண்டி³தோ.

விஸாரதோ³ காளஸுமனோ, தே²ரோ ச தீ³க⁴னாமகோ;

தீ³க⁴ஸுமனோ ச பண்டி³தோ.

புனதே³வ காளஸுமனோ, நாக³த்தே²ரோ ச பு³த்³த⁴ரக்கி²தோ;

திஸ்ஸத்தே²ரோ ச மேதா⁴வீ, தே³வத்தே²ரோ ச பண்டி³தோ.

புனதே³வ ஸுமனோ மேதா⁴வீ, வினயே ச விஸாரதோ³;

ப³ஹுஸ்ஸுதோ சூளனாகோ³, க³ஜோவ து³ப்பத⁴ம்ஸியோ.

த⁴ம்மபாலிதனாமோ ச, ரோஹணே ஸாது⁴பூஜிதோ;

தஸ்ஸ ஸிஸ்ஸோ மஹாபஞ்ஞோ, கே²மனாமோ திபேடகோ.

தீ³பே தாரகராஜாவ பஞ்ஞாய அதிரோசத²;

உபதிஸ்ஸோ ச மேதா⁴வீ, பு²ஸ்ஸதே³வோ மஹாகதீ².

புனதே³வ ஸுமனோ மேதா⁴வீ, புப்ப²னாமோ ப³ஹுஸ்ஸுதோ;

மஹாகதீ² மஹாஸிவோ, பிடகே ஸப்³ப³த்த² கோவிதோ³.

புனதே³வ உபாலி மேதா⁴வீ, வினயே ச விஸாரதோ³;

மஹானாகோ³ மஹாபஞ்ஞோ, ஸத்³த⁴ம்மவம்ஸகோவிதோ³.

புனதே³வ அப⁴யோ மேதா⁴வீ, பிடகே ஸப்³ப³த்த² கோவிதோ³;

திஸ்ஸத்தே²ரோ ச மேதா⁴வீ, வினயே ச விஸாரதோ³.

தஸ்ஸ ஸிஸ்ஸோ மஹாபஞ்ஞோ, புப்ப²னாமோ ப³ஹுஸ்ஸுதோ;

ஸாஸனம் அனுரக்க²ந்தோ, ஜம்பு³தீ³பே பதிட்டி²தோ.

சூளாப⁴யோ ச மேதா⁴வீ, வினயே ச விஸாரதோ³;

திஸ்ஸத்தே²ரோ ச மேதா⁴வீ, ஸத்³த⁴ம்மவம்ஸகோவிதோ³.

சூளதே³வோ ச மேதா⁴வீ, வினயே ச விஸாரதோ³;

ஸிவத்தே²ரோ ச மேதா⁴வீ, வினயே ஸப்³ப³த்த² கோவிதோ³.

ஏதே நாகா³ மஹாபஞ்ஞா, வினயஞ்ஞூ மக்³க³கோவிதா³;

வினயம் தீ³பே பகாஸேஸும், பிடகம் தம்ப³பண்ணியாதி.

203. யம் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன பி⁴க்கு²னீனம் ச²ட்ட²ம் பாராஜிகம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? து²ல்லனந்த³ம் பி⁴க்கு²னிம் ஆரப்³ப⁴. கிஸ்மிம் வத்து²ஸ்மிந்தி? து²ல்லனந்தா³ பி⁴க்கு²னீ ஜானம் பாராஜிகம் த⁴ம்மம் அஜ்ஜா²பன்னம் பி⁴க்கு²னிம் நேவத்தனா படிசோதே³ஸி க³ணஸ்ஸ ஆரோசேஸி, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் ஏகேன ஸமுட்டா²னேன ஸமுட்டா²தி – காயதோ ச வாசதோ ச சித்ததோ ச ஸமுட்டா²தி…பே….

204. பி⁴க்கு²னீனம் ஸத்தமம் பாராஜிகம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? து²ல்லனந்த³ம் பி⁴க்கு²னிம் ஆரப்³ப⁴. கிஸ்மிம் வத்து²ஸ்மிந்தி? து²ல்லனந்தா³ பி⁴க்கு²னீ ஸமக்³கே³ன ஸங்கே⁴ன உக்கி²த்தம் அரிட்ட²ம் பி⁴க்கு²ம் க³த்³த⁴பா³தி⁴புப்³ப³ம் அனுவத்தி, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் ஏகேன ஸமுட்டா²னேன ஸமுட்டா²தி – து⁴ரனிக்கே²பே…பே….

205. பி⁴க்கு²னீனம் அட்ட²மம் பாராஜிகம் கத்த² பஞ்ஞத்தந்தி? ஸாவத்தி²யம் பஞ்ஞத்தம். கம் ஆரப்³பா⁴தி? ச²ப்³ப³க்³கி³யா பி⁴க்கு²னியோ ஆரப்³ப⁴. கிஸ்மிம் வத்து²ஸ்மிந்தி? ச²ப்³ப³க்³கி³யா பி⁴க்கு²னியோ அட்ட²மம் வத்து²ம் பரிபூரேஸும், தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் ஏகேன ஸமுட்டா²னேன ஸமுட்டா²தி – து⁴ரனிக்கே²பே…பே….

அட்ட² பாராஜிகா நிட்டி²தா.

தஸ்ஸுத்³தா³னம் –

மேது²னாதி³ன்னாதா³னஞ்ச, மனுஸ்ஸவிக்³க³ஹுத்தரி;

காயஸம்ஸக்³க³ம் சா²தே³தி, உக்கி²த்தா அட்ட² வத்து²கா;

பஞ்ஞாபேஸி மஹாவீரோ, சே²ஜ்ஜவத்தூ² அஸம்ஸயாதி.