8. உபக்க²டஸிக்கா²பத³ம்

527. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ புரிஸோ பஜாபதிம் ஏதத³வோச – ‘‘அய்யம் உபனந்த³ம் சீவரேன அச்சா²தே³ஸ்ஸாமீ’’தி. அஸ்ஸோஸி கோ² அஞ்ஞதரோ பிண்ட³சாரிகோ பி⁴க்கு² தஸ்ஸ புரிஸஸ்ஸ இமம் வாசம் பா⁴ஸமானஸ்ஸ. அத² கோ² ஸோ பி⁴க்கு² யேனாயஸ்மா உபனந்தோ³ ஸக்யபுத்தோ தேனுபஸங்கமி; உபஸங்கமித்வா ஆயஸ்மந்தம் உபனந்த³ம் ஸக்யபுத்தம் ஏதத³வோச – ‘‘மஹாபுஞ்ஞோஸி த்வம், ஆவுஸோ உபனந்த³, அமுகஸ்மிம் ஓகாஸே அஞ்ஞதரோ புரிஸோ பஜாபதிம் ஏதத³வோச – ‘‘அய்யம் உபனந்த³ம் சீவரேன அச்சா²தே³ஸ்ஸாமீ’’’தி. ‘‘அத்தா²வுஸோ, மம் ஸோ உபட்டா²கோ’’தி. அத² கோ² ஆயஸ்மா உபனந்தோ³ ஸக்யபுத்தோ யேன ஸோ புரிஸோ தேனுபஸங்கமி; உபஸங்கமித்வா தம் புரிஸம் ஏதத³வோச – ‘‘ஸச்சம் கிர மம் த்வம், ஆவுஸோ, சீவரேன அச்சா²தே³துகாமோஸீ’’தி? ‘‘அபி மேய்ய, ஏவம் ஹோதி – ‘அய்யம் உபனந்த³ம் சீவரேன அச்சா²தே³ஸ்ஸாமீ’’’தி. ‘‘ஸசே கோ² மம் த்வம், ஆவுஸோ, சீவரேன அச்சா²தே³துகாமோஸி, ஏவரூபேன சீவரேன அச்சா²தே³ஹி. க்யாஹம் தேன அச்ச²ன்னோபி கரிஸ்ஸாமி யாஹம் ந பரிபு⁴ஞ்ஜிஸ்ஸாமீ’’தி.

அத² கோ² ஸோ புரிஸோ உஜ்ஜா²யதி கி²ய்யதி விபாசேதி – ‘‘மஹிச்சா² இமே ஸமணா ஸக்யபுத்தியா அஸந்துட்டா². நயிமே ஸுகரா சீவரேன அச்சா²தே³தும். கத²ஞ்ஹி நாம அய்யோ உபனந்தோ³ மயா புப்³பே³ அப்பவாரிதோ மம் உபஸங்கமித்வா சீவரே விகப்பம் ஆபஜ்ஜிஸ்ஸதீ’’தி! அஸ்ஸோஸும் கோ² பி⁴க்கூ² தஸ்ஸ புரிஸஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசேந்தஸ்ஸ. யே தே பி⁴க்கூ² அப்பிச்சா²…பே… தே உஜ்ஜா²ய்யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ புப்³பே³ அப்பவாரிதோ க³ஹபதிகம் உபஸங்கமித்வா சீவரே விகப்பம் ஆபஜ்ஜிஸ்ஸதீ’’தி! அத² கோ² தே பி⁴க்கூ² ஆயஸ்மந்தம் உபனந்த³ம் ஸக்யபுத்தம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும் …பே… ‘‘ஸச்சம் கிர த்வம், உபனந்த³, புப்³பே³ அப்பவாரிதோ க³ஹபதிகம் உபஸங்கமித்வா சீவரே விகப்பம் ஆபஜ்ஜஸீ’’தி? ‘‘ஸச்சம், ப⁴க³வா’’தி. ‘‘ஞாதகோ தே, உபனந்த³, அஞ்ஞாதகோ’’தி? ‘‘அஞ்ஞாதகோ, ப⁴க³வா’’தி. ‘‘அஞ்ஞாதகோ, மோக⁴புரிஸ, அஞ்ஞாதகஸ்ஸ ந ஜானாதி பதிரூபம் வா அப்பதிரூபம் வா ஸந்தம் வா அஸந்தம் வா. தத்த² நாம த்வம், மோக⁴புரிஸ, புப்³பே³ அப்பவாரிதோ அஞ்ஞாதகம் க³ஹபதிகம் உபஸங்கமித்வா சீவரே விகப்பம் ஆபஜ்ஜிஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

528. ‘‘பி⁴க்கு²ம் பனேவ உத்³தி³ஸ்ஸ அஞ்ஞாதகஸ்ஸ க³ஹபதிஸ்ஸ வா க³ஹபதானியா வா சீவரசேதாபன்னம் [சீவரசேதாபனம் (ஸ்யா.)] உபக்க²டம் ஹோதி – ‘இமினா சீவரசேதாபன்னேன சீவரம் சேதாபேத்வா இத்த²ன்னாமம் பி⁴க்கு²ம் சீவரேன அச்சா²தே³ஸ்ஸாமீ’தி; தத்ர சே ஸோ பி⁴க்கு² புப்³பே³ அப்பவாரிதோ உபஸங்கமித்வா சீவரே விகப்பம் ஆபஜ்ஜேய்ய – ‘ஸாது⁴ வத மம் ஆயஸ்மா இமினா சீவரசேதாபன்னேன ஏவரூபம் வா ஏவரூபம் வா சீவரம் சேதாபேத்வா அச்சா²தே³ஹீ’தி, கல்யாணகம்யதம் உபாதா³ய, நிஸ்ஸக்³கி³யம் பாசித்திய’’ந்தி.

529. பி⁴க்கு²ம் பனேவ உத்³தி³ஸ்ஸாதி பி⁴க்கு²ஸ்ஸத்தா²ய, பி⁴க்கு²ம் ஆரம்மணம் கரித்வா, பி⁴க்கு²ம் அச்சா²தே³துகாமோ.

அஞ்ஞாதகோ நாம மாதிதோ வா பிதிதோ வா யாவ ஸத்தமா பிதாமஹயுகா³ அஸம்ப³த்³தோ⁴.

க³ஹபதி நாம யோ கோசி அகா³ரம் அஜ்ஜா²வஸதி.

க³ஹபதானீ நாம யா காசி அகா³ரம் அஜ்ஜா²வஸதி.

சீவரசேதாபன்னம் நாம ஹிரஞ்ஞம் வா ஸுவண்ணம் வா முத்தா வா மணி வா பவாளோ வா ப²லிகோ வா படகோ வா ஸுத்தம் வா கப்பாஸோ வா.

இமினா சீவரசேதாபன்னேனாதி பச்சுபட்டி²தேன.

சேதாபேத்வாதி பரிவத்தேத்வா.

அச்சா²தே³ஸ்ஸாமீதி த³ஸ்ஸாமி.

தத்ர சே ஸோ பி⁴க்கூ²தி யம் பி⁴க்கு²ம் உத்³தி³ஸ்ஸ சீவரசேதாபன்னம் உபக்க²டம் ஹோதி ஸோ பி⁴க்கு².

புப்³பே³ அப்பவாரிதோதி புப்³பே³ அவுத்தோ ஹோதி – ‘‘கீதி³ஸேன தே, ப⁴ந்தே, சீவரேன அத்தோ², கீதி³ஸம் தே சீவரம் சேதாபேமீ’’தி?

உபஸங்கமித்வாதி க⁴ரம் க³ந்த்வா யத்த² கத்த²சி உபஸங்கமித்வா .

சீவரே விகப்பம் ஆபஜ்ஜேய்யாதி ஆயதம் வா ஹோது வித்த²தம் வா அப்பிதம் வா ஸண்ஹம் வா.

இமினா சீவரசேதாபன்னேனாதி பச்சுபட்டி²தேன.

ஏவரூபம் வா ஏவரூபம் வாதி. ஆயதம் வா வித்த²தம் வா அப்பிதம் வா ஸண்ஹம் வா.

சேதாபேத்வாதி பரிவத்தேத்வா.

அச்சா²தே³ஹீதி த³ஜ்ஜேஹி.

கல்யாணகம்யதம் உபாதா³யாதி ஸாத⁴த்தி²கோ [ஸாது⁴த்தி²கோ (ஸ்யா.)] மஹக்³க⁴த்தி²கோ. தஸ்ஸ வசனேன ஆயதம் வா வித்த²தம் வா அப்பிதம் வா ஸண்ஹம் வா சேதாபேதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, ப⁴ந்தே, சீவரம் புப்³பே³ அப்பவாரிதோ அஞ்ஞாதகம் க³ஹபதிகம் உபஸங்கமித்வா சீவரே விகப்பம் ஆபன்னம் நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

530. அஞ்ஞாதகே அஞ்ஞாதகஸஞ்ஞீ புப்³பே³ அப்பவாரிதோ க³ஹபதிகம் உபஸங்கமித்வா சீவரே விகப்பம் ஆபஜ்ஜதி, நிஸ்ஸக்³கி³யம் பாசித்தியம். அஞ்ஞாதகே வேமதிகோ புப்³பே³ அப்பவாரிதோ க³ஹபதிகம் உபஸங்கமித்வா சீவரே விகப்பம் ஆபஜ்ஜதி, நிஸ்ஸக்³கி³யம் பாசித்தியம். அஞ்ஞாதகே ஞாதகஸஞ்ஞீ புப்³பே³ அப்பவாரிதோ க³ஹபதிகம் உபஸங்கமித்வா சீவரே விகப்பம் ஆபஜ்ஜதி, நிஸ்ஸக்³கி³யம் பாசித்தியம்.

ஞாதகே அஞ்ஞாதகஸஞ்ஞீ, ஆபத்தி து³க்கடஸ்ஸ. ஞாதகே வேமதிகோ, ஆபத்தி து³க்கடஸ்ஸ. ஞாதகே ஞாதகஸஞ்ஞீ, அனாபத்தி.

531. அனாபத்தி ஞாதகானம், பவாரிதானம், அஞ்ஞஸ்ஸத்தா²ய, அத்தனோ த⁴னேன, மஹக்³க⁴ம் சேதாபேதுகாமஸ்ஸ அப்பக்³க⁴ம் சேதாபேதி, உம்மத்தகஸ்ஸ, ஆதி³கம்மிகஸ்ஸாதி.

உபக்க²டஸிக்கா²பத³ம் நிட்டி²தம் அட்ட²மம்.