2. ஸங்கா⁴தி³ஸேஸகண்ட³ம்

7. யம் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன உபக்கமித்வா அஸுசிம் மோசேந்தஸ்ஸ ஸங்கா⁴தி³ஸேஸோ கத்த² பஞ்ஞத்தோ? கம் ஆரப்³ப⁴? கிஸ்மிம் வத்து²ஸ்மிம்? அத்தி² தத்த² பஞ்ஞத்தி, அனுபஞ்ஞத்தி, அனுப்பன்னபஞ்ஞத்தி? ஸப்³ப³த்த²பஞ்ஞத்தி, பதே³ஸபஞ்ஞத்தி? ஸாதா⁴ரணபஞ்ஞத்தி, அஸாதா⁴ரணபஞ்ஞத்தி? ஏகதோபஞ்ஞத்தி, உப⁴தோபஞ்ஞத்தி? பஞ்சன்னம் பாதிமோக்கு²த்³தே³ஸானம் கத்தோ²க³த⁴ம் கத்த² பரியாபன்னம்? கதமேன உத்³தே³ஸேன உத்³தே³ஸம் ஆக³ச்ச²தி? சதுன்னம் விபத்தீனம் கதமா விபத்தி? ஸத்தன்னம் ஆபத்திக்க²ந்தா⁴னம் கதமோ ஆபத்திக்க²ந்தோ⁴? ச²ன்னம் ஆபத்திஸமுட்டா²னானம் கதிஹி ஸமுட்டா²னேஹி ஸமுட்டா²தி? சதுன்னம் அதி⁴கரணானம் கதமம் அதி⁴கரணம்? ஸத்தன்னம் ஸமதா²னம் கதிஹி ஸமதே²ஹி ஸம்மதி? கோ தத்த² வினயோ, கோ தத்த² அபி⁴வினயோ? கிம் தத்த² பாதிமோக்க²ம், கிம் தத்த² அதி⁴பாதிமோக்க²ம்? கா விபத்தி, கா ஸம்பத்தி, கா படிபத்தி? கதி அத்த²வஸே படிச்ச ப⁴க³வதா உபக்கமித்வா அஸுசிம் மோசேந்தஸ்ஸ ஸங்கா⁴தி³ஸேஸோ பஞ்ஞத்தோ? கே ஸிக்க²ந்தி, கே ஸிக்கி²தஸிக்கா²? கத்த² டி²தம்? கே தா⁴ரேந்தி? கஸ்ஸ வசனம்? கேனாப⁴தந்தி?

8. யம் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன உபக்கமித்வா அஸுசிம் மோசேந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ஸாவத்தி²யம் பஞ்ஞத்தோ. கம் ஆரப்³பா⁴தி? ஆயஸ்மந்தம் ஸேய்யஸகம் ஆரப்³ப⁴. கிஸ்மிம் வத்து²ஸ்மிந்தி? ஆயஸ்மா ஸேய்யஸகோ ஹத்தே²ன உபக்கமித்வா அஸுசிம் மோசேஸி, தஸ்மிம் வத்து²ஸ்மிம். அத்தி² தத்த² பஞ்ஞத்தி, அனுபஞ்ஞத்தி, அனுப்பன்னபஞ்ஞத்தீதி? ஏகா பஞ்ஞத்தி, ஏகா அனுபஞ்ஞத்தி. அனுப்பன்னபஞ்ஞத்தி தஸ்மிம் நத்தி². ஸப்³ப³த்த² பஞ்ஞத்தி, பதே³ஸபஞ்ஞத்தீதி? ஸப்³ப³த்த²பஞ்ஞத்தி. ஸாதா⁴ரணபஞ்ஞத்தி, அஸாதா⁴ரணபஞ்ஞத்தீதி? அஸாதா⁴ரணபஞ்ஞத்தி. ஏகதோபஞ்ஞத்தி, உப⁴தோபஞ்ஞத்தீதி? ஏகதோபஞ்ஞத்தி. பஞ்சன்னம் பாதிமோக்கு²த்³தே³ஸானம் கத்தோ²க³த⁴ம் கத்த² பரியாபன்னந்தி? நிதா³னோக³த⁴ம் நிதா³னபரியாபன்னம். கதமேன உத்³தே³ஸேன உத்³தே³ஸம் ஆக³ச்ச²தீதி? ததியே உத்³தே³ஸேன உத்³தே³ஸம் ஆக³ச்ச²தி. சதுன்னம் விபத்தீனம் கதமா விபத்தீதி? ஸீலவிபத்தி. ஸத்தன்னம் ஆபத்திக்க²ந்தா⁴னம் கதமோ ஆபத்திக்க²ந்தோ⁴தி? ஸங்கா⁴தி³ஸேஸோ ஆபத்திக்க²ந்தோ⁴. ச²ன்னம் ஆபத்திஸமுட்டா²னானம் கதிஹி ஸமுட்டா²னேஹி ஸமுட்டா²தீதி? ஏகேன ஸமுட்டா²னேன ஸமுட்டா²தி – காயதோ ச சித்ததோ ச ஸமுட்டா²தி, ந வாசதோ. சதுன்னம் அதி⁴கரணானம் கதமம் அதி⁴கரணந்தி? ஆபத்தாதி⁴கரணம். ஸத்தன்னம் ஸமதா²னம் கதிஹி ஸமதே²ஹி ஸம்மதீதி? த்³வீஹி ஸமதே²ஹி ஸம்மதி – ஸம்முகா²வினயேன ச படிஞ்ஞாதகரணேன ச. கோ தத்த² வினயோ, கோ தத்த² அபி⁴வினயோதி? பஞ்ஞத்தி வினயோ, விப⁴த்தி அபி⁴வினயோ. கிம் தத்த² பாதிமோக்க²ம், கிம் தத்த² அதி⁴பாதிமோக்க²ந்தி? பஞ்ஞத்தி பாதிமோக்க²ம், விப⁴த்தி அதி⁴பாதிமோக்க²ம். கா விபத்தீதி? அஸம்வரோ விபத்தி. கா ஸம்பத்தீதி? ஸம்வரோ ஸம்பத்தி. கா படிபத்தீதி? ந ஏவரூபம் கரிஸ்ஸாமீதி யாவஜீவம் ஆபாணகோடிகம் ஸமாதா³ய ஸிக்க²தி ஸிக்கா²பதே³ஸு. [அ. நி. 10.31] கதி அத்த²வஸே படிச்ச ப⁴க³வதா உபக்கமித்வா அஸுசிம் மோசேந்தஸ்ஸ ஸங்கா⁴தி³ஸேஸோ பஞ்ஞத்தோதி? த³ஸ அத்த²வஸே படிச்ச ப⁴க³வதா உபக்கமித்வா அஸுசிம் மோசேந்தஸ்ஸ ஸங்கா⁴தி³ஸேஸோ பஞ்ஞத்தோ – ஸங்க⁴ஸுட்டு²தாய, ஸங்க⁴பா²ஸுதாய, து³ம்மங்கூனம் புக்³க³லானம் நிக்³க³ஹாய, பேஸலானம் பி⁴க்கூ²னம் பா²ஸுவிஹாராய, தி³ட்ட²த⁴ம்மிகானம் ஆஸவானம் ஸம்வராய, ஸம்பராயிகானம் ஆஸவானம் படிகா⁴தாய, அப்பஸன்னானம் பஸாதா³ய, பஸன்னானம் பி⁴ய்யோபா⁴வாய, ஸத்³த⁴ம்மட்டி²தியா, வினயானுக்³க³ஹாய. கே ஸிக்க²ந்தீதி? ஸேக்கா² ச புது²ஜ்ஜனகல்யாணகா ச ஸிக்க²ந்தி. கே ஸிக்கி²தஸிக்கா²தி? அரஹந்தோ ஸிக்கி²தஸிக்கா². கத்த² டி²தந்தி? ஸிக்கா²காமேஸு டி²தம். கே தா⁴ரேந்தீதி? யேஸம் வத்ததி, தே தா⁴ரேந்தி. கஸ்ஸ வசனந்தி? ப⁴க³வதோ வசனம் அரஹதோ ஸம்மாஸம்பு³த்³த⁴ஸ்ஸ. கேனாப⁴தந்தி? பரம்பராப⁴தம் –

உபாலி தா³ஸகோ சேவ, ஸோணகோ ஸிக்³க³வோ ததா²;

மோக்³க³லிபுத்தேன பஞ்சமா, ஏதே ஜம்பு³ஸிரிவ்ஹயே.

ததோ மஹிந்தோ³ இட்டியோ, உத்தியோ ஸம்ப³லோ ததா²;

ப⁴த்³த³னாமோ ச பண்டி³தோ.

ஏதே நாகா³ மஹாபஞ்ஞா, ஜம்பு³தீ³பா இதா⁴க³தா;

வினயம் தே வாசயிம்ஸு, பிடகம் தம்ப³பண்ணியா.

நிகாயே பஞ்ச வாசேஸும், ஸத்த சேவ பகரணே;

ததோ அரிட்டோ² மேதா⁴வீ, திஸ்ஸத³த்தோ ச பண்டி³தோ.

விஸாரதோ³ காளஸுமனோ, தே²ரோ ச தீ³க⁴னாமகோ;

தீ³க⁴ஸுமனோ ச பண்டி³தோ.

புனதே³வ காளஸுமனோ, நாக³த்தே²ரோ ச பு³த்³த⁴ரக்கி²தோ;

திஸ்ஸத்தே²ரோ ச மேதா⁴வீ, தே³வத்தே²ரோ ச பண்டி³தோ.

புனதே³வ ஸுமனோ மேதா⁴வீ, வினயே ச விஸாரதோ³;

ப³ஹுஸ்ஸுதோ சூளனாகோ³, க³ஜோவ து³ப்பத⁴ம்ஸியோ.

த⁴ம்மபாலிதனாமோ ச, ரோஹணே ஸாது⁴பூஜிதோ;

தஸ்ஸ ஸிஸ்ஸோ மஹாபஞ்ஞோ, கே²மனாமோ திபேடகோ.

தீ³பே தாரகராஜாவ, பஞ்ஞாய அதிரோசத²;

உபதிஸ்ஸோ ச மேதா⁴வீ, பு²ஸ்ஸதே³வோ மஹாகதீ².

புனதே³வ ஸுமனோ மேதா⁴வீ, புப்ப²னாமோ ப³ஹுஸ்ஸுதோ;

மஹாகதீ² மஹாஸிவோ, பிடகே ஸப்³ப³த்த² கோவிதோ³.

புனதே³வ உபாலி மேதா⁴வீ, வினயே ச விஸாரதோ³;

மஹானாகோ³ மஹாபஞ்ஞோ, ஸத்³த⁴ம்மவம்ஸகோவிதோ³.

புனதே³வ அப⁴யோ மேதா⁴வீ, பிடகே ஸப்³ப³த்த² கோவிதோ³;

திஸ்ஸத்தே²ரோ ச மேதா⁴வீ, வினயே ச விஸாரதோ³.

தஸ்ஸ ஸிஸ்ஸோ மஹாபஞ்ஞோ, புப்ப²னாமோ ப³ஹுஸ்ஸுதோ;

ஸாஸனம் அனுரக்க²ந்தோ, ஜம்பு³தீ³பே பதிட்டி²தோ.

சூளாப⁴யோ ச மேதா⁴வீ, வினயே ச விஸாரதோ³;

திஸ்ஸத்தே²ரோ ச மேதா⁴வீ, ஸத்³த⁴ம்மவம்ஸகோவிதோ³.

சூளதே³வோ ச மேதா⁴வீ, வினயே ச விஸாரதோ³;

ஸிவத்தே²ரோ ச மேதா⁴வீ, வினயே ஸப்³ப³த்த² கோவிதோ³.

ஏதே நாகா³ மஹாபஞ்ஞா, வினயஞ்ஞூ மக்³க³கோவிதோ³;

வினயம் தீ³பே பகாஸேஸும், பிடகம் தம்ப³பண்ணியாதி.

9. யம் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன மாதுகா³மேன ஸத்³தி⁴ம் காயஸம்ஸக்³க³ம் ஸமாபஜ்ஜந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ஸாவத்தி²யம் பஞ்ஞத்தோ. கம் ஆரப்³பா⁴தி? ஆயஸ்மந்தம் உதா³யிம் ஆரப்³ப⁴. கிஸ்மிம் வத்து²ஸ்மிந்தி? ஆயஸ்மா உதா³யீ மாதுகா³மேன ஸத்³தி⁴ம் காயஸம்ஸக்³க³ம் ஸமாபஜ்ஜி, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் ஏகேன ஸமுட்டா²னேன ஸமுட்டா²தி – காயதோ ச சித்ததோ ச ஸமுட்டா²தி, ந வாசதோ…பே….

10. மாதுகா³மம் து³ட்டு²ல்லாஹி வாசாஹி ஓபா⁴ஸந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ஸாவத்தி²யம் பஞ்ஞத்தோ. கம் ஆரப்³பா⁴தி? ஆயஸ்மந்தம் உதா³யிம் ஆரப்³ப⁴. கிஸ்மிம் வத்து²ஸ்மிந்தி? ஆயஸ்மா உதா³யீ மாதுகா³மம் து³ட்டு²ல்லாஹி வாசாஹி ஓபா⁴ஸி, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் தீஹி ஸமுட்டா²னேஹி ஸமுட்டா²தி – ஸியா காயதோ ச சித்ததோ ச ஸமுட்டா²தி, ந வாசதோ; ஸியா வாசதோ ச சித்ததோ ச ஸமுட்டா²தி, ந காயதோ; ஸியா காயதோ ச வாசதோ ச சித்ததோ ச ஸமுட்டா²தி…பே….

11. மாதுகா³மஸ்ஸ ஸந்திகே அத்தகாமபாரிசரியாய வண்ணம் பா⁴ஸந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ஸாவத்தி²யம் பஞ்ஞத்தோ. கம் ஆரப்³பா⁴தி? ஆயஸ்மந்தம் உதா³யிம் ஆரப்³ப⁴. கிஸ்மிம் வத்து²ஸ்மிந்தி? ஆயஸ்மா உதா³யீ மாதுகா³மஸ்ஸ ஸந்திகே அத்தகாமபாரிசரியாய வண்ணம் அபா⁴ஸி, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் தீஹி ஸமுட்டா²னேஹி ஸமுட்டா²தி – ஸியா காயதோ ச சித்ததோ ச ஸமுட்டா²தி, ந வாசதோ; ஸியா வாசதோ ச சித்ததோ ச ஸமுட்டா²தி, ந காயதோ; ஸியா காயதோ ச வாசதோ ச சித்ததோ ச ஸமுட்டா²தி…பே….

12. ஸஞ்சரித்தம் ஸமாபஜ்ஜந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ஸாவத்தி²யம் பஞ்ஞத்தோ. கம் ஆரப்³பா⁴தி? ஆயஸ்மந்தம் உதா³யிம் ஆரப்³ப⁴. கிஸ்மிம் வத்து²ஸ்மிந்தி? ஆயஸ்மா உதா³யீ ஸஞ்சரித்தம் ஸமாபஜ்ஜி, தஸ்மிம் வத்து²ஸ்மிம். ஏகா பஞ்ஞத்தி, ஏகா அனுபஞ்ஞத்தி. ச²ன்னம் ஆபத்திஸமுட்டா²னானம் ச²ஹி ஸமுட்டா²னேஹி ஸமுட்டா²தி – ஸியா காயதோ ஸமுட்டா²தி, ந வாசதோ ந சித்ததோ; ஸியா வாசதோ ஸமுட்டா²தி, ந காயதோ ந சித்ததோ; ஸியா காயதோ ச வாசதோ ச ஸமுட்டா²தி, ந சித்ததோ; ஸியா காயதோ ச சித்ததோ ச ஸமுட்டா²தி, ந வாசதோ; ஸியா வாசதோ ச சித்ததோ ச ஸமுட்டா²தி, ந காயதோ; ஸியா காயதோ ச வாசதோ ச சித்ததோ ச ஸமுட்டா²தி…பே….

13. ஸஞ்ஞாசிகா குடிம் காராபேந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ஆளவியம் பஞ்ஞத்தோ. கம் ஆரப்³பா⁴தி? ஆளவகே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? ஆளவகா பி⁴க்கூ² ஸஞ்ஞாசிகாய குடியோ காராபேஸும், தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் ச²ஹி ஸமுட்டா²னேஹி ஸமுட்டா²தி…பே….

14. மஹல்லகம் விஹாரம் காராபேந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? கோஸம்பி³யம் பஞ்ஞத்தோ. கம் ஆரப்³பா⁴தி? ஆயஸ்மந்தம் ச²ன்னம் ஆரப்³ப⁴. கிஸ்மிம் வத்து²ஸ்மிந்தி? ஆயஸ்மா ச²ன்னோ விஹாரவத்து²ம் ஸோதே⁴ந்தோ அஞ்ஞதரம் சேதியருக்க²ம் சே²தா³பேஸி, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் ச²ஹி ஸமுட்டா²னேஹி ஸமுட்டா²தி…பே….

15. பி⁴க்கு²ம் அமூலகேன பாராஜிகேன த⁴ம்மேன அனுத்³த⁴ம்ஸேந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ராஜக³ஹே பஞ்ஞத்தோ. கம் ஆரப்³பா⁴தி? மேத்தியபூ⁴மஜகே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? மேத்தியபூ⁴மஜகா பி⁴க்கூ² ஆயஸ்மந்தம் த³ப்³ப³ம் மல்லபுத்தம் அமூலகேன பாராஜிகேன த⁴ம்மேன அனுத்³த⁴ம்ஸேஸும், தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் தீஹி ஸமுட்டா²னேஹி ஸமுட்டா²தி…பே….

16. பி⁴க்கு²ம் அஞ்ஞபா⁴கி³யஸ்ஸ அதி⁴கரணஸ்ஸ கிஞ்சி தே³ஸம் லேஸமத்தம் உபாதா³ய பாராஜிகேன த⁴ம்மேன அனுத்³த⁴ம்ஸேந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ராஜக³ஹே பஞ்ஞத்தோ. கம் ஆரப்³பா⁴தி? மேத்தியபூ⁴மஜகே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? மேத்தியபூ⁴மஜகா பி⁴க்கூ² ஆயஸ்மந்தம் த³ப்³ப³ம் மல்லபுத்தம் அஞ்ஞபா⁴கி³யஸ்ஸ அதி⁴கரணஸ்ஸ கிஞ்சி தே³ஸம் லேஸமத்தம் உபாதா³ய பாராஜிகேன த⁴ம்மேன அனுத்³த⁴ம்ஸேஸும், தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் தீஹி ஸமுட்டா²னேஹி ஸமுட்டா²தி…பே….

17. ஸங்க⁴பே⁴த³கஸ்ஸ பி⁴க்கு²னோ யாவததியம் ஸமனுபா⁴ஸனாய ந படினிஸ்ஸஜ்ஜந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ராஜக³ஹே பஞ்ஞத்தோ. கம் ஆரப்³பா⁴தி? தே³வத³த்தம் ஆரப்³ப⁴. கிஸ்மிம் வத்து²ஸ்மிந்தி? தே³வத³த்தோ ஸமக்³க³ஸ்ஸ ஸங்க⁴ஸ்ஸ பே⁴தா³ய பரக்கமி, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் ஏகேன ஸமுட்டா²னேன ஸமுட்டா²தி – காயதோ ச வாசதோ ச சித்ததோ ச ஸமுட்டா²தி…பே….

18. பே⁴தா³னுவத்தகானம் பி⁴க்கூ²னம் யாவததியம் ஸமனுபா⁴ஸனாய ந படினிஸ்ஸஜ்ஜந்தானம் ஸங்கா⁴தி³ஸேஸோ கத்த² பஞ்ஞத்தோதி? ராஜக³ஹே பஞ்ஞத்தோ. கம் ஆரப்³பா⁴தி? ஸம்ப³ஹுலே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? ஸம்ப³ஹுலா பி⁴க்கூ² தே³வத³த்தஸ்ஸ ஸங்க⁴பே⁴தா³ய பரக்கமந்தஸ்ஸ அனுவத்தகா அஹேஸும் வக்³க³வாத³கா, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் ஏகேன ஸமுட்டா²னேன ஸமுட்டா²தி – காயதோ ச வாசதோ ச சித்ததோ ச ஸமுட்டா²தி…பே….

19. து³ப்³ப³சஸ்ஸ பி⁴க்கு²னோ யாவததியம் ஸமனுபா⁴ஸனா ந படினிஸ்ஸஜ்ஜந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? கோஸம்பி³யம் பஞ்ஞத்தோ. கம் ஆரப்³பா⁴தி? ஆயஸ்மந்தம் ச²ன்னம் ஆரப்³ப⁴. கிஸ்மிம் வத்து²ஸ்மிந்தி? ஆயஸ்மா ச²ன்னோ பி⁴க்கூ²ஹி ஸஹத⁴ம்மிகம் வுச்சமானோ அத்தானம் அவசனீயம் அகாஸி, தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் ஏகேன ஸமுட்டா²னேன ஸமுட்டா²தி – காயதோ ச வாசதோ ச சித்ததோ ச ஸமுட்டா²தி…பே….

20. குலதூ³ஸகஸ்ஸ பி⁴க்கு²னோ யாவததியம் ஸமனுபா⁴ஸனாய ந படினிஸ்ஸஜ்ஜந்தஸ்ஸ ஸங்கா⁴தி³ஸேஸோ கத்த² பஞ்ஞத்தோதி? ஸாவத்தி²யம் பஞ்ஞத்தோ. கம் ஆரப்³பா⁴தி? அஸ்ஸஜிபுனப்³ப³ஸுகே பி⁴க்கூ² ஆரப்³ப⁴. கிஸ்மிம் வத்து²ஸ்மிந்தி? அஸ்ஸஜிபுனப்³ப³ஸுகா பி⁴க்கூ² ஸங்கே⁴ன பப்³பா³ஜனீயகம்மகதா பி⁴க்கூ² ச²ந்த³கா³மிதா தோ³ஸகா³மிதா மோஹகா³மிதா ப⁴யகா³மிதா பாபேஸும், தஸ்மிம் வத்து²ஸ்மிம். ஏகா பஞ்ஞத்தி. ச²ன்னம் ஆபத்திஸமுட்டா²னானம் ஏகேன ஸமுட்டா²னேன ஸமுட்டா²தி – காயதோ ச வாசதோ ச சித்ததோ ச ஸமுட்டா²தி…பே….

தேரஸ ஸங்கா⁴தி³ஸேஸா நிட்டி²தா.

தஸ்ஸுத்³தா³னம் –

விஸ்ஸட்டி² காயஸம்ஸக்³க³ம், து³ட்டு²ல்லம் அத்தகாமஞ்ச;

ஸஞ்சரித்தம் குடீ சேவ, விஹாரோ ச அமூலகம்.

கிஞ்சிதே³ஸஞ்ச பே⁴தோ³ ச, தஸ்ஸேவ [ததே²வ (க.)] அனுவத்தகா;

து³ப்³ப³சம் குலதூ³ஸஞ்ச, ஸங்கா⁴தி³ஸேஸா தேரஸாதி.