9. து³தியஉபக்க²டஸிக்கா²பத³ம்

532. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ புரிஸோ அஞ்ஞதரம் புரிஸம் ஏதத³வோச – ‘‘அய்யம் உபனந்த³ம் சீவரேன அச்சா²தே³ஸ்ஸாமீ’’தி. ஸோபி ஏவமாஹ – ‘‘அஹம்பி அய்யம் உபனந்த³ம் சீவரேன அச்சா²தே³ஸ்ஸாமீ’’தி. அஸ்ஸோஸி கோ² அஞ்ஞதரோ பிண்ட³சாரிகோ பி⁴க்கு² தேஸம் புரிஸானம் இமம் கதா²ஸல்லாபம். அத² கோ² ஸோ பி⁴க்கு² யேனாயஸ்மா உபனந்தோ³ ஸக்யபுத்தோ தேனுபஸங்கமி; உபஸங்கமித்வா ஆயஸ்மந்தம் உபனந்த³ம் ஸக்யபுத்தம் ஏதத³வோச – ‘‘மஹாபுஞ்ஞோஸி த்வம், ஆவுஸோ உபனந்த³. அமுகஸ்மிம் ஓகாஸே அஞ்ஞதரோ புரிஸோ அஞ்ஞதரம் புரிஸம் ஏதத³வோச – ‘அய்யம் உபனந்த³ம் சீவரேன அச்சா²தே³ஸ்ஸாமீ’தி. ஸோபி ஏவமாஹ – ‘அஹம்பி அய்யம் உபனந்த³ம் சீவரேன அச்சா²தே³ஸ்ஸாமீ’’’தி. ‘‘அத்தா²வுஸோ, மம் தே உபட்டா²கா’’தி.

அத² கோ² ஆயஸ்மா உபனந்தோ³ ஸக்யபுத்தோ யேன தே புரிஸா தேனுபஸங்கமி; உபஸங்கமித்வா தே புரிஸே ஏதத³வோச – ‘‘ஸச்சம் கிர மம் தும்ஹே, ஆவுஸோ, சீவரேஹி அச்சா²தே³துகாமாத்தா²’’தி? ‘‘அபி நய்ய, ஏவம் ஹோதி – ‘அய்யம் உபனந்த³ம் சீவரேஹி அச்சா²தே³ஸ்ஸாமா’’’தி. ‘‘ஸசே கோ² மம் தும்ஹே, ஆவுஸோ, சீவரேஹி அச்சா²தே³துகாமாத்த², ஏவரூபேன சீவரேன அச்சா²தே³த², க்யாஹம் தேஹி அச்ச²ன்னோபி கரிஸ்ஸாமி, யானாஹம் ந பரிபு⁴ஞ்ஜிஸ்ஸாமீ’’தி. அத² கோ² தே புரிஸா உஜ்ஜா²யந்தி கி²ய்யந்தி விபாசேந்தி – ‘‘மஹிச்சா² இமே ஸமணா ஸக்யபுத்தியா அஸந்துட்டா². நயிமே ஸுகரா சீவரேஹி அச்சா²தே³தும். கத²ஞ்ஹி நாம அய்யோ உபனந்தோ³ அம்ஹேஹி புப்³பே³ அப்பவாரிதோ உபஸங்கமித்வா சீவரே விகப்பம் ஆபஜ்ஜிஸ்ஸதீ’’தி!

அஸ்ஸோஸும் கோ² பி⁴க்கூ² தேஸம் புரிஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ புப்³பே³ அப்பவாரிதோ க³ஹபதிகே உபஸங்கமித்வா சீவரே விகப்பம் ஆபஜ்ஜிஸ்ஸதீ’’தி! அத² கோ² தே பி⁴க்கூ² ஆயஸ்மந்தம் உபனந்த³ம் ஸக்யபுத்தம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர த்வம், உபனந்த³, புப்³பே³ அப்பவாரிதோ க³ஹபதிகே உபஸங்கமித்வா சீவரே விகப்பம் ஆபஜ்ஜஸீ’’தி? ‘‘ஸச்சம், ப⁴க³வா’’தி. ‘‘ஞாதகா தே, உபனந்த³, அஞ்ஞாதகா’’தி? ‘‘அஞ்ஞாதகா, ப⁴க³வா’’தி. ‘‘அஞ்ஞாதகோ, மோக⁴புரிஸ, அஞ்ஞாதகானம் ந ஜானாதி பதிரூபம் வா அப்பதிரூபம் வா ஸந்தம் வா அஸந்தம் வா. தத்த² நாம த்வம், மோக⁴புரிஸ, புப்³பே³ அப்பவாரிதோ அஞ்ஞாதகே க³ஹபதிகே உபஸங்கமித்வா சீவரே விகப்பம் ஆபஜ்ஜிஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

533. ‘‘பி⁴க்கு²ம் பனேவ உத்³தி³ஸ்ஸ உபி⁴ன்னம் அஞ்ஞாதகானம் க³ஹபதீனம் வா க³ஹபதானீனம் வா பச்சேகசீவரசேதாபன்னானி உபக்க²டானி ஹோந்தி – ‘இமேஹி மயம் பச்சேகசீவரசேதாபன்னேஹி பச்சேகசீவரானி சேதாபேத்வா இத்த²ன்னாமம் பி⁴க்கு²ம் சீவரேஹி அச்சா²தே³ஸ்ஸாமா’தி; தத்ர சே ஸோ பி⁴க்கு² புப்³பே³ அப்பவாரிதோ உபஸங்கமித்வா சீவரே விகப்பம் ஆபஜ்ஜேய்ய – ‘ஸாது⁴ வத மம் ஆயஸ்மந்தோ இமேஹி பச்சேகசீவரசேதாபன்னேஹி ஏவரூபம் வா ஏவரூபம் வா சீவரம் சேதாபேத்வா அச்சா²தே³த², உபோ⁴வ ஸந்தா ஏகேனா’தி, கல்யாணகம்யதம் உபாதா³ய, நிஸ்ஸக்³கி³யம் பாசித்திய’’ந்தி.

534. பி⁴க்கு²ம் பனேவ உத்³தி³ஸ்ஸாதி பி⁴க்கு²ஸ்ஸத்தா²ய, பி⁴க்கு²ம் ஆரம்மணம் கரித்வா, பி⁴க்கு²ம் அச்சா²தே³துகாமா.

உபி⁴ன்னந்தி த்³வின்னம்.

அஞ்ஞாதகா நாம மாதிதோ வா பிதிதோ வா யாவ ஸத்தமா பிதாமஹயுகா³ அஸம்ப³த்³தா⁴.

க³ஹபதீ நாம யே கேசி அகா³ர அஜ்ஜா²வஸந்தி.

க³ஹபதானியோ நாம யா காசி அகா³ரம் அஜ்ஜா²வஸந்தி.

சீவரசேதாபன்னானி நாம ஹிரஞ்ஞா வா ஸுவண்ணா வா முத்தா வா மணீ வா பவாளா வா ப²லிகா வா படகா வா ஸுத்தா வா கப்பாஸா வா.

இமேஹி பச்சேகசீவரசேதாபன்னேஹிதி பச்சுபட்டி²தேஹி.

சேதாபேத்வாதி பரிவத்தேத்வா.

அச்சா²தே³ஸ்ஸாமாதி த³ஸ்ஸாம.

தத்ர சே ஸோ பி⁴க்கூ²தி யம் பி⁴க்கு²ம் உத்³தி³ஸ்ஸ சீவரசேதாபன்னானி உபக்க²டானி ஹோந்தி ஸோ பி⁴க்கு².

புப்³பே³ அப்பவாரிதோதி புப்³பே³ அவுத்தோ ஹோதி – ‘‘கீதி³ஸேன தே, ப⁴ந்தே, சீவரேன அத்தோ², கீதி³ஸம் தே சீவரம் சேதாபேமா’’தி.

உபஸங்கமித்வாதி க⁴ரம் க³ந்த்வா யத்த² கத்த²சி உபஸங்கமித்வா.

சீவரே விகப்பம் ஆபஜ்ஜேய்யாதி ஆயதம் வா ஹோது வித்த²தம் வா அப்பிதம் வா ஸண்ஹம் வா.

இமேஹி பச்சேகசீவரசேதாபன்னேஹீதி பச்சுபட்டி²தேஹி.

ஏவரூபம் வா ஏவரூபம் வாதி ஆயதம் வா வித்த²தம் வா அப்பிதம் வா ஸண்ஹம் வா.

சேதாபேத்வாதி பரிவத்தேத்வா.

அச்சா²தே³தா²தி த³ஜ்ஜேத².

உபோ⁴வ ஸந்தா ஏகேனாதி த்³வேபி ஜனா ஏகேன.

கல்யாணகம்யதம் உபாதா³யாதி ஸாத⁴த்தி²கோ மஹக்³க⁴த்தி²கோ.

தஸ்ஸ வசனேன ஆயதம் வா வித்த²தம் வா அப்பிதம் வா ஸண்ஹம் வா சேதாபேந்தி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, ப⁴ந்தே, சீவரம் புப்³பே³ அப்பவாரிதோ அஞ்ஞாதகே க³ஹபதிகே உபஸங்கமித்வா சீவரே விகப்பம் ஆபன்னம் நிஸ்ஸக்³கி³யம். இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

535. அஞ்ஞாதகே அஞ்ஞாதகஸஞ்ஞீ புப்³பே³ அப்பவாரிதோ க³ஹபதிகே உபஸங்கமித்வா சீவரே விகப்பம் ஆபஜ்ஜதி, நிஸ்ஸக்³கி³யம் பாசித்தியம். அஞ்ஞாதகே வேமதிகோ புப்³பே³ அப்பவாரிதோ க³ஹபதிகே உபஸங்கமித்வா சீவரே விகப்பம் ஆபஜ்ஜதி, நிஸ்ஸக்³கி³யம் பாசித்தியம். அஞ்ஞாதகே ஞாதகஸஞ்ஞீ புப்³பே³ அப்பவாரிதோ க³ஹபதிகே உபஸங்கமித்வா சீவரே விகப்பம் ஆபஜ்ஜதி, நிஸ்ஸக்³கி³யம் பாசித்தியம்.

ஞாதகே அஞ்ஞாதகஸஞ்ஞீ, ஆபத்தி து³க்கடஸ்ஸ. ஞாதகே வேமதிகோ, ஆபத்தி து³க்கடஸ்ஸ. ஞாதகே ஞாதகஸஞ்ஞீ, அனாபத்தி.

536. அனாபத்தி – ஞாதகானம், பவாரிதானம், அஞ்ஞஸ்ஸத்தா²ய, அத்தனோ த⁴னேன, மஹக்³க⁴ம் சேதாபேதுகாமானம் அப்பக்³க⁴ம் சேதாபேதி, உம்மத்தகஸ்ஸ, ஆதி³கம்மிகஸ்ஸாதி.

து³தியஉபக்க²டஸிக்கா²பத³ம் நிட்டி²தம் நவமம்.