7. ததுத்தரிஸிக்கா²பத³ம்

522. தேன ஸமயேன பு³த்³தோ⁴ ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கூ² அச்சி²ன்னசீவரகே பி⁴க்கூ² உபஸங்கமித்வா ஏவம் வத³ந்தி – ‘‘ப⁴க³வதா, ஆவுஸோ, அனுஞ்ஞாதம் – ‘அச்சி²ன்னசீவரஸ்ஸ வா நட்ட²சீவரஸ்ஸ வா அஞ்ஞாதகம் க³ஹபதிம் வா க³ஹபதானிம் வா சீவரம் விஞ்ஞாபேதும்’; விஞ்ஞாபேத², ஆவுஸோ, சீவர’’ந்தி. ‘‘அலம், ஆவுஸோ, லத்³த⁴ம் அம்ஹேஹி சீவர’’ந்தி. ‘‘மயம் ஆயஸ்மந்தானம் விஞ்ஞாபேமா’’தி. ‘‘விஞ்ஞாபேத², ஆவுஸோ’’தி. அத² கோ² ச²ப்³ப³க்³கி³யா பி⁴க்கூ² க³ஹபதிகே உபஸங்கமித்வா ஏதத³வோசும் – ‘‘அச்சி²ன்னசீவரகா, ஆவுஸோ, பி⁴க்கூ² ஆக³தா. தே³த² நேஸம் சீவரானீ’’தி, ப³ஹும் சீவரம் விஞ்ஞாபேஸும்.

தேன கோ² பன ஸமயேன அஞ்ஞதரோ புரிஸோ ஸபா⁴யம் நிஸின்னோ அஞ்ஞதரம் புரிஸம் ஏதத³வோச – ‘‘அச்சி²ன்னசீவரகா அய்யோ பி⁴க்கூ² ஆக³தா. தேஸம் மயா சீவரம் தி³ன்ன’’ந்தி. ஸோபி ஏவமாஹ – ‘‘மயாபி தி³ன்ன’’ந்தி. அபரோபி ஏவமாஹ – ‘‘மயாபி தி³ன்ன’’ந்தி. தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா ந மத்தம் ஜானித்வா ப³ஹும் சீவரம் விஞ்ஞாபேஸ்ஸந்தி, து³ஸ்ஸவாணிஜ்ஜம் வா ஸமணா ஸக்யபுத்தியா கரிஸ்ஸந்தி, பக்³கா³ஹிகஸாலம் [படக்³கா³ஹிகஸாலம் (?)] வா பஸாரேஸ்ஸந்தீ’’தி! அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² ந மத்தம் ஜானித்வா ப³ஹும் சீவரம் விஞ்ஞாபேஸ்ஸந்தீ’’தி! அத² கோ² தே பி⁴க்கூ² ச²ப்³ப³க்³கி³யே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர தும்ஹே, பி⁴க்க²வே, ந மத்தம் ஜானித்வா ப³ஹும் சீவரம் விஞ்ஞாபேதா²’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தும்ஹே, மோக⁴புரிஸா, ந மத்தம் ஜானித்வா ப³ஹும் சீவரம் விஞ்ஞாபேஸ்ஸத²! நேதம், மோக⁴புரிஸா, அப்பஸன்னானம் வா பஸாதா³ய…பே… ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாத² –

523. ‘‘தஞ்சே அஞ்ஞாதகோ க³ஹபதி வா க³ஹபதானீ வா ப³ஹூஹி சீவரேஹி அபி⁴ஹட்டு²ம் பவாரேய்ய ஸந்தருத்தரபரமம் தேன பி⁴க்கு²னா ததோ சீவரம் ஸாதி³தப்³ப³ம். ததோ சே உத்தரி ஸாதி³யேய்ய, நிஸ்ஸக்³கி³யம் பாசித்திய’’ந்தி.

524. தஞ்சேதி அச்சி²ன்னசீவரகம் பி⁴க்கு²ம்.

அஞ்ஞாதகோ நாம மாதிதோ வா பிதிதோ வா யாவ ஸத்தமா பிதாமஹயுகா³ அஸம்ப³த்³தோ⁴.

க³ஹபதி நாம யோ கோசி அகா³ரம் அஜ்ஜா²வஸதி.

க³ஹபதானீ நாம யா காசி அகா³ரம் அஜ்ஜா²வஸதி.

ப³ஹூஹி சீவரேஹீதி ப³ஹுகேஹி சீவரேஹி.

அபி⁴ஹட்டு²ம் பவாரேய்யாதி யாவதகம் இச்ச²ஸி தாவதகம் க³ண்ஹாஹீதி.

ஸந்தருத்தரபரமம் தேன பி⁴க்கு²னா ததோ சீவரம் ஸாதி³தப்³ப³ந்தி ஸசே தீணி நட்டா²னி ஹோந்தி த்³வே ஸாதி³தப்³பா³னி, த்³வே நட்டா²னி ஏகம் ஸாதி³தப்³ப³ம், ஏகம் நட்ட²ம் ந கிஞ்சி ஸாதி³தப்³ப³ம்.

ததோ சே உத்தரி ஸாதி³யேய்யாதி ததுத்தரி விஞ்ஞாபேதி, பயோகே³ து³க்கடம். படிலாபே⁴ன நிஸ்ஸக்³கி³யம் ஹோதி. நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ம்…பே… இத³ம் மே, ப⁴ந்தே, சீவரம் அஞ்ஞாதகம் க³ஹபதிகம் உபஸங்கமித்வா ததுத்தரி விஞ்ஞாபிதம் நிஸ்ஸக்³கி³யம். இமாஹம் ஸங்க⁴ஸ்ஸ நிஸ்ஸஜ்ஜாமீதி…பே… த³தே³ய்யாதி…பே… த³தே³ய்யுந்தி…பே… ஆயஸ்மதோ த³ம்மீதி.

525. அஞ்ஞாதகே அஞ்ஞாதகஸஞ்ஞீ ததுத்தரி சீவரம் விஞ்ஞாபேதி, நிஸ்ஸக்³கி³யம் பாசித்தியம். அஞ்ஞாதகே வேமதிகோ ததுத்தரி சீவரம் விஞ்ஞாபேதி, நிஸ்ஸக்³கி³யம் பாசித்தியம். அஞ்ஞாதகே ஞாதகஸஞ்ஞீ ததுத்தரி சீவரம் விஞ்ஞாபேதி, நிஸ்ஸக்³கி³யம் பாசித்தியம்.

ஞாதகே அஞ்ஞாதகஸஞ்ஞீ, ஆபத்தி து³க்கடஸ்ஸ. ஞாதகே வேமதிகோ, ஆபத்தி து³க்கடஸ்ஸ. ஞாதகே ஞாதகஸஞ்ஞீ, அனாபத்தி.

526. அனாபத்தி – ‘‘ஸேஸகம் ஆஹரிஸ்ஸாமீ’’தி ஹரந்தோ க³ச்ச²தி, ‘‘ஸேஸகம் துய்ஹேவ ஹோதூ’’தி தே³ந்தி, ந அச்சி²ன்னகாரணா தே³ந்தி, ந நட்ட²காரணா தே³ந்தி, ஞாதகானம், பவாரிதானம், அத்தனோ த⁴னேன, உம்மத்தகஸ்ஸ, ஆதி³கம்மிகஸ்ஸாதி.

ததுத்தரிஸிக்கா²பத³ம் நிட்டி²தம் ஸத்தமம்.