10. ராஜஸிக்கா²பத³ம்

537. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மதோ உபனந்த³ஸ்ஸ ஸக்யபுத்தஸ்ஸ உபட்டா²கோ மஹாமத்தோ ஆயஸ்மதோ உபனந்த³ஸ்ஸ ஸக்யபுத்தஸ்ஸ தூ³தேன சீவரசேதாபன்னம் பாஹேஸி – ‘‘இமினா சீவரசேதாபன்னேன சீவரம் சேதாபேத்வா அய்யம் உபனந்த³ம் சீவரேன அச்சா²தே³ஹீ’’தி. அத² கோ² ஸோ தூ³தோ யேனாயஸ்மா உபனந்தோ³ ஸக்யபுத்தோ தேனுபஸங்கமி; உபஸங்கமித்வா ஆயஸ்மந்தம் உபனந்த³ம் ஸக்யபுத்தம் ஏதத³வோச – ‘‘இத³ம் கோ², ப⁴ந்தே, ஆயஸ்மந்தம் உத்³தி³ஸ்ஸ சீவரசேதாபன்னம் ஆப⁴தம். படிக்³க³ண்ஹாது ஆயஸ்மா சீவரசேதாபன்ன’’ந்தி. ஏவம் வுத்தே ஆயஸ்மா உபனந்தோ³ ஸக்யபுத்தோ தம் தூ³தம் ஏதத³வோச – ‘‘ந கோ² மயம், ஆவுஸோ, சீவரசேதாபன்னம் படிக்³க³ண்ஹாம, சீவரஞ்ச கோ² மயம் படிக்³க³ண்ஹாம காலேன கப்பிய’’ந்தி. ஏவம் வுத்தே ஸோ தூ³தோ ஆயஸ்மந்தம் உபனந்த³ம் ஸக்யபுத்தம் ஏதத³வோச – ‘‘அத்தி² பனாயஸ்மதோ கோசி வேய்யாவச்சகரோ’’தி? தேன கோ² பன ஸமயேன அஞ்ஞதரோ உபாஸகோ ஆராமம் அக³மாஸி கேனசிதே³வ கரணீயேன. அத² கோ² ஆயஸ்மா உபனந்தோ³ ஸக்யபுத்தோ தம் தூ³தம் ஏதத³வோச – ‘‘ஏஸோ கோ², ஆவுஸோ, உபாஸகோ பி⁴க்கூ²னம் வேய்யாவச்சகரோ’’தி. அத² கோ² ஸோ தூ³தோ தம் உபாஸகம் ஸஞ்ஞாபேத்வா யேனாயஸ்மா உபனந்தோ³ ஸக்யபுத்தோ தேனுபஸங்கமி; உபஸங்கமித்வா ஆயஸ்மந்தம் உபனந்த³ம் ஸக்யபுத்தம் ஏதத³வோச – ‘‘யம் கோ², ப⁴ந்தே, ஆயஸ்மா வேய்யாவச்சகரம் நித்³தி³ஸி ஸஞ்ஞத்தோ ஸோ மயா. உபஸங்கமது ஆயஸ்மா காலேன, சீவரேன தம் அச்சா²தே³ஸ்ஸதீ’’தி.

தேன கோ² பன ஸமயேன ஸோ மஹாமத்தோ ஆயஸ்மதோ உபனந்த³ஸ்ஸ ஸக்யபுத்தஸ்ஸ ஸந்திகே தூ³தம் பாஹேஸி – ‘‘பரிபு⁴ஞ்ஜது அய்யோ தம் சீவரம், இச்சா²ம மயம் அய்யேன தம் சீவரம் பரிபு⁴த்த’’ந்தி. அத² கோ² ஆயஸ்மா உபனந்தோ³ ஸக்யபுத்தோ தம் உபாஸகம் ந கிஞ்சி அவசாஸி. து³தியம்பி கோ² ஸோ மஹாமத்தோ ஆயஸ்மதோ உபனந்த³ஸ்ஸ ஸக்யபுத்தஸ்ஸ ஸந்திகே தூ³தம் பாஹேஸி – ‘‘பரிபு⁴ஞ்ஜது அய்யோ தம் சீவரம், இச்சா²ம மயம் அய்யேன தம் சீவரம் பரிபு⁴த்த’’ந்தி. து³தியம்பி கோ² ஆயஸ்மா உபனந்தோ³ ஸக்யபுத்தோ தம் உபாஸகம் ந கிஞ்சி அவசாஸி. ததியம்பி கோ² ஸோ மஹாமத்தோ ஆயஸ்மதோ உபனந்த³ஸ்ஸ ஸக்யபுத்தஸ்ஸ ஸந்திகே தூ³தம் பாஹேஸி – ‘‘பரிபு⁴ஞ்ஜது அய்யோ தம் சீவரம், இச்சா²ம மயம் அய்யேன தம் சீவரம் பரிபு⁴த்த’’ந்தி.

தேன கோ² பன ஸமயேன நேக³மஸ்ஸ ஸமயோ ஹோதி. நேக³மேன ச கதிகா கதா ஹோதி – ‘‘யோ பச்சா² ஆக³ச்ச²தி பஞ்ஞாஸம் ப³த்³தோ⁴’’தி. அத² கோ² ஆயஸ்மா உபனந்தோ³ ஸக்யபுத்தோ யேன ஸோ உபாஸகோ தேனுபஸங்கமி; உபஸங்கமித்வா தம் உபாஸகம் ஏதத³வோச – ‘‘அத்தோ² மே, ஆவுஸோ, சீவரேனா’’தி. ‘‘அஜ்ஜண்ஹோ, ப⁴ந்தே, ஆக³மேஹி, அஜ்ஜ நேக³மஸ்ஸ ஸமயோ. நேக³மேன ச கதிகா கதா ஹோதி – ‘யோ பச்சா² ஆக³ச்ச²தி பஞ்ஞாஸம் ப³த்³தோ⁴’’’தி. ‘‘அஜ்ஜேவ மே, ஆவுஸோ, சீவரம் தே³ஹீ’’தி ஓவட்டிகாய பராமஸி. அத² கோ² ஸோ உபாஸகோ ஆயஸ்மதா உபனந்தே³ன ஸக்யபுத்தேன நிப்பீளியமானோ ஆயஸ்மதோ உபனந்த³ஸ்ஸ ஸக்யபுத்தஸ்ஸ சீவரம் சேதாபேத்வா பச்சா² அக³மாஸி. மனுஸ்ஸா தம் உபாஸகம் ஏதத³வோசும் – ‘‘கிஸ்ஸ த்வம், அய்யோ, பச்சா² ஆக³தோ, பஞ்ஞாஸம் ஜீனோஸீ’’தி.

அத² கோ² ஸோ உபாஸகோ தேஸம் மனுஸ்ஸானம் ஏதமத்த²ம் ஆரோசேஸி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘மஹிச்சா² இமே ஸமணா ஸக்யபுத்தியா அஸந்துட்டா². நயிமேஸம் ஸுகரம் வேய்யாவச்சம்பி காதும். கத²ஞ்ஹி நாம ஆயஸ்மா உபனந்தோ³ உபாஸகேன – ‘அஜ்ஜண்ஹோ, ப⁴ந்தே, ஆக³மேஹீ’தி வுச்சமானோ நாக³மேஸ்ஸதீ’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஆயஸ்மா உபனந்தோ³ ஸக்யபுத்தோ உபாஸகேன – ‘அஜ்ஜண்ஹோ, ப⁴ந்தே, ஆக³மேஹீ’தி வுச்சமானோ நாக³மேஸ்ஸதீ’’தி! அத² கோ² தே பி⁴க்கூ² ஆயஸ்மந்தம் உபனந்த³ம் ஸக்யபுத்தம் அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர த்வம், உபனந்த³, உபாஸகேன – ‘அஜ்ஜண்ஹோ, ப⁴ந்தே, ஆக³மேஹீ’தி வுச்சமானோ நாக³மேஸீ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம த்வம், மோக⁴புரிஸ, உபாஸகேன – ‘அஜ்ஜண்ஹோ, ப⁴ந்தே, ஆக³மேஹீ’தி வுச்சமானோ நாக³மேஸ்ஸஸி! நேதம், மோக⁴புரிஸ, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

538. ‘‘பி⁴க்கு²ம் பனேவ உத்³தி³ஸ்ஸ ராஜா வா ராஜபோ⁴க்³கோ³ வா ப்³ராஹ்மணோ வா க³ஹபதிகோ வா தூ³தேன சீவரசேதாபன்னம் பஹிணேய்ய – ‘இமினா சீவரசேதாபன்னேன சீவரம் சேதாபேத்வா இத்த²ன்னாமம் பி⁴க்கு²ம் சீவரேன அச்சா²தே³ஹீ’தி. ஸோ சே தூ³தோ தம் பி⁴க்கு²ம் உபஸங்கமித்வா ஏவம் வதே³ய்ய – ‘இத³ம் கோ², ப⁴ந்தே, ஆயஸ்மந்தம் உத்³தி³ஸ்ஸ சீவரசேதாபன்னம் ஆப⁴தம், படிக்³க³ண்ஹாது ஆயஸ்மா சீவரசேதாபன்ன’ந்தி, தேன பி⁴க்கு²னா ஸோ தூ³தோ ஏவமஸ்ஸ வசனீயோ – ‘ந கோ² மயம், ஆவுஸோ, சீவரசேதாபன்னம் படிக்³க³ண்ஹாம. சீவரஞ்ச கோ² மயம் படிக்³க³ண்ஹாம, காலேன கப்பிய’ந்தி. ஸோ சே தூ³தோ தம் பி⁴க்கு²ம் ஏவம் வதே³ய்ய – ‘அத்தி² பனாயஸ்மதோ கோசி வேய்யாவச்சகரோ’தி, சீவரத்தி²கேன, பி⁴க்க²வே, பி⁴க்கு²னா வேய்யாவச்சகரோ நித்³தி³ஸிதப்³போ³ ஆராமிகோ வா உபாஸகோ வா – ‘ஏஸோ கோ², ஆவுஸோ, பி⁴க்கூ²னம் வேய்யாவச்சகரோ’தி. ஸோ சே தூ³தோ தம் வேய்யாவச்சகரம் ஸஞ்ஞாபேத்வா தம் பி⁴க்கு²ம் உபஸங்கமித்வா ஏவம் வதே³ய்ய – ‘யம் கோ², ப⁴ந்தே, ஆயஸ்மா வேய்யாவச்சகரம் நித்³தி³ஸி ஸஞ்ஞத்தோ ஸோ மயா, உபஸங்கமது ஆயஸ்மா காலேன, சீவரேன தம் அச்சா²தே³ஸ்ஸதீ’தி, சீவரத்தி²கேன, பி⁴க்க²வே, பி⁴க்கு²னா வேய்யாவச்சகரோ உபஸங்கமித்வா த்³வத்திக்க²த்தும் சோதே³தப்³போ³ ஸாரேதப்³போ³ – ‘அத்தோ² மே, ஆவுஸோ, சீவரேனா’தி. த்³வத்திக்க²த்தும் சோத³யமானோ ஸாரயமானோ தம் சீவரம் அபி⁴னிப்பா²தே³ய்ய, இச்சேதம் குஸலம்; நோ சே அபி⁴னிப்பா²தே³ய்ய, சதுக்க²த்தும் பஞ்சக்க²த்தும் ச²க்க²த்துபரமம் துண்ஹீபூ⁴தேன உத்³தி³ஸ்ஸ டா²தப்³ப³ம். சதுக்க²த்தும் பஞ்சக்க²த்தும் ச²க்க²த்துபரமம் துண்ஹீபூ⁴தோ உத்³தி³ஸ்ஸ திட்ட²மானோ தம் சீவரம் அபி⁴னிப்பா²தே³ய்ய, இச்சேதம் குஸலம்; ததோ சே உத்தரிவாயமமானோ தம் சீவர அபி⁴னிப்பா²தே³ய்ய, நிஸ்ஸக்³கி³யம் பாசித்தியம். நோ சே அபி⁴னிப்பா²தே³ய்ய, யதஸ்ஸ சீவரசேதாபன்னம் ஆப⁴தம், தத்த² ஸாமம் வா க³ந்தப்³ப³ம் தூ³தோ வா பாஹேதப்³போ³ – ‘யம் கோ² தும்ஹே ஆயஸ்மந்தோ பி⁴க்கு²ம் உத்³தி³ஸ்ஸ சீவரசேதாபன்னம் பஹிணித்த², ந தம் தஸ்ஸ பி⁴க்கு²னோ கிஞ்சி அத்த²ம் அனுபோ⁴தி, யுஞ்ஜந்தாயஸ்மந்தோ ஸகம், மா வோ ஸகம் வினஸ்ஸா’தி, அயம் தத்த² ஸாமீசீ’’தி.

539. பி⁴க்கு²ம் பனேவ உத்³தி³ஸ்ஸாதி பி⁴க்கு²ஸ்ஸத்தா²ய, பி⁴க்கு²ம் ஆரம்மணம் கரித்வா, பி⁴க்கு²ம் அச்சா²தே³துகாமோ.

ராஜா நாம யோ கோசி ரஜ்ஜம் காரேதி.

ராஜபோ⁴க்³கோ³ நாம யோ கோசி ரஞ்ஞோ ப⁴த்தவேதனாஹாரோ.

ப்³ராஹ்மணோ நாம ஜாதியா ப்³ராஹ்மணோ.

க³ஹபதிகோ நாம ட²பேத்வா ராஜம் ராஜபோ⁴க்³க³ம் ப்³ராஹ்மணம் அவஸேஸோ க³ஹபதிகோ நாம.

சீவரசேதாபன்னம் நாம ஹிரஞ்ஞம் வா ஸுவண்ணம் வா முத்தா வா மணி வா.

இமினா சீவரசேதாபன்னேனாதி பச்சுபட்டி²தேன.

சேதாபேத்வாதி பரிவத்தேத்வா.

அச்சா²தே³ஹீதி த³ஜ்ஜேஹி.

ஸோ சே தூ³தோ தம் பி⁴க்கு²ம் உபஸங்கமித்வா ஏவம் வதே³ய்ய – ‘‘இத³ம் கோ², ப⁴ந்தே, ஆயஸ்மந்தம் உத்³தி³ஸ்ஸ சீவரசேதாபன்னம் ஆப⁴தம். படிக்³க³ண்ஹாது ஆயஸ்மா சீவரசேதாபன்ன’’ந்தி, தேன பி⁴க்கு²னா ஸோ தூ³தோ ஏவமஸ்ஸ வசனீயோ – ‘‘ந கோ² மயம், ஆவுஸோ, சீவரசேதாபன்னம் படிக்³க³ண்ஹாம. சீவரஞ்ச கோ² மயம் படிக்³க³ண்ஹாம, காலேன கப்பிய’’ந்தி. ஸோ சே தூ³தோ தம் பி⁴க்கு²ம் ஏவம் வதே³ய்ய – ‘‘அத்தி² பனாயஸ்மதோ கோசி வேய்யாவச்சகரோ’’தி? சீவரத்தி²கேன, பி⁴க்க²வே, பி⁴க்கு²னா வேய்யாவச்சகரோ நித்³தி³ஸிதப்³போ³ ஆராமிகோ வா உபாஸகோ வா – ‘‘ஏஸோ கோ², ஆவுஸோ, பி⁴க்கூ²னம் வேய்யாவச்சகரோ’’தி. ந வத்தப்³போ³ – ‘‘தஸ்ஸ தே³ஹீதி வா, ஸோ வா நிக்கி²பிஸ்ஸதி, ஸோ வா பரிவத்தேஸ்ஸதி, ஸோ வா சேதாபேஸ்ஸதீ’’தி.

ஸோ சே தூ³தோ தம் வேய்யாவச்சகரம் ஸஞ்ஞாபேத்வா தம் பி⁴க்கு²ம் உபஸங்கமித்வா ஏவம் வதே³ய்ய – ‘‘யம் கோ², ப⁴ந்தே, ஆயஸ்மா வேய்யாவச்சகரம் நித்³தி³ஸி ஸஞ்ஞத்தோ ஸோ மயா. உபஸங்கமது ஆயஸ்மா காலேன, சீவரேன தம் அச்சா²தே³ஸ்ஸதீ’’தி, சீவரத்தி²கேன, பி⁴க்க²வே, பி⁴க்கு²னா வேய்யாவச்சகரோ உபஸங்கமித்வா த்³வத்திக்க²த்தும் சோதே³தப்³போ³ ஸாரேதப்³போ³ – ‘‘அத்தோ² மே, ஆவுஸோ, சீவரேனா’’தி. ந வத்தப்³போ³ – ‘‘தே³ஹி மே சீவரம், ஆஹர மே சீவரம், பரிவத்தேஹி மே சீவரம், சேதாபேஹி மே சீவர’’ந்தி. து³தியம்பி வத்தப்³போ³. ததியம்பி வத்தப்³போ³. ஸசே அபி⁴னிப்பா²தே³தி, இச்சேதம் குஸலம்; நோ சே அபி⁴னிப்பா²தே³தி, தத்த² க³ந்த்வா துண்ஹீபூ⁴தேன உத்³தி³ஸ்ஸ டா²தப்³ப³ம். ந ஆஸனே நிஸீதி³தப்³ப³ம். ந ஆமிஸம் படிக்³க³ஹேதப்³ப³ம். ந த⁴ம்மோ பா⁴ஸிதப்³போ³. ‘‘கிம் காரணா ஆக³தோஸீ’’தி புச்சி²யமானோ ‘‘ஜானாஹி, ஆவுஸோ’’தி வத்தப்³போ³. ஸசே ஆஸனே வா நிஸீத³தி, ஆமிஸம் வா படிக்³க³ண்ஹாதி, த⁴ம்மம் வா பா⁴ஸதி, டா²னம் ப⁴ஞ்ஜதி. து³தியம்பி டா²தப்³ப³ம். ததியம்பி டா²தப்³ப³ம். சதுக்க²த்தும் சோதே³த்வா சதுக்க²த்தும் டா²தப்³ப³ம். பஞ்சக்க²தும் சோதே³த்வா த்³விக்க²த்தும் டா²தப்³ப³ம். ச²க்க²த்தும் சோதே³த்வா ந டா²தப்³ப³ம். ததோ சே உத்தரி வாயமமானோ தம் சீவரம் அபி⁴னிப்பா²தே³தி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, ப⁴ந்தே, சீவரம் அதிரேகதிக்க²த்தும் சோத³னாய அதிரேகச²க்க²த்தும் டா²னேன அபி⁴னிப்பா²தி³தம் நிஸ்ஸக்³கி³யம். இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

நோ சே அபி⁴னிப்பா²தே³ய்ய, யதஸ்ஸ சீவரசேதாபன்னம் ஆப⁴தம் தத்த² ஸாமம் வா க³ந்தப்³ப³ம் தூ³தோ வா பாஹேதப்³போ³ – ‘‘யம் கோ² தும்ஹே ஆயஸ்மந்தோ பி⁴க்கு²ம் உத்³தி³ஸ்ஸ சீவரசேதாபன்னம் பஹிணித்த² ந தம் தஸ்ஸ பி⁴க்கு²னோ கிஞ்சி அத்த²ம் அனுபோ⁴தி. யுஞ்ஜந்தாயஸ்மந்தோ ஸகம், மா வோ ஸகம் வினஸ்ஸா’’தி.

அயம் தத்த² ஸாமீசீதி அயம் தத்த² அனுத⁴ம்மதா.

540. அதிரேகதிக்க²த்தும் சோத³னாய அதிரேகச²க்க²த்தும் டா²னேன அதிரேகஸஞ்ஞீ அபி⁴னிப்பா²தே³தி, நிஸ்ஸக்³கி³யம் பாசித்தியம். அதிரேகதிக்க²த்தும் சோத³னாய அதிரேகச²க்க²த்தும் டா²னேன வேமதிகோ அபி⁴னிப்பா²தே³தி, நிஸ்ஸக்³கி³யம் பாசித்தியம். அதிரேகதிக்க²த்தும் சோத³னாய அதிரேகச²க்க²த்தும் டா²னேன ஊனகஸஞ்ஞீ அபி⁴னிப்பா²தே³தி, நிஸ்ஸக்³கி³யம் பாசித்தியம்.

ஊனகதிக்க²த்தும் சோத³னாய ஊனகச²க்க²த்தும் டா²னேன அதிரேகஸஞ்ஞீ, ஆபத்தி து³க்கடஸ்ஸ. ஊனகதிக்க²த்தும் சோத³னாய ஊனகச²க்க²த்தும் டா²னேன வேமதிகோ, ஆபத்தி து³க்கடஸ்ஸ. ஊனகதிக்க²த்தும் சோத³னாய ஊனகச²க்க²த்தும் டா²னேன ஊனகஸஞ்ஞீ அனாபத்தி.

541. அனாபத்தி – திக்க²த்தும் சோத³னாய, ச²க்க²த்தும் டா²னேன, ஊனகதிக்க²த்தும் சோத³னாய, ஊனகச²க்க²த்தும் டா²னேன, அசோதி³யமானோ தே³தி, ஸாமிகா சோதே³த்வா தே³ந்தி, உம்மத்தகஸ்ஸ, ஆதி³கம்மிகஸ்ஸாதி.

ராஜஸிக்கா²பத³ம் நிட்டி²தம் த³ஸமம்.

கதி²னவக்³கோ³ பட²மோ.

தஸ்ஸுத்³தா³னம் –

உப்³ப⁴தம் கதி²னம் தீணி, தோ⁴வனஞ்ச படிக்³க³ஹோ;

அஞ்ஞாதகானி தீணேவ, உபி⁴ன்னம் தூ³தகேன சாதி.