3. அனியதகண்ட³ம்

21. யம் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன பட²மோ அனிம்யதோ கத்த² பஞ்ஞத்தோ? கம் ஆரப்³ப⁴? கிஸ்மிம் வத்து²ஸ்மிம்? அத்தி² தத்த² பஞ்ஞத்தி, அனுபஞ்ஞத்தி, அனுப்பன்னபஞ்ஞத்தி, ஸப்³ப³த்த²பஞ்ஞத்தி பதே³ஸபஞ்ஞத்தி, ஸாதா⁴ரணபஞ்ஞத்தி அஸாதா⁴ரணபஞ்ஞத்தி, ஏகதோபஞ்ஞத்தி உப⁴தோபஞ்ஞத்தி, பஞ்சன்னம் பாதிமோக்கு²த்³தே³ஸானம் கத்தோ²க³த⁴ம் கத்த² பரியாபன்னம், கதமேன உத்³தே³ஸேன உத்³தே³ஸம் ஆக³ச்ச²தி, சதுன்னம் விபத்தீனம் கதமா விபத்தி, ஸத்தன்னம் ஆபத்திக்க²ந்தா⁴னம் கதமோ ஆபத்திக்க²ந்தோ⁴, ச²ன்னம் ஆபத்திஸமுட்டா²னானம் கதிஹி ஸமுட்டா²னேஹி ஸமுட்டா²தி, சதுன்னம் அதி⁴கரணானம் கதமம் அதி⁴கரணம், ஸத்தன்னம் ஸமதா²னம் கதிஹி ஸமதே²ஹி ஸம்மதி, கோ தத்த² வினயோ, கோ தத்த² அபி⁴வினயோ, கிம் தத்த² பாதிமோக்க²ம், கிம் தத்த² அதி⁴பாதிமோக்க²ம், கா விபத்தி, கா ஸம்பத்தி, கா படிபத்தி, கதி அத்த²வஸே படிச்ச ப⁴க³வதா பட²மோ அனியதோ பஞ்ஞத்தோ, கே ஸிக்க²ந்தி, கே ஸிக்கி²தஸிக்கா², கத்த² டி²தம், கே தா⁴ரேந்தி, கஸ்ஸ வசனம் கேனாப⁴தந்தி.

22. யம் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன பட²மோ அனியதோ கத்த² பஞ்ஞத்தோதி? ஸாவத்தி²யம் பஞ்ஞத்தோ. கம் ஆரப்³பா⁴தி? ஆயஸ்மந்தம் உதா³யிம் ஆரப்³ப⁴. கிஸ்மிம் வத்து²ஸ்மிந்தி? ஆயஸ்மா உதா³யீ மாதுகா³மேன ஸத்³தி⁴ம் ஏகோ ஏகாய ரஹோ படிச்ச²ன்னே ஆஸனே அலங்கம்மனியே நிஸஜ்ஜம் கப்பேஸி, தஸ்மிம் வத்து²ஸ்மிம். அத்தி² தத்த² பஞ்ஞத்தி, அனுபஞ்ஞத்தி, அனுப்பன்னபஞ்ஞத்தீதி? ஏகா பஞ்ஞத்தி. அனுபஞ்ஞத்தி அனுப்பன்னபஞ்ஞத்தி தஸ்மிம் நத்தி². ஸப்³ப³த்த²பஞ்ஞத்தி, பதே³ஸபஞ்ஞத்தீதி? ஸப்³ப³த்த²பஞ்ஞத்தி. ஸாதா⁴ரணபஞ்ஞத்தி, அஸாதா⁴ரணபஞ்ஞத்தீதி? அஸாதா⁴ரணபஞ்ஞத்தி. ஏகதோபஞ்ஞத்தி, உப⁴தோபஞ்ஞத்தீதி? ஏகதோபஞ்ஞத்தி. பஞ்சன்னம் பாதிமோக்கு²த்³தே³ஸானம் கத்தோ²க³த⁴ம் கத்த² பரியாபன்னந்தி? நிதா³னோக³த⁴ம் நிதா³னபரியாபன்னம். கதமேன உத்³தே³ஸேன உத்³தே³ஸம் ஆக³ச்ச²தீதி? சதுத்தே²ன உத்³தே³ஸேன உத்³தே³ஸம் ஆக³ச்ச²தி. சதுன்னம் விபத்தீனம் கதமா விபத்தீதி? ஸியா ஸீலவிபத்தி ஸியா ஆசாரவிபத்தி. ஸத்தன்னம் ஆபத்திக்க²ந்தா⁴னம் கதமோ ஆபத்திக்க²ந்தோ⁴தி? ஸியா பாராஜிகாபத்திக்க²ந்தோ⁴ ஸியா ஸங்கா⁴தி³ஸேஸாபத்திக்க²ந்தோ⁴ ஸியா பாசித்தியாபத்திக்க²ந்தோ⁴. ச²ன்னம் ஆபத்திஸமுட்டா²னானம் கதிஹி ஸமுட்டா²னேஹி ஸமுட்டா²தீதி? ஏகே ஸமுட்டா²னேன ஸமுட்டா²தி – காயதோ ச சித்ததோ ச ஸமுட்டா²தி, ந வாசதோ. சதுன்னம் அதி⁴கரணானம் கதமம் அதி⁴கரணந்தி? ஆபத்தாதி⁴கரணம். ஸத்தன்னம் ஸமதா²னம் கதிஹி ஸமதே²ஹி ஸம்மதீதி? தீஹி ஸமதே²ஹி ஸம்மதி – ஸியா ஸம்முகா²வினயேன ச படிஞ்ஞாதகரணேன ச, ஸியா ஸம்முகா²வினயேன ச திணவத்தா²ரகேன ச. கோ தத்த² வினயோ, கோ தத்த² அபி⁴வினயோதி? பஞ்ஞத்தி வினயோ, விப⁴த்தி அபி⁴வினயோ. கிம் தத்த² பாதிமோக்க²ம், கிம் தத்த² அதி⁴பாதிமோக்க²ந்தி? பஞ்ஞத்தி பாதிமோக்க²ம், விப⁴த்தி அதி⁴பாதிமோக்க²ம். கா விபத்தீதி? அஸம்வரோ விபத்தி. கா ஸம்பத்தீதி? ஸம்வரோ ஸம்பத்தி. கா படிபத்தீதி? ந ஏவரூபம் கரிஸ்ஸாமீதி யாவஜீவம் ஆபாணகோடிகம் ஸமாதா³ய ஸிக்க²தி ஸிக்கா²பதே³ஸு. [அ. நி. 10.31] கதி அத்த²வஸே படிச்ச ப⁴க³வதா பட²மோ அனியதோ பஞ்ஞத்தோதி? த³ஸ அத்த²வஸே படிச்ச ப⁴க³வதா பட²மோ அனியதோ பஞ்ஞத்தோ – ஸங்க⁴ஸுட்டு²தாய, ஸங்க⁴பா²ஸுதாய, து³ம்மங்கூனம் புக்³க³லானம் நிக்³க³ஹாய, பேஸலானம் பி⁴க்கூ²னம் பா²ஸுவிஹாராய, தி³ட்ட²த⁴ம்மிகானம் ஆஸவானம் ஸம்வராய, ஸம்பராயிகானம் ஆஸவானம் படிகா⁴தாய, அப்பஸன்னானம் பஸாதா³ய, பஸன்னானம் பி⁴ய்யோபா⁴வாய, ஸத்³த⁴ம்மட்டி²தியா, வினயானுக்³க³ஹாய. கே ஸிக்க²ந்தீதி? ஸேக்கா² ச புது²ஜ்ஜனகல்யாணகா ச ஸிக்க²ந்தி. கே ஸிக்கி²தஸிக்கா²தி? அரஹந்தோ ஸிக்கி²தஸிக்கா². கத்த² டி²தந்தி? ஸிக்கா²காமேஸு டி²தம். கே தா⁴ரேந்தீதி? யேஸம் வத்ததி தே தா⁴ரேந்தி. கஸ்ஸ வசனந்தி? ப⁴க³வதோ வசனம் அரஹதோ ஸம்மாஸம்பு³த்³த⁴ஸ்ஸ. கேனாப⁴தந்தி? பரம்பராப⁴தம் –

உபாலி தா³ஸகோ சேவ, ஸோணகோ ஸிக்³க³வோ ததா²;

மோக்³க³லிபுத்தேன பஞ்சமா, ஏதே ஜம்பு³ஸிரிவ்ஹயே.

ததோ மஹிந்தோ³ இட்டியோ, உத்தியோ ஸம்ப³லோ ததா²;

ப⁴த்³த³னாமோ ச பண்டி³தோ.

ஏதே நாகா³ மஹாபஞ்ஞா, ஜம்பு³தீ³பா இதா⁴க³தா;

வினயம் தே வாசயிம்ஸு, பிடகம் தம்ப³பண்ணியா.

நிகாயே பஞ்ச வாசேஸும், ஸத்த சேவ பகரணே;

ததோ அரிட்டோ² மேதா⁴வீ, திஸ்ஸத³த்தோ ச பண்டி³தோ.

விஸாரதோ³ காளஸுமனோ, தே²ரோ ச தீ³க⁴னாமகோ;

தீ³க⁴ஸுமனோ ச பண்டி³தோ.

புனதே³வ காளஸுமனோ, நாக³த்தே²ரோ ச பு³த்³த⁴ரக்கி²தோ;

திஸ்ஸத்தே²ரோ ச மேதா⁴வீ, தே³வத்தே²ரோ ச பண்டி³தோ.

புனதே³வ ஸுமனோ மேதா⁴வீ, வினயே ச விஸாரதோ³;

ப³ஹுஸ்ஸுதோ சூளனாகோ³, க³ஜோவ து³ப்பத⁴ம்ஸியோ.

த⁴ம்மபாலிதனாமோ ச, ரோஹணே ஸாது⁴பூஜிதோ;

தஸ்ஸ ஸிஸ்ஸோ மஹாபஞ்ஞோ, கே²மனாமோ திபேடகோ.

தீ³பே தாரகராஜாவ பஞ்ஞாய அதிரோசத²;

உபதிஸ்ஸோ ச மேதா⁴வீ, பு²ஸ்ஸதே³வோ மஹாகதீ².

புனதே³வ ஸுமனோ மேதா⁴வீ, புப்ப²னாமோ ப³ஹுஸ்ஸுதோ;

மஹாகதீ² மஹாஸிவோ, பிடகே ஸப்³ப³த்த² கோவிதோ³.

புனதே³வ உபாலி மேதா⁴வீ, வினயே ச விஸாரதோ³;

மஹானாகோ³ மஹாபஞ்ஞோ, ஸத்³த⁴ம்மவம்ஸகோவிதோ³.

புனதே³வ அப⁴யோ மேதா⁴வீ, பிடகே ஸப்³ப³த்த² கோவிதோ³;

திஸ்ஸத்தே²ரோ ச மேதா⁴வீ, வினயே ச விஸாரதோ³.

தஸ்ஸ ஸிஸ்ஸோ மஹாபஞ்ஞோ, புப்ப²னாமோ ப³ஹுஸ்ஸுதோ;

ஸாஸனம் அனுரக்க²ந்தோ, ஜம்பு³தீ³பே பதிட்டி²தோ.

சூளாப⁴யோ ச மேதா⁴வீ, வினயே ச விஸாரதோ³;

திஸ்ஸத்தே²ரோ ச மேதா⁴வீ, ஸத்³த⁴ம்மவம்ஸகோவிதோ³.

சூளதே³வோ ச மேதா⁴வீ, வினயே ச விஸாரதோ³;

ஸிவத்தே²ரோ ச மேதா⁴வீ, வினயே ஸப்³ப³த்த² கோவிதோ³.

ஏதே நாகா³ மஹாபஞ்ஞா, வினயஞ்ஞூ மக்³க³கோவிதா³;

வினயம் தீ³பே பகாஸேஸும், பிடகம் தம்ப³பண்ணியாதி.

23. யம் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன து³தியோ அனியதோ கத்த² பஞ்ஞத்தோதி? ஸாவத்தி²யம் பஞ்ஞத்தோ. கம் ஆரப்³பா⁴தி? ஆயஸ்மந்தம் உதா³யிம் ஆரப்³ப⁴. கிஸ்மிம் வத்து²ஸ்மிந்தி? ஆயஸ்மா உதா³யீ மாதுகா³மேன ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேஸி, தஸ்மிம் வத்து²ஸ்மிம். அத்தி² தத்த² பஞ்ஞத்தி, அனுபஞ்ஞத்தி அனுப்பன்னபஞ்ஞத்தீதி? ஏகா பஞ்ஞத்தி. அனுபஞ்ஞத்தி அனுப்பன்னபஞ்ஞத்தி தஸ்மிம் நத்தி². ஸப்³ப³த்த²பஞ்ஞத்தி, பதே³ஸபஞ்ஞத்தீதி? ஸப்³ப³த்த²பஞ்ஞத்தி. ஸாதா⁴ரணபஞ்ஞத்தி அஸாதா⁴ரணபஞ்ஞத்தீதி? அஸாதா⁴ரணபஞ்ஞத்தி. ஏகதோபஞ்ஞத்தி உப⁴தோபஞ்ஞத்தீதி? ஏகதோபஞ்ஞத்தி. பஞ்சன்னம் பாதிமோக்கு²த்³தே³ஸானம் கத்தோ²க³த⁴ம் கத்த² பரியாபன்னந்தி? நிதா³னோக³த⁴ம் நிதா³னபரியாபன்னம். கதமேன உத்³தே³ஸேன உத்³தே³ஸம் ஆக³ச்ச²தீதி? சதுத்தே²ன உத்³தே³ஸேன உத்³தே³ஸம் ஆக³ச்ச²தி. சதுன்னம் விபத்தீனம் கதமா விபத்தீதி? ஸியா ஸீலவிபத்தி, ஸியா ஆசாரவிபத்தி. ஸத்தன்னம் ஆபத்திக்க²ந்தா⁴னம் கதமோ ஆபத்திக்க²ந்தோ⁴தி? ஸியா ஸங்கா⁴தி³ஸேஸாபத்திக்க²ந்தோ⁴, ஸியா பாசித்தியாபத்திக்க²ந்தோ⁴. ச²ன்னம் ஆபத்திஸமுட்டா²னானம் கதிஹி ஸமுட்டா²னேஹி ஸமுட்டா²தீதி? தீஹி ஸமுட்டா²னேஹி ஸமுட்டா²தி – ஸியா காயதோ ச சித்ததோ ச ஸமுட்டா²தி, ந வாசதோ; ஸியா வாசதோ ச சித்ததோ ச ஸமுட்டா²தி, ந காயதோ; ஸியா காயதோ ச வாசதோ ச சித்ததோ ச ஸமுட்டா²தி. சதுன்னம் அதி⁴கரணானம் கதமம் அதி⁴கரணந்தி? ஆபத்தாதி⁴கரணம். ஸத்தன்னம் ஸமதா²னம் கதிஹி ஸமதே²ஹி ஸம்மதீதி? தீஹி ஸமதே²ஹி ஸம்மதி – ஸியா ஸம்முகா²வினயேன ச படிஞ்ஞாதகரணேன ச, ஸியா ஸம்முகா²வினயேன ச திணவத்தா²ரகேன ச…பே….

த்³வே அனியதா நிட்டி²தா.

தஸ்ஸுத்³தா³னம் –

அலங்கம்மனியஞ்சேவ, ததே²வ ச ந ஹேவ கோ²;

அனியதா ஸுபஞ்ஞத்தா, பு³த்³த⁴ஸேட்டே²ன தாதி³னாதி.